Yumi Nid blong Gat Fet long Yumiwan

Bon long Papua Niu Gini, Maria Kupun Mael hem i oltaem drim blong kasem wan yunivesiti digri, be hem i no bin save olsem wanem hemia bae i posibol. “Mi no bin save olsem wanem mi save mekem drim ia i kam tru from famli blong mi i no gat inaf mane,” hem i talem.

Long 2004, hem i bin joenem Jos. Tu yia afta, hem i bin sevem wan ful-taem misin long Vanuatu. Afta we hem i gobak hom long Papua Niu Gini, wan memba blong Jos, Luke Robert Mael, we hem i bin mitim long Vanuatu, i askem hem blong mared. Maria i disaed blong maredem hem mo muv i kam long Vanuatu long Ogis 2008.

Taem Maria mo Luke i stap lukaotem yang famli blong tufala, tufala i fesem plante hadtaem long saed blong mane. Hem i statem blong wivim bilums (Papua Niu Gini–stael basket) blong salem blong sapotem famli blong hem. Hem i stil drim blong kasem wan digri. “Mi oltaem prea from, mo mi save se wan dei bae i save kam tru,” hem i talem.

Long 2012, Maria i kam blong save abaot Jos Pepetuol Edukesen Fan mo enrol long Yunivesiti blong Saot Pasifik, Emalus Kampas, long 2013.

Maria i tekem fo kos long wan semesta, we “i no bin isi.” Taem hem i stap yet long skul, hem i bonem nambatri pikinini blong hem. Blong sevem mane, hem i no go long bas be i wokbaot wan aoa blong go kasem kampas long wan wei.

Plante long ol fren mo famli oli talem nogud Maria from desisen we hem i mekem, oli talem long hem blong stap long haos mo lukaotem gud famli blong hem. Ol toktok nogud ia oli mekem Maria i harem nogud, mo hem i tanem hem i go long Lod mo prea blong kasem kamfot.

“Hasban blong mi i sapotem mi bigwan long ol stadi blong mi[;] nomata long ol nogud toktok ia, hem i talem long mi blong no mas givap. Hem i stap lukaotem ol pikinini, taem mi go long skul blong atendem ol klas mo sabmitim ol asaenmen blong mi,” Maria i talem.

Long 2015, Bigfala Saeklon Pam i kilim Vanuatu mo prapa spolem gud haos blong Maria. “Evri teks buk mo ol kos buk blong mi oli nogud evriwan,” Maria talem.

Hem i harem nogud, from hem i karem ol buk ia long laebri. Haos blong hem i nogat intanet akses, hem i mas yusum intanet blong skul.

Maria i graduet long Novemba 30, 2018, faef yia afta we hem i finisim ol stadi blong hem, wetem wan bajela digri long komes, dabol meja long manejmen mo pablik administresen mo sosioloji. Ol lokol Lata-dei Sent oli luk save hem olsem wan long ol fas Lata-dei Sent woman long Vanuatu blong graduet long yunivesiti.

“Bae mi mekem sua se ol pikinini blong mi bae oli kasem bes edukesen mo blong oli kwalifae,” hem i talem. “Plante taem i had, olsem we mi gat faef pikinini naoia, mo mi gat plante komitmen. Be mi traehad evri dei blong mekem sua se olgeta oli hapi.” Mo tu hem i bin akseptem koling ia blong stap olsem wan fasiliteta blong stap dipen long yuwan long wod blong hem.

Maria i enrol bakegen long Yunivesiti blong Saot Pasifik blong kasem masta digri long bisnis administresen (MBA), we hem i bin graduet long Disemba 2021. Hem i kasem wan wok long Ministri blong infastrakta mo Pablik Yutiliti. “Mi laekem wok blong mi mo mi fetful long wok blong mi ia,” hem i talem. “Mi oltaem wantem blong stap olsem wan gudfala man blong wok mo wan gud eksampol long ol man we mi sevem [evri dei] taem mi yusum ol prinsipol blong gospel mo laef olsem wan Lata-dei Sent.”