Hīmene

Hōho’a

Pupu māmā rū’au e hīmene ra

Hou te mau misiōnare nō Europa ’a tāpae mai ai nā Pātifita ’Apato’a, ’ua vai noa te hīmene ’ei rāve’a pūai nō te tūtu’u i te ’ite nā te mau motu. ’A parare noa ai te ha’apa’ora’a keresetiano i reira, ’ua fa’aauhia te mau hīmene keresetiano mātauhia i te huru hīmene ’āuri rau . Mai ia Teri’i, hō’ē o te mau vahine mātāmua i fa’afāriuhia i Tubuai i te matahiti 1844, e fa’a’ite atu ’oia i te ’evanelia nā roto i te putuputura’a i te ta’ata ’ei pupu i te tapera’a mahana nō tē « hīmene i te hō’ē reo ’āpī nā ni’a iho fa’ahou ’e fa’ahou ā ē tae noa atu i te tu’ira’a pō ». ’Ua māere roa ’o Caroline Barnes Crosby, hō’ē o te mau misiōnare mātāmua, i te hīmene a te mau melo. « ’Aita a’enei au i fa’aro’o i te hīmene navenave maita’i mai te reira », ’ua nā ’ō ’oia.

I te 20ra’a o te tenetere, ’ua ha’a te feiā mo’a i Pōrīnetia farāni nō te fa’aherehere i te mau hīmene o te hīro’a tumu. I te mau matahiti 1950, ’ua ha’api’i atu te mau melo pa’ari i te feiā ’āpī i te hīmene tārava—e pupu hīmene nō te hīro’a tumu mā’ohi e fa’ati’a pinepine nei i te mau ’ā’amu o te Bibilia. ’Aita i maoro roa, tē tere ra te Barcolles, e pupu hīmene feiā ’āpī momoni nā te mau vāhi nō te hīmene i te hīmene tārava nā roto i te reo tahiti, te reo peretāne ’e te reo tinito. Pinepine te Barcolles i te hīmene nō te fa’anahora’a hepetoma a te misiōni i ni’a ia Radio Tahiti.

E mau ’āma’a e rave rahi tei fa’anaho i te mau pupu hīmene ’e te tahi ato’a pupu ’upa’upa. Ha’amata i te matahiti 1954, ’ua fa’anaho te misiōni i te ’āru’i hīmene matahiti ra, te Soirées Musicales, i reira te mau pupu o te mau ’āma’a e ha’uti ai i mua i te naho’a rahi. ’Ua tu’iro’o roa mai te Pupu māmā rū’au ’e tā rātou mau hīmene ’e mau ’ori i terā vāhi ’e terā vāhi, ’ua hīmene ato’a rātou nō te peresideni farāni ra ’o Charles de Gaulle, i te matahiti 1966.