Alolofa Atu i Ē Ita Mai ia te Outou

O aoaoga a le Alii e mo le faavavau ma mo fanau uma a le Atua. I le savali lenei, o le a ou avatu ai ni nai faataitaiga mai le Iunaite Setete, ae o mataupu faavae ou te aoao atu e faatatau i soo se mea.

Ua tatou ola i se taimi o le ita ma le inoino i sootaga faaupufai ma aiaiga faavae. Na tatou lagonaina i lenei taumafanafana i nofoaga ia na tia’i ai e nisi ia solotetee filemu ae auai i amioga faataumaoi. Ua tatou lagonaina i nisi o faatosina i le taimi nei mo tofi faalemalo. O nisi o nei mea ua masua atu i ni faamatalaga faapolokiki ma lafoga le lelei i totonu o a tatou sauniga/fonotaga faale-Ekalesia.

I se malo faatemokarasi, o le a i ai pea lava o tatou eseesega i tagata tauva e faatutu mai ma aiaiga faavae. Peitai, i le avea ai ma soo o Keriso, e tatau ona tatou faate’a ese le ita ma le inoino pe o a filifiliga faaupufai o finauina pe faitioina i soo se faatulagaga.

O se tasi lenei o aoaoga a le Faaola, atonu e lauiloa tele ae e seāseā ona faatinoina:

“Ua outou faalogo, na fai mai, Ia e alofa atu i le lua te tuaoi, a ia inoino i le ua ita mai ia te oe.

“Ae Ou te fai atu a’u ia te outou, ia outou alolofa atu i ē ua ita mai ia te outou, faamanuia i ē ua fetuu mai ia te outou, ia agalelei atu i ē ua inoino mai ia te outou, ma tatalo foi mo ē ua tuua’i fua mai ma faasaua mai ia te outou” (Mataio 5:43–44). ¹

E tele augatupulaga na aoaoina ai Iutaia ia inoino i o latou fili, ma o lea sa latou mafatia ai i na taimi i lalo o puleaga ma sauaga faakolone a Roma. Ae, na aoao i latou e Iesu ia “alolofa i ē ua ita mai ia te outou” ma “agalelei atu i ē … inoino mai ia te outou.”

Oka ni aoaoga faataamilosaga mo sootaga patino ma faaupufai! Ae o le mea lava lea o loo poloai mai ai lo tatou Faaola. I le Tusi a Mamona ua tatou faitau ai, “Aua e moni, e moni ou te fai atu ia te outou, o le ua i ai le agaga o le finauga e le mai ia te a’u lea, a e mai le tiapolo, o le tama lea o finauga, ua ia faaosoina foi loto o tagata e fefinauai ma ita” (3 Nifae 11:29).

O le alofa i ē ita mai ma o tatou fili e le faigofie. “O le toatele o i tatou e le’i oo i lena tulaga o le … alofa ma le lotofaamagalo,” na saunoa i ai Peresitene Hinckley, “E manaomia ai le lotopulea e toetoe lava sili atu i lo le mea tatou te mafaia.” ² Ae e tatau ona manaomia, aua o se vaega lena o poloaiga sili e lua a le Faaola ia “alofa atu i le Alii lou Atua” ma ia “alofa atu i le lua te tuaoi e pei o oe lava ia te oe” (Mataio 22:37, 39). E tatau foi ona mafaia, aua na Ia aoao mai foi, “Ia outou ōle atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu ona toina ai lea ia te outou” (Mataio 7:7). ³

E faapefea ona tatou tausia nei poloaiga faalelagi i se lalolagi lea foi e noatia ai i tatou i tulafono a le tagata? O le mea e lelei ai, ua ia i tatou faataitaiga a le Faaola lava Ia i le ala e faapaleni ai Ana tulafono e faavavau ma le talafeagai foi o tulafono e fai e tagata. Ina ua taumafai Ona fili e maileia o Ia i se fesili pe tatau i tagata Iutaia ona totogi lafoga i Roma, na Ia tusi i le ata o Kaisara i luga o a latou tupe siliva ma fetalai atu: “O mea a Kaisara ia outou avatu ia Kaisara: o mea a le Atua avatu ia i le Atua” (Luka 20:25 ⁴

O lea, e ao ai ona tatou mulimuli i tulafono a tagata (avatu ia Kaisara) ina ia nofo filemu ai i lalo o le pule faalemalo, ma ia tatou mulimuli i tulafono a le Atua e agai atu i lo tatou taunuuga e faavavau. Ae pe faapefea ona tatou faia lenei mea—aemaise pe faapefea ona tatou aoao ia alolofa i o tatou fili ma ē ita mai ia i tatou?

O le aoaoga a le Faaola ia aua ne’i “fefinaua’i ma ita” o se laasaga lelei muamua lea. O le tiapolo o le tama o finauga, ma o ia foi e faaosoina tagata ia fefinaua’i ma le ita. Na te faalauiloaina le feitaga’i ma sootaga feinoinoa’i i tagata ma i totonu o vaega. Na aoao mai Peresitene Thomas S. Monson e faapea o le ita o le “meafaigaluega a Satani,” aua “o le ita o le gauai atu lea i faatosinaga a Satani. E leai se tasi e mafai ona faia tatou ia ita. O la tatou lava filifiliga.” ⁵ O le ita o le ala lea i fevaevaea’iga ma le feitaga’i. Tatou te agai atu i le alolofa i o tatou fili pe a tatou aloese mai le ita ma o ese mai le faataute’e ia i latou tatou te le malilie i ai. E fesoasoani foi pe afai tatou te naunau e aoao mai ia i latou.

Faatasi ai ma isi auala e atia’e ai le mana e alolofa ai i isi o loo i ai le metotia faigofie lea na faamatalaina i upu o se tala faamusika o aso la ua leva. Pe a tatou taumafai ia malamalama ma faafesootai atu i tagata o se aganuu ese, e ao ona tatou taumafai ia iloa i latou. I tulaga e le masino, e faaofiofi atu ai lava le masalosalo o tagata ese po o le faataute’e i faigauo pe e oo lava i le alofa pe a fua mai i fesootaiga patino le malamalama ma le faaaloalo masani. ⁶

E i ai se fesoasoani sili atu e aoao ai ia alofa i o tatou fili ma ē ita mai, o le saili lea ia malamalama i le mana o le alofa. O ni aoaoga faaperofeta nei se tolu e uiga i lenei mea:

Na aoao mai le Perofeta o Iosefa Samita: “o se anaga ua loa e faapea o le alofa e fanau mai ai le alofa. Inā tatou liligi atu ia le alofa—faaali atu lo tatou agalelei i tagata uma.” ⁷

Na aoao mai Peresitene Howard W. Hunter: “O le a manuia tele le lalolagi o loo tatou ola ai pe afai o le a faatino e alii ma tamaitai i soo se mea, le alofa le pona o Keriso, o le agalelei, agamalu, ma le lotomaualalo. E le lotoleaga pe faamaualuga. … Na te le sailia se taui. … “E leai se avanoa mo le faasausili, inoino, po o le saua. … E uunaia ai tagata eseese e nonofo faatasi i le alofa faaKerisiano tusa lava po o a talitonuga faalelotu, lanu, tagatanuu, tulaga tautupe, tulaga faaleaoaoga, po o aganuu.” ⁸

Ua uunaia i tatou e Peresitene Russell M. Nelson “ina ia faalautele lo tatou li’o o le alofa e opo mai ai le aiga atoa o tagata.” ⁹

O se vaega taua o le alofa i ē ita mai o le avatu lea o mea a Kaisara e ala i le tausiga o tulafono a o tatou atunuu eseese. E ui o aoaoga a Iesu e tetee i mea sese, ae Na te le’i aoao maia le fouvale po o le solia o tulafono. Sa Ia aoao maia se ala e sili atu. Ua aoao mai foi e faaaliga i ona po nei lea lava mea e tasi.

“Ia lē tuu atu i se tagata ia soli e ia le tulafono o le laueleele, ona o ia o lē e tausia tulafono a le Atua e leai se mea e manaomia ai e ia ona soli o tulafono o le laueleele.

O le mea lea, ia tuu atu outou i lalo o pule ua i ai” (Mataupu Faavae ma Feagaiga 58:21–22).

Ma o la tatou mataupu faavae o le faatuatua, na tusia e le Perofeta o Iosefa Samita ina ua mavae le pagatia o uluai Paionia i sauaga ogaoga mai taitai o Misuri, o loo tautino mai: “Matou te talitonu i le usiusitai i tupu, ma peresitene, ma faipule, ma faamasino, i le usiusitai ma faamamalu ma lagolagoina le tulafono” (Mataupu Faavae o le Faatuatua 1:12).

E le faapea ai la tatou te ioe i mea uma ua faia i le malosiaga o le tulafono. O lona uiga tatou te usiusitai i le tulafono o i ai nei ma faaaoga auala filemu e sui ai. O lona uiga foi ia tatou talia filemu ia taunuuga o faigapalota. O le a tatou le auai i ni vevesi e taufaamata’u mai e i latou ua le fiafia i le taunuuga. ¹⁰ I se sosaiete faatemokarasi, tatou te maua pea lava le avanoa ma le tiute e tumau ai pea ma le fifilemu seia oo foi i le isi faigapalota.

O le aoaoga a le Faaola ia alolofa i ē ita mai e faavae i luga o le mea moni e faapea, o tagata uma o ni fanau faapelepele a le Atua. O lena mataupu faavae e faavavau ma nisi o mataupu faavae autu o le tulafono, sa tofotofoina i solotetee talu ai nei i le tele o aai o Amerika.

I se tasi tulaga matuia, sa foliga mai na galo i nisi le Suiga Muamua i le Tulafono Faavae a le Iunaite Setete e faamaonia ai le “aia tatau a tagata e faapotopoto filemu ai ma talosagaina ai le Malo mo se vaifofo i faitioga.” O le ala faatagaina lea e faalauiloa faalaua’itele ai ma taulai atu i mea lē tonu i le ‘anotulafono po o le faatautaiga o tulafono. Ma sa i ai le lē amiotonu. I faatinoga faalaua’itele ma i o tatou uiga faaalia faaletagata lava ia, sa i ai lo tatou faailoga lanu ma faitioga e faatatau i ai. I se tusigatala patino faatauanau, na faamanatu mai ai e le Faifeau ia Theresa A. Dear o le Asosi Faalemalo mo le Atina’ega o Tagata Lanu (NAACP) ia i tatou e faapea “o le faailoga lanu e mafi tele i le inoino, pule saua, gauai gofie, le popole ma le lē faaalia o manatu.” ¹¹ I le avea ai tagatanuu ma tagata O Le Ekalesia a Iesu Keriso o le Au Paia o Aso e Gata Ai, e tatau ona tatou faia mea e sili atu e fesoasoani ai e tafiese atoa le faailoga lanu.

I se isi tulaga matuia, o se vaega toaitiiti o ē na auai ma ē na lagolagoina nei solotetee ma faatinoga faasolitulafono ia na sosoo ai, e foliga mai ua galo ia i latou o solotetee e puipuia e le Tulafono Faavae, o solotetee filemu ia. E leai se aia tatau o i tagata solotetee e susunu ai, faaleaga, pe gaoia meatotino pe faamāina ai le malosiaga faaletulafono o leoleo o le malo. E le o i ai i le Faavae ma tulafono se valaaulia i se fouvalega po o se faatafunaga o le tulafono. O i tatou uma lava—leoleo, au solotetee, au lagolago, ma le au matamata—e tatau ona malamalama i tapulaa o a tatou aia tatau ma le taua o o tatou tiute e nonofo i totonu o tuaoi o le tulafono o i ai. Na sa’o lelei Aperaamo Linikone ina ua ia saunoa: “E leai se faitioga po o se faafitauli e talafeagai mo le foiaina e tulafono a tagata leaga. ¹² O le foiaina o faitioga ma faafitauli e tagata leaga, o le foiaina lea i ala faasolitulafono. O le faatafunaga lena o le tulafono, o se tulaga e leai ni pulega aoga ma e leai foi ni leoleo mamalu, ma e faamaina ai nai lo le puipuia ai o aia tatau a tagata taitoatasi.

O se tasi mafuaaga mo le tele o solotetee talu ai nei i le Iunaite Setete sa faate’ia ai le toatele, o le fevataua’i ma faiga faasolitulafono na lagonaina e ituaiga eseese i isi atunuu, e le tatau ona lagonaina i totonu o le Iunaite Setete. Ua tatau ona sili atu lenei atunuu i le tafiesea o le faailoga lanu, e le gata e faasaga i Amerika Uli, o ē na sili ona iloagofie i solotetee talu ai nei, ae faapea foi e faasaga i le au Latina, tagata Asia, ma isi vaega. O le talafaasolopito o lenei atunuu e uiga i le faailoga lanu, e le o se tala fiafia ma ua tatau ona lelei atu mea tatou te faia.

O le Iunaite Setete na faavae e tagata fāi mai i totonu mai atunuu eseese ma ituaiga eseese. O lona faamoemoega soofaatasi e le o le atia’eina o se faatuatuaga faapitoa pe faaauau pea ni aganuu eseese po o le lotonuu faaleituaiga o atunuu tuai. Sa saili o tatou augatuaa sa faavaeina [le malo], ina ia aufaatasi i se faavae fou ma tulafono. E le faapea ai la, o a tatou faamaumauga tusitusia soofaatasi po o le malamalama i lena taimi i o latou faauigaga na atoatoa. O le talafaasolopito o seneturi muamua e lua o le Iunaite Setete, sa faaalia ai le manaomia o le tele o teuteuga, e pei o aia tatau e palota ai mo tamaitai ma, patino lava i le faamutaina o le faia o pologa e aofia ai tulafono e faamautinoa ai o i latou na faapologaina e ao ona mauaina tulaga uma o le saolotoga.

Na faamanatu mai talu ai nei e ni sikola se toalua o le Iunivesite o Yale:

“E ui ina tele ona lape, ae o le Iunaite Setete ua tulagaese lona faa’au’upegaina e tuufaatasia se sosaiete e eseese aganuu ma fevaevaeai. …

“… E le tau filifilia e ona tagatanuu pe o le faasinomaga faaleatunuu po o aganuu eseese e tele. E mafai e tagata Amerika ona filifili mea uma e lua. Ae o le ki o le lotonuu faalefaavae. E tatau ona tumau lo tatou lotogatasi e ala i le Faavae, tusa lava po o a ō tatou eseesega i manatu.” ¹³

I le tele o tausaga ua mavae, sa tuuina atu ai e se failautusi o le va i fafo a Peretania le fautuaga maoae lenei i se finauga o manatu felafoai i le Maota o Tagata Lautele: “E leai ni a tatou paaga faavavau ma e le tumau foi ni o tatou fili. O o tatou naunauga e faavavau ma e tumau, ma o nei foi naunauga o lo tatou tiute lea e mulimuli ai.” ¹⁴

O se mafuaaga lelei lea faalelalolagi mo le mulimuli ai i naunauga “faavavau ma tumau” i mataupu faaupufai. Ma le isi, o le aoaoga faavae a le Ekalesia a le Alii ua tatou aoaoina ai se isi naunauga faavavau e taiala ai i tatou: o aoaoga a lo tatou Faaola o le sa musuia le Faavae o le Iunaite Setete ma tulafono faavae a le tele o o tatou atunuu. O le lotonuu i tulafono ua faavaeina nai lo “paaga” lē tumau o le ala sili lava lea e alolofa atu ai i o tatou fili ma ē ita mai ia i tatou a o tatou sailia le lotogatasi i le eseesega o tagata ma aganuu.

O le iloa ai o i tatou uma o fanau a le Atua, tatou te maua ai se vaaiga mamao faalelagi i le taua o isi tagata uma, ma le loto ma le tomai e faatoilalo ai le faailoga tagata ma le faailoga lanu. E pei ona ou ola ai mo le tele o tausaga i nofoaga eseese i lenei malo, na aoao mai ai a’u e le Alii e faapea, e mafai ona usiusitai ma saili atu e faaleleia atili tulafono a lenei atunuu ma ia alolofa foi i o tatou fili ma ē ita mai ia i tatou. E ui e le faigaofie, ae e mafai faatasi ma le fesoasoani a lo tatou Alii o Iesu Keriso. Na Ia tuuina mai lenei poloaiga ia alofa atu, ma Ia folafola maia Lana fesoasoani pe a tatou saili atu e usiusitai. Ou te molimau atu e alofagia i tatou ma o le a fesoasoani mai lo tatou Tama Faalelagi ma Lona Alo, o Iesu Keriso. I le suafa o Iesu Keriso, amene.