Ole Atu, Saili, ma Tuitui Atu

Ina ua asiasi atu le Faaola i Amerika ina ua mavae Lona Toetu, sa Ia toe faia se valaaulia lea na Ia tuuina atu i Ona soo i Kalelaia. Sa Ia fetalai:

“Ole atu, ma o le a to mai ia te outou; saili, ma o le a outou maua; tuitui atu, ma o le a tatala mai ia te outou.

“Aua o i latou uma e ole atu, e to mai i ai; ma o ia o le e saili, e maua e ia; ma o le e tuitui atu, o le a tatala mai ia te ia” (3 Nifae 14:7–8; tagai foi i le Mataio 7:7–8).

Na tuuina mai foi e lo tatou perofeta, o Peresitene Russell M. Nelson, se valaaulia talitutusa i o tatou aso. Na ia saunoa: “Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau. Fa’amaumau i lalo ou lagona ma tulitatao i fa’atinoga e uunaia oe e fai. A e faia pea lenei faagasologa i lea aso ma lea aso, masina ma lea masina, tausaga ma lea tausaga, o le a e ‘ola ai i le mataupu faavae o faaaliga.’”²

Na faaopoopo mai Peresitene Nelson, “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga mafanafana a le Agaga Paia.”³

Aisea e taua tele ai faaaliga i lo tatou ola ai faaleagaga? Aua e mafai ona le mautonu ma pisapisao le lalolagi, tumu i le taufaasese ma faalavefau. O fesootaiga ma lo tatou Tama o i le Lagi tatou te mafai ai ona iloa le mea moni ma le mea pepeplo, le mea e fesootai i le fuafuaga a le Alii mo i tatou ma le mea e leai. E mafai foi ona saua ma lotonutimomoia le lalolagi. Ae pe a tatou tatalaina o tatou loto i le tatalo, o le a tatou lagona le toafimalie lea e oo mai mai lo tatou Tama oi le Lagi ma le faamautinoaga e alofa o Ia ia i tatou ma faatauaina i tatou.

Na fetalai mai le Alii “o i latou uma e ole atu, e to mai i ai.” O le ole atu e foliga faigofie, ae e malosi ona e faaali atu ai o tatou manaoga ma lo tatou faatuatua. Peitai, e manaomia ai le taimi ma le onosa’i e aoao ai ia iloa le siufofoga o le Alii. Tatou te gauai atu i manatu ma lagona lea e oo mai i o tatou mafaufau ma loto, ma tusia i latou i lalo, e pei ona fautuaina ai i tatou e lo tatou perofeta ia faia. O le tusiaina o o tatou lagona o se vaega taua o lo tatou mauaina. E fesoasoani tatou te toe manatua ai, iloilo, ma toe lagona mea o loo aoao maia i tatou e le Alii.

Talu ai nei na fai mai ai se e pele ia te a’u, “Ou te talitonu e moni faaaliga patino. Ou te talitonu o le a faaali mai e le Agaga Paia ia te a’u mea uma e tatau na ou faia.⁴ E faigofie le talitonu pe a mu lo’u loto i le tuuto le maluelue.⁵ Ae e faapefea ona ou faia ia talanoa mai e le aunoa le Agaga Paia ia te a’u i lenei tulaga?”

I e pele ia te a’u ma outou uma, ou te faapea atu ai ou te fia lagonaina pea na uunaiga malolosi mai le Agaga ma ia manino ai pea le vaai i le ala e mulimuli ai. Peitai e leai. Ae e ui i lea, o mea o loo tatou lagonaina soo o le leo itiiti ma le faatauvaa o le Alii o loo musumusu mai i o tatou mafaufau ma loto: “O loo Ou i ai iinei. Ou te alofa ia te oe. Faaauau pea; fai le mea sili. O le a ou lagolagoina oe.” Tatou te le manaomia i taimi uma le iloa o mea uma pe vaai i mea uma.

E faamautinoa, faamalosiau ma faatoafimalie e le leo filemu ma itiiti—ma o le tele o taimi pau lava na o mea tatou te manaomia mo le aso. E moni le Agaga Paia, ma moni Ana uunaiga—tetele ma itiiti.

Na folafola mai e le Alii, “O le e saili, e maua e ia.” O le saili e faatatau i taumafaiga faalemafaufau ma faaleagaga—mafaufau loloto, tofotofo, taumafai, ma le suesue. Tatou te saili aua tatou te faalagolago i folafolaga a le Alii. “Aua e tatau i le alu atu i le Atua ona talitonu o loo soifua o ia, o ia foi na te tauia mai o e matua saili ia te ia” (Eperu 11:6). Pe a tatou saili, ua tatou faailoa atu ma le agamaualalo e tele mea e manaomia tatou te aoaoina, ma o le a faalautele e le Alii lo tatou malamalama, e saunia i tatou ia maua atili. “Aua faauta, ua faapea ona fetalai mai o le Alii le Atua: Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o; … ona o ia o lē na te taliaina o le a Ou tuu atu atili i ai” (2 Nifae 28:30).

Ona fetalai mulimuli mai lea o le Alii, “O le e tuitui atu, o le a tatala mai ia te ia.” O le tuitui o le faatino lea i le faatuatua. Pe a tatou mulimuli ma le punouai ia te Ia, e tatala mai e le Alii le ala i o tatou luma. E i ai se viiga matagofie lea e aoao mai i tatou ia “ala ma fai se lelei nai lo le manao i manuia. O se fiafiaga, se faamanuiaga, se alofa, tiute, aogā.”⁶ Sa faamatala e Elder Gerrit W. Gong o le Korama a leToasefululua talu ai nei faapea e tele ina oo mai faaaliga a o tatou faatinoa ni mea lelei. Na ia saunoa, “Ao tatou taumafai e aapa atu i auaunaga ia i latou o siomia i tatou, ou te manatu e aumai ia i tatou e le Alii se fuataga sili o Lona alofa mo i latou ma faapea mo i tatou. Ou te manatu tatou te faalogo i Lona siufofoga—tatou te lagonaina o Ia i se ala ese—a’o tatou tatalo e fesoasoani ia i latou o siomia i tatou, ona o se tasi lena o tatalo e sili ona Ia finagalo e taliina.”⁷

O lena fautuaga faigofie i le Sau, Mulimuli Mai ia te A’u e mafaufau ai e uiga i a’u faamanuiaga na aumaia se agaga alofa ma ni vaaiga faaleagaga ia e le’i mafaufauina. Ao faaauau pea ona ou faitau e uiga ia Alema ma lana auaunaga i Amonaea, sa ou iloa ai na aumaia e Alema se faataitaiga lelei o le uiga o le ole atu, saili, ma tuitui atu. Ua tatou faitau ai “sa galue malosi Alema i le agaga, ma fagatua ma le Atua i le tatalo malosi, ma ia sasaa ifo lona Agaga i luga o tagata.” Peitai, sa le’i taliina lena tatalo i le ala na ia faamoemoe ai, ma sa tuliese Alema mai le aai. “O le mamafa o le faanoanoa i ona luga,” sa toetoe ai a faavaivai Alema, ae aveina atu loa e se agelu le savali lenei: “Amuia lava oe, Alema; o lea, inā ea ia i luga lou ulu ma olioli, ona ua ia te oe se pogai tele e te olioli ai.” Ona tau atu lea e le agelu ia te ia e toe foi i Amonaea ma toe taumafai, ma sa “vave ona toe foi atu” Alema.⁸

O a ni mea ua tatou aoao mai ia Alema e uiga i le ole atu, saili, ma tuitui atu? Ua tatou aoao e manaomia e le tatalo se galuega faaleagaga, ma e le taitai atu ai pea lava i taunuuga tatou te faamoemoe i ai. Ae pe a tatou lagona le faavaivai pe ua mamafatu i le faanoanoa, ua aumaia e le Alii ia i tatou le toafimalie ma le malosi i auala eseese. Atonu na te le taliina uma a tatou fesili pe foia uma a tatou faafitauli i le taimi lava lena; ae, na te uunaia i tatou e taumafai pea. Afai tatou te faaogatusa vave a tatou fuafuaga ma Lana fuafuaga, o le a Ia talaia le ala mo i tatou, e pei ona Ia faia mo Alema.