Para sa Iya

Sa sining importante nga gab-i, ginapabutyag ko ang akon pagpalangga kag pag-apresyar sa tagsa sa inyo, mahal kong mga sisters. Ano man ang aton edad, duog, ukon sirkumstansya, nagatipon kita karon nga gab-i sa pag-isa, sa kusog, sa katuyuan, kag sa testimonya nga ginapalangga kita kag ginagiyahan sang aton Amay nga Langitnon; aton Manluluwas nga si Jesucristo; kag aton buhi nga propeta nga si President Russell M. Nelson.

Sang bataon pa kami nga mag-asawa, gintawag ako kag ang akon bana sang amon bishop agud magduaw kag mag-minister sa isa ka pamilya nga wala na kasimba pila na katuig. Ginbaton namon ang takay kag nagkadto sa ila balay pagkaligad sing pila ka adlaw. Nangin klaro sa amon nga indi sila luyag sang mga bisita halin sa Simbahan.

Gani sa masunod namon nga pagduaw, gindal-an namon sila sang isa ka pinggan sang cookies nga nagasalig nga matunaw ang ila tagipusuon sa chocolate chips. Wala gid. Nangin mas klaro pa gid nga indi kami pagpasudlon kay gin-istorya lang kami sang mag-asawa sa may iskren sang puwertahan. Pero sa amon pagpauli, sigurado gid kami nga nakumbinser namon sila kon naghatag na lang kami kuntani sang Rice Krispies Treats.

Makapaluya ang dugang nga napaslawan nga mga pagtinguha bangod sa amon kakulang sa espiritwal nga panan-aw. Indi gid manami nga sikwayon. Sa malawig nga panahon ginpamangkot namon ang amon mga kaugalingon, “Ngaa ginahimo naton ini? Ano ang aton katuyuan?”

Si Elder Carl B. Cook nagsiling: “Ang pag-alagad sa Simbahan … mahimo mangin makahalangkat kon ginapangabay kita sa paghimo sang butang nga makapahadlok sa aton, kon ginakapoy na kita sa pag-alagad, ukon ginatawag kita sa paghimo sang butang nga indi kita nanamian.”¹ Naeksperiyensiahan namon ang kamatuoran sang mga pulong ni Elder Cook sang namat-od kami nga kinahanglan namon magpangayo sang direksyon sa Isa nga may mas dako nga panan-aw sangsa aton.

Gani, pagkatapos sang mga sinsero nga pagpangamuyo kag pagtuon, nabaton namon ang sabat sa ngaa sang amon pag-alagad. Nagbag-o ang amon paghangop, nagbag-o ang amon tagipusuon, sa pagkamatuod isa ka eksperiyensia sang diosnon nga pahayag.² Sa amon pagpangita sang direksyon gikan sa balaan nga mga kasulatan, ang Ginuo nagtudlo sa amon kon paano himuon nga mas mahapos kag mas makahuluganon ang proseso sang pag-alagad sa iban. Yari ang bersikulo nga nabasa namon nga nagliwat sang amon mga tagipusuon kag pamaagi: “Higugmaa ang Ginuo sa bug-os mo nga tagipusuon, sa bug-os mo nga ikasarang, panghunahuna, kag kusog; kag alagaran mo sia sa ngalan ni Jesucristo.”³ Bisan pa nga pamilyar kaayo ining bersikulo, daw nagaimpluwensia ini sa amon sa bag-o kag importante nga paagi.

Narealisar namon nga nagatinguha kami sing sinsero sa pag-alagad sa sining pamilya kag sa bishop, pero kinahanglan namon usisaon ang amon kaugalingon kon nagaalagad gid bala kami bangod sang gugma sa Ginuo. Si Haring Benjamin nagpaathag sining kinalain sang sia nagsiling, “Yari karon, ginasiling ko sa inyo nga sanglit nagsiling ako sa inyo nga ginhinguyang ko ang akon mga adlaw sa inyo pag-alagad, wala ako nagahandum sa pagpabugal, kay yara lamang ako sa pag-alagad sang Dios.”⁴

Sin-o gid bala ang gin-alagaran ni Haring Benjamin? Ang Amay nga Langitnon kag ang Manluluwas. Ang pagkahibalo sang sin-o kag sang ngaa sa pag-alagad sa iban nagabulig sa aton nga mahangpan nga ang labing mataas nga pagpakita sang gugma amo ang debosyon sa Dios.

Samtang nagaliwat ang amon pagtutok, nagaliwat man ang amon mga pangamuyo. Nagapaabot na kami sa amon mga pagduaw sa sining pamilya bangod sang amon gugma sa Ginuo.⁵ Ginahimo namon ini para sa Iya. Ang mabudlay ginhimo niya nga indi na masyado kabudlay. Pagkaligad sing pila ka bulan nga pagtindog namon sa puwertahan, ginpasulod na kami sining pamilya. Sang ulihi, nagahiwat na kami sang masunson nga pagpangamuyo kag paghinambalanay parte sa ebanghelyo. Nagluntad ang isa ka malawig nga pag-inabyanay. Ginasimba kag ginapalangga namon Sia paagi sa pagpalangga sang Iya mga anak.

Madumduman bala ninyo ang tion sang nagdab-ot ka sing mapinalanggaon nga may sinsero nga pagtinguha agud buligan ang isa ka tawo nga nagkinahanglan kag nabatyagan nga wala ginsapak ang inyo pagtinguha ukon wala gin-apresyar ukon wala ginbaton? Sa sina nga tion, nagduhaduha bala kamo sa balor sang inyo pag-alagad? Kon huo, kabay nga ang mga pulong ni Haring Benjamin magbulos sang inyo pagduhaduha kag inyo kasakit: Yara lamang kamo sa pag-alagad sang inyo Dios.”⁶

Sangsa magpasad sang kaugot, sarang kita magpasad, paagi sa pag-alagad, sing mas himpit nga kaangtanan sa aton Amay nga Langitnon. Ang aton gugma kag debosyon sa Iya nagapugong sang pagkinahanglan sang pagkilala ukon pag-apresyar kag nagatugot sa Iya gugma nga mag-ilig sa aton.

Kon kaisa mahimo kita mag-alagad tungod obligasyon naton ini pero bisan ang inang pag-alagad makatuytoy sa aton nga gamiton ang isa ka butang nga mas mataas sa sulod naton, nga nagatuytoy sa aton nga mag-alagad sa “mas labing maayo nga paagi”⁷—subong sa agda ni President Nelson sa “mas bag-o, mas balaan nga paagi sa pagtatap kag pag-minister sa iban.”⁸

Kon tutokan naton ang tanan nga nahimo sang Dios para sa aton, nagailig ang aton pag-alagad gikan sa mapinasalamaton nga tagipusuon. Samtang wala na kita nagapaminsar gid sang kon paano ang aton pag-alagad makabenepisyo sa aton, marealisar pa gani naton nga ang sentro sang aton pag-alagad amo ang pag-una sa Dios.⁹

Si President M. Russell Ballard nagtudlo, “Paagi lamang sa pagpalangga naton sa Dios kag kay Cristo sa bug-os naton nga tagipusuon, kalag, kag hunahuna nga sarang naton mapaambit ining pagpalangga sa aton isigkatawo paagi sa mga buhat sang kaayo kag pag-alagad.”¹⁰

Ang una nga Napulo ka Kasugoan nagasulit sining diosnon nga kaalam: “Ako ang Ginuo nga imo Dios. … Dili ka maghupot sing iban nga mga dios sa atubangan ko.”¹¹ Ang pagpahamtang sining kasugoan nagabulig sa aton nga mahangpan nga kon unahon naton Sia, ang tanan nga iban sa ulihi mahangpan sa ila nagakaigo nga prayoridad—bisan ang aton pag-alagad sa iban. Kon magpanguna Sia sa aton kabuhi paagi sa aton hungod nga pagpamat-od, mabugayan Niya ang aton mga buhat para sa aton kaayohan kag sa kaayohan sang iban.

Ang Ginuo naglaygay, “Magtulok sa akon sa tagsa ka panghunahuna.”¹² Kag tagsa ka semana nagapakighisugot kita nga himuon ina—nga “dalayon nga magdumdum sa iya.”¹³ Ang subong bala nga diosnon nga pagtutok maaplikar sa tanan naton nga ginahimo? Ang paghikot bala sing bisan kubos nga ulubrahon puwede mangin oportunidad sa pagpakita sang aton gugma kag debosyon sa Iya? Nagapati ako nga puwede ini kag mahimo ini.

Puwede naton himuon ang tagsa ka ulubrahon sa aton listahan nga pamaagi sa paghimaya sa Iya. Makita naton ang tagsa ka ulubrahon bilang pribilihiyo kag oportunidad sa pag-alagad sa Iya bisan pa yara kita sa tunga sang mga deadline, katungdanan, ukon mahigko nga mga dayaper.

Subong sang ginsiling ni Amon, “Huo, nahibal-an ko nga wala ako sing kapuslanan; bahin sa akon kusog mahuyang ako; gani indi ako magpabugal sang akon kaugalingon, kundi nga magapabugal ako sang akon Dios, kay sa iya kusog mahimo ko ang tanan nga mga butang.”¹⁴

Kon ang pag-alagad sa aton Dios mangin aton mayor nga prayoridad sa kabuhi, madula naton ang aton mga kaugalingon, kag sa ulihi, makita naton ang aton mga kaugalingon.¹⁵

Ang Manluluwas nagtudlo sining prinsipyo sing simple kag direkta: “Gani pasigaha ninyo ang inyo suga sa atubang sining katawhan, agud nga makita nila ang inyo maayong mga buhat kag himayaon ang inyo Amay nga yara sa langit.”¹⁶

Luyag ko magpaambit sa inyo sing pila ka pulong sang kaalam nga nakita sa pader sang balay-alaypan sa Calcutta, India: “Kon maayo ka, mahimo ka pasibangdan sang mga tawo nga maiyaiyahon, may natago nga motibo. Mangin maayo lang sa gihapon. Ang imo nga ginpasad sing pila ka tuig, sarang gub-on sang isa ka tawo sa isa lang ka gab-i. Magpasad lang sa gihapon. Ang maayo nga himuon mo karon nga adlaw, masami nga malipatan sang mga tawo pagkadason nga adlaw. Maghimo lang sang maayo sa gihapon. Ihatag ang imo pinakamaayo sa kalibutan, kag kulang man ini sa gihapon. Ihatag lang sa gihapon ang imo pinakamaayo sa kalibutan. Sa katapusan, nakita mo nga ang importante amo ang imo kaangtanan sa Dios … sa gihapon.”¹⁷

Mga sisters, ang importante pirme amo ang aton kaangtanan sa Ginuo. Subong sang ginsiling ni President James E. Faust: “‘Ano ang labi gid nga ginakinahanglan sa kalibutan?’ … ‘Indi bala nga ang labi gid nga ginakinahanglan sa kalibutan amo nga ang tagsa ka tawo makaangkon sing personal, dalayon, adlaw-adlaw, nagapadayon nga kaangtanan sa Manluluwas?’ Ang pag-angkon sing subong nga kaangtanan makapahayag sang pagkadiosnon sa sulod naton, kag wala na sing makahimo sing mas dako nga kinalain sa aton kabuhi kon mahibaloan naton kag mahangpan ang aton diosnon nga kaangtanan sa Dios.”¹⁸

Sing kaanggid, si Alma nagpaathag sa iya anak, “Huo, himoa ang tanan mo nga mga ginahimo nga manginsa Ginuo, kag bisan diin ka man magkadto himoa ini nga manginsa Ginuo; huo, itutok ang tanan mo nga mga panghunahuna sa Ginuo; huo, ibutang ang mga pagpalangga sang imo tagipusuon sa Ginuo sa wala’y katubtuban.”¹⁹

Kag si President Russell M. Nelson nagtudlo man sa aton, “Kon nahangpan naton ang Iya boluntaryo nga Pagbayad-sala, ang bisan ano nga pagsakripisayo sa aton bahin lubos nga masapawan sang dako nga kapasalamatan para sa pribilihiyo sang pag-alagad sa Iya.”²⁰

Mga sisters, nagapamatuod ako nga kon si Jesucristo, paagi sa gahum sang Iya Pagbayad-sala, nagahikot sa aton kag sa sulod naton, nagasugod Sia sa paghikot paagi sa aton agud pakamaayohon ang iban. Nagaalagad kita sa ila pero ginahimo naton ini paagi sa pagpalangga kag pag-alagad sa Iya. Mangin pareho kita kon ano ang ginalaragway sang balaan nga kasulatan: “Ang tagsa ka lalaki [kag babayi] dapat magtinguha para sa kaayohan sang iya isigkatawo, kag maghimo sang tanan nga butang nga may mata nga tampad sa himaya sang Dios.”²¹

Sigruo nakahibalo ang amon bishop nga amo yadto ang leksyon nga matun-an namon sang akon bana gikan sadtong maayo sing katuyuan, pero di-perpekto nga mga pagtinguha sa pag-minister sa pinalangga nga mga anak nga lalaki kag babayi sang Dios. Nagapanaksi ako sing personal kag sing pat-od sang kaayo kag gugma nga ginapaambit Niya sa aton samtang nagatinguha kita nga mag-alagad para sa Iya. Sa sagrado nga ngalan ni Jesucristo, amen.