Kev Ua Yog Toog Pom txoj Kev Txhiv cov Neeg Tuag Kom Dim
Kuv hais lus tim khawv tias Thawj Tswj Hwm Joseph F. Smith txoj kev ua yog toog pom no yeej muaj tseeb. Kuv hais lus tim khawv tias txhua tus neeg muaj cuab kav kawm paub tias qhov no muaj tseeb.
Kuv cov kwv tij thiab cov muam, kuv twb npaj kuv zaj lus hais no ua ntej kuv tus me poj niam Barbara tso lub neej no tseg. Kuv thiab kuv tsev neeg ua nej tsaug rau nej txoj kev hlub thiab nej txoj kev ua siab ncaj rau peb. Kuv thov Vajtswv kom nws yuav pab kuv hais lus rau nej tag kis no.
Thaum lub Kaum Hli Ntuj xyoo 1918, 100 xyoo tas los lawm, Thawj Tswj Hwm Joseph F. Smith tau ua yog toog pom. Tom qab twb ua hauj lwm pab tus Tswv tau 65 xyoos hauv Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg, thiab ob peb lim piam ua ntej nws tuag thaum lub Kaum Ib Hlis Ntuj hnub tim 19, 1918, nws zaum hauv nws chav tsev ntsuam xav txog Khetos txoj kev theej txhoj thiab tau nyeem tus Thwj Tim Petus cov lus piav txog tus Cawm Seej txoj kev ua hauj lwm qhuab qhia neeg hauv lub ntuj ntsuj plig tom qab Nws tuag thaum Raug Ntsia Saum Ntoo Khaub Lig.
Nws sau tias: “Thaum kuv nyeem kuv los xav tsis thoob. … … Thaum kuv xav txog tej yam … no, ua rau lub qhov muag ntawm kuv txoj kev to taub qhib, thiab tus Tswv tus Ntsuj Plig los rau kuv, thiab kuv pom ib tsoom neeg ntawm cov tuag, tag nrho cov yau thiab cov hlob.”1 Tag nrho nws tej lus muab sau tseg hauv phau Lus Qhuab Qhia thiab Kev Khi Lus tshooj 138.
Cia kuv qhia nej me ntsis ntxiv txog nws zaj keeb kwm kom peb thiaj to taub seb Joseph F. tau npaj li cas hauv nws lub neej kom thiaj txais tau kev tshwm sim zoo kawg nkaus no.
Thaum nws ua tus Thawj Tswj Hwm rau lub Koom Txoos, nws tau mus xyuas lub nroog Nauvoo thaum xyoo 1906 thiab nco txog ib yam dab tsi uas kawj rau nws thaum nws tsuas muaj tsib xyoos. Nws hais tias, “Kuv tau sawv kiag hauv qhov chaw no thaum [Yauxej, uas yog kuv txiv ntxawm, thiab kuv txiv, Hyrum] caij nees tab tom yuav mus nram lub zos Carthage. Nws tsis nqi ntawm tus nees los es txiv khoov los ntawm lub eeb nees thiab rub kuv los. Nws nwj kuv hais sib ntsib dua es txawm tso kuv rau hauv av thiab kuv pom nws caij tus nees mus.”2
Lwm zaus uas Joseph F. pom nkawd ces, nws niam, Mary Fielding Smith, nqa nws hlo kom nws thiaj pom tau nkawd ob lub cev nyob hauv lub hleb vim tib neeg phem muab nkawd tua hauv lub Qhov Taub hauv Carthage thaum lub Rau Hli Ntuj hnub tim 27, 1844.
Ob xyoos tom qab ntawd, Joseph F., nrog nws tsev neeg thiab nws niam, Mary Fielding Smith, uas rau siab ntseeg sawv kev ntawm lawv lub tsev hauv lub nroog Nauvoo yuav mus rau lub zos Winter Quarters. Txawm tias nws tsis tau nto txog yim xyoo, Joseph F. tau cob ob tug twm uas cab lub laub mus rau lub zos Montrose, Iowa, mus rau tim lub zos Winter Quarters ces tom qab ntawd mus rau lub Hav Salt Lake, thaum tuaj txog nws twb yuav muaj 10 xyoo. Kuv cia siab hais tias nej cov me nyuam tub thiab cov tub hluas yuav mloog zoo zoo thiab yuav pom hais tias nws muaj hauj lwm thiab kev lav ris loj npaum li cas thaum Joseph F tseem yog ib tug me nyuam tub xwb.
Plaub nyuag xyoo tom qab ntawd, hauv xyoo 1852, thaum nws muaj 13 xyoos, nws niam uas nws hlub txawm tuag—tseg Joseph thiab nws cov kwv tij thiab muam ua ntsuag nos.3
Joseph F. raug hu mus ua tub txib tim cov koog pov txwv Hawaii thaum xyoo 1854 thaum nws muaj 15 xyoos. Txoj kev ua tub txib no, kav ntev tshaj 3 xyoos, yog qhov pib rau nws lub neej uas ua hauj lwm hauv lub Koom Txoos.
Thaum nws rov qab los rau Utah, Joseph F. yuav poj niam thaum xyoos 1859.4 Rau ob peb xyoos tom qab ntawd, nws ua hauj lwm, saib xyuas nws tsev neeg, thiab txawm mus ua tub txib ob zaug ntxiv. Thaum lub Xya Hli Ntuj hnub tim 1, 1866, thaum nws muaj hnub nyoog 27 xyoos, Joseph F. lub neej tau hloov hlo thaum Brigham Young tsa nws los ua ib tug Thwj Tim. Hauv lub Kaum Ob Hlis Ntuj xyoo tom qab ntawd, nws los ua ib tug hauv Pawg Kaum Ob tug Thwj Tim.5 Nws tau ua ib tug pab cuam rau Brigham Young, John Taylor, Wilford Woodruff, thiab Lorenzo Snow ua ntej nws tau los ua tus Thawj Tswj Hwm kiag thaum xyoo 1901.6
Joseph F. thiab nws tus poj niam Julina yug nkawd thawj tus me nyuam, Mercy Josephine, los rau nkawd tsev neeg.7 Nws tsuas muaj ob xyoos tawm thaum nws txawm tso lub neej no tseg. Tsis ntev tom qab ntawd, Joseph F. sau hais tias, “Ib hlis twb dhau los mus txij li kuv tus me … ntxhais Josephine tuag. Au! kheev lam kuv tau cawm nws txoj sia kom nws tau loj hlob tiav nkauj. Kuv nco nws txhua hnub thiab kuv kho siab kawg. … Thov Vajtswv zam txim rau kuv yog tias kev nco kuv tus me nyuam yog kev txhaum nws txoj kev cai vim kuv hlub nws kawg.”8
Hauv tag nrho nws lub neej, Thawj Tswj Hwm Smith xiam nws txiv, nws niam, nws ib tug kwv thiab ob tug muam, thiab kaum peb tug me nyuam. Nws los paub ntau txog kev tu siab thiab kev xiam cov uas yus hlub.
Thaum nws tus tub Albert Jesse tuag, Joseph F. sau ntawv mus rau nws tus muam Martha Ann hais tias nws tau taij thov kom tus Tswv yuav cawm nws thiab tau nug hais tias, “Vim li cas muaj li no? Au, Vajtswv vim li cas thiaj muaj li no?”9
Txawm nws thov Vatjswv li cas los, Joseph F. tsis tau lus teb hais txog qhov no.10 Nws qhia Martha Ann tias “zoo nkaus li ntuj ceeb tsheej yog ib yam dab tsi hnyav” hais los txog kev tuag thiab lub ntuj ntsuj plig. Txawm li ntawd los, nws txoj kev ntseeg tus Tswv tej kev cog lus uas kav mus ib txhis tseem ruaj thiab khov.
Nyob hauv tus Tswv lub sij hawm, cov lus teb, kev nplij siab, thiab kev to taub txog lub ntuj ntsuj plig tau los rau Thawj Tswj Hwm Smith thaum nws ua yog toog pom hauv lub Kaum Hli Ntuj xyoo 1918.
Xyoo ntawd yeej ua rau nws nyuaj siab kawg nkaus. Nws tu siab vim neeg coob kawg tuag hauv Kev Tsov Rog Thoob Ntiaj teb vim muaj coob tshaj 20 plhom leej neeg uas tuag. Tsis tas li ntawd xwb, txawm muaj ib phaum mob uas tib neeg ua npaws thoob ntiaj teb no es muaj coob npaum li 100 plhom leej neeg tuag thiab.
Hauv xyoo ntawd, Thawj Tswj Hwm Smith xiam peb tug neeg ntxiv hauv nws tsev neeg. Txwj Laug Hyrum Mack Smith ntawm Pawg Kaum Ob tug Thwj Tim, nws thawj tus me nyuam tub uas yog kuv yawg, txawm tuag vim nws txoj hnyuv tw tawg lawm.
Thawj Tswj Hwm Smith sau hais tias: “Kuv tsis pom qab hais—[ib ce loog tas] vim muaj kev nyuaj siab kawg! … Kuv lub plawv twb tawg nrho; thiab dhia tsis thwj rau txoj sia no! … Au! Kuv hlub nws kawg! … Kuv yuav hlub nws tas mus ib txhis li. Thiab muaj li no thiab yuav muaj li no tas mus ib txhis li rau kuv txhua tus tub thiab ntxhais, tiam sis nws yog kuv thawj leej tub, thawj tug uas coj kev zoo siab thiab kev cia siab kom kuv yuav muaj suab muaj npe rau tib neeg sawv daws. … Kuv tau ua Vajtswv tsaug vim kuv tau kuv tus tub no! Tiam sis … au! Kuv xav tau nws heev kawg! Peb sawv daws xav tau nws heev kawg! Nws yog ib qho cuab yeej zoo rau lub Koom Txoos. … Thiab nim no … au! kuv yuav ua li cas! … Au! Vajtswv thov koj pab kuv lauj!”11
Lub hlis tom qab ntawd, Thawj Tswj Hwm Smith tus vauv, Alonzo Kesler, raug xwm txheej nws thiaj tuag thiab.12 Thawj Tswj Hwm Smith sau hauv nws phau ceev xwm txheej hais tias, “Nov yog ib qho xwm txheej loj heev uas ua rau peb nyuaj siab kawg, rov qab ua rau tag nrho kuv tsev neeg muaj kev nyuaj siab kawg nkaus.”13
Xya hli tom qab ntawd, thaum lub Cuaj Hli Ntuj xyoo 1918, Thawj Tswj Hwm Smith tus nyab uas yog kuv pog, Ida Bowman Smith, tuag tom qab nws yug tau nws tus me nyuam thib tsib, uas yog kuv txiv hlob Hyrum.14
Yog li ntawd, thaum lub Kaum Hli Ntuj hnub tim 3, 1918, raug kev nyuaj siab heev vim ntau plhom leej neeg tuag vim muaj tsov rog thiab kab mob thoob ntiaj teb thiab muaj coob leej hauv nws tsev neeg uas tau tuag, Thawj Tswj Hwm Smith thiaj tau txais kev tshwm sim los saum ntuj ceeb tsheej uas peb hu ua “kev ua yog toog pom txog kev txhiv dim rau cov neeg tuag.”
Nws qhia me ntsis txog kev tshwm sim ntawd hauv lub Kaum Hli Ntuj thawj tuas rau lub tuam rooj sab laj. Thawj Tswj Hwm Smith twb muaj mob muaj nkees, tiam sis nws tau hais lus hais tias: “Kuv yuav tsis qhia, kuv tsis kam, sim hais txhua yam uas nyob hauv kuv lub siab tag kis no, ces kuv mam li tos txog lwm lub sij hawm yav tom ntej, yog tias tus Tswv pub kuv hais, kuv yuav sim qhia nej ob peb yam uas nyob hauv kuv lub paj hlwb, thiab nyob puag hauv kuv nruab siab. Kuv kuj tsis nyob kuv ib leeg xwb tau tsib hlis tas los no. Kuv pheej muaj lub siab thov Vatjswv tsis tu tsis tseg, tau taij thov, muaj kev ntseeg thiab rau siab ntseeg; thiab kuv tau nrog tus Tswv tus Ntsuj Plig sib txuas lus tsis tu tsis tseg li.”15
Kev tshwm sim uas nws txais lub Kaum Hli Ntuj hnub tim 3 tau nplij nws siab thiab teb nws ntau lo lus nug. Peb sawv daws kuj yuav tau kev nplij siab thiab kawm ntxiv txog peb lub caij yav tom ntej thaum peb thiab cov uas peb hlub tso lub neej no tseg thiab mus rau lub ntuj ntsuj plig yog peb yuav kawm txoj kev tshwm sim no thiab ntsuam xav seb nws tseem ceeb npaum li cas rau peb txoj kev ua neej nyob.
Hauv ntau yam uas Thawj Tswj Hwm pom yog qhov uas nws pom tus Cawm Seej tau mus ntsib cov neeg uas rau siab ntseeg hauv lub ntuj ntsuj plig tom qab nws tuag saum ntoo khaub lig. Los ntawm kev ua yog toog pom no kuv hais ib co lus:
“Tiam sis saib seb, los ntawm cov neeg ncaj ncees, nws tau tsa nws pab neeg thiab txib tej tub xa xov, cov uas muaj hwj chim thiab muaj txoj cai, thiab tso cai kom lawv mus thiab coj txoj kev kaj ntawm txoj moo zoo mus rau lawv cov uas nyob hauv qhov tsaus ntuj, twb yog rau tag nrho cov ntsuj plig ntawm tib neeg;16 thiab yog li ntawd tau tshaj tawm txoj moo zoo mus rau cov tuag zoo li no. …
“Tau qhia cov no txog txoj kev ntseeg Vajtswv, kev hloov siab lees txim rau tej kev txhaum, kev sawv lwm tus cev ua kev cai raus dej rau txoj kev zam txim rau tej kev txhaum, lub txiaj ntsim Vaj Ntsuj Plig Dawb Huv los ntawm kev tso tes saum taub hau,
“Thiab tag nrho lwm lub ntsiab cai ntawm txoj moo zoo uas lawv yuav tsum paub thiaj ua rau lawv tus kheej zoo txaus xwv kom lawv yuav raug txiav txim raws li tej neeg thaum muaj cev nqaij daim tawv, tiam sis ua neej raws li Vajtswv siab nyiam ntawm sab ntsuj plig. …
“Vim cov tuag tau xav hais tias qhov uas lawv cov ntsuj plig sib ncaim ntev loo ntawm lawv lub cev nqaij yeej zoo li kev ua cev qhev.
“Tus Tswv qhia cov no, thiab muab hwj chim rau lawv kom sawv los, tom qab tus Tswv txoj kev sawv hauv qhov tuag rov los, kom nkag mus rau hauv nws Txiv lub nceeg vaj, mus txais lub meej mom tsis txawj tuag thiab txoj sia nyob mus ib txhis,
“Thiab ua lawv tej hauj lwm mus ntxiv txij lub sij hawm ntawd mus ib yam li tus Tswv tau cog lus tseg, thiab yog cov tau txais tag nrho tej koob hmoov uas tau muab tshwj tseg cia rau lawv cov uas hlub nws.”17
Nyob hauv kev ua yog toog pom, Thawj Tswj Hwm Smith pom nws txiv, Hyrum, thiab tus Yaj Saub Yauxej Xamiv. Twb yog 74 xyoo txij li nws pom nws txiv thaum nws ua ib tug me nyuam tub hauv Nauvoo. Peb yeej paub hais tias nws muaj kev zoo siab vim nws pom nws txiv thiab txiv ntxawm. Tej zaum nws tau kev tshoov siab thiab kev nplij siab vim nws paub tias tag nrho cov ntsuj plig tseem muaj tib tug xeeb ceem uas lawv muaj thaum lawv tseem muaj lub cev nqaij daim tawv thiab lawv tab tom tos ntsoov hnub zoo kawg nkaus uas lawv yuav sawv rov qab los. Txoj kev ua yog toog pom qhia tseeb seb Leej Txiv Saum Ntuj Ceeb Tsheej tau npaj ib txoj hau kev zoo li cas rau Nws cov me nyuam thiab txog Yexus txoj kev txhiv dim thiab Nws txoj Kev Theej Txhoj muaj hwj chim tshaj txhua yam tsav.18
Thaum peb nco txog 100 xyoo no, kuv caw nej los ua tib zoo nyeem thiab xav txog txoj kev tshwm sim no. Thaum nej ua li no, thov kom tus Tswv yuav foom koob hmoov rau nej es pab nej haj yam to taub thiab muaj kev ris txiaj rau Vatjswv txoj kev hlub thiab Nws txoj kev cawm seej thiab kev zoo siab rau Nws cov me nyuam.
Kuv hais lus tim khawv tias Thawj Tswj Hwm Joseph F. Smith txoj kev ua yog toog pom no yeej muaj tseeb. Kuv hais lus tim khawv tias txhua tus neeg muaj cuab kav nyeem thiab kawm tau kom paub qhov tseeb no thiab. Cov uas tsis kawm paub li no hauv lub neej no yeej yuav paub qhov tseeb no thaum lawv mus txog lub ntuj ntsuj plig. Nyob ntawd, txhua leej txhia tus yuav hlub thiab qhuas Vajtswv thiab tus Tswv Yexus Khetos vim muaj txoj kev cawm seej no thiab lawv tau kev cog lus hais tias lawv yuav muaj kev sawv rov qab los thaum lub cev thiab tus ntsuj plig rov los nyob ua ke dua yuav tsis sib ncaim ib zaug ntxiv li.19
Kuv zoo siab heev vim kuv paub hais tias kuv tus me poj niam Barbara nyob qhov twg thiab tias wb yuav rov qab los nyob ua ke dua nrog wb tsev neeg, rau tas mus ib txhis. Kuv txo hwj chim thov Vajtswv kom tus Tswv txoj kev thaj yeeb nyab xeeb yuav txhawb nqa nej tas sim no thiab tsis tu tsis tseg tom ntej los ntawm Yexus Khetos lub npe, amees.