Soahng Koaros Pahn Mwahu Pwehki Inou Sarawih Kan en Tehnpas Sarawi

Maing kempoakepahi soulengko, tiepene en kapokon lap wet wia ehu ahnsou inenen sarawi ong ie. I inenen kapingki pwukoah me kohieng ie pwe ien kak koasoaieng milien kei en Souleng en Imwin-rahn akan oh kempoakepahtail kan koaros nan sampah. I poakoahng kumwail, oh I ese me Kauno ketin poakohng kumwail.

Pahr [limeisek] 50 samwalahro, I ahneki ahnsou mwahu ehu ien wia pwukoahn preseden en Ricks College nan Rexburg, Idaho. Ni menseng en Suhn 5, 1976, ngehi oh ai pwoud Kathy ahpw diraip sang Rexburg kohla ni Tehnpas Sarawi en Idaho Falls pwe sen iang kasarawihn katengtengpene en emen kempoakepaht. Pwe mehlel, nan imwat naiht pwutak pwulopwul pahmen, eri aht seiloklahng nan tehnpas sarawio pweikihda pwehki sang ni sawas en me kohdo oh apwalih nait serihko! Eri se mweselda oh pwilikihdi naiht seri kesempwalko rehn liho en apwalih oh sahpw tapiada aht seilok mwotomwot, diraipkihla minit [silihsek] 30.

Aht pepehm nan tehnpas sarawio rahno me inenen kaselel, me duwehte ansou kan koaros. Ahpw, mwurin kaimwseklahn kasarawihn katengtengpenehu—oh ni ansou me se onohnop en mwesel pwurala nihmwo—se kasawiada diren tohn doadoahk en tehnpas sarawio oh sounsawas kan arail koasoakoasoi ngilen saloh ni wasahn pidolong oh pidohi en tehnpas sarawio. Ni mwurin ansou kis, emen tohn doadoahk en tehnpas sarawio ahpw indahng kiht me Teton Dam me ahpwtehn wiawihda ni palimese en Idaho mweredi ohla! Lapalahn kalon en pihl me dirsang bilien [welihsek] 80 (milien [silipwiki] 300 kiupik miter) me widekieilahsang nan dahmo oh kusdilahng nanwahu kan me karanihki sikuwehr maihl [silipwiki] 300 (km sikuwehr [isipwiki isihsek limau] 775). Palilaud en nan kahnihmw en Rexburg mihla nan pihl, ihmw akan oh sidohsah kan peila pwehki sang ni lapek en pihlo. Persent weneisek samwa en [duwekid] 9,000 en tohn kouson en wasahu sohla nimwarail.

Ni amwail pahn song medewe, aht madamadau oh iren kapwunod ansouohte doke poarepen oh naiht seri kan, tohn skuhl epwiki kei oh tohn doadoahk en skuhlo kau, oh kousapw me se inenen poakoahng. Se dohkihsang nihmwo sohte lel mile 30 (50km), ahpw rahnwet, mwohn eh miehier sehlpwohn oh meset kan, se sohte kak lokaiahng nait seri kan ni ansouohte, de sen pil kak diraip sang Idaho Falls kohla Rexburg, pwehki ahl kan koaros ritidier.

Ihte me se kak wia ansouo sen pweidi pwohngo nan ehu motel en Idaho Falls. Ngehi oh Kathy sahpw kelepwikihdi nan aht motelo oh peki ni ngidingid rehn Sahm Nanleng ong doarepen nait seri kesempwal kan oh irail kidsamwah kan me lelohng nan kahpwal pwehki sang ni dahme wiawio. I taman Kathy ah kin kahkseli pohn tatoni mensengo ni ah pwunodki nah serihko. Itarete ai pil ahniki pwunod, ahpw I pil nantiheng kameleileidi ai madamadau oh meihrla.

E sohte werei ai meihro a ahi mwohn limpoak pa kapiriehda oh indahng ie, “Hal, ia mwomwen ahmw kak meihr nan soangen apwal wet?”

Eri iren mahsen pwukat ahpw kohdohng nan ai mongiong oh madamadau. I indalahng ai pwoud: “Kathy, sohte lipilipil dahme pahn pwarada, soahng koaros pahn mwahu pwehki tehnpas sarawi. Se wiahdahr aht inou sarawi kan rehn Koht oh se katengtengpenehr en wia peneinei kohkohlahte.”

Nan ansouo, e mwomwen me Ngehn en Kauno kamehlelehieng kihtehr nan aht mongiong oh madamadau kan dahme se esehier me mehlel: tiahk sarawi kan en katengtengpene, ihte wasa me e kin wiawi nan tehnpas sarawi en Kauno oh kin wiawi pahn kaweidpen prihsduhd kan me ahniki pwuhng, katengeikitailpenehr nin duwen ohl oh lih pwopwoud ehu, oh naiht seri kan pil katengtengieng kihtehr. Eri ni mehlel sohte anahnepen en mie masepwehk, oh se inenen kapingki pwehki aht rongada mwuhr me naiht serihko sohte lelehng nan kahpwal.

Mehlel mahsen wet me sang Preseden Thomas S. Monson kasalehda mehlel dahme ngehi oh Kathy kehn pwohng me sohte pahn kak manoknoklahu. “Ni atail kin kohla nan tehnpas sarawi, wasahuo kak kieng palingenetail soangen pepehm kei oh pepehm en popohl. … Kitail pahn esehla ia wehwehn mahsen en Soundoro ansou me e ketin mahsanih: ‘I kihong kumwail popohl, pein ei popohl me I kihong kumwail. … Kumwail dehr insensuwed, de pil ahniki masepwehk [John 14:27].’”

I inenen kapaikihda pepehm en popohl ni ansou koaros me I kin pidolong nan tehnpas sarawi. I tamanda rahn me I tepin aluhlong nan Tehnpas Sarawi en Salt Lake. I wia pwutak pwulopwul men ansouo.

I kilengida nan pwolengen ihmwo me inenen pwetepwet oh kamarainihda nan perehu duehte ei kak kilangda nanleng. Oh ni ansouo, madamadau me kohdo nan mwoangeie ni mahsen sansal: “Mie ier pak me I iang mih nan wasa marain wet.” Ahpw pil ni ansouohte madamadau ehu pil kohdohng ie, kaidehn sang ni ngilei, oh iet koasoai kan: “Soh, ke saik iang kohdo wasaht. Ke wie tamatamanda ansou mwon ahmw ipwidi. Ke mih nan wasa sarawi ehu me duwehte wasa me Kauno pahn ketsang ie.”

Riei soulengko, I kadehdehki ni mehlel me ni atail pahn kin kohla nan tehnpas sarawi, kitail pahn kin tamanda duwen poahson en palingenitail, ni atail kin ehuieng Sahmo oh Sapwellime Ieroso, oh atail ineng laud en men pwuralahng nimwatail nanleng.

Nan padahk kan en kapokon lap me apwtehn nek, Preseden Russell M. Nelson padahngki me:

“Wasa me keieu mwahu en momourki ngehn sarawi iei momouriki loalemwail amwail inou sarawi kan!”

“Soahng koaros me kitail kamehlele oh ehu ehu inou me Koht wiadahr ong Sapwllime aramas en inou kan koaros wiawi nan sapwellime tehnpas sarawi.”

“Emen emen aramas me wiahda inou sarawi kan … nan tehnpas sarawi—oh momourki—kalaudehla ah kak en alehdi sapwelimen Sises Krais manaman.”

E pil padahngki me “ni ahnsou me kitail wiahda inou ong Koht, kitail mweselsang wasa mengei kohkohlahte. Koht sohte pahn pohnsehsehla Sapwellime ehupene ong irail kan me nantiheng en tengedi Reh. Ni mehlel, irail kan koaros me wiadahr arail inou ehng Koht alehdier soangen limpoak oh mahk kesempwal ehu.”

Pahn kaweidpen Preseden Nelson me loaloapwoat, Kauno ketin kamwadangahla, oh pahn poupousehlahte kamwadanga wiawihdahn tehnpas sarawi kan pohn sampah. Met me pahn kak kieng sapwellimen Koht serih kan en kak alehdi tiahk sarawi kan en komour oh mour soutik oh en kak wiahda oh kolokol inou sarawi kan. Pwehn kak warohng en wiahda inou sarawi kan e sohte ong ansou ehute ahpw e wia tiahk en ereihn mour. Kauno ketin mahsanier me e pahn pweidahte ma sang atail mongiong unsek, kehl unsek, lamalam unsek, oh wen kehlail unsek.

Kalapw kohla nan tehnpas sarawi oh wia tiahk sarawi kan pahn kak wiahla ehu ahl en loaloapwoatieng Kauno. Ni ansou me kumwail pahn kin kolokol amwail inou sarawi kan en tehnpas sarawi oh tamataman irail, kumwail lukehiengehr Ngehn Sarawi en kakehlailih kumwail oh kamwakelehda ahmw mour.

Kumwail ahpw pahn alehdi pepehm en maraihn oh koapwoaroapwoar me pahn kadehdehda me inou kan koaros me mehlel. Kumwail pahn esehla me ehu ehu inou sarawi rehn Koht iei e wia ehu ahnsou mwahu en karaniala Ih, ne pahn kak kahrehda ineng en amwail mongiong en kak kapwaiada inou sarawi kan en tehnpas sarawi.

Kitail alehdier inou, “Pwehki atail inou sarawi kan rehn Koht, E sohte pahn pwangada nan Sapwellime sawas en seweseikitail, oh kitail sohte pahn pwangahkihda Sapwellime mahk en kanengemah ong kitail.”

Iei e sang ni inou sarawi en katengtengpene en nan tehnspas sarawi me kitail kak alehdi koapwoaroapwoar en limpoak nan pwungen peneinei me pahn popousla mwurin mehla oh lel mour soutuk. Wahuniki inou sarawi kan en kapwopwoud oh peneinei me wiawi nan tehnpas sarawi en Koht pahn doarehsang ngehn suwed en lehk oh pohnmwahso.

Ni epwelpene mwahu nanpwungen riamwail ohl oh lih akan iei ihte me pahn kak sawas en sewese amwail peneinei nan sapwellimen Kauno ahl. Kieng serih kan arail ahnsou en kak kapakapki emen emen. Kasawiada mwadang tepin saweweh kan me kin pwarada, oh kin kapinga irail kan me kin wiahda doadoahk mwahu, mehlel ong emen emen. Ni ansou me perien kan kin kapakapki emen emen irail oh papah emen emen irail, mongiong kan pahn kin mwuterekda oh pahn kin sohpeieng emen men irail oh ong arail pahpa oh nohno kan.

Me pil wia kisehnte mwo, me iei dahme kawewehdisang Malakai ni ansou me e koasoiada duwen soukohp Elaisa: “E pahn poadokedi nan mongiong en seri kan inou kan me wiawihengehr arail pahpa kau, oh mongiong en seri kan pahn sohpeilahng arail pahpa kau. Pwe ma soh, a sampah wet unsek pahn kamwomwala ni eh pahn ketido.”

Kasongosong kan, oh kahpwal akan pahn udahn kodohng kitail koaros. Sohte emente kitail me pahn pitsang “kamedek kan en paliwar.” Ahpw, ni atail pahn kin pwarek tehnpas sarawi oh tamataman atail inou sarawi kan, kitail kak kaunopada en ale kaweid sang Kauno.

Ni ansou me ngei oh Kathy kapwopwoud oh katengtengpene nan Tehnpas Sarawi en Logan Utah, eri-Elder Spencer W. Kimball me wia kasarawihn katengtengpenehu. Ni lokaia mwotomwot eh mahsanih, ni ah wia kaweihd wet, “Hal oh Kathy, kumwa ahniki mour mwahu pwe ni ansou me amwa ansou pahn leledo, kumwa pahn kak kowei ni saledek.”

Ni ansouo, se sohte wewehki mwahu ah kaweihd ong kiht, ahpw se nantiheng wia aht kak koaros en momourki mour ehu me se pahn kak kaunopkihda en papah Kauno ni ansou me pwukoahu pahn leledohng kiht. Mwurin aht wie pwopwoudki kerenieng pahr [eisek] 10, pwukoah ehu me sohte kasikpe ahpw kodohng kiht sang Comisiner en Ohpis en Skuhl en Mwomwohdiso, Neal A. Maxwell.

Kaweid kaselel me kohiong kiht sang Preseden Kimball nan tehnpas sarawi me dene “kowei ni mengei” e mehlela. Ngei oh Kathy alehdi pwukoah ehu en mweselda me wia mehkot kaperen ong peneinei nan California pwehn kohla papah pwukoah ehu oh wasa ehu me I udahn sehse. Ahpw, aht peneinei onopadahr en mwesel pwehki soukohp men, nan tehnpas sarawi ehu, wasa ehu me kin ale kaudiahl, me kilangada kemwekid ehu me ehu rahn se pahn onopadahng.

Riei soulengko, I kadedehki me sohte mehkot kesempwal me duwehte wahuniki inou sarawi kan me kumwail wiadahr de me kumwail pahn wiahda nan tehnpas sarawi. Sohte lipilipil wasa kumwail mihmi ie pohn ahl en inouo, I koangoangoahkin kumwail en nantieng kapwaiada kosonned kan oh ale mweimwei en warohng en pidolong nan tehnpas sarawi. Kin nantieng pwarek ansou koaros ansou me kin mie ahnsou. Wiahda oh kolokol inou sarawi kan koaros rehn Koht. I kak inoukiong kumwail duwen me mehlelo me I ehukiong Kathy ni lukepen pwong ehu pahr limau samwalahro nan motel ehu nan Idaho Falls me: “Sohte lipilipil dahme pahn pwarada, soahng koaros pahn mwahu pwehki dodohk en tehnpas sarawi.”

I men kadehdehieng kumwail ahi kadehdeh tohrohr me Sises iei ih me Krais. E ketin ieias oh kaukaweid Sapwellime Mwomwohdiso. Tehnpas sarawi kan iei tehnpas en Kauno. President Russell M. Nelson me wia sapwellimen Koht soukohp pohn sampah. I poakoahng ih, oh I poakoahng emen emen kumwail. Ni lengileng sarawi en Sises Krais, amen.