2010–2019
Lub Koom Txoos lub Npe uas Raug Lawm
Kaum Hli Ntuj Xyoo 2018

Lub Koom Txoos lub Npe uas Raug Lawm

Los ntawm Thawj Tswj Hwm Russell M. Nelson

Yexus Khetos tau qhia peb kom hais txog lub Koom Txoos raws li Nws lub npe vim nov yog Nws lub Koom Txoos, uas muaj Nws lub hwj chim puv npo.

Kuv cov kwv tij thiab cov muam, thaum Hnub Caiv zoo nkauj no peb zoo siab vim tus Tswv tau foom koob hmoov ntau rau peb. Peb zoo siab heev vim nej ua tim khawv txog Yexus Khetos txoj moo zoo, nej tau ua kev txi kom taug Nws txoj kev ntawm kev khi lus, thiab nej rau siab pab lwm tus hauv Nws lub Koom Txoos.

Hnub no kuv yuav tsum hais lus rau nej txog ib yam uas tseem ceeb heev. Ob peb lim tiam tas los, kuv tau tso ib zaj lus tawm txog qhov uas peb yuav tsum kho lub Koom Txoos lub npe.1 Kuv tau ua li no vim tus Tswv tau tshoov kuv lub siab kom paub tias lub npe rau Nws lub Koom Txoos uas Nws tau tshaj tawm tseem ceeb npaum li cas, lub npe uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.2

Nyaj nej twb paub lawm hais tias, tib neeg xav sib txawv txog kuv zaj no thiab cov ntaub ntawv uas qhia tias yuav hu lub Koom Txoos li cas.3 Ntau tus mej zeej twb kho lub npe ntawm lub Koom Txoos no nyob hauv lawv tej blog thiab social media hauv Internet. Lwm tus xav paub seb vim muaj xwm txheej ntau heev hauv lub ntiaj teb no, vim li cas yuav tsum xav txog ib yam uas “tsis tshua tseem ceeb.” Thiab lwm tus hais tias ua tsis tau qhov no, yog li ntawd tsis tas sim ua. Cia kuv piav vim li cas peb xav tias qhov no tseem ceeb heev. Tiam sis cia kuv qhia nej tias qhov no tsis yog tej yam uas kuv yuav hais no:

  • Tsis yog kev hloov npe.

  • Tsis yog ib lub npe tshiab.

  • Tsis yog kom zoo nkauj.

  • Tsis yog peb lam ua.

  • Thiab tsis yog ib yam uas tsis tseem ceeb.

Tiam sis qhov peb ua no yog kev kho kom raug. Yeej yog tus Tswv txoj lus txib. Yauxej Xamiv tsis tau muab lub npe no rau lub Koom Txoos; Maumoos kuj tsis tau muab lub npe no thiab. Yog tus Cawm Seej uas tau muab lub npe no thaum Nws hais tias, “Vim yuav tsum hu kuv lub koom txoos li no nyob hauv hnub nyoog kawg, uas twb yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.”4

Puag thaum ub, thaum xyoo 34, peb tus Tswv uas tau sawv rov los tau qhia li no rau cov mej zeej ntawm Nws lub Koom Txoos thaum Nws tuaj xyuas lawv nyob hauv Amelikas. Thaum lub sij hawm ntawd Nws hais tias:

“Nej yuav tsum hu lub koom txoos li kuv lub npe. …

“Thiab lub koom txoos yog kuv lub li cas, yog tsis muab hu li kuv lub npe? Vim tias yog muab ib lub koom txoos hu li Mauxes lub npe ces kuj yog Mauxes lub koom txoos; los sis yog tias muab hu li ib tug neeg lub npe ces kuj yog tus neeg ntawd lub koom txoos; tiam sis yog tias muab hu li kuv lub npe ces yog kuv lub koom txoos, yog tias lawv muab kuv txoj moo zoo ua lawv lub hauv paus.”5

Yog li ntawd, tsis muaj cai sib cav txog lub Koom Txoos lub npe. Thaum tus Cawm Seej qhia meej tias yuav tsum hu Nws lub Koom Txoos li cas, thiab ua ntej Nws hais tias, “Nej yuav tsum hu lub koom txoos li kuv lub npe,” ces Nws yeej hais tiag tiag. Thiab yog peb siv lwm lub npe li tib neeg nyiam hu thiab siv los sis txhawb nqa tej lub npe no ces ua rau Nws tu siab.

Ib lub npe tseem ceeb npaum li cas los sis, zoo li zaum no, lub npe luv tseem ceeb npaum li cas? Thaum hais txog lub npe rau lub Koom Txoos uas tib neeg nyiam hais, xws li “Lub Koom Txoos LDS,” “lub Koom Txoos Maumoos,” los sis “Lub Koom Txoos ntawm Tsoom Haiv Neeg Ntseeg hauv Hnub Nyoog Kawg,” los yus pom tias nyob hauv tej lub npe no qhov uas tau muab tshem tawm yog tus Cawm Seej lub npe. Dab Ntxwg Nyoog yog tus uas kov yeej thaum tib neeg tshem tus Tswv lub npe tawm ntawm tus Tswv lub Koom Txoos. Thaum peb muab tus Cawm Seej lub npe tso tseg, ces peb muab txhua yam uas Yexus Khetos tau ua rau peb tso tseg—tsis hais Nws txoj Kev Theej Txhoj los yog.

Xav seb Yexus xav li cas: Ua ntej lub neej no Nws yog Yehauvas, tus Vajtswv ntawm Phau Qub. Raws li Nws Leej Txiv qhia, Nws yog tus uas Tsim lub ntiaj teb no thiab lwm lub ntuj.6 Nws tau xaiv kom ua raws li Nws Txiv lub siab nyiam thiab ua ib yam rau Vajtswv cov me nyuam tag nrho uas lwm tus ua tsis tau hlo li! Nws tau los rau hauv lub ntiaj teb ua Leej Txiv Tib Leeg Tub ntawm sab cev nqaij daim tawv, es Nws raug tsim txom, thuam, nto qaub ncaug, thiab nplawm. Nyob hauv lub Vaj Khexemanes, peb tus Cawm Seej tau ris txhua qhov mob, txhua txoj kev txhaum, thiab tag nrho kev nyuaj siab thiab kev txom nyem uas peb txhua leej txhua tus ib txwm tau raug thiab yuav raug. Vim nws ris lub nra hnyav kawg ntawd, Nws tau los ntshav ntawm txhua lub qhov hws.7 Kev raug txom nyem loj zuj zus tuaj thaum Nws raug ntsia saum tus ntoo khaub lig nyob saum Khaulakhauthas.

Los ntawm tej kev raug txom nyem no thiab Nws txoj Kev Sawv Rov Los—uas yog Nws txoj Kev Theej Txhoj uas nyob mus ib txhis—Nws ua kom peb txhua tus yuav tsis txawj tuag thiab Nws txhiv peb txhua tus dim kev txhaum yog tias peb hloov siab lees txim.

Tom qab tus Cawm Seej Sawv Rov Los thiab Nws cov Thwj Tim tuag, lub ntiaj teb twb nyob hauv kev tsaus ntuj tas li. Ces thaum xyoo 1820, Vajtswv Leej Txiv thiab Nws Leej Tub, Yexus Khetos, tau tshwm sim rau tus Yaj Saub Yauxej Xamiv kom muab tus Tswv lub Koom Txoos Txum Tim Rov Qab Los.

Tom qab tag nrho tej yam uas Nws tau nyiaj lawm—txhua yam uas Nws tau ua rau tib neeg—kuv tu siab heev uas peb tau pom zoo hu tus Tswv lub Koom Txoos ua lwm lub npe, es tej npe ntawd tsis siv Yexus Khetos lub npe dawb ceev!

Txhua Hnub Xya thaum peb txais lub cim nco txog, peb rov qab cog lus rau peb Leej Txiv Saum Ntuj Ceeb Tsheej hais tias peb txaus siab ris Nws Leej Tub, Yexus Khetos lub npe.8 Peb cog lus tias peb yuav coj raws li Nws, hloov siab lees txim, ua raws li Nws cov lus txib, thiab nco ntsoov Nws tas mus li.

Thaum peb tshem Nws lub npe tawm ntawm peb lub Koom Txoos li, peb tshem Nws tawm ntawm peb lub neej me ntsis.

Qhov uas peb ris tus Cawm Seej lub npe txhais tias peb tshaj tawm thiab ua tim khawv rau lwm tus tias Yexus yog tus Khetos—los ntawm tej yam peb ua thiab hais. Peb puas ntshai heev tsis xav ua rau lwm tus uas hu peb ua “Neeg Maumoos” tu siab es peb thiaj li tsis tau tiv thaiv tus Cawm Seej, peb tsis tau ua pov thawj txog Nws tsis hais nyob hauv Nws lub Koom Txoos uas muaj Nws lub npe?

Yog tias peb yuav muaj lub hwj chim ntawm Yexus Khetos txoj Kev Theej Txhoj—kom ntxuav peb thiab kho peb, kom txhawb nqa thiab pab peb ua zoo, thiab thaum kawg kom muab peb tsa nto—ces peb yeej yuav tsum lees hais tias Nws yog lub hauv paus ntawm lub hwj chim ntawd. Peb yuav tsum pib hu Nws lub Koom Txoos li lub npe uas Nws tau tshaj tawm lawm.

Neeg ntiaj teb feem coob hais tias tus Tswv lub Koom Txoos yog “lub Koom Txoos Maumoos.” Tiam sis peb cov mej zeej ntawm tus Tswv lub Koom Txoos paub tias leej twg yog tus thawj: Yexus Khetos Nws tus kheej. Tiam sis, neeg feem coob uas hnov lo lus Maumoos tej zaum lawv xav tias peb teev tiam Maumoos. Tsis yog li ntawd! Peb hwm thiab saib tus yaj saub uas nyob puag thaum ub hauv Amelikas rau nqi.9 Tiam sis peb tsis yog Maumoos cov thwj tim. Peb yog tus Tswv cov thwj tim.

Thaum nyuam qhuav tau muab lub Koom Txoos txum tim rov qab los, tej lus xws li lub Koom Txoos Maumoos thiab cov Maumoos 10 los neeg siv los thuam thiab hais lus phem kom ua rau lwm tus tsis ntseeg tias yog Vajtswv txhais tes uas tau muab Yexus Khetos lub Koom Txoos txum tim rov qab los hauv hnub nyoog kawg.11

Cov kwv tij thiab cov muam, muaj ntau lub tswv yim uas qhia vim li cas tsis tas siv lub Koom Txoos lub npe tiag tiag. Vim hais tias txhua yam nyob hauv Internet niaj hnub no thiab vim muaj tej kev uas pab peb nrhiav xov xwm li peb xav tau sai heev—tsis hais xov xwm txog tus Tswv lub Koom Txoos—tib neeg thuam hais tias kev kho lub npe li no yeej tsis yog ib qho txawj ntse. Lwm tus xav tias vim txhua leej txhua tus paub peb yog “Neeg Maumoos” thiab yog “lub Koom Txoos Maumoos,” peb yuav tsum cia li ntawd xwb.

Yog tias peb sib tham txog kev tis npe rau ib lub koom haum uas tib neeg tau tsa, ces lawv yeej hais yog. Tiam sis hais txog qhov tseem ceeb no, peb saib ntsoov tus uas tau tsim lub Koom Txoos no thiab lees hais tias tus Tswv tej kev tsis yog, thiab yeej yuav tsis yog zoo li tib neeg tej kev. Yog peb yuav ua siab ntev thiab ua zoo, tus Tswv yuav coj peb mus kom ua tau txoj hauj lwm tseem ceeb no. Vim hais tias, peb paub tus Tswv pab cov uas xav ua raws li Nws lub siab nyiam, ib yam li Nws tau pab Nifais ua ib lub nkoj kom hla tau hiav txwv.12

Peb xav ua siab dawb siab zoo thiab ua siab ntev thaum peb kho tej yam ua yuam kev no. Cov neeg uas sau xov xwm yuav muaj siab xav ua raws li peb thov.

Nyob hauv ib lub tuam rooj sab laj tas los, Txwj Laug Benjamín De Hoyos tau hais txog qhov no. Nws hais tias:

“Ntau xyoo tas los thaum kuv ua hauj lwm rau lub Koom Txoos qhov chaw pab tej yam hais rau pej xeem sawv daws hauv Teb Chaws Mev, [ib tug khub thiab kuv] wb txais kev caw hais lus hauv xov tooj cua txoj kev sib tham. … [Ib tug uas khiav txheej xwm] nug [peb], ‘Vim li cas lub Koom Txoos no muaj lub npe ntev ua luaj? …’

“Kuv tus khub thiab kuv wb luag nyav vim nws nug ib qho zoo kawg ces wb piav hais tias tib neeg tsis tau xaiv lub Koom Txoos no lub npe. Yog tus Cawm Seej uas tau xaiv. … Tus uas coj txheej xwm teb kiag hais tias, ‘Yog li ntawd peb yuav zoo siab hais lub npe no.’”13

Zaj no qhia ib tug yam ntxwv rau peb. Ib tug dhau ib tug, peb yuav tsum ua zoo npaum li peb ua tau kom kho tej yam ua yuam kev uas tau nkag hauv peb ntau xyoo tas los no. 14 Tej zaum lwm tus hauv lub ntiaj teb yuav tsis ua raws li peb ua thiab hu peb los ntawm lub npe uas yog lawm. Tiam sis tsis tsim nyog rau peb ntxhov siab yog tias lwm tus hauv lub ntiaj teb hu lub Koom Txoos thiab cov mej zeej raws li tej npe tsis yog, yog tias peb ua zoo ib yam li ntawd.

Peb cov ntaub ntawv uas qhia tias yuav hu lub Koom Txoos li cas pab tau peb. Nws hais tias: “Thawj zaug yus hais, xav hais lub Koom Txoos lub npe tag nrho: ‘Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.’ Thaum yuav tsum hais dua ntxiv [zaum ob], xav hais ‘lub Koom Txoos’ los sis ‘Yexus Khetos lub Koom Txoos.’ Yog hais ‘Yexus Khetos lub Koom Txoos uas tau muab txum tim rov qab los’ los yeej hais raug lawm thiab zoo.”15

Yog leej twg nug hais tias, “Koj puas yog ib tug Neeg Maumoos?” tej zaum koj yuav xav teb hais tias, “Yog koj nug kuv seb kuv puas yog ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, ces kuv yeej yog!”

Yog leej twg nug hais tias, “Koj puas yog ib tug Neeg Ntseeg hauv Hnub Nyoog Kawg?”16 tej zaum koj yuav xav teb hais tias, “Kuv yog. Kuv ntseeg Yexus Khetos thiab yog ib tug mej zeej ntawm Nws lub Koom Txoos uas tau txum tim rov qab los.”

Kuv cov kwv tij thiab cov muam, kuv cog lus rau nej yog peb yuav ua zoo npaum li peb ua tau kom rov qab siv lub npe ntawm tus Tswv lub Koom Txoos, ces Nws yuav nchuav Nws lub hwj chim thiab cov koob hmoov saum Tsoom Haiv Neeg Ntseeg hauv Hnub Nyoog Kawg tej taub hau,17 ntau dua li peb ib txwm tau pom dua. Peb yuav muaj Vajtswv txoj kev txawj ntse thiab lub hwj chim kom pab peb coj cov koob hmoov ntawm Yexus Khetos txoj moo zoo rau txhua haiv neeg, xeem neeg, yam lus, thiab cov neeg thiab npaj neeg ntiaj teb rau tus Tswv txoj Kev Los Zaum ob.

Yog li ntawd, ib lub npe tseem ceeb npaum li cas? Thaum peb hais txog lub npe ntawm tus Tswv lub Koom Txoos, ces yuav tsum teb hais tias, “Qhov no tseem ceeb kawg nkaus!” Yexus Khetos tau qhia peb kom hais txog lub Koom Txoos raws li Nws lub npe vim nov yog Nws lub Koom Txoos, uas muaj Nws lub hwj chim puv npo.

Kuv paub tias Vajtswv muaj txoj sia nyob. Yexus yog tus Khetos. Nws coj Nws lub Koom Txoos hnub no. Kuv ua tim khawv li no los ntawm Yexus Khetos lub npe dawb ceev, amees.

Lus Cim

  1. Tus Tswv tau tshoov kuv lub siab kom paub tias lub npe rau Nws lub Koom Txoos uas Nws tau qhia tseem ceeb npaum li cas, lub npe uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb muaj hauj lwm ua xwv kom peb ua raws li Nws lub siab nyiam. Ob peb lim tiam no, cov thawj coj thiab qhov chaw hauv lub Koom Txoos twb tau pib ua tej yam uas yuav tsum ua. Ob peb hlis tom ntej no yuav hais ntxiv txog qhov tseem ceeb no” (Russell M. Nelson, nyob hauv “The Name of the Church” [zaj lus tshaj tawm raug cai, Yim Hli Ntuj 16, 2018], mormonnewsroom.org).

  2. Cov Thawj Tswj Hwm ntawm lub Koom Txoos tas los twb tau hais ib yam. Ua piv txwv tias, Thawj Tswj Hwm George Albert Smith hais tias: “Tsis txhob ua rau tus Tswv poob siab thaum nej hu lub koom txoos no ua lub Koom Txoos Maumoos. Nws tsis tau hais tias yog lub Koom Txoos Maumoos” (nyob hauv Conference Report, Plaub Hlis Ntuj 1948, 160)

  3. Saib “Style Guide—The Name of the Church,” mormonnewsroom.org.

  4. Lus Qhuab Qhia thiab Kev Khi Lus 115:4.

  5. 3 Nifais 27:7–8.

  6. Saib Mauxes 1:33.

  7. Saib Lus Qhuab Qhia thiab Kev Khi Lus 19:18.

  8. Saib Maulaunais 4:3; Lus Qhuab Qhia thiab Kev Khi Lus 20:37, 77.

  9. Maumoos yog ib tug ntawm plaub tug uas sau Phau Ntawv Maumoos, lwm tus yog Nifais, Yakhauj, thiab Maulaunais. Txhua tus twb pom tus Tswv, ib yam li tus uas tau txhais Phau Ntawv Maumoos, tus Yaj Saub Yauxej Xamiv.

  10. Lo lus Neeg Maumoos kuj yog ib lo lus thuam uas neeg hais (saib History of the Church, 2:62–63, 126).

  11. Muaj lwm lub npe phem uas tib neeg hais nyob hauv Phau Tshiab. Thaum tus Thwj Tim Povlauj hais plaub rau ntawm Felis, lawv hais tias Povlauj yog “tus thawj ntawm pawg ntseeg cov Naxales” (Tes Hauj Lwm 24:5). Hais txog lo lus “cov Naxales,” ib tug kws sau ntawv hais tias: “Nov yog lub npe uas tib neeg hais kom thuam cov Neeg Khetos. Luag hu lawv li ntawd vim Yexus los ntawm Naxales” (Albert Barnes, Notes, Explanatory and Practical, on the Acts of the Apostles [1937], 313).

    Ib yam li ntawd, lwm tus hais tias: “Ib yam li luag cem tus Tswv hais tias nws yog ‘Tus Naxales’ (Mathais xxvi. 71), cov Neeg Yudais twb tau hu nws cov thwj tim ua ‘cov Neeg Naxales.’ Lawv tsis lees hais tias lawv yog Neeg Khetos, los yog hais tias cov thwj tim ntawm tus Mexiyas” (The Pulpit Commentary: The Acts of the Apostles, tus kho yog H. D. M. Spence thiab Joseph S. Exell [1884], 2:231).

    Ib yam li ntawd, Txwj Laug Neal A. Maxwell qhia tias: “Nyob hauv cov vaj lug kub, peb pom tib neeg nyiam thuam cov yaj saub kom lwm tus tso lawv tseg—siv tej lub npe phem kom lwm tus saib lawv tsis rau nqi. Tiam sis, feem ntau tib neeg tsis quav ntsej txog cov yaj saub thiab tsis sau txog lawv hauv zaj keeb kwm. Vim hais tias, cov Neeg Ntseeg Khetos los luag hu lawv ua ‘pawg ntseeg cov Naxales.’ (Tes Hauj Lwm 24:5.)” (“Out of Obscurity,” Ensign, Kaum Ib Hlis Ntuj 1984, 10).

  12. Saib 1 Nifais 18:1–2.

  13. Benjamín De Hoyos, “Called to Be Saints,” Liahona, Tsib Hlis Ntuj 2011, 106.

  14. Txawm peb tswj tsis tau lwm tus kom hu peb li peb nyiam, peb yeej tswj tau qhov uas peb hu peb tus kheej li cas. Peb yuav ua li cas kom lwm tus hais lub npe ntawm lub Koom Txoos raws li qhov yog, yog tias peb cov mej zeej tsis ua li ntawd?

  15. “Style Guide—The Name of the Church,” mormonnewsroom.org.

  16. Lo lus saint los sis neeg ntseeg los siv ntau nyob hauv Phau Vaj Lug Kub Npaiv Npaum. Nyob hauv Povlauj Tsab Ntawv rau cov Neeg Efexus, nws twb siv lo lus saint ib zaug txhua tshooj. Ib tug neeg ntseeg yog ib tug neeg uas ntseeg Yexus Khetos thiab sim coj raws li Nws.

  17. Saib Lus Qhuab Qhia thiab Kev Khi Lus 121:33.