Aapko Aazaadi Milegi

Mere pyaare bhaaiyo aur bahano, hum bahut abhaari hai aaj aap log se Africa se baat kare ke saobhaagye ke liye. Ketna bada ashirwaad hai ki aaj technology hai aur uske istemaal sab se sahi dhang se kara jaawe aap sab tak pahunche ke liye.

September 2019 ke, Bahan Mutombo aur hum, jab Maryland Baltimore Mission ke agwaah raha, ke saobhaagye mila raha Girjaghar itihaas ke kuch jaghaaon me ghume ke Palmyra, New York me, ek mission leadership seminar jab giya raha. Hum log ke aakhri ghume la jagha raha Sacred(Pawitr) Grove. Hum log ih kaaran se Sacred Grove ghumo nahi giya ki ek khaas pradarshan ya ek drishye mile, par humne Parmeshwar ki upasthiti mehsoos kara. Hum log ke dil abhaar se bhar ge raha Profat Joseph Smith ke liye.

Laute la samay Bahan Mutombo dekhis ki hum gaadi chalaate samay bhaari se muskuraata hai, tab uh puchis, “Aapke josh ke kaaran konchi hai?”

Hum jawaab diya, “Hamaar pyaari Nathalie, sachchaai sab taaim galat ke haraai, aur Ishu Masih ke punahsthaapit susamachaar ke wajah se dhaarmik andhera dharti pe nahi tikega.”

Pita Parmeshwar aur Ishu Masih jawaan Joseph Smith ke darshan dees chupa hua ke prakaash ke saamne laae ke liye taaki hum log “uh sab ke gyaan paaega jaise uh hai, … jaise raha, aur jaise uh [aage chal ke rahi]” (Doctrine and Covenants 93:24).

200 saal se zyaada ke baad, dher jan ab bhi uh sachchaai khoje hai jisse kuch paramparaaon aur duniya bhar faelaae la shaetaan ke jhoot se aazaadi mile sake. Dher jan “insaan ke chaanlaaki se dhokha me reh jaawe” (Doctrine and Covenants 123:12). Ephesians ke paas bheja ge la apan Patr me, Paul sikhaais, “Apan neend se jaago, aur murda pan se jaago, aur tab Masih tumme prakaash dei” (Ephesians 5:14). Rakshak waada karis hai ki jo koi Uski baato ko sunega Woh un sab ke liye woh prakaash banega (dekhiye 2 Nephi 10:14).

Tees aur paanch saal pehle, hamaar maata-pita bhi insaan ke chaanlaaki se dhokha khaae ke sachchaai jaane mangta raha aur chintit raha ki uh-log ke kaise mili. Hamaar maata-pita dono gaaon me paeda hois raha, jahan ke parampara log mazboot raha har insaan aur pariwaar ke jiwan me. Uh-log dono apan gaaon chodh dees raha apan jawani ke samay aur shahar aais raha, ek behtar zindagi ke liye.

Uh-log shaadi karis aur apan pariwaar ek bahut saadhaaran tarika se shuru karis. Ek chota ghar me hum log lagbhag aath jan rehta raha—hamaar maata-pita, hamaar dui bahane aur hum, aur ek chachera bhaai jo hum-log ke saathe rehta raha. Uh taaim hum sochta raha kya hum log sachche ke ek pariwaar hai, kaae ki hum log ke maata-pita log ke sange baith ke khana khaae ke nahi milta raha. Jab hum log ke pitaji kaam se ghar aata raha, ghar me halte, hum log ke bola jaata raha bhaire jaao. Hum log bahut kamti sowe paata raha, kaae ki hum log ke maata-pita ke viwaah me madhurta aur sachcha pyaar kam tha. Khali hum log ke ghar chota nahi raha, lekin uh ek andhyaar jagah raha. Prachaarakon se mile se pehle, hum log har ek Raviwaar ke dusra dusra girjaghar jaata raha. Ayse lagta raha ki hum log ke maata-pita kuch aisan cheez khojta raha jon ih duniya nahi de sakta raha.

Ayse chalte raha jab tak hum-log Elder aur Bahan Hutchings se nahi mila, jon ek buzurg mishanari dampati raha Zaire me sewa kare bheja ge raha (jiske aaj Democratic Republic of Congo ya Congo-Kinshasa bola jaawe hai). Jab hum-log ih achcha mishanari log se mile ke shuru kara, jon Parmeshwar se bhejal farishta ke rakam raha, hum dekha ki hum-log ke pariwaar me kuch badle laga hai. Hum-log ke baptisma ke baad, punahsthaapit susamachaar ke wajah se sach me hum-log ek nawa rahan-sahan apnaae laga. Masih ke shabd se hum-log ke aatma badhe laga raha. Isse hum-log ke samajh me prakaash aaya aur uh hum-log ke sawaad lage laga, kaae ki jon sachchaai hum-log ke mila raha samjhe laaik raha aur hum log ke prakaash dikhaae laga raha, aur ih prakaash sab roj badhte ge.

Susamachaar ke ih kaae ke samajh hum-log ke aur zyaada Rakshak ke rakam banawe me madad kare laga raha. Hum-log ke ghar ke saaiz nahi badlis; na toh hum ke mile-jule la tarika. Lekin hum apan maata-pita ke dil me badlaao dekha jab hum-log sab roj, sabere aur sanjha praathna kare laga. Hum-log Mormon ki Pustak padhta raha; pariwaarik gharelu shaam sabha karta raha; hum sach me ek pariwaar ban giya. Sab Raviwaar ke hum log 6:00 baje sabere jagta raha girjaghar jaae ke taeyaari kare ke, aur sab hafta etna deri safar karke Girjaghar ke sabha me jaata raha bina koi shikayat kare. Ih ek ashcharyejanak anubhao raha bayaan kare ke. Hum-log, jon pehle andhyaara me chalta raha, apan beech se andhyaara bhagaae diya (dekhiye Doctrine and Covenants 50:25) aur “bahut bada prakaash” dekha (2 Nephi 19:2).

Hamme yaad hai ek roj sabere jab hum pariwaar praathna ke liye jaldi nahi jage mangta raha, hum apan bahano se dhire se bola, “Sachche ke ih ghar me aur koi cheez nahi sake howe, khali praathna, praathna, praathna.” Hamaar pitaji sab sunn lees raha. Hamme yaad hai uh konchi karis, jab uh pyaar se lekin sakhti se hamme sikhaais, “Jab tak aap ih ghar me rahega, aap praathna, praathna, praathna karega.”

Sab roj hamaar pitaji ke baat hamme yaad raha. Aap konchi sochta Bahan Mutombo aur hum aaj apan ladkan ke sange konchi karta hai? Hum-log praathna, praathna, aur praathna karta hai. Yahi hum-log ke viraasat hai.

Jon admi andha paida hois raha aur Ishu Masih ke haathon changaai paais raha, apan padosiyon aur Pharisees ke bahut puche ke baad, bolis:

“Ishu naam ke admi matti saan ke hamaar aankhi pe lagaais, aur humse bolis ki Siloam ke kund me jaae ke apan aankhi dhoe lo: aur hum wahan giya aur dhoya, aur hum dekhe laga. …

“… Ek baat jon [ki] hum janta [hai] uh hai ki,jabki hum andha raha, ab hum dekhe [sakta] hai” (John 9:11, 25).

Hum-log bhi andha raha aur ab dekhe sakta hai. Punahsthaapit susamachaar uh taaim se hum-log ke pariwaar ke prabhaawit karis hai. Susamachaar ke kaae ke samjhe se hamaar pariwaar ke teen peedhi ke ashish mila hai aur aane waale dher peedhi ke ashish dete rahi.

Ishu Masih uh prakaash hai jon andhera me chamke hai. Uh-log jon Uske piche aai “andhera me nahi chali, lekin jiwan ke jyoti mili” (John 8:12).

Lagbhag ek saal tak, 2016 aur 2017 ke beech, Kasai ilaake ke log ek bhaari musibat ke saamna karis. Uh ek bahut mushkil ke samay raha uh-log ke liye kaae ki parapaarik sipaahiyon aur shaasan ke sena ke beech dushmani raha. Ladaai Kasai-Mukhye Jile ke shaharon se shuru hoke pure Kasai ilaake me fael gaya. Dher jan apan gharo se bhaag ge raha surakshit rahe ke liye aur jangal me luk ge raha. Uh-log ke paas koi khaana ya paani ya maano kuch bhi nahi raha, aur uh-log me kuch Ishu Masih ka Girjaghar Antim-dino ke Santo ka ke Kananga ilaake ke sadasye the. Unme se kuch Girjaghar ke sadasye sena dwara maare gaye the.

Bhaai Honoré Mulumba jon Kananga me Nganza Ward ke raha aur uske pariwaar usme se thoda jan raha jon apan ghar me luka tha abhi tak, kaae ki uh-log nahi janta raha kahan jaao kaae ki sab rasta me bandook chalta raha. Ek roj pados ke kuch sena ke admi log jaan ge raha Bhaai Mulumba aur uske pariwaar wahan hai jab ek shaam uh log ge raha pariwaar la bagicha me shaak-bhaaji khoje khaae ke liye. Sena ke ek dal uh-log ke ghare aais aur phir uh-log ke jabran ghinch ke nikaalis aur batais sena ke kaaeda saho ya uh-log ke maar diya jaai.

Bhaai Mulumba nidarta se uh-log ke batais, “Hum Ishu Masih ka Girjaghar Antim-dino ke Santo ka ke ek sadasye hai. Hamaar pariwaar aur hum Ishu Masih ke apnaaya hai aur hum-log ke Uspe vishwaas hai. Hum-log apan vachano ke prati wafadaar rahenge aur mare ke swikaar karega.”

Sena uh-log ke batais, “Kaae ki tum log Ishu Masih ke chuna hai, tum log ke shareer kutta long khaai,” aur uh-log laute ke waada karis. Lekin uh-log kabhi nahi lautis, aur uh pariwaar wahan dui mahina rahis aur kabhi uh-log ke nahi dekhis. Bhaai Mulumba aur uske pariwaar apan vishwaas ke jyoti kaayam rakhis. Uh-log apan vachano ke yaad rakhis aur uh-log ke surakshit raha.

Ishu Masih uh jyoti hai jiske prati hum log maango wafadaar raho apan maransheel jiwan ke sabse mushkil ke samay me bhi (dekhiye 3 Nephi 18:24). Jab hum-log Masih ke rakam bane ke chunta hai, hum-log badle ke chunta hai. Jon purush ya mahila Masih ke liye badli uske aguwaa Masih bani, aur hum-log Paul ke rakam puchega, “Prabhu, uh konchi hai jon aap mangta hum kari?” (Acts 9:6). Hum-log “uske uddharan pe chalega” (1 Peter 2:21). Hum-log “uske bataya gaya rasta, pe chalega” (1 John 2:6). (Dekhiye Ezra Taft Benson, “Born of God,” Tambuli, Oct. 1989, 2, 6.)

Hum gawahi deta Uske jon maris raha, gaada ge raha, aur teesra roj jee uthis raha aur uppar swarg me chalae ge raha taaki aap aur mai amaransheelta aur umang jiwan ke ashirwaad paaega. Wohi “prakaash, … jiwan, aur sachchaai” hai (Ether 4:12). Wohi duniya ke nasamjhi ka vish-naashak aur ilaaj hai. Wohi umang jiwan ka sabse behtar uddharan hai, hamare Ishu Masih. Ishu Masih ke naam se, amen.