Mwokutun ew Ekkei mi Mwonono

Pwi me fefinei, ua fen kaeo ew ametekin nesen seni ewe omuchunon ua nom ren ei nenien afanafan non October 2022. Ena nesen: Ika kose awora ew afanafan mi och, kese tongeni kopwe fiti ekkewe mwichenap mwirin. Ouwa tongeni kuna pwe uwa finita upwe akkom non ewe aewin mwich non ei ew. Met ose kuna pwe ua nom won ew asamen sar fiti ew kamochun mi mecheres epwe sukuno. Ika ei afanafan ese fetanoch, usap kunakemi ren pwan ekkoch fansoun mwich.

Non ewe ngunun ena murinon kon, fiti ei murinon mwichen kon, ngang uafen karan kaeo ekkoch nesen pwe, fiti an ewe Samon aninis, ua mochen aporousa ngenikemi ikenai. Ena epwe fori ei afanafan pwe mi monomon.

Ewe a kon weneitiei me ametek me nein meinisin met a keran fisingeniei ina manon punuwei achengicheng, Pat. I ewefefin mi unusen murino ua fen sinei—emon fefin mi pupunu me inenap mi unusoch, ese wor met upwe apasa ren an nimenimoch, an nifangen kapas, me an tupwen. Fan ew a awora ew afanafan itenapan “Awesano ewe Koukun Om Foruta.” Merei pwe a awesano ewe koukun anforuta a unusen fetanoch nap seni an emon epwe tongeni tana. I emon noun Kot nengin mi unusoch, emon fefin a pwarano napanapen Kraist. Ngang emon mwan mi unusen feioch ren ai awora 60 ierin manauei ngeni. Ika ngang mi nimenimoch, am riri fengen a wewen ua tongeni nom ren fansoun ese much.

Pwan ew mettoch ua kaeo a poputa 48 awa mwirin an punuwei we a peiaseno. Non ena fansoun, ra emwitirieinong non ewe pioing non watten osukosuken samau. Ekkewe aewin ruanu wiken ekkewe onu wik uwa tonong me tou non ewe nenien mi samau watte me ngang mi mefiei me mwirin chok use chiwen pwan mefiei.

Arapakan meinisin ai weweiti nonewe pioing non ena aewin fansoun a nemeseniei. Met esenemeseniei ren ew sai nukunewe pioing, ngeni met ewe ussun pwe nepokun fansoun esemuch. Use tongeni ounusa ne kapas usun ena mettoch ikei, nge ua tongeni apasa ena kinikinin met uwa angei pwe ew kapasen pesepes ai upwe mwitir niwiniti ai angang mi pin fiti, watten epinipin, watten anonga ekiek won ewe Chon Amanau, me watten nuku non An kapas.

Use tongeni ai upwe oukatiw ne mefi pwe uwa angei ai pusin nemesepwin ew pwarata a kawor ngeni ekkewe Engon me Ruemon arapakan 200 ier a no:

Kopwe pwarata ussun itei … [me] tinano ai kapas ngeni nesopun ewe fonufan. …

“… Iteiten nesosor; me ew me ew ran mut ngeni om mongungun esinesin epwe feinno; me nupwen epwe pwin kosap mut ngeni aramasen fonufan repwe mour, pokiten om afanafan. …

“Pwata[,] … mwarei om irapenges, [me] tapweto mwiri.”¹

Achengicheng pwi me fefinei, seni met na a fis, ua fen sotuni ne achocho ngeni ne mwarei ai irapenges, ren pochokunen ai upwe kutta ian upwe tongeni neuomongeta non ew mongungun ir me ruu kinamwe me pesepes nesosorun ewe ran, non ewe ran, me feinno ngeni ewe pwin.

Ena a emwen ngeni ei ew ounungatinennet a feitto non ekkana maramen netipechou, samwau, and osukosuk. A ew asofosefanin pwarata usun me kinisou esemuch ren manamen ewe ennetin iotek—ami iotek—minne ua fen angei tufich seni. Upwe kinisou non fansoun ese much ren kewe tingor non iotek an ngoroun aramas usun ewe mi mano punuwan,² ra tiniken, ne eniwin ne kutta aninisin nang fan itei. Ua fen angei efeiochun pristut, me kuna ai we klassin high school ra echikipin fan itei, usun pwan ekkoch ward non ewe Mwichefen. Me itei meni a nom won ewe tettenin it epwe wor iotek fan iter non ekkewe tempel non ewe Mwichefen.

Non ai ennetin kinisou ren ekkei meinisin, ua fiti G. K. Chesterton, ewe a pin apasa “kinisou ir ekkewe ekiek mi tekia; … kinisou ina pwapwa a eniwin fan ruu ren amwararan.”³ Ren ai pwisin “pwapwa a eniwin fan ruu ren amwararan,” ua kinisou ngeni ami meinisin me kinisou ngeni Semei non Nang, ewe a rong ami kewe iotek me efeiochu manauei.

Pwi me fefinei, ua pwarata pwe Kot mi rongorong meinisin iotek sia ngeni me a ponueni ew me ew anongonong ngeni ewe an I a fen finata ren ach unusoch. Ua esina pwe non fansoun ewe chok pwan fansoun chommong ra iotek fan iten niwinsefanin ai pochokun, ew nonopokun nampa—pachenong ngang—sia iotek fan iten niwinsefanin an punuwei ewe pochokun. Ua pwarata pwe ir me ruu ekena iotek a rongorong me ponu seni emon Sam won Nang mi uren tong, ina mo ika ekkewe iotek fan iten Pat rese ponu non ewe napanap ua tingor. Ren ekkei popun Kot chok a sinei pwata a sokofesen ponuen iotek seni met sia epinukunuku—nge uwa pwon I a rong ngenirme I a ponueni iranongonong ngeni An tong esemuch me an fansoun.

Ika sia “tingor ese ngaw,”⁴ese wor ne koukun inet, ian, ika usun met sipwe ioteki. Anongonong won ekkewe pwarata, sipwe “iotek fansoun meinisin.”⁵ Sipwe iotek, Amulek a apasa, fan iten “ekkewe ra nom unukumi,”⁶fiti ewe nuku pwe “an emon aramas mi tupwon iotek mi manaman.”⁷ Ach iotek repwe neuwomong nupwen nupwen sia anamonuno ne aworer.⁸ Ika ese tufich, sipwe chok apasa non mosonoson non netipach.⁹ Sia kon pwe ach iotek ir “mwokutun ew ekkei mi mwonono,”¹⁰repwe kawor fansoun meinisin ngeni, anongonong won ewe Chon Amanau Pusin, ngeni Kot ewe Sam Esemuch non iten Noun we Anamon.¹¹

Chiechiei achengicheng, ach iotek ir ach kewe awa mi murino,¹²ach akkaewin “ennetin mochen,”¹³ach mecheresin, nimochun napanapen fen ngeni.¹⁴ Sipwe en me pusin iotek won an, non ach famini, me non mwich ese nifinifin saisir.¹⁵ Sipwe aea iotek pwe repwe ew eppet seni sossot,¹⁶me ika epwe wor fansoun sia mefi pwe sisemochen iotek, sipwe wesen fat pwe tipemwawramwar eseetto seni Kot, ewe a mochen an epwe kapas fengen me Noun semirit inet chok me fansoun meinisin. Ewer, ekkoch sossot ra epeti kich seni iotek a etto seni ewe chon u ngeni.¹⁷ Nupwen sise sinei ifa ussun ika wesewesen ren met sipwe iotek fan itan, sipwe poputa, ne sopweno, tori an ewe Ngun mi Fel a emweni kichenong non ewe iotek ewe sipwe awora.¹⁸ Ei napanap meni epwe ina ewe sipwe aea nupwen sia iotek fan iten kewe chon ungenikich me ekkana ra nounou ngaw kich.¹⁹

Nesoponon, sia tongeni nengeni ewe nenien apiru an ewe Chon Amanau, ewe a iotek iteiten, fansoun meinisin. Nge a fen ew amwasangasang ngeniei pwe Jises a mefi ewe namoten an epwe iotek. I Ese Unusoch? Ren met a namot ngeni I an epwe iotek? Nge, ua fen apareni pwe pwan I, a fiti kich, sia mochen “kutta mesen [ewe Sam,] nuku an kapas, me epinukunuku an chen.”²⁰ Fansoun me fansoun, I a no seni mwichen aramas an epwe anamon me mwen an epwe amwokutu nang ren An iotek.²¹ Ren ekkoch fansoun, I a iotek fiti ekkoch chiechian. Mwirin I a kutta nang fan iten mwicheichen aramas ekkewe ra rokopwanieno nepekin ew chuk. Fan ekkoch iotek a eningano Pisekin.²² Fan ekkoch a eningano Mesemesan.²³ Fan ekkoch I a uta ne iotek, fan ekkoch I a fotupuku, me pwan mwo fan ew a chapetiw won Mesan non iotek.²⁴

Luke a awewei an Jises feitiw non An achasefani tipis usun a anomota ngeni I ne ennetin iotek.²⁵ Ifa ussun an emon mi unusoch a iotek ren ennetin? Sia ekieki pwe meinisin An iotek ra ennetin, nge non an awesano An asoren achasefan me non ewe metek mi fichi ngeni meinisin, I a mefi an epwe iotek ne anapano an tingor, fiti choun An asor omuchunon a osuku chan seni inisin meinisin.

Ren nonnomun an Kraist okkufu mano me An keran niffang ngeniei ren ekkoch wik ika maram non ei manau, ua ennetin pwarata usun ennetin manau esemuch me ewe namotan ngeni kich ach sipwe ennet non ach okkota.

Ua pwarata pwe nupwen Kraist epwe feito, mi namot I epwe esinna kich—esap chok memper mi tettenitiw won rekotun papatais nge ennetin mi nikuchar, nikutu non nuku, chon kuno mi apwonuta pwon mi pin. Ei ew mettoch mi atapwanapwan ngeni kich meinisin, are esap ina sipwe rong nichipungun niemam: “Ngang use sisineok,”²⁶ika, usun Joseph Smith a chiakuni ena kapas, “[En] kose sisineiei.”²⁷

Feiochun, a wor ach aninis ren ei angang—chommong aninis. Mi namot sipwe nuku non chon nang me manaman me ekkewe pwonen ewe pristut mi pin. Mi namot sipwe nuku non ewe niffangen ewe Ngun mi Fel, me emwenin famini me chiechiach mi murino, me ewe manamanen ewe nimochun tongen Kraist. A auchea sipwe nuku non pwarata me soufos, chon osini, me chon pwarata me Preseten Russell M. Nelson. Mi namot sipwe nuku pwe ren ach iotek me tingor me pusin ach nimenimoch sia tongeni feita ngeni ewe “Chukun Zion, … ewe teninimwen ewe Kot mi manau, ewe nenien nang, ewe a pin seni meinisin.”²⁸

Pwi me fefinei, nupwen sia aier seni ach tipis me pwaracho ne feito ren ena nenien mottun chen,²⁹nikiti ngeni I ach asoren ennetin tingor, sipwe angei umoumoch me kuna omusomus me ren kirekirochun poun Samach Esemuch me Noun mi aneasochis, me nimenimoch. Iwe, fiti Job me meinisin ekkewe mi nimenimoch tupwen, sipwe kuna ew fonufan mi “kon amwarar”³⁰ach sipwe weweiti. Non iten Jises Kraist, amen.