An Kot Akkot epwe Emweni Ngonuk Neimw

Uwa mochen pwarata ai kinisou ren ami iotek nupwen uwa poputani ewe angangen akasiwin ngeni ewe akoko, seni Preseten Nelson, ai upwe angang usun emon Aposel noun we Samon Jises Kraist. Meni oua tongeni anchangochu ifa ussun tipetekisonun memefin ei koko, me a ew fansoun amwararen ekesiwin me fatochun ekiekin nonnomui. Ewer, fokkun, ew watten feioch ne angang ngeni ewe Chon Amanau, non ese nifinifin koukun, me ai fiti kemi ne aporousa ewe mwurinon porausen An we kapas allimen epinukunuk.

Pekinon ena, a fen pin wor kapasan pwe nukusokurun meinisin minafon Aposel a utta emon fefin mi mairu ren inen punuwei we. Use sinei ika mi wor a pin apasa, nge non ei fansoun, mi tongeni fis. Uwa ekieki pwe ewe ennetin ren inen punuwei ese chiwen nonomw rech ese tongeni kisitiw an mwareiti.

Ekkoch maram ano, nupwen am me punuwei auwa churi eu fonu ren sokopatun angangen Michefel, uwa nenokai eu soran me uwa neu nukun asamwachon am we hotel. Fan we won ewe osukosuken an, uwa kuna eu an mi kesip me ren emon ponis a nom unukun an epwe eniwini ekkewe taraku nupwen ra tori ewe eppet. Akkom, fitefoch chok taraku ra sa won ewe an me ra kuun sefan. Nge nupwen ewe kunok a feino me trafik a napeno, nainin taraku ra poputa ne tetenita.

Seni ewe asamacho asan, uwa katon nupwen ewe ponis usun a mefi menemenoch non an nemenem ne pinei fetanin ewe trafik me eniwinono kewe aramas. Ennetin, nikinikin pwe a poputani ne mwemwet non an eipweip, usun nge epwene poputa ne ekis poruk, nupwen efoch me efoch taraku a sa ngeni ewe eppet. Ika emon chon sa a ningeringer ren ewe eppet, ewe ponis esap aninisoch me weweitir. A chok enniwin ne uchuki mokuran me itino non osokurun ewe an.

Chiechei, chienei souneng won ei aanen manau mi wor mano, an Samach ningen kokkot, pwan An “mwurinno” kokkot,¹ a forata epwe emweni kemino ngeni neimw, esap epetti kemi.² Ese wor emon a aueta ew eppetin an me anomu emon ikewe an epwe akunu sefani me tini kemino towaw. Ennetin, iei ewe sokononon. Kot a tiniken ne attapwa kemi. I a “mochen meinisin Noun semerit repwe niwin ngeni I,”³ me I a fori chommong annen an epwe eniwini sefanikemito.

Samach mi tong a ota forutan fonufan ren ewe akkaewin popun an epwe awora ew tufich fan itemi me fan itei an epwe wor ameresin me enimochun akasiwin ren manauach iei, ewe fansoun aian ach pungun finata meren Kot ach sipwe fini I,⁴ ne kaeo, me marita, ne fori mwan, ne aier, me tongei Kot me chon oruch, iwe eu ran niwin ngeni neimw ngeni I.

A tinatiw noun Achengicheng ngeni ei fonufan mi tipis pwe epwe manaueni ewe manauen aramas, an epwe awora ew minen appiru fan iten unusen Noun semirit ar repwe tapweno, me epwe achasefan me angasa. An Kraist niffangen achasefan a awesano meinisin appet ren pekin inis me manon ngun ekkewe ra eimuni kich seni imwach ese much.

Mettoch meinisin usun an Samach kokkot fan iten Noun semirit a for an epwe uweireto meinisin neimw.

Met ekkewe ngun noun Kot chon angang, Noun soufos, ra eita ngeni ei kokot non Niwinsefaniton pukefel? Ra eita ngeni ewe kokkotun ngaseno,⁵ ewe kokkotun umoumoch,⁶ ewe wachimuken kokkotun pwapwa,⁷ me ewe kokkotun manau esemuch, minne a ngeni kich meinisin, “seni ewe chaan Noun Anamon.”⁸

Ewe popun an Samach wachemuken kokkotun pwapwa fanitemi pwapwa, ikei ia, iei chok, me non ewe fansoun esemuch. Esap ren an epwe awora appetin ach pwapwa me awora ngenikich noninen me nuwokus.

Ewe popun an ewe Sam kokkotun ngaseno non ennetin ina ami ngaseno, ami musono me ren ewe riaffou me mano an Jises Kraist,⁹ ngaseno seni fotekin tipis me mano. Esap ren an epwe nikitikicheno usumi chok.

Ewe popun An Semach kokkotun umoumoch ina an epwe anapano umoumoch nupwen oua kunusefan ngeni I me osufonu ami pwon mi pin ne nikitu ngeni I. Esap ren an epwe amam umoumoch me awora metek me netipengaw.

Ewe popun an ewe Sam kokkotun amanau ina ennetin ami amanau non ewe muun selestial ren ning nupwen oua angei “ewe kapasen pwarata ussun Jises”¹⁰ me fang ngunuch ngeni I.¹¹ Esap ren an epwe appetikemiu.

Wewen nge mettoch meinisin mi ketiw ren ifa usun ach manaueni manauach? Pwe ewe napanapen ach finata ne aea ach pungun finata ese pwan wor osukosukan? Pwe sia tongeni angei ika nikitano an Kot annuk? Apw, esap ina. Ennetin ew me nein an Jises auchean titingor me sio fansoun An angang won fonufan pwe sipwe ekesiwin me aier me feito ren I.¹² Fateochun non meinisin An afanafan ngeni kich ach sipwe nom non neni mi tekia non nonomun manau¹³ eu koko ngeni pusin maritach, ne akasiwini ach nuku non Kraist, ren watten akasiwinin netipach.¹⁴

A mochen fan itach ew mokutun ekesiwinin ach aapangaw me tipetekia, me osuono ewe mochenin inis,¹⁵ ren kich ach sipwe “feino, me ukutiw ne tipis.”¹⁶

Ika sia nuku ewe popun an ewe Sam mokutun angangen kokkot epwe amanaua kich, angasa kich, anapano umoumoch ngenikich, me ngeni kich pwapwa, met popun ewe Nau seni ion ei wachemuken kokkot a fis?

Ewe Nau a pusin apasa ngeni kich: “Pun uwa fen feitiw seni nang, esap ren ai upwe fori pusin ai mochen, nge netipen i ewe a tinieito.”¹⁷

An Jises mochen ina an ewe kirekirochun Sam mochen! I a mochen fori an epwe tufich ngeni meinisin omuchunon noun Saman won Nang semirit ar repwe angei ewe sopun ewe kokkot— manau fochofoch ren Ir. Ese wor epwe tiweu seni ei tufich.

Ika oua soun ourek pwe ousap ukungeni, are ewe tongen an Jises Achasefan esemuch a weneiti meinisin, nge ese weneiti kemi, iwe ouse kon wewefichiti. Esemuch wewen esemuch. Esemuch a weneiti kemi me meinisin ekkewe oua tonger.¹⁸

Nifai a awewe ei enlet: “Ese fori och mettoch tiwenon chok ika pwe epwe efeiochu fonufan; pun i a tongei ewe fonufan, pwan mwo i a pwisin watiw manauan pwe i epwe emerato aramas meinisin ngeni i. Ina minne, i ese annuku emon pwe resap angei an ewe manau esemuch.”¹⁹

Ewe Chon Amanau, Ewe Chon Masan Siip mi murinno, a no kutta noun siip mi monuchono tori An kuna ir.²⁰ I ese “mochen pwe emon epwe poutmwanino.”²¹

“Pei mi umoumoch a keitiu ngenikemi, iwe ion chok epwe feito, i upwe etiwa.”²²

“Mi wor neimi mi semwen? Uweireto ikei. Mi wor neimi mi pechema, are chuun, are fetanengaw, are mwok, are kinipotur, are ekkewe ir mi pwaseno inisir, are ekkewe ir mi seningepung , are ekkewe ir mi riaffou non sokopaten napanap? Uweireto ikei iwe upwe echikarereta, pun mi wor ai kirekiroch womi.”²³

I ese poutano ewe fefin mi pwuu seni cha, I ese nou ewe mi uri semwenin keinapan, I ese pinei ewe fefin mi tipisin nisou, I ese pinei ekkewe a wor ar niamam— ina mo ika met ar tipis. Me I esap pinei ami ika ekkewe owa tonger nupwen owa wato ren I ami netipeta me netip niemam. Ena esap ina An popun ika An angang, are An kokkot, popun, anean, ika epinukunuku.

Apw, I ese watta pinepinen an me apet; I a asureno. I ese eimukemiu; I a etiwa keminong.²⁴ Unusen An angangen afanafan ew esinesinen faniten ei popun.

Iwe ewer mi wor An pusin asoren achasefan, ewe minne a weires ach sipwe weweiti, pekinon ach tufich non manau ne weweiti. Nge, me iei auchean“nge,” sia weweiti, tongeni weweiti, ewe mi pin, popun amanau an we asoren achasefan.

Ewe mangaku mi eitiwetiw me non ewe tempel a kamwefesen non ru nupwen Jises a mano won ewe irapenges, a esisinata ena tufichin niwinsefanino ngeni mwen mesan ewe Sam a suk chochono—ngeni meinisin ion a kun ngeni I, nuku I, watta ar chou won I, me angei osan mi pwas wata wor non ew ririn pwon mi pin.²⁵

Non ekkoch kapas, ewe kokkot An ewe Sam esap usun eppetin aan. Ese ina; esap tongeni ina. Mi wor mettoch a auchea sipwe fori, annuk sipwe aponueta, mettochun nonomuch sipwe siwini? Ewer. Nge ren An chen, ekkana kich mi tongeni tour ngeni kich, esap pekinon ach omochunukur.

Iei ewe mwurino poraus! Ngang use tongeni pwarano non kapas ai kinisou ren ekkei mecheresin ennet. An ewe Sam angang, An kokkot, An popun, An mochen, An anean, me An epinukunuk meinisin an epwe achikara kemi, meinisin an epwe ngeni kemi kinamwe, meinisin an epwe uwei kemi, me ekkewe ami mi tonger, ngeni imwan. Ren ei ua pwarata non iten Noun we, Jises Kraist, , amen.