Vanuatu

Ol Lata-dei Sent oli setemap wan fandesen blong gospel we i kambak long Vanuatu long ol yia we oli bin wokhad plante. Long 1981 kasem 1991, ol misinari blong ovasi mo ol misin lida oli no gat raet blong kam laef long kantri, mo ol lokol Lata-dei Sent, olsem Saikem Jackson mo Jack Hokau Taso long Port Vila, oli tekem responsabiliti ia blong helpem wanwan long olgeta mo serem gospel. Long en, tru long wan politik muv mo ol efot blong ol Sent olsem Edwin R. Basil, oli kam blong save putum bak koneksen wetem ful program blong intanasonol Jos.

Ol aelan blong Vanuatu we oli stap longlongwe long olgeta oli bin krietem ol strong mo lokol kongregesen we i go bigwan blong kam tugeta blong kasem rijonol level. Long 2003, Jos Presiden Gordon B. Hinckley i visitim Vanuatu. Moa long 2000 Lata-dei Sent long ol aelan we oli stap longwe oli mekem plante bigfala sakrifaes mo karem kam tugeta ol samting blong olgeta blong atendem mo harem profet i toktok.

Long 2005, oli bin transletem Buk blong Momon i go long Bislama anda long daereksen blong Mariella Kaun. Mo tu anda long supavisen blong hem, Bislama intepretesen blong jeneral konfrens brodkas oli save gat, blong konektem moa ol Sent “long ol aelan blong solwota” wetem ol toktok blong God mo bodi blong Jos long evri nesen (2 Nifae 29:7).

Ol Lata-dei Sent blong Vanuatu oli go tru long plante hariken, we i gat tu Bigfala Saeklon Pam long 2015, we prapa spolem ol hom. Olsem evri taem, oli helpem wanwan long olgeta blong bildimap bakegen ol haos mo gohed blong stap laef.