2010–2019
Mau fa’atanora’a nō te ha’apūai i te feiā ’āpī
’Āmuira’a rahi nō ’Ātopa 2019

Mau fa’atanora’a nō te ha’apūai i te feiā ’āpī

Nā Elder Quentin L. Cook

Nō te pupu nō te Tino ’Ahuru Ma Piti ’āpōsetolo

E rahi atu te feiā ’āpī tamāroa ’e te feiā ’āpī tamāhine e ha’apa’o i te tītaura’a, ’e e fa’aea i ni’a i te ’ē’a nō te fafaura’a maoti teie fa’atumura’a rahi i ni’a i tā tātou feiā ’āpī.

Māuruuru, e te peresideni here Nelson, nō taua arata’ira’a ’oa’oa heheuhia mai nō ni’a i te mau ’ite i roto i te mau bāpetizora’a, ’e te arata’ira’a tā ’oe i ani mai ia mātou ’ia fa’a’ite nō te tauturu ’ia ha’apūai i te feiā ’āpī ’e ’ia fa’ananea i tō rātou pūai mo’a.

Hou ’a fa’a’ite atu ai au i te reira mau fa’atanora’a, tē fa’a’ite atu nei mātou i tō mātou māuruuru nō te huru ta’a ’ē o tō te mau melo pāhonora’a i te mau tupura’a i roto i te fa’aho’i-fa’ahou-ra’a tāmau o te ’evanelia. Mai tā te peresideni Nelson i parau mai i te matahiti i ma’iri a’e nei, ’ua rave ’outou i tā ’outou vitamine !1

’Ua tuatāpapa ’outou ma te ’oa’oa i te Mai, pe’e mai i te fare.2 ’Ua pāhono ato’a mai ’outou i te mau fa’atanora’a i te fare pure. Tē rave tāhō’ē nei te mau melo o te pupu peresibutero ’e te mau tuahine o te Sōtaiete Tauturu i te ’ohipa nō te fa’aorara’a.3

’Ua ī roa mātou i te māuruuru rahi.4 E māuruuru ta’a ’ē tō mātou i te mea ē, tē tāmau noa nei tō tātou feiā ’āpī i te vai pūai noa ’e te ha’apa’o.

Te ora nei tō tātou feiā ’āpī i roto i te hō’ē tau ’oa’oa terā rā e tau fifi ato’a. Te mau mā’itira’a e vai ra, ’aita ïa te reira i ’itehia a’e nei. Hō’ē hi’ora’a : Nā roto i te niuniu ’āfa’ifa’i smartphone, e nehenehe e haru mai i te mau ha’amāramaramara’a fa’ahiahia, tae noa atu i te ’ā’amu ’utuāfare ’e te mau pāpa’ira’a mo’a. Terā rā tē vai ato’a ra te mau mea ma’ama’a, vi’ivi’i, ’e te ’ino, ’aita e vai ra i te mātāmua.

Hōho’a
Fa’anahora’a ha’api’ira’a fa’atumuhia i ni’a i te ’utuāfare
Hōho’a
Mau ’ohipara’a a te feiā ’āpī

Nō te tauturu i tā tātou feiā ’āpī ’ia rātere nā roto i teie mau mā’itira’a fifi, ’ua fa’aineine te ’Ēkālesia e toru mau fa’aotira’a hōhonu ’e te pāpū maita’i. A tahi, ’ua ha’apūaihia te fa’anahora’a ha’api’ira’a ’e ’ua fa’anaho-ato’a-hia nō te fare. A piti, i te sābati i ma’iri a’e nei, ’ua vauvau atu te peresideni Nelson, te peresideni Ballard, ’e te ti’a fa’atere rahi, i te hō’ē fa’anahora’a nā te mau tamari’i ’e te feiā ’āpī, tei roto te mau ’ohipara’a fa’ahiahia ’e te fa’ananeara’a o te ta’ata iho. Te toru o te fa’aotira’a, ’oia ho’i o te mau tauira’a ïa i roto i te fa’anahonahora’a o te tītau ’ia fa’ariro i te feiā ’āpī ’ei rōtahira’a pāpū hau atu nō tō tātou mau ’episekōpo ’e te tahi atu mau ti’a fa’atere. ’Ia riro teie rōtahira’a ’ei mana pae vārua ’e nō te tauturu i tā tātou feiā ’āpī ’ia riro ’ei nu’u feiā ’āpī tā te peresideni Nelson i ani ia rātou ’ia riro mai.

Mau hōho’a ’āmuimui

Teie mau tauto’ora’a, ’āpitihia i te mau tauto’ora’a i fa’aarahia i roto i nā matahiti ri’i i ma’iri, ’e ’ere ïa i te mau tauira’a ’ōtahi. ’Ua riro te mau tauira’a tāta’itahi ’ei tuha’a pāpū nō te hō’ē hōho’a ’āmuimui nō te ha’amaita’i i te feiā mo’a ’e nō te fa’aineine ia rātou ’ia fārerei i te Atua.

Hō’ē tuha’a o te hōho’a nō ni’a ïa i te u’i e ti’a mai nei. Tē anihia nei i tō tātou feiā ’āpī ’ia rave rahi atu i te hōpoi’a a te ta’ata hō’ē i te ’āpīra’a—ma te ’ore te mau metua ’e te feiā fa’atere e rave i te mau ’ohipa tā te feiā ’āpī iho e nehenehe e rave.4

Fa’aarara’a

I teie mahana tē fa’a’ite atu nei mātou i te mau tauira’a i roto i te fa’anahora’a nō te feiā ’āpī i roto i te pāroita ’e te titi. Mai tā peresideni Nelson i fa’ata’a mai, e paraparau te tuahine Bonnie H. Cordon i te mau tauira’a nō te feiā ’āpī tamāhine i teie ahiahi. Hō’ē tumu nō te mau tauira’a tā’u e paraparau i teienei, ’o te ha’apūaira’a ïa i te mau taea’e e mau nei i te autahu’ara’a a Aarona, te mau pupu, ’e te mau peresidenira’a pupu. Tē fa’atano nei teie mau tauira’a i tā tātou ravera’a ’e Te Parau Ha’api’ira’a ’e te mau Parau Fafau 107:15, ’o tē nā ō ra ē, « o te ’episekōpora’a ïa te peresidenira’a nō teie nei autahu’ara’a [a Aarona], ’e ’o tē mau nei i te mau tāviri ’oia ho’i te mana nō taua autahu’ara’a ra ».

Hō’ē o te mau ’ohipa a te ’episekōpo ’o te peresideni ïa i ni’a i te mau tahu’a ’e ’ia pārahi i roto i te ’āpo’ora’a i pīha’i iho ia rātou, ’ia ha’api’i ia rātou i te mau ’ohipa nō tō rātou tōro’a.6 Ta’a’ē atu i te reira, e hōpoi’a ta’a ’ē nā te tauturu hō’ē i roto i te ’episekōpora’a te ha’apa’ora’a i te mau ha’api’i, ’e te tauturu piti, te ha’apa’ora’a ïa i te mau diakono.

Nō reira, nō te pe’e i te heheura’a i roto i te Parau Ha’api’ira’a ’e te mau Parau Fafau, e fa’a’orehia te mau peresidenira’a feiā ’āpī i roto i te pāroita. ’Ua rave teie mau taea’e ha’apa’o i te mau ’ohipa maita’i, ’e tē fa’atae nei mātou i te tāpa’o māuruuru ia rātou.

Tē ti’aturi nei mātou ē, e ha’apāpū ’e e fa’atumu te mau ’episekōpora’a i ni’a i te mau hōpoi’a autahu’ara’a a te feiā ’āpī tamāroa ’e e tauturu ia rātou i roto i tā rātou mau ’ohipa nō te pupu. E pi’ihia te mau tauturu ha’amāramarama feiā ’āpī pa’ari maita’i, nō te tauturu i te mau peresidenira’a pupu autahu’ara’a a Aarona, ’e i te ’episekōpora’a, i roto i tā rātou mau ’ohipa.7 Tē ti’aturi nei mātou ē, e rahi atu ā te feiā ’āpī tamāroa ’e te feiā ’āpī tamāhine ’o te rave i te tītaura’a, ’e ’ia fa’aea noa i ni’a i te ’ē’a nō te fafaura’a nā roto i teie fa’atumura’a rahi i ni’a i tā tātou feiā ’āpī.

I roto i te hōho’a fa’auruhia a te Fatu, e hōpoi’a nā te ’episekōpo te mau ta’ata ato’a i roto i te pāroita. E ha’amaita’i ’oia i te mau metua o te feiā ’āpī ’e tae noa atu i te feiā ’āpī. ’Ua ’itehia i te hō’ē ’episekōpo ē, ’a paraparau ai ’oia i te hō’ē taure’are’a e ’aro ra i te hōho’a faufau, ’ua ti’a iāna ’ia tauturu i taua taure’are’a ra i roto i tāna tātarahapa, nā roto noa i tōna tauturura’a i te mau metua ’ia fa’a’ite noa i te here ’e te hāro’aro’a. Te fa’aorara’a o taua taure’are’a ra, e fa’aorara’a ïa nō tōna ’utuāfare, ’e ’ua tupu te reira nā roto i tō te ’episekōpo ’ohipara’a nō te ’utuāfare tā’āto’a. ’Ua riro mai taua taure’are’a ra i teienei ’ei taea’e ti’amā tei mau i te autahu’ara’a a Melehizedeka ’e ’ei misiōnare rave tāmau.

Mai tā teie ’ā’amu e fa’a’ite nei, nā teie mau fa’atanora’a :

  • E tauturu i te mau ’episekōpo ’e tō rātou mau tauturu ’ia fa’atumu i ni’a i tā rātou mau hōpoi’a tumu nō te feiā ’āpī ’e te mau tamari’i nō te Paraimere.

  • E tu’u i te mana ’e i te mau tītaura’a o te autahu’ara’a a Aarona i rōpū i te orara’a ’e i te mau ’ōpuara’a a te feiā ’āpī tamāroa tāta’itahi.

Nā teie ato’a mau fa’atanora’a :

  • E ha’apāpū i te mau hōpoi’a a te mau peresidenira’a pupu o te Autahu’ara’a a Aarona, ’e tō rātou rēni hōro’ara’a parau fa’a’ite i te ’episekōpora’a

  • E fa’aitoito i te feiā fa’atere ta’ata pa’ari ’ia tauturu ’e ’ia ha’api’i i te mau peresidenira’a nō te pupu Autahu’ara’a a Aarona i te fa’arahira’a i te mana ’e i te mana fa’atere o tō rātou tōro’a.

Mai tei fa’a’itehia, e’ita teie mau fa’atanora’a e fa’aiti i te hōpoi’a a te ’episekōpora’a nō te feiā ’āpī tamāhine. Mai tā te peresideni Nelson i ha’api’i iho nei, « te hōpoi’a mātāmua a te [’episekōpo], ’o te ha’apa’ora’a ïa i te feiā ’āpī tamāroa ’e te feiā ’āpī tamāhine o tāna pāroita ».8

Nāhea tō tātou mau ’episekōpo here ’e te itoito ’ia fa’aoti i teie hōpoi’a ? Mai tā ’outou e ha’amana’o ra, i te matahiti 2018, ’ua fa’atanohia te mau pupu autahu’ara’a a Melehisedeka ’ia ’ohipa hau atu ā ’e te mau Sōtaiete Tauturu, ’ia ti’a i te mau pupu peresibutero ’e te mau Sōtaiete Tauturu, i raro a’e i te fa’aterera’a a te ’episekōpo, ’ia amo i te mau hōpoi’a faufa’a roa tei rave i te hō’ē tuha’a rahi o tōna taime i mua ra. Teie mau hōpoi’a, o te ’ohipa misiōnare ïa, ’e te hiero ’e te ’ā’amu ’utuāfare i roto i te pāroita8—e tae noa atu i te aupurura’a i te mau melo o te pāroita.

Hōho’a
Mau hopoi‘a a te ’episekōpo

E’ita te ’episekōpo e hōro’a i te tahi mau hōpoi’a, mai te ha’apūaira’a i te feiā ’āpī, te rirora’a ’ei ha’avā, te ha’apa’ora’a i te feiā nava’i ’ore, ’e te hi’opo’ara’a i te faufa’a moni ’e i te mau ’ohipa pae tino. Terā rā, e mea iti ri’i te reira i tā tātou i hāro’aro’a i mūta’a ra. Mai tā Elder Jeffrey R. Holland i fa’ata’a mai i te matahiti i ma’iri a’e nei i te taime a fa’a’itehia mai ai te mau fa’atanora’a nō te mau pupu autahu’ara’a a Melehisedeka : « E vai noa te ’episekōpo ’ei tahu’a rahi fa’atere o te pāroita. Nā teie ’āna’ira’a rēni ’āpī [o te mau pupu Peresibutero ’e o te mau Sōtaiete Tauturu] e vaiiho iāna ’ia peresideni i ni’a i te ’ohipa a te Autahu’ara’a a Melehizedeka ’e a te Sōtaiete Tauturu ma te tītau ’ore iāna ’ia rave i te ’ohipa a teie nā pupu  ».10

Ei hi’ora’a, e nehenehe te hō’ē peresideni nō te Sōtaiete Tauturu ’e te peresideni nō te hō’ē pupu peresibutero, tei fa’ata’ahia, e rave i te hō’ē hōpoi’a rahi a’e i roto i te ’āpo’ora’a a te feiā paari—mai te hō’ē peresideni feiā ’āpī tamāhine e nehenehe e rave i roto i te ’āpo’ora’a a te feiā ’āpī tamāhine. Te ’episekōpo ana’e tē nehenehe e tāvini ’ei ha’avā, teie atu mau feiā fa’atere e ti’a ato’a ia rātou ’ia fāri’i i te heheura’a nō te ra’i mai nō te tauturu ia rātou ’ia pāhono i te mau fifi ’aita e tītauhia te hō’ē ha’avā, ’aore rā, te mau fifi e ’ere i te hāmani-’ino-ra’a.11

’Aita te reira e parau ra ē, e’ita ’aore rā ’eiaha te hō’ē feiā ’āpī tamāhine e paraparau i te ’episekōpo ’aore rā i tōna nā metua. Te feiā ’āpī tā rātou fa’atumura’a ! Te aura’a maori rā, e nehenehe te hō’ē feiā fa’atere feiā ’āpī tamāhine e pāhono maita’i a’e i te mau hina’aro o te hō’ē feiā ’āpī tamāhine. Hō’ē ā māna’ona’ora’a tō te ’episekōpora’a nō te feiā ’āpī tamāhine ’e nō te feiā ’āpī tamāroa; terā rā, ’ua ’ite rā mātou i te pūai nō roto mai i te feiā fa’atere feiā ’āpī tamāhine, tō rātou pūai, tō rātou itoito, ’e te mana’o tumu, tei here ’e tei arata’i, ma te haru ’ore i te mau ’ohipa a te mau peresidenira’a pupu, ’ua tauturu rā ’ia manuia te feiā ’āpī i roto i te reira mau ’ohipa.

E fa’a’ite atu te tuahine Cordon i te tahi atu mau tauira’a fa’ahiahia nō te feiā ’āpī tamāhine i teie pō. Terā rā, tē fa’a’ite atu nei au ē, e fa’atae te mau peresideni feiā ’āpī tamāhine nō te pāroita i te parau fa’a’ite, ’e e paraparau ’āfaro roa atu rātou i te ’episekōpo o te pāroita. I mūta’a ra, e nehenehe teie ’ohipa e hōro’ahia i te hō’ē tauturu, i teienei rā, e riro te feiā ’āpī tamāhine ’ei hōpoi’a tumu nā te ta’ata tei mau i te mau tāviri fa’atere nō te pāroita. E tāmau noa ato’a te peresideni nō te Sōtaiete Tauturu i te fa’atae i te parau fa’a’ite i te ’episekōpo ra.12

I roto i te fa’aterera’a rahi ’e i te titi, e vai noa ā te mau peresidenira’a feiā ’āpī tamāroa. I roto i te titi, e riro te hō’ē melo ’āpo’ora’a teitei ’ei peresideni nō te feiā ’āpī tamāroa12 ’e riro ato’a ’oia ’e nā melo ’āpo’ora’a teitei ha’apa’o i te feiā ’āpī tamāhine ’e te Paraimere, ’ei tuha’a nō te tōmite autahu’ara’a a Aarona–Feiā ’Āpī Tamāhine o te titi. E ’ohipa teie mau taea’e ’e te peresidenira’a o te Feiā ’Āpī Tamāhine nō titi i roto i teie tōmite. Nā te hō’ē tauturu o te peresideni titi e peresideni i teie tōmite, ’e e faufa’a rahi tō teie tōmite i te mea ē, e rave rahi o te mau fa’anahora’a ’e te mau fa’a’oa’oara’a i roto i te fa’anahora’a ’āpī a te mau tamari’i ’e te feiā ’āpī, e tupu ïa i roto i te titi.

I raro a’e i te fa’aterera’a a te peresidenira’a titi, e nehenehe teie mau melo o te ’āpo’ora’a teitei, e ’ohipa ’ei rāve’a tauturu nō te ’episekōpo ’e nō te mau pupu o te Autahu’ara’a a Aarona, mai tei ravehia e te mau melo o te ’āpo’ora’a teitei i roto i te mau pupu peresiputero o te pāroita.

E tāvini ato’a te tahi atu melo o te ’āpo’ora’a teitei ’ei peresideni nō te ha’api’ira’a sābati nō te titi, ’e, mai te mea e hina’arohia, e nehenehe e tāvini i roto i te tōmite autahu’ara’a a Aarona–feia ’āpī tamāhine nō te titi.14

E fa’ata’ahia atu te tahi atu mau tauira’a i roto i te mau ha’amāramaramara’a o te fa’ataehia atu i te feiā fa’atere. Te reira mau tauira’a tei roto :

  • E monohia te putuputura’a a te tōmite ’episekōpora’a a te feiā ’āpī e te hō’ē ’āpo’ora’a pāroita nā te feiā ’āpī.

  • E fa’a’orehia te parau « Mutual » (te tahi ’e te tahi), ’e e riro mai ’ei « ’Ohipara’a a te feiā ’āpī tamāhine », « ’Ohipara’a a te pupu Autahu’ara’a a Aarona », ’aore rā, « ’Ohipara’a a te feiā ’āpī » ’e ’o te fa’atupuhia i te mau hepetoma ato’a, i te mau vāhi e nehenehe.

  • E vāhihia te faufa’a moni nō te mau ’ohipara’a a te feiā ’āpī i rotopū i te mau pupu feiā ’āpī tamāroa ’e feiā ’āpī tamāhine, mai te au i te rahira’a o te feiā ’āpī i roto i te pupu tāta’itahi. E hōro’ahia te hō’ē tuha’a moni na’ina’i, ’ia nava’i rā nō te mau ’ohipara’a a te Paraimere.

  • I te mau fāito ato’a—pāroita, titi, ’e te fa’aterera’a rahi—e fa’a’ohipa tātou i te ta’o « fa’anahonahora’a » ’eiaha ra te « pupu tauturu ». Te feiā e fa’atere i te mau fa’anahonahora’a nō te Sōtaiete Tauturu rahi, Feiā ’Āpī Tamāhine, Feiā ’Āpī Tamāroa, Paraimere ’e Ha’api’ira’a Sābati, e parauhia rātou ’ei « Ti’a Fa’atere Rahi ». O rātou ’o te arata’i i te mau fa’anahonahora’a i roto i te pāroita ’e te titi, e parauhia rātou e « ti’a fa’atere pāroita » ’e e « ti’a fa’atere titi ».15

Te mau fa’atanora’a i fa’a’itehia i teie mahana, e nehenehe e ha’amata i te taime e ineine ai te mau ’āma’a, te mau pāroita, te mau mata’eina’a ’e te mau titi, terā rā, ’ia mau te reira i te 1 nō Tēnuare 2020. Teie mau tauira’a, ’āmuihia i te mau tauira’a i mua ra, e riro ïa ’ei tūtavara’a pae vārua ’e pae fa’anahonahora’a, tei tū’ati i te ha’api’ira’a tumu nō te ha’amaita’i ’e nō te ha’apūai i te tāne, te vahine, te feiā ’āpī, ’e te tamari’i tāta’itahi, ma te tauturu i te ta’ata tāta’itahi ’ia pe’e i te hi’ora’a o tō tātou Fa’aora, o Iesu Mesia, a haere ai tātou nā ni’a i te ’ē’a o te fafaura’a.

E te mau taea’e ’e te mau tuahine here, tē fafau atu nei au ’e tē fa’a’ite pāpū atu nei au ē, teie mau fa’atanora’a, i raro a’e i te fa’aterera’a a te hō’ē peresideni fa’auruhia ’e te hō’ē peropheta, Russell M. Nelson, e ha’apūai te reira ’e e ha’apūai ho’i i te melo tāta’itahi o te ’Ēkālesia. E fa’atupu tō tātou feiā ’āpī i te fa’aro’o rahi a’e i roto i te Fa’aora, e pāruruhia rātou i te mau fa’ahemara’a a te ’enemi, ’e e ti’a rātou ma te ineine nō te fa’aruru i te mau tītaura’a o te orara’a. Nā roto i te i’oa mo’a o Iesu Mesia, ’āmene.

Fa’ata’ara’a

  1. Russell M. Nelson, i roto « Latter-day Saint Prophet, Wife and Apostle Share Insights of Global Ministry », Newsroom, 30 nō ’Ātopa 2018, newsroom.ChurchofJesusChrist.org.

  2. Ta’a’ē atu i te reira, ’ua tūtava ta’a ’ē ’outou nō te fa’a’ohipa i te i’oa ti’a o te ’Ēkālesia mai tei ha’api’ihia mai e te peresideni Russell M. Nelson, ’e nō te ha’amana’o i tō tātou Fa’aora ma te here ’e te fa’atura.

  3. « Ei melo nō te ’Ēkalesia, ’ua pi’ihia tātou ‘’ia rave i te ’ohipa i roto i tāna ra ō vine nō te fa’aorara’a i te mau vārua o te ta’ata nei’ (Te Parau Ha’api’ira’a ’e te mau Parau Fafau 138:56). Teie ’ohipa nō te fa’aorara’a tei roto te ’ohipa misiōnare a te mau melo, te tāpe’ara’a mai i te feiā fa’afāriu, te fa’aitoitora’a i te mau melo paruparu, te ’ohipa hiero ’e te ’ohipa ’ā’amu ’utuāfare ’e te ha’api’ira’a i te ’evanelia. Nā te ’episekōpora’a e fa’atere i teie ’ohipa i roto i te pāroita, tauturuhia ’e te tahi atu mau melo ’o te ’āpo’ora’a pāroita » (Buka arata’i 2 : Te fa’aterera’a i te ’Ēkālesia, 5.0, ChurchofJesusChrist.org).

  4. ’Ei feiā fa’atere, tē here nei mātou i te mau melo o te ’Ēkālesia a Iesu Mesia i te Feiā Mo’a i te mau Mahana Hope’a nei nō tō ’outou maita’i ’e tō ’outou ti’ara’a pipi. Tē fa’ahanahana nei mātou i te mau ta’ata, te mau metua vahine, te mau metua tāne, te feiā ’āpī ’e te mau tamari’i ’o tē haere nei nā ni’a i te ’ē’a o te fafaura’a—ma te ha’apa’o ’e te ’oa’oa.

  5. I roto i te matahiti 2019, ’ua ha’amata te mau diakono 11 matahiti i te ’ōpere i te ’ōro’a mo’a, ’e ’ua fāri’i te feiā ’āpī tamāhine ’e te feiā ’āpī tamāroa 11 matahiti i te parau fa’ati’a nō te hiero tā’ōti’ahia. I te matahiti i ma’iri a’e nei, ’ua ani te peresideni Nelson i tō tātou feiā ’āpī tamāroa ’e feiā ’āpi tamāhine ’ia riro ’ei tuha’a nō te hō’ē nu’u feiā ’āpī nō te ha’aputuputu ia Iseraela i ha’apūrarahia i nā pae e piti o te pāruru (hi’o « Hope of Israel » [purera’a nā te feiā ’āpī, ’ati a’e te ao nei, 3 nō Tiunu 2018], HopeofIsrael.ChurchofJesusChrist.org). E mea fa’ahiahia te pāhonora’a.

    Te tāvini nei te mau misiōnare rave tāmau i teie nei ma te ta’a ’ē mau, i te matahiti ’āpī a’e. Mai te 6 nō ’Ātopa 2012, ’ua ti’a i te feiā ’āpī tamāroa ’ia tāvini i te 18 matahiti ’e te feiā ’āpī tamāhine i te 19 matahiti.

  6. « Te ’ohipa ato’a nō te peresideni i ni’a i te autahu’ara’a a Aarona ra o te fa’aterera’a ïa i ni’a i te mau tahu’a, ’e ’ia pārahi i roto i te ’āpo’ora’a i pīha’i iho ia rātou ra, ’ia ha’api’i atu ia rātou i te mau ’ohipa nō tō rātou tōro’a. Teie nei peresideni ’ei ’episekōpo ïa ’oia; nō te mea o te hō’ē ’ohipa te reira nō teie nei autahu’ara’a » (Te parau ha’api’ira’a ’e te mau parau fafau 107:87–88).

  7. E pi’i-ato’a-hia te feiā fa’atere pa’ari ’ei mau ta’ata ’aravihi nō te pupu autahu’ara’a a Aarona nō te tauturu i te mau fa’anahora’a ’e te mau ’ohipara’a, ’e nō te haere i roto i te mau putuputura’a a te pupu, ’ia nehenehe i te ’episekōpora’a ’ia fārerei tāmau noa i te mau piha Feiā ’Āpī Tamāhine ’e te mau ’ohipara’a ’e i te tahi taime, e fārerei i te Paraimere. E nehenehe te tahi feiā ’aravihi e pi’ihia nō te tauturu i te hō’ē ’ohipa ta’a ’ē, mai te pūhapara’a; e nehenehe te tahi atu e pi’ihia nō te hō’ē tau roa, nō te tauturu i te mau tauturu ha’amāramarama o te pupu autahu’ara’a. E tītauhia i te mau taime ato’a ’ia pārahi e piti ta’ata pa’ari i roto i te putuputura’a a te pupu tāta’itahi, te fa’anahora’a ’aore rā, te ’ohipara’a. ’A taui ai te mau ’ohipa ’e te mau ti’ara’a, ’eiaha tātou e tīa’i ’ia fa’aitihia te rahira’a ta’ata pa’ari tāne e tāvini ’e e pāturu i te mau pupu autahu’ara’a a Aarona.

  8. Russell M. Nelson, « Te mau ’ite, te mau pupu o te Autahu’ara’a a Aarona ’e te mau piha feiā ’āpī tamāhine », Liahona, Novema 2019; hi’o ato’a Ezra Taft Benson, « To the Young Women of the Church »,, Ensign, Novema 1986.

  9. Tē parau ato’a nei mātou i te mau ’episekōpo ’ia hōro’a rahi atu i te taime i roto i te mau melo feiā ’āpī pa’ari ’ōtahi ’e tō rātou iho ’utuāfare.

  10. Jeffrey R. Holland, putuputura’a nā te feiā fa’atere nō te ’āmuira’a rahi, ’Ēperēra 2018; hi’o ato’a « Aupurura’a manuia », ministering.ChurchofJesusChrist.org. ’Ua ha’api’i mai o Elder Holland ē, te mau hōpoi’a ’aita te episekōpo e hōro’a, maori rā, te peresidenira’a i ni’a i te mau pupu autahu’ara’a a Aarona ’e te feiā ’āpī tamāhine, te rirora’a ’ei ha’avā, te ha’apa’ora’a i te faufa’a moni ’e te mau ’ohipa pae tino a te ’Ēkālesia, ’e te utuutura’a i te feiā veve ’e te nava’i ’ore. E nehenehe te peresidenira’a o te pupu peresibutero ’e o te Sōtaiete Tauturu ’e te tahi atu, e amo i te hōpoi’a tumu o te ’ohipa misiōnare, te hiero ’e te ’ā’amu ’utuāfare, te maita’i ’o te ha’api’ira’a i roto i te pāroita, ’e te ha’apa’ora’a ’e te aupurura’a i te mau melo o te ’Ēkālesia.

  11. Ta’a ’ē atu te mau ’ohipa o te tītau i te mau tāviri a te hō’ē ha’avā, tītauhia i te mau ’episekōpo ’ia fa’atītī’aifaro i te mau fifi o te mau huru hāmani-’ino-ra’a ato’a, ’ia au i te arata’ira’a ture a te ’Ēkālesia.

  12. E tāmau noa ato’a te peresideni nō te Sōtaiete Tauturu titi i te fa’atae i te parau fa’a’ite i te peresideni titi.

  13. E nehenehe te mau tauturu o te peresideni o te Feiā ’Āpī Tamāroa nō te titi e pi’ihia i roto i te mau melo o te titi ’aore rā, mai te mea e tītauhia, e nehenehe te melo o te ’āpo’ora’a teitei ha’apa’o i te feiā ’āpī tamāhine ’e te melo o te ’āpo’ora’a teitei ha’apa’o i te Paraimere.

  14. E hōpoi’a faufa’a tā te taea’e e tāvini ’ei peresideni nō te Ha’api’ira’a Sābati i roto i te fa’anahora’a ha’api’ira’a nā te feiā ’āpī, i roto e piti sābati i te ’āva’e tāta’itahi.

  15. Te mau peresidenira’a nō te Sōtaiete Tauturu, te Feiā ’Āpī Tamāhine, te Feiā ’Āpī Tamāroa, te Ha’api’ira’a Sābati, ’e te Paraimere i roto i te fa’aterera’a rahi ’e i roto i te titi, e parauhia rātou e ti’a fa’atere rahi ’aore rā e ti’a fa’atere titi. I roto i te pāroita, nā te ’episekōpora’a e fa’atere i te feiā ’āpī tamāroa, nō reira, e ’ere te mau tauturu ha’amāramarama nō te feiā ’āpī tamāroa i te ti’a fa’atere nō te pāroita.