Koapwoaroapwoar en Inou Sarawi sang Sises Krais

I kapakapki kitail en kaweliakapwiala pali ngenitail kan sang ni padahk koaros me kitail pahn rong sang atail kaun kan ni imwilahn wihk wet oh peren nin duwen ahi men nda “koapwoaroapwoar en inou sarawi sang Sises Krais.“ Koapwoaroapwoar wet me meleilei oh kin kihdo ineng tengeteng en alehdi kapai kan en Koht ong irail kan me kin kolokol arail inou kan oh pil mie anahnepe nan kahpwal akan en rahn pwukat.

Sapwellimen Kauno tehnpas kapw kan me wie kokouda nan sampah rahnpwukat, pahn kaweid en sapwellimen Presiden Russell M. Nelson soun kaweid kan, wiadahr peren laud ong tohn Mwomwohdiso oh papah doadoahk kesempwal kan me kasalehda kalaudlahn sapwellimen Kauno wehi.

Medewehdo nan ahi pepehm kapwuriamwei ni kasarawihn Tehnpas Sarawi en Feather River California nan Okotopehu, I kin medewe ma ekei pak kitail kin salongala nan atail perenkihda tehnpas sarawi kapw kan nan wehi oh wasahn kouson kan oh kin manokehla kahrepe sarawi me tehnpas sarawi kan kin kihda.

Intingdahr ni temwen ehu ehu tehnpas sarawi kan mesen inting mehlel wet: “Sarawihla ong Kauno.“ Mahsen kaselel pwukat inenen sansal, oh e wia mehn luhk ehu, ansou me kitail pidelong nan tehnpas en Kauno, kitail doudahng nan seiloak sarawi en esehla ia mwomwen atail kak ileilehla oh lapalapala ni atail wia werek en Krais kei. Ni atail kokohwei nan seilok wet, wiewiahda inou sarawi kan mwohn Koht oh inoukihdi en idahwen Sounkomouro, kitail alehdi manaman en wekidala atail mongiong kan, kaweliakapwiala pali ngenitail kan, oh kalaudehla atail ehu ong Ih. Doadoahk wet kin wahdo pweida nan palingenitail oh wiahda ehupene sarawi ehu ong Koht oh Sises Krais, me inoukiong kitail me kitail kak sosohki kisakis en mour soutuk. Kahrepen seiloak sarawi wet iei en kihong kitail ineng en sarawihla oh lapalapala nan atail momour en ehu-ong-ehu rahn nan atail inou kan me kitail wiadahr sang Sises Krais.

Ineng wet iei ih utuht pen atail ehu ong Koht oh e kak sewese kalaudehla atail pwoson oh kapingki Sises Krais oh Sapwellime tomw en tohnmeteio. E kalaudehla atail koahiek en limpoak oh en papah meteikan oh kakelakahla palingenitail kan en momour nan sampah diren dihp wet me direkilahr rotorot oh kapahtou, E kiong kitail kehl en powehdi wahn peikasal oh insensuwed, masepwehk oh pwunod, medek en mongiong oh sohla koapwoaroapwoar me imwintihtio songosong en kihdila nan kepin atail mohngiong kan, ni mehlel ansou me mour kin apwal, kahpwal akan kin reireila, de nan irair akan me kahpwal. Ire ieu sang nan pwuhk sarawi kaweidki emen emen kitail ni atail kin pengpengkiseli kisinieng en sampah me kin wia mehn kasongsong: “Kumwail dehr kesehla amwail koapwoaroapwoar.“

Riei souleng kan, irail akan me kaludelahr arail koapwoaroapwoar nan inou kan me irail wiawidahr nan tehnpas en Kauno sang Sises Krais irail aledier ehu manaman kehlail me kitail kak alehdi nan mour wet.

Ni atail kin onopiki Pwuhk en Mormon nan Kohdo, Idahwen Ie nan pahr et, kitail kadehde ier mwomwen Nihpai ah doadoahngki manaman wet ong inou wet sang ni ah pwoson ansou me e sohpai peikasal oh kahpwal akan en ale pileit kan me Kauno mahsanihong. Nipahi, inenen nan kapehd toutoukihla uwen masepwehk oh sou pwoson en Laman oh lemuel, ahpw e ahnikihte koapworopwor me Kauno pahn ketkiong irail pleit kan. E padahkiong rie ko, “Ni mehlel pwehki Kauno eh ieias, oh kitail momour, kitail sohte pahn kohdihla rehn atail pahpao nan sapwtehno lao kitail kapwaiada dahme Kauno pahngokihong kitail.“ Pwehki sang ni kehlail en Nihpai ong sapwellimen Kauno inou kan, e kilangehr manaman kapwuriamwei ehu oh kak kapwaiada dahme koasoandiong en wia. Mwuhr, nan ah kokohp, Nephi intingidier songen kopworopwor wet, ni inting, “Kedekedeo Ngehi, Nihpai, kilangada manaman en Sihmpwul en Kohto, eh kohkohdi pohn souleng kan en mwomwohdiso en Sihmpwulo, oh pohn sapwellimen Kauno aramas en inou kan, … oh irail perehrehki mour pwuhng oh manaman en Koht ni lingan kowahlap.“

I kilangehr sapwellimen Kauno inou kan oh manaman me kin kokohdo nan mour en seri kan en Koht, kakehlailih irailla en sohpai irair kan en nan mour wet. Ehu rahno ahi pwoud o pwurodo ni ihmwat o sang ah sarawi nan tehnpas sarawi oh padahkiong ie ia uwen ah kehn laud dahme e alehdier wasao ansou me rahn o inenen lomwulomwur. Ni ansou me e pedelong nan tehnpas en Kauno, e kilangada ohl emen nan wheelchair mwekimwekid wawai kohwei oh lih emen me dodohngki sokon alialu limwah, ira koaros kohdo pwe ira en sarawi oh ehu ong Kauno nan Tehnpese. Ansou me ahi pwoud o aluhla nan wasahn initiatory, e kilangada lih emen me sohte elep peh oh ekiste elep en peh ong mehteio, pil wiewia soahng kan koaros me e alehdier.

Ansou me ngehi oh ahi pwoud kosokosoaia songen kemwekid pwukat, se esedahr me irail me ahneki mongiong mwakelekel oh kehlail nan inou sarawih kan me irail wiahiong Koht nan Tehnpese me karehda arail kak wia tohnpadahk kehlail kei en Krais me karehda arail kak mwesel sang arail wasahn kousoan nan ansou kopou wet, mendahkila pein arail mour.

Kompokepahi ko, ma mie mehkot me kitail kak alehdi—oh ehu mehkot me kitail kak ehukiong neitail seri kan oh dih en mwuhr akan me pahn kak sewese irail nan skeng oh kahpwal akan me mih mwohrail—e pahn seweseirail en ahneki koapwoaroapwoar nan inou kan me irail wiahda sang Sises Krais. Alehdi soangen mwekid kaselel pwukat pahn sewese irail en momouriki dahme Kauno inoukidahr ong sapwellime kan me poadidiong Ih: “Nei tohnpadahk kan pahn keskesihnen te wasa me sarawi kan, oh sohte pahn mwekid.“

Ia mwomwen atail kak kalaudehla soangen koapwoaroapwoar wet sang Sises Krais? E kin kohdo ni atail aktikitikla, poasonekihda atail mour Sounkomouro, momouriki rongamwahu en Sises Krais, alehdi tiahk sarawi kan en mour soutuk oh lapalapala, oh wauneki inou kan me kitail wiahiong Koht nan Sapwellime tehnpas sarawio.

Ni kaimwseklahn ah padahk nan kapokon lap en Okotohpe 2019, atail soukohpo katamankiong kitail ehu dake kesempwal en alehdi koapwoaroapwoar en inouo, e kosoaia: “Ahn emen emen warohng en pidelong nan tehnpas en Kauno anahne en pil kaunopada laud palingehne. … En emenemen warohng anahne weliakapw unsek en madamadau oh mongiong pwehn kak rasehng Kauno, me wia aramas mehlel, wia mehn kahlmengi mwahu men, oh aramas mwakelekel men.” Eri, ma kitail pahn wekidala mwomwen atail koukounop en pidelong nan tehnpas sarawi, kitail pahn wekidala mwomwen atail doadoahk nan tehnpas sarawi, me pahn wekidala atail mour likin tehnpas sarawi. “Eri amwail likilik en kehlailla mwohn sihlangin Koht; oh padahk en priesthood ahpw pahn kamwakelehda pali ngenimwail duwehte pwoik me kin sang nanleng.”

Bishop men ih ese me kin kosoia me perehn Praimeri kaidehn te perehn “Praimeri“ ahpw e wia wasahn kaskuhl en “kaunopada pidolong tehnpas sarawi.“ Nan Senueri bishopo kin kihpene tohn klahso iangahki sounpadahk kan nan ah ohpis wasa me re kin kosoaia mwomwen arail pahn kaunop arail pahn pidolong tehnpas sarawi pahro pwon. Bishopo ahneki ansou mwahu en wia peidek kan ong pidelong nan tehnpas sarawi, me mihmier nan kasukuhl kan en Praimeri. E luhkeiong seri kan en kin kounopada pwe ansou me re pahn kohdo ni ohpis en bishop nan pahr ehu, irail pahn kehlail, koapwaoroapwoar nan inou kan, onopongehr en alehdi kisin likou en mweimwei en pidelong nan tehnpas en Kauno. Nan pahr et bishopo naineki serepein pahmen me inenen peren, kounopadahr, oh inengiong en kohla nan tehnpas sarawi me kahreda re mwahu ki bishopo en kiong irail neirail kisin likou en mweimwei kan nin rahn en pahr kapwo kulok [eisekriau minit ehu daulih] 12:01a.m.

Soangen kounopada wet kaidehn ongete irail akan me pahn keieun kohla ni tehnpas sarawi. Kitail koaros anahne kin koukounop en kohla ni tehnpas en Kauno. I ese ehu sdeik me doadoahngki lepin koasoi pwukat Ni imwatail kan iei wasahn kaskuhl, Mwomwohdiso iei wasahn sawas, oh tehnpas sarawi wasahn katengehdi” Katengehdi wia mahsen kesempwal ehu me wehweki kilkilengwohngete wasa ke kohkohlaie, ahpw e pil kak wehwehki pirediong de tehk mwahu, koasoanehdi de rapahki wiepe, pwung. Eri katengeteng nan tehnpas sarawi katengehiong kitail atail Sounkomouro, kihong kitail ahl me pwung oh inen me kamehlelehiong kitail me kitail ahneki inou oh koapwoaroapwoar sang Sises Krais. Eri, kitail koaros anahne kalaudehla katengeteng wet sang ni wiahda ehu ansou en kohla nan Sapwellimen Kauno tehnpas, mendahte ma tehnpaso karanihuk de pil doh.

Presedend Russell M. Nelson, atail soukohp kesempwalo, katamanehng kitail kesempwalpen padahk kan me mahsani: “Tehnpas sarawi wia poahsoanpen atail kehl en atail pwoson oh palingehn pwehki Sounkomouro oh Sapwellime padahk me wia tapwin nan tehnpas sarawio. Soahng koaros me padahk nan tehnpas sarawi, me sang ni kaweid oh sang ni Ngehno, e kalaudehla atail wewehki Sises Krais. Sapwellime tiahk sarawi kesempwal akan katengeikitaildieng Ih sang ni inou sarawi kan en prihsduhd. Eri, ni atail pahn kolokol atail inou sarawi kan, E pahn ketin kiheng kitail kisakis en Sapwellime manaman en kakehlail oh kamwahu. Oh, ia uwen atail pahn anahne Sapwellime manaman nan rahn akan me pahn kohdo.”

Sounkomouro kupwurki kitail en kounopada en wewehki, ni wehwe sansal mwahu, mwomwen atail pahn mwekid ni atail pahn wiahda atail inou kan ong ni Mwaren Samatail Nanleng. E mwahuki kitail en kounopada en wewehkihla atail sohso kan, inou kan, oh pwukoah kan; en kounopada ong pepehm en palingehn en pirida me kitail anahne nan mour wet. I ese me ansou me Kauno pahn mahsanih mendahte kisin ineng ehu de pwung ehu nan atail ingeng en kihong Ih nan atail mour, oh nan tiahk sarwi kan oh inou kan me kitail kin wiahda nan Tehnpese, E pahn kapai kitailda, nan ahl ehu me unsek, sang ni manaman oh popohl me kitail kin anahne.

Nan tehnpas en Kauno iei wasa kitail kak kiweklahng nan wasa ieleile oh ahl sarawi kan. Eri, ansou me kitail kin aluhiei sang nan Tehnpas Sarawio, kiewekla sang ni koapwoaroapwoar en inou sarawihkan, katengetengkihdi manaman sang powe, kitail kin wahda tehnpas sarawio ong nan imwatail kan oh nan atail mour. I men kamelelehiong kumwail me kolokol Ngehn en tehnpas en Kauno rehtail pahn wekid kitaila, ni unsek mehlel.

Kitail ese me sang ni tehnpas sarawi ma kitail mwahuki Ngehn en Kauno en ketiket saledek nan atail mour, kitail sohte kak ahneki pepehm suwed ong mehteikan. Kihong nan atail mongiong oh madamadau kan perehn pepehm suwed de lamalam me pahn kapwarehda koasoi suwed oh mwekid, mendahte ma nan social media de nan wasahn kouson kan, pahn kahreiong Ngehn en Kauno ah pahn kokohlasang atail mongiong kan. Eri menlau ke dehr kesehla ahmw koapwoaroapwoar, ahpw, mweidohng ahmw koapwoaroapwoar en kehlail la.

Kokoudahn tehnpas sarawihkan kan pahn doudoulahte kaperenih kitail, kihong kitail kehlail, oh kapai kitail da. Me keieu kesempwal, ma kitail pahn wekidala atail kounopada en pidelong nan tehnpas sarawi, kitail pahn wekidala dahme kitail esehla nan tehnpas sarawi, me pahn pil wekidala atail mour likin tehnpas sarawi. I men wekdekla wet en audehkin kitailda koapwoaroapwoar nan atail inou sarawi kan me kitail wiahda ong Koht sang Sises Krais. Kauno ieias, Sises iei Ih me Soundoar, oh iei Ih Sapwellime Mwomwohdiso me kapwurupwurdohu met. I wia ahi kadehde ong me mehlel pwukat ni mwar sarawi en Sounkomour, Sises Krais, ahmen.