Tej Lus Qhib Rooj Sab Laj

Kuv cov kwv tij thiab cov muam, peb twb tos ntsoov rov qab nrog nej sib koom ua ke hauv lub Kaum Hli Ntuj lub tuam rooj sab laj ntawm lub Koom Txoos no. Peb zoo siab tos txais nej txhua leej txhua tus. Peb ua nej tsaug vim nej thov Vajtswv txhawb nqa peb. Peb yeej txais kev pab vim nej ua li ntawd. Ua tsaug!

Peb zoo siab ua nej tsaug rau nej txoj kev khwv ua tej dej num kom ua raws li tej lus ntuas uas tau hais hauv lub tuam rooj sab laj rau lub hlis tas los. Tej ceg txheem ntseeg pawg thawj tswj hwm nyob thoob plaws lub ntiaj teb no twb nrhiav kev tshwm sim kom paub kho lawv tej pawg txwj laug li cas. Cov txiv neej hauv tej pawg no nrog rau peb cov muam hauv Koom Haum Niam Tsev rau siab mus txhawb pab peb cov kwv tij thiab cov muam raws li ib txoj kev uas siab dua, thiab dawb huv dua li qub. Peb txais kev tshoov siab vim nej ua siab zoo thiab ua hauj lwm ntau heev kom coj tus Cawm Seej txoj kev hlub rau nej tsev neeg, zej zog, thiab phooj ywg thiab txhawb pab lawv zoo li Nws yuav ua.

Txij thaum lub tuam rooj sab laj, Muam Nelson thiab kuv wb tau sib ntsib nrog cov mej zeej hauv plaub thooj av teb chaws thiab cov pov txwv hauv hiav txwv. Txij ntawm Yeluxalees mus rau Harare, txij ntawm Winnipeg mus rau Bangkok, wb tau kawm txog nej txoj kev ntseeg loj heev thiab nej zaj lus tim khawv uas muaj zog.

Peb xyiv fab heev vim muaj coob tus tub hlus ntxhais hluas uas tau koom nrog tus Tswv pawg tub rog hluas kom pab muab Ixayees sib sau ua ke.¹ Peb ua nej tsaug! Thiab thaum nej tseem ua raws li kuv tej lus caw nyob hauv cov hluas kev hawm Vajtswv thoob plaws ntiaj teb, nej coj tus yam ntxwv zoo kawg rau peb txhua tus xyaum. Es nej cov tub hluas ntxhais hluas yeej pab heev!

Ob peb xyoos no, peb cov nyob hauv tej pawg tswj hwm lub Koom Txoos twb xav paub teb ib lo lus nug tseem ceeb: peb yuav ua li cas kom qhia txoj moo zoo, thiab cov kab ke uas nyob mus ib txhis rau tag nrho Vajtswv cov me nyuam?

Vim peb yog ib Tsoom Haiv Neeg Ntseeg, peb twb tau xav tias “lub koom txoos” yog muaj nyob hauv peb tej tsev sib ntsib, es tej yam uas ua hauv tsev txhawb nqa tej ntawd xwb. Peb yuav tsum kho peb tej kev xav li no. Twb txog lub sij hawm rau ib lub Koom Txoos uas ua hauv tsev, thiab tej yam uas peb ua hauv peb ceg ntseeg, pawg ntseeg, thiab ceg txheem ntseeg yuav txhawb nqa xwb.

Thaum lub Koom Txoos no tseem loj tuaj kom thoob plaws lub ntiaj teb, ntau tus mej zeej nyob hauv ib qho chaw uas tsis muaj tsev teev ntuj—thiab ntshe tau ntev yuav tsis muaj. Kuv nco txog ib tsev neeg es vim muaj xwm txheej li no, lawv yuav tsum sib ntsib hauv tsev. Kuv twb nug tus niam tsev seb nws puas nyiam ua kev sib ntsib koom txoos hauv nws lub tsev. Nws teb hais tias, “Kuv nyiam heev! Kuv tus txiv hais lus zoo dua ntxiv hauv tsev, vim nws paub tias nws yuav foom koob hmoov rau lub cim nco txog txhua Hnub Xya.”

Lub hom phiaj ntawm lub Koom Txoos no yog kom pab txhua tus mej zeej muaj kev ntseeg tus Tswv Yexus Khetos thiab Nws txoj Kev Theej Txhoj ntxiv, kom pab lawv ua thiab ua raws li lawv tej kev khi lus nrog Vajtswv, thiab kom txhawb lawv tsev neeg lub zog thiab muab lawv khi ua ke. Nyob hauv lub ntiaj teb no, ua li no yeej tsis yooj yim. Tus yeeb ncuab haj yam tawm tsam kev ntseeg thiab tsev neeg zuj zus tuaj. Yog peb sab ntsuj plig yuav dim, ces peb yuav tsum muaj tej txheej txheem thiab tej kev npaj kom tiv tau. Yog li ntawd, tam sim no peb yuav kho tej yam hauv peb lub koom txoos uas yuav txhawb nqa peb cov mej zeej thiab lawv tsev neeg ntxiv.

Tau ntau xyoo, cov thawj coj ntawm lub Koom Txoos twb npaj tej txheej txheem qhia ntawv kom ntxiv dag zog rau tsev neeg thiab tib neeg uas qhia nyob hauv tsev thiab lub Koom Txoos txhawb nqa kom kawm cov lus qhuab qhia, kom kev ntseeg muaj zog, thiab txhawb nqa kev teev tiam Vajtswv. Tej yam uas peb qhia tias yuav hloov no yuav txhawb nqa peb tej hauj lwm uas peb ua ob peb xyoo no kom hwm Hnub Caiv kom dawb huv—ua ib hnub zoo siab thiab ib lub cim rau Vajtswv hais tias peb hlub Nws.

Tag kis no peb yuav tshaj tawm ib txoj kev tshiab kom muaj kev qhia txoj moo zoo hauv tsev thiab hauv lub Koom Txoos sib npaug. Peb txhua tus lav ris peb txoj kev loj hlob ntawm sab ntsuj plig. Thiab cov vaj lug kub qhia meej tias cov niam tsev txiv tsev muaj kev lav ris qhia cov lus qhuab qhia rau lawv cov me nyuam.² Lub Koom Txoos txoj kev lav ris yog kom pab txhua tus mej zeej ua raws li Vajtswv lub hom phiaj kom nws tej kev paub txog txoj moo zoo loj tuaj.

Tam sim no Txwj Laug Quentin L. Cook yuav piav txog tej yam uas peb yuav kho no. Tag nrho cov mej zeej ntawm Thawj Pawg Thawj Tswj Hwm thiab Pawg Kaum Ob tug Thwj Tim koom siab pom zoo rau zaj lus no. Peb zoo siab ua tus Tswv tsaug vim Nws tshoov peb lub siab kom npaj txoj hau kev no thiab tej txheej txheem no uas Txwj Laug Cook yuav hais.

Kuv cov kwv tij thiab cov muam, kuv paub tias Vajtswv muaj txoj sia nyob! Yexus yog tus Khetos! Nws coj Nws lub Koom Txoos raws li kev qhia tej uas yuav muaj los yav tom ntej thiab kev tshwm sim uas los rau Nws cov tub qhe uas txo hwj chim. Kuv hais lus tim khawv li no los ntawm Yexus Khetos lub npe, amees.