“Bae Mi Save Mekem”
“Taem mi bin stap long skul mi laekem lanwis. Mi wantem blong kam wan transleta. Mi bin kasem wan skolasip blong go long Kanada,” Mariella Kaun i talem. Be taem we papa blong hem i bin ded, hem i stap yet long hae skul, mo papa blong hem i lego mama blong hem i stap hemwan mekem se Mariella i stop blong go long skul. Hem i faenem wan wok long Redio Vanuatu, blong stap raetem nius long Bislama mo transletem i go long Franis.
Afta long faef yia olsem wan junalis, Mariella i disaed blong lego wok blong hem we i tekem fulap taem blong hem. Hem i aplae from wok long risepsen long Suprim kot blong Vanuatu go kasem hem i kam wan transleta mo jif klak.
Eli long 1997, brata blong man blong hem, Paul, i introdiusum Mariella mo hasban blong hem, Katimal, long Jos. Ol lesen blong ol misinari long plan ia blong sevem man i mekem Mariella i tingbaot wan samting we i hapen taem hem i smol. Taem Mariella i bin stap go long Katolik skul, wan sista i no bin glad long wan tingting blong hem se “yumi bin stap olsem ol spirit samples mo Lod i jusum yumi mo putum yumi kam long bel blong ol mama blong yumi long wol.” Long Maj 7, 1997, Mariella mo Katimal tufala i bin kasem baptaes.
“Mitufala i neva rigret long desisen ia,” Mariella i talem. Hem i eksplenem se long taem ia, hem mo hasban blong hem tufala i bin stap go tru long sam hadtaem wetem mared blong tufala. “Taem ol misinari oli kam, mi bin invaetem hasban blong mi. Mi bin luk hemia olsem wan seken janis. Ating bifo mi divos bae mi mas traem bakegen,” hem i talem. “Long taem we mi bin baptaes mi mekem promes long Lod[;] sapos Hem i save sevem mared blong mi, bae mi wok blong Hem, long ful laef blong mi.”
Long wik afta long baptaes blong tufala, oli bin singaotem Mariella long presidensi blong Ol Yang Woman, mo Katimal oli bin singaotem hem i go long presidensi blong Ol Yang Man. Afta plante samting i hapen, Mariella i stap givim seves olsem distrik Rilif Sosaeti presiden mo olsem nasonal daerekta blong pablik afea. Hem i wok blong mekem Jos long Vanuatu i kamaot gud moa long pablik tru long ol yumaniterian projek.
Oli bin singaotem Mariella tu blong stap olsem Jos translesen supavaesa. Long 1997 kasem 2005, hem i no wok wetem ol kompiuta, hem i stap taepem ol toktok, i kam mo go, bitwin Port Vila mo long eria ofis long Oklan.
Long taem blong transletem Buk Blong Momon i go long Bislama, ofisol lanwis blong Vanuatu, wan ripresentativ blong Jos hedkwota i kam long Vanuatu blong intaviu olgeta we oli save mekem wok ia. “Distrik long taem ia, i gat wan lis blong ol nem blong ol brata we oli save mekem wok ia,” Mariella i talem. Olgeta man ia oli bin tekem wan tes blong luk level blong Inglis blong olgeta.
Long Sandei blong hem, wetem janis Mariella i mit wetem hedkwota ripresentativ blong jos, mo man ia i faenemaot se Mariella i bin wan profesonol transleta. “?From wanem yu no bin stap long lis blong ol nem ia?” hem i askem.
Ripresentativ ia i askem Mariella blong tekem tes. Long dei bifo bae hem i lego Vanuatu, hem i mit wetem Mariella mo Katimal mo talem long Mariella se hem i bin wan we oli jusum blong kam wan transleta, be Kworom blong olgeta Twelef Aposol ia nao bae i mekem las seleksen. Afta long tu wik, Mariella i kasem wan leta we i talem se oli bin jusum hem blong kam olsem wan transleta. “Mi no save bilivim nomo, be dip daon insaed long mi, mi save se yes, hem i raet samting,” hem i talem. “Bae mi save mekem.”
Buk blong Momon, oli bin pablisim long Bislama long 2004.
Long nekis yia, long 2005, Mariella mo tim blong hem blong ol lanwis speselis long Vanuatu oli stat blong intepretem jeneral konfrens i go long Bislama. From we Mariella mo tim blong hem oli intepret i gud tumas, mo from se blong harem ol Jos lida blong Sol Lek Siti oli toktok Bislama i wan niu samting tumas, mekem se long en blong miting, Mariella i harem sam memba oli askem, “?Huia i tijim olgeta blong toktok Bislama?”