“Nennenla, oh Ese Me Ngehi Koht”
Kitail kak nennenla oh ese me Koht iei Samatail Nanleng, kitail Sapwellime seri, oh Sises Krais atail Sounkomour.
I kahre pwihn en wie nuhs ehu kohlong nan sapwellimen Kauno, tehnpas sarawi kapw ehu me ahpwtehn kasarawihla. I padahkiong irail ia kahrepen tehnpas sarawi nan Mwomwohdiso en Sises Krais en Souleng en Imwin-rahn akan oh pil sapsapeng arail peidek kan.
Mwohn aht pahn pidolong nan perehn selestielo, I kawehwehda me pere kesempwal wet nan tehnpas en Kauno e weliandi meleilei oh kaselel en tehnpas en nanleng me ehu rahn kitail pahn pwurala ie mwurin mour wet. I kawehweiong irail me ni ansou me se pahn mihmi nan perehn selestiel et se sohte pahn lokaia, ahpw I pahn pereniki sapeng arail peidek kan wasa me se pahn pwurehng tuhpene ie.
Ni ansou me se pidohisang nan perehn selestielo oh kiht kohla ehu wasa, I ahpw idek rehrail ma mie mehkot me irail men ehuki me pid dahme re kilang de rong. Emen soun wie nuhso ahpw koasoiahda sang nan ah pepehm laudo inda, “Saikinte pak ehu I kin kehn soahng wet nan ahi mour. I sohte ese me mie soangen meleilei wet nan sampah; I sohte kamehlele me soangen meleilei wet kak wiawi.”
Dahme aramas menet koasoia inenen sair ie pwehki e mehlel oh sansal. Mwekid me soun wie nuhso wiahu kasalehda ehu kesempwal en nennenla—kitail kak powehdi oh sohpeisang mwoarong me wiewiawi nan sampah.
Mwurin ahi medemedewe ahn soun wie nuhs menet pasapengo e katamandohngie soahng me kitail kin wiewia nan atail mour rahn pwukat—atail kediropw, kamwarong, wekdeklahn koasoandi, mwekid kan me kin wekidala dahme kitail udahn pahn wia—iren pwuhk sarawi ehu me kohdo nan ahi madmadau: “Nennenla, oh ese me Ngehi Koht.”1
I kapkapki me Ngehn Sarawi pahn kamarainih kin kitail en medewe mwahu ia wen ileile oh sarawi en nennenla nan atail mour—nennenla en palingenitail me kin kahrehda paliwererail ah kin ese oh tamanda me Koht iei Samatail Nanleng, kitail Sapwellime seri, oh Sises Krais iei atail Sounkomour. Kapai kaselel kak kohieng tohn Mwomwohdiso koaros me kolokol arail pwoson pwe irail en kak wiahla sapwellimen Kauno aramas en inou kei.”2
Nennenla
Nan 1988, Souleng kan en Missouri alehdi kahpwal en kalokolok. Pwihn suwed kan pwakihrail sang nan imwarail kan nan Jackson County, oh ekei tohn Mwomwohdiso songehr kapwureirail pene nan wehi keren kan. Ahpw kalokolok wet wenwenlahte mwowe, kahpwal en mehla tohtolahr. Nan ansou en kahpwal pwukat, Kauno kasalehiong mehn kaweid pwukat rehn Soukohp Joseph Smith nan Kirtland, Ohio:
Eri, amwail mohngiong kan en nsenamwahula me pid Saion; pwehki soahng me momour koaros mihmi nan Limei kat; nennenla oh ese me Ngehi Koht.”3
I kamehlele me sapwellimen Kauno mahsen me masanih ”en nennenla” audaudki soahng tohto kaidehnte sohte lokaia oh dehr mwekid. Pwehki E men kitail en tamataman oh kehliki Ih oh Sapwellime manaman “ansou koaros ni mehkoaros, oh wasa koaros me kitail pahn mih ie.”4 Eri, “nennenla” kakete wia ahl en katkataman kin kitail en kilenglahngete sapwellimen Sounkomouro doadoahk laud me karehda palingenitail kak nennenla oh kakehlailih kitailda en kak wia oh powehdi kahpwal akan.
Kokouda pohn Paipalap
Pwoson mehlel kin ansou koaros kilengwohngete Kaun Sises Krais—pwehki Ih E wia sapwellimen Sahm Nanleng Iehroso oh pwehki Ih komour kodohng kitailehr.
“E ketin sapengalahr keimwseklahn kosonnedo, oh kin ketin uhki irail kan me kin pwoson Ih; oh irail me pwoson Ih pahn tengetengediong soahng koaros me mwahu; pwehki e ketin welian kitaildier ong atail wiewiah kan.”5
Sises Krais iei atail Soundoar,6 soun koasokosoi,7 oh soun uhpalihkin kitail8 rehn Sahm Nanleng oh iei paipalap wasa me kitail pahn kauwada poahsoan en palingehn en atail mour ie.
Helaman koasoia, “Tamataman, tamataman me iei pohn paipalap en atail Sounkomouro, me iei Krais, sapwellimen Koht Iehroso, me kumwail udahn pahn kauwada amawail poahsoan powe; pwe ansou me tepelo pahn kadarodo kisinieng kehlail kan, ei, elipip kehlail kan, ei, ni ansou me takai ais kan oh melimel kehlail kan pahn lel kumwail, sohte pahn ah manaman pohmwail pwe en keseikumwaildiong nan kepin sehd wasahn nsensuwed oh weirek poatoapoat, pwehki paipalap wet me kitail kokouda powe, iei poahsoan mehlel, poahsoan me ma aramas kokouda powe re sohte pahn kak pwupwidi.”9
Karasaras en Krais me wia atail “paipalap” me kitail pahn kauwada poahsoan en atail mour powe wia mehn kaweid keieu mwahu. Menlau ntingihdi nan ire tiktitik wet me kaidehn Sounkomouro me poahsoanpe. Ahpw, e koasoandi kitail en kauwada poahsoan en pali ngenitail Powe.10
Poahsoan iei kisehn kokoudahn ihmw me kin tepsang nan pwehlo. Poahsoan kehlail kin sewese doarehsang kahpwal soh kesikpeh kan oh soangen kahpwal tohrohr teikan. Poahsoan kehlail pil kin sewese ia uwen toutou en ihmwo e pahn kokouda wasa laud kan pwe en dehr toutoula oh kihrla nan pwehlo oh soun kou ihmw kan kak sohngedi pahrehk.
Ehupenehn pwehlo oh poahsoan ohng ni kokoudahn ihmw ehu udahn kesempwal pwe ma e pahn kehlail ah ihmwo pahn tengeteng oh sohte pahn ohla ansou werei. Ekei soun wie ihmw kan, kin katengepene deking kan pwe irail en kin perekihwei nan pwehlo pwe poahsoano en kin kokoudahsang pohn “takai me kin koledi pwehlo” takai kan me kin mihmi pahn pwehlo oh rakied kan.
Me duwehte met, poahsoan en atail mour udahn pahn kokouda pohn paipalap en Krais ma kitail men tengetengedi oh sohte mwekid. Inou sarawi oh tiahk sarawi kan en sapwellimen Sounkomouro rongamwahu kopwurpwurdoh kak duwehte deking kan me kin katengteng pene pwe en kak poahsoanehda kokoudahn ihmwo. Ansou koaros me kitail kin mehlel alehdi, tehk sapahl, tamataman, oh kakapwa inou sarawi kan, angkehn palingenitail kan kin katengtengdi oh sohte mwekid pohn “paipalapo” iei Sises Krais.
“Eri, mehmen me kamehlele Koht pahn koapworopworiki mehlel me mie sampah mwahu ehu, mehlel, wasahu iei ni pali maun en Koht, soangen koapwoaroapwoar me tepsang pwoson, me wiahda angke ong palingehn en aramas, me kin kahrehiong irail en tengeteng oh loaloapwoat, wiewia me mwahu ahnsou koaros, pwehn kalinganahla Koht.”11
Kisikisin keirda oh kekeirda laud “ni soangosoangen ansou,”12 “pwung [pahn kalinganahda atail] madamadau kan sohte uhdi,” atail “kamehlele [pahn lalaudla oh kehlaila] mwohn sihlangin Koht,” oh “Ngehn Sarawio pahn wia kempoakepahtail ansou koaros.”13 Kitail pahn duduwehte, tengeteng, keirda, oh soandi.14 Ni poahsoan en atail mour ah pahn kokouda pohn Sounkomouro, kitail kin ale kapai en “nennenla”—pwe palingenitail en kamehlelehiong kitail me Koht iei Samatail Nanleng, kitail Sapwellime seri, oh Sises Krais atail Sounkomour.
Ansou Sarawihkan, Wasa Sarawi, oh Imwatail.
Kauno pein ketkihda ansou sarawi oh wasa sarawi kan pwe en seweseikitail en kak kehn oh esehla duwen nennenla me mihmi loalatail.
Ni karasepe, Rahnsarawi iei sapwellimen Koht rahn, e wia ansou sarawi kasarawihla pwe en tamataman oh kaudokiong Sahmo ni mwaren Sapwellime Iehroso, pwe en patehng tiahk sarawih kan en prihsduhd, oh alehda oh kakapwa atail inou sarawih kan. Ehu ehu wihk kitail kin kaudokiong Kauno ansou en onop nimwatail kan oh ni atail kin “patehng riatail souleng kan”15 ansou en kamadipw sarawi de nan mihting teikan. Nan Sapwellime rahn sarawio, atail madamadau, wiewia kan, oh mwomwatail iei kilel me kitail pahn kiong Koht iei kasalepen atail limpoak ong Ih.16 Rahnsarawi koaros, ma kitail pahn wia, kitail kak nennenla oh ese me Koht iei Samatail Nanleng, kitail Sapwellime seri, oh Sises Krais atail Sounkomour.
Poahsoan en atail kaudok en Rahnsarawi iei kitail en “kohla ni tehnpas en kapakap oh aledahng [kitail] kamadipw sarawi ni [sapwellimen Kauno] rahn sarawi.”17 “Ihmw[akan] en kapakap” me kitail kin patpene loale rahnsarawi wia imwen mihting kei oh soahng teikan me kamanamanla—wasa sarawihkan wia wasahn meleilei, kaudok, oh kaskuhl. Ehu ehu imwen mihting kan oh dipwsou kan kasarawihla sang manaman en prihsduhd en wia wasa me Ngehn en Kauno pahn ketket ie oh wasa me sapwellimen Koht seri kan pahn kohdo “esehla kupwuren arail Soundoro.”18 Ma kitail wia, kitail kak “nennenla” wasahn atail kaudok kan oh esehla laud me Koht iei Samatail Nanleng, kitail Sapwellime seri, oh Sises Krais iei atail Sounkomour.
Tehnpas sarawi iei pilehu wasa sarawi ni mehlel e kasarawihla wasahn kaudok oh papah Koht oh esehla me mehlel akan en nanleng. Atail madamadau, wiewia, oh atail likou kan nan tehnpas en Kauno kin weksang wasa teikan me kitail kin kohla ie. Nan Sapwellime tehnpas sarawi, ma kitail wia, kitail kak nennenla oh ese me Koht iei Samatail Nanleng, kitail wia Sapwellime seri, oh Sises Krais iei atail Sounkomour.
Kahrepe kesempwal en ansoun sarawi oh wasahn sarawi duwepenehte: e kin kapwkapwurehiong kitail en kin kilenglahngete Sahm Nanleng oh Sapwellime koasoandio, Kaun Sises Krais oh Sapwellime Tomwo, manaman en Ngehn Sarawio, oh inou kan me iangahki tiahk sarawi kan oh inou sarawi kan en sapwellimen Sounkomouro rongamwahu kowpurpwurdohr.
Rahnwet I kapwurehiong oaralap me I ndahier ansoukis samwalahro. Imwatail kan pahn wia wasa kis me duwete ansou sarawi oh wasa sarawi wasa me aramas akan oh peneinei kak “nennenla” oh ese me Koht iei Samatail Nanleng, kitail wia Sapwellime seri, oh Sises Krais iei atail Sounkomour. Mwesel sang imwatail kan Rahnsarawi pwe kitail en kaudok nan tehnpas en Kauno inenen kesempwal. Ahpw ihte ma kitail pwurodo nimwatail kan palingenitail tamataman oh kehlailki soahng kan me kitail alehdi nan tehnpas en Kauno oh kemwekid kan me pahn utungada atail madamadau en ulahngete kahrepen mourwet pahn kak powehdi kasongsong kan me ikiparpesengier nan sampa wet.
Atail Rahnsarawi kokohdo kan, tehnpas sarawi, oh soahng kan me kitail esehla nan imwatail kan kak wadohng kitail manaman en Ngehn Sarawi, iangahki inou sarawi kehlail me kokohdo kan me poadohngete Sahmo oh sapwellime Iehroso, oh “iangahki marain unsek en koapworopwor”19 en sapwellimen Koht Inou poatopoat kan.
Ni imwatail kan oh Mwomwohdiso ah ehupene oh wia ehu rehn Krais,20 kitail kak diar kahpwal pali koaros, ahpw kitail sohte pahn nsensuwedla nan atail madamadau oh mohngiong. Kitail kak pwunodada sang ni atail wiewiahkan oh kasongsong kan, ahpw kitail sohte pahn kesehla atail koapworopwor. Kitail pahn kalokolok, ahpw kitail pil pahn ese me kitail sohte kelekelehpw.21 Kitail kak alehdi kakehlepen palingenitail pwe kitail en kak tengetengedi, sohte mwekid oh mehlel.
Inou oh Kadehde
I inoukihda me ma kitail pahn kauwada poahsoan en atail mour pohn “paipalap” en Sises Krais, kitail kak kapaida sang Ngehn Sarawio pwe palinwar oh palingehn en kak alehdi meleilei wet pwe kitail en kak ese oh tamataman me Koht iei Samatail Nanleng, kitail wia Sapwellime seri, Sises Krais iei atail Sounkomour, oh kitail kak kapaida oh powehdi soahng apwal akan.
I pereniki kadehde me Koht iei Samatail Nanleng, kitail Sapwellime seri, oh Sises Krais iei atail Sounkomour oh “paipalap” en atail mour. I kadehdehki met ni mwar sarawi en Kaun Sises Krais, ahmen.