Mettoch Meinisin fan iten Feiochuch

Ikenai April 6, ewe ranin achemen an Jises Kraist aniwinsefanieto An Mwichefenin fansoun-soponon—me atun ewe apwapwan Paska nupwen sia apwapwa ne apwarata usun an Jises Kraist manau mi unusoch, achasefan, me amwararan Manausefan.

Eu tutunapen China a poputa ren noun emon mwan at a kuna emon oris mi ningoch.

“A kan feioch,” chon orun kewe ra apasa.

“Sipwe katon,” ewe mwan a era.

Iwe ewe at a turutiw seni ewe oris me a feingaw fochofoch.

“Ese kan feioch,” chon orun kewe ra apasa.

“Sipwe katon,” ewe mwan a era.

Ekkewe chon sounfiu ra feitto nge rese uwei ewe at mi feingaw.

“A kan feioch,” chon orun kewe ra apasa.

“Sipwe katon,” ewe mwan a era.

Ei fonufan mi osukosuk fan chommong sia mefi usun sia nom non asepwan watte, fan ekkoch sia feioch, me—fan chommong—ese feioch. Nge non ei fonufan mi weires,¹ “sia sinei pwe mettoch meinisin mi angang fengen fan iten feiochun ekkewe mei tongei Kot.”² Ennet, nupwen sia fetan wenechar me chechemeni ach kewe pwon mi pin, “mettoch meinisin repwe angang fengen fan iten efeiochum.”³

Mettoch meinisen fan iten feiochuch.

Eu pwon mi amwarar! Ekinamwen kapas seni Kot Pwisin! Non eu amwararen napanap, ewe popun forutan me napanapen Kot pwe sipwe sinei poputan me nesoponon,⁴ repwe awora mettoch meinisin mi och fan iten feiochuch, me anisi kich sipwe ningeno me pin me ren an Jises Kraist chen me Achasefan.

An Jises Kraist Achasefan a tongeni angasa me amanaua kich seni tipis. Nge Jises Kraist a pwan ennetin weiweiti meinisin ach kewe metek, weires, semwen,⁵ netipengaw me imufesen. Non fansoun me fenfeinno, An pworacho ngeni mano me hell mi tongeni apungu mettoch meinisin.⁶ A aninis ne echikara ewe tano me weires, ekinamwe ekkewe mi song me keimufesen, echipa ewe mi anamon me mefi netipengaw, pesei ekkewe rese fatoch me ekkewe rese unusoch, me wato manaman mi chok tufich me ren Kot.

Sia konu hallelujah me puchoru hosanna! Ren manaman ese much me ochun ese much, non an Kot kokkotun pwapwa mettoch meinisin repwe angang fengen fan iten efeiochuch. Sia tongeni fetan non manau ren epinukunuk me sisap nuokus.

Ach anaemon, mi tufich sisap sinei pwisin ochuch. Nupwen “Ua finiei,” ua pwan fini pwisin ai aukuk, apwangapwang, me nipwakingaw. Nesoponon, ne fori ewe mi kon och, sipwe wesewesen och.⁷ Pokiten ese wor emon nge chok Kot mi och,⁸ sia kutta unusoch non Jises Kraist.⁹ Sia fokkun ennet, och nupwen chok sia nikitatiw foforun mwan me fefin me winiti usun emon semirit fan mesan Kot.

Ren ach epinukunuk me nuku non Kot, sossot me riaffou repwe epinipinino fan iten ochuch. Joseph, amomono non fotek non Egypt, mwirin a angasa an famini me noun aramas. An ewe Soufos Joseph Smith kanapus non kanupus Liberty a aiti i “ekkei mettoch repwe ngeni i mirit me repwe fis pwe och feioch ngeni.”¹¹ Manau ren nuku, sossot me fangeno sisap tongeni fini ra tongeni efeiochu kich me ekkoch non napanap sise tongeni ekieki.¹²

Sia anapano nuku me epinukunuk non ewe Samon pwe mettoch meinisin repwe tongeni angang fengen fan iten ochuch nupwen sia angei ekiekin esemuch;¹²weweiti ach sossot meni epwe chok “mwoch fansoun”;¹³esinna riaffou a tongeni pinino pwe ach feioch;¹⁴etiwa akseten, weiweitan mano, apwangapwangen inis, me samaw ir pekin manau won fonufan; me nuku Samach non Nang mi tong ese awora sossot an epwe etipisi ika apungu kich. I esap fang efou fau ngeni emon a tingor pinewa esap pwan fang emon serepenit ngeni emon a tingor ik.¹⁵

Nupwen sossost a fis, napengeni met sia kan mochen pwe emon epwe ausening me nom rech.¹⁶ Non ewe fansoun, ekiek ese ennet resap aninisoch, inamo ika ekiekir ita epwe awora kinamwe. Fan ekkoch sia mochen emon epwe fiti kich ne netipeta, metek, me kechiw; sipwe mefi metek, ningeringer, fan ekkoch song; me etiwa pwe mi wor mettoch kich sise sinei.

Nupwen sia nuku Kot me An tong fan itach, pwan mwo watten ach netipengaw, nesoponon epwe fis pwe feiochuch.

Ua chemeni ewe ran ua rong usun ew ennetin aksetenin taraku mi pachenong ekkewe ua tonger. Atun ekkena fansoun, non riaffou me nuku, sia tongeni fiti Job ne apasa, “Ewe Samon a awora, iwe iei a pwan angei sefani; sipwe mwareiti iten ewe Samon.”¹⁷

Non unusen ewe Mwichefen non fonufan, ekkoch 3,500 steik me tischrik me ekkoch 30,000 wart me pranch ra awora nenien eppet me tumun.¹⁸ Nge non ach kewe steik me wart, chommong tupwen famini me aramas ra weri weires, pwan mwo nupwen ar sinei ena (me nukun ar repwe sinei ifa usun) mettoch repwe angang fengen fan iten feiochur.

Non Huddersfield, England, Brother Samuel Bridgstock a uri ewe amuchunon tettenin cancer me mwen chok ewe kokkon emon minafon presetenin steik. Ren aweiresin an semwen, a eisini punuwan we, Anna, pwata epwe pwan interfiu.

“Pokiten,” Sister Bridgstock a apasa, “kopwene kokko ngeni emon presetenin steik.”

Sasing

Bridgstock family.

Akkom a chok kawor ngeni ew ika ru ier epwe manau, Preseten Bridgstock (ewe mi nom ikei ikenai) a nom non aruwanun ierin an angang. A wor ranin mi och me weires. An we steik ra achufengeni non watten nuku, angang, me kirekiroch. Ese mecheres, nge punuwan me an famini ra nom non nuku, kinisou, me netipengaw mi weweoch ra nuku epwe winiti pwapwa fochofoch non an Jises Kraist Achasefan.¹⁹

Nupwen sia fanafaneno, tipemecheres, me mosonoson, sipwe mefi ewe ningen, popun, me kinamwein ewe pwon mi pin ewe Samon epwe awora. Non fansoun mi pin, I epwe mut ngeni kich sipwe ekis kuna ewe ennetin watten esemuch minne manauach iteitan ina kinikinin, ikewe mettoch mi kukkun me mecheres ra angang fengen fan iten ochun chon fangeno me chon angei.

Rebekah, ewe nengin noun nei we akkom presetenin misin, a aporousa ifa usun ewe Samon a ponuweni an iotekin kinamwe ren ew tufich ese esuku an epwe ponuweni pwan an emon iotek.

Sasing

Rebekah a ngeni ewe fefin an inan we mwesinen oxygen mi tongeni chuna fetanei.

Non ew pwinin, Rebekah, a netipeta ren an inan we keran mano, a wor an fatochun ekiek pwe epwe no kamo kassin wan we. Nupwen a tori ewe nenien kas, a churi emon chinnap fefin a weires ne gasangas fiti ew watten nenien oxygen. Mwirin, Rebekah a ngeni ewe fefin an inan we mwesinen oxygen mi tongeni chuna fetanei. Ei sister a kinisou ne apasa, “Ka ngeniei sefan ai ngaseno.” Mettoch ra angang fengen fan iten ochuch nupwen sia iamwir usun Jises Kraist.

Emon sam a ewis fengen me noun at ierin ticher pwe repwe iamwir fengen a awewei, “Iamwir wewen nupwen sia siwin seni chon winior ekkewe era wouno kukis ngeni chiechi, chon akkom wareto aninis non pekin ngun.” Fiti pwon mi pin non Jises Kraist a ekinamwei, achufengeni, epinano.

Pwan non feiengaw, amonneta non ngun a tongeni achema kich pwe Samach non Nang mi sinei nupwen sia mefi apwangapwang me anamon. Ren awewe, ew famini ewe nour semirit a kekino non ewe pioing mwirin ra kuna kinamwe non ar chechemeni ewe Ngun mi Fel a fen mongunungunu akkom met repwe esuku.

Fan ekkoch ewe ennetin watten esemuch minne ewe Samon a mut ngeni kich sipwe mefi mi pachenong famini ra fen mano. Emon sister a kuna pwapwa non an siwin ngeni an Jises Kraist kapas allim mi niwinsefan. Nge ruu watten osukosuk a akinasa non manauan—a kuna ew feiengawan efoch mwota me manon inan ewe, ion a pusin angeino manauan.

Sasing

Sister a akufu an nuokus me a papatais.

Nge ei sister a ekis akkufu an nuokusiti konik an epwe papatais ren an mwono non konik. Me non met epwene winiti ew pwapwan ran, neminewe a kuna emon, a wisen tupuni inan we mi mano an epwene papatais non ewe tempel. “Papatais non tempel a echikara inei we, me a angasaeino,” ewe sister a apasa. “Ina ewe aewin fansoun uwa mefi kinamwe seni ewe fansoun inei we a mano.”

Noun kon mi pin ra enniwini An pwon pwe mettoch meinisin repwe angang fengen fan iten feiochuch.

Ewe Puken Mormon eu pisekin pwarata sia tongeni komoch non pouch pwe Jises i ewe Kraist me Kot a apwonueta An osini. A mak me ren soufos mi emwen ekkewe ra kuna ach fansoun, ewe Puken Mormon a poputa ren wesewesen tutunap—ew famini mi watte ar sokofesen. Nge, nupwen sia kaeo me ekipwichi 1 Nifai 1 ngeni Moronai 10, sia arap ngeni Jises Kraist ren pochokunen kapasen pwarata pwe met a fis ikewe me nom a tongeni efeiochu kich ikei me iei.

Usun ewe Samon, me ren Noun soufos mi manau, a wato chommong imwen ewe Samon arapeno non chommong neni, feiochun tempel ra angang fengen fan iten feiochuch. Sia feito non pwon me angangepin ngeni Kot Samach we me Jises Kraist me angei weweoch esemuch usun manauen iei. A fis ren emon me emon, it me it, sia awora ngeni atongeach chochon famini—newo—angangepinen amanau me pwon mi pin non an ewe Samon tettenin chon manau won Chukun Zion.²²

Usun tempel ra arap ngeni kich non chommong neni, ew asoren tempel sia tongeni asora ina ach sipwe kutta pin imwen ewe Samon fan chommong. Non chommong ier, sia fen isoiseno, kokkot, me fangeno ren ach sipwe feito ngeni ewe tempel. Iei, ika nonnomuch mi mutata, ouse mochen feito fan chommong ngeni ewe Samon me non Imwan we mi pin. Mut ngeni fenin non tempel me angang repwe efeiochu, tumunu, me pesei kemi me ami famini—om we famini iei me ewe famini kopwe ani me winiti fan ew.

Sasing

Inach chinap nukun ewe tempel.

Pwan, ika nonnomum epwe mutata, kose mochen ekieki feiochun om pwisin awora ufom ufoufen tempel.²³ Emon inenap seni ew famini mi tekison a apasa pwe och mettoch seni ewe fonufan, a kon mochen epwe pwisin wor ufan ufoufen tempel. Noun noun at a apasa, “Mamachi a mongunungun, ‘Upwe angang non pwisin ufei ufoufen tempel, me mwirin ua mano, upwe peiaseno non ir.’” Me nupwen ewe fansoun a feito, a peiaseno non ir.

Usun Preseten Russell M. Nelson a aitikich, “ Meinisin sia nuku me meinisin pwon Kot a fori ngeni Noun aramas mi tupon ra fis non ewe tempel.”²⁴

Non fansoun me fochofoch, ewe popun foruta me pwisin nonnomun Kot repwe wato mettoch meinisin iten feiochuch.

Iei an ewe Samon popun esemuch. Iei An ekiek esemuch. Iei An pwon esemuch.

Nupwen manau mi fitikoko me nupwen popun ese fat, nupwen oua mochen manauoch nge ouse sinei ifa usun, feito ren Kot ewe Sam me Jises Kraist. Nuku Ir mi manau, tongei kemi, me mochen mettoch meinisin fan iten feiochumi. Ua pwarata pwe Ir mi tongei kemi, esemuch me feinfeino, non ewe it mi pin me manaman Jises Kraist, amen.