O Taulaga e Maua ai Manuia mai le Lagi

O upu, “taulaga e maua ai manuia mai le lagi” mai le viiga, “Viia Le na Fetaiai ma Ieova,”¹ e fagua ai lou agaga i taimi uma. O le taulaga ua faauigaina faapea “o le faatinoga o le lafoaiina o se mea taugata ona o se mea e sili atu lona taugata pe sili atu foi lona taua.”² E tele ituaiga o taulaga. Ua osia e le Au Paia o Aso e Gata Ai se feagaiga ma le Alii o le a latou ositaulaga. O le faia la o lea mea, o le gauai atu lea o tatou loto i Lona finagalo, o le tuuina atu o o tatou olaga i le fausiaina o Lona malo ma auauna atu i Lana fanau.

Mo i latou o e o lo o ositaulaga ma le faatuatua e ala i le totogiina faamaoni o sefuluai, ua folafola mai e le Alii o le a Ia toina pupuni o le lagi.³ E le gata ina faamanuia e lena taulaga ia tagata taitoatasi ma le aiga, ae o na foi tupe sa tuuina atu ma le lotomalie ua maua ai le malosiaga talafeagai e fesoasoani ai i le malo o le Alii e faataunuu ai vavega i aso taitasi. Ua tau mai e le Tupu o Peniamina: “Ia outou mafaufau i le manuia ma le fiafia o i latou o e tausi i poloaiga a le Atua. Aua faauta, ua manuia i latou i mea uma, i le faaletino atoa ma le faaleagaga.⁴ O le totogiina ma le faatuatua o sefuluai o le faaalia lea o le itu i fafo o se tautinoga i totonu e ositaulaga.

O le usitaia o le tulafono o le anapogi o le isi lea ituaiga o ositaulaga. Ua fetalai mai le Alii ia i tatou, ina ia faaavanoa se aso Sa se tasi i le masina e anapogi ai mo taumafataga e lua. Ua valaauliaina i tatou e totogi atu tupe ua sefeina mai i tau o ia aiga i le Ekalesia, ina ia mafai ona fesoasoani atu ia i latou o lo o manaomia le fesoasoani. O le anapogi ma le totogiina atu o se taulaga anapogi ma le alofa, e i ai sona aafiaga mama i le agaga. Ua tautino mai Peresitene Spencer W. Kimball, “O le ola ai i le tulafono o le anapogi, e maua ai e le tagata lava ia, se mana e totogo ae, e faatoilalo ai lona manatu i se lelei mo na o ia lava, ma le manatu faapito.”⁵

O malumalu ma galuega o talafaasolopito o aiga o se osigataulaga o le alofa. O le Au Paia faatuatua latou te faaaluina le faitau miliona o itula i le tuufaatasia o o latou talafaasolopito faaleaiga. Latou te suesue i ata mata ninii ma tusi o talaaga o tagata. Faatasi ai ma peni ma komepiuta, latou te tusitusia ai aso ma mea na tutupu ai. Latou te faia sauniga paia i totonu o malumalu mo o latou tupuaga faapelepele. E faapei foi o le taulaga sili a le Faaola, o le faia o sauniga mo e ua maliliu, o le faaalia o le ositaulaga—o le faia lea o se mea mo nisi, ua le mafai ona latou faia mo i latou lava.

I ni nai tausaga ua tuanai, ao i ai i se tofiga o le Ekalesia i Saint Petersburg, i Lusia, na ma maua ai ma lou toalua, o Mary Jayne, se avanoa e le mafaatusalia e lagonaina ai faamanuiaga o galuega o talafaasolopito o aiga. Sa ma asiasi atu i le nofoaga e teuina ai faamaumauga sili ona taua, i le fia vaavaai i taumafaiga a le Ekalesia i le pueina i ata mata ninii, nisi o faamaumauga a Rusia i Sisifo. Ao ou vaavaai atu i le tagata e pulea le nofoaga e teuina ai faamaumauga, o tapueina ata o tusi ua limulimua mai le aai o Pskov, o igoa na avea ma tagata moni. Na foliga mai ua latou toe ola mai ma faapea mai: “Ua e mauaina au. Ua ou le toe leiloa nei. Ou te iloa, o le a i ai se aso, po o fea lava, o le a aveina atu ai lou igoa e se tasi o lou aiga i le malumalu ma o le a papatisoina au ma faia ou faaeega paia, ma o le a faamauina ai lou toalua ma lau fanau ia te au. Faafetai lava!”

O le soifuaga o le Perofeta o se faataitaiga o le le manatu faapito mo le talalelei a Iesu Keriso. E ui lava ina sa tele puapuaga na oo i le Perofeta o Iosefa, sa talitonu pea o ia o le a lelei mea uma ma sa ia manumalo i le tele o sauaga. Na faamatalaina e Parley P. Pratt se aafiaga faamomoi loto, i lona i ai i le falepuipui faatasi ma le Perofeta i Misuri i le taumalulu o le 1838–39. O na masina e ono, o puapuaga matautia ma le faafalepuipuiina, na faamamaina ai lenei Perofeta sili ona maoae.

I totonu o le falepuipui, sa faafofoga ai le Perofeta ma le usoga i taufaifaiga ma sauaga mataga na faia e fitafita i “Mamona.” Mulimuli ane, na le mafai e le Perofeta ona toe onosaia a latou fetuu mataga. Na faafuasei ona tulai o ia, ma “i se leo o le faititili” ma faapea atu: “ ‘FILEMU, outou na tiapolo o le lua o seoli. I le suafa o Iesu Keriso ou te aoai ai outou, ma poloaiina outou ia fifilemu… .’

“Sa ia tu faasasao i luga i se tulaga malualii matautia, na saisai i filifili, ma sa aunoa ma se auupega, e le faavevesia ma le mamalu e pei o se agelu… . [Sa pauu i lalo leoleo ua tetemu], i se tulimanu,” ma tuu i lalo a latou auupega, “ma aioi atu mo sana faamagaloga, ma tumau ai ona le toe pisa seia oo ina sui mai tagata leoleo.”

Na faaauau pea ona tusia e Brother Pratt: “Sa ou vaai i minisita o faamasinoga tonu, o laei i ofu talaloa o faamasino … ; ua ou molimauina foi se Konekaresi i se fonotaga mamalu …; sa ou taumafai ou te mafaufau i tupu, i lotoa o tupu, i nofoalii ma palealii … ; a o le mamalu ma le malualii sa na o le tasi lava le taimi sa ou vaai i ai, o le taimi lea a o tu o ia iina, a o saisai i filifili, i le tulua o po i totonu o se potu pogisa i se nuu e le lauiloa o Misuri.”⁶

I ni nai vaiaso talu mai lena mea na tupu, i se tasi foi taimi sili ona faigata, na tatalo faatauanau atu ai Iosefa i le Alii mo se taitaiga. Na tali mai le Alii, “Lou atalii e, ia i ai le filemu i lou agaga; o lou tiga ma ou puapuaga o le a nao sina ituaso itiiti lava.”⁷ Ona tau mai lea e le Alii upu matagofie nei i le perofeta: “O le a fesili tuluiga o le lalolagi i lou igoa.”⁸

I le lima tausaga mulimuli ane, a o toe vaavaai atu i le galuega e lei maea ona fauina o le Malumalu i Navu, na silafia e Iosefa ua taulalata i le iuga o lana malaga, ma o le a alu atu o ia “e pei o le tamai mamoe a fasia” ae sa ia “filemu e pei o le taeao i le tau vevela.”⁹ Ona o se folafolaga o le a puipuia o ia, o lea sa ia gauai atu ai i le pue faapagotaina o ia mo le taimi mulimuli lava. Peitai, na olegia lona faamaoni. Ia Iuni aso 27 1844, na fasiotia ai o ia ma lona uso o Ailama ma le faalealofa i le falepuipui o Karefasi.

Ua fesili tuluiga o le lalolagi i le igoa o Iosefa Samita, ma o le aso o le Ekalesia toefuataiina a Iesu Keriso, ua i ai i le lalolagi atoa lava. O upu nei e uiga i le tagatavaleina o Aperaamo Linikone e faapena foi ona faamatalaina ai le malualii o le Perofeta o Iosefa Samita.

E le mafai ona i ai se isi taulaga e sili atu nai lo le taulaga togiola a le Faaola o Iesu Keriso. O Lana Togiola, e ui lava ina faigata ma le mafaatusalia, o le mea sili lea ona maoae i lenei lalolagi. O le faafetai, aua o Lana taulaga maoae o le alofa mama, ua leai ai se tui o le oti, ma ua le manumalo ai le tuugamau.

O lo tatou luitau o le ositaulagaina ma le le manatu faapito o mea uma ua tuuina mai ia i tatou, e aofia ai ma o tatou lava loto. Ua saunoa sao mai Elder Neal A. Maxwell e faapea: “O le tuuina atu o le loto o le tagata, ona pau lea o le mea moni faapitoa faaletagata lava ia e mafai ona tatou tuu i luga o le fata faitaulaga a le Atua. O le tele o isi mea tatou te avatu … o ni mea na Ia tuuina mai pe faaune mai ia i tatou.”¹¹

O le faaiuga lava, o le taulaga o se mea lava e faasino i le loto—o le loto. “Faauta e ao ina ave i le Alii le loto ma le mafaufau matala.”¹² Afai tatou te agalelei, afai tatou te alolofa moni, afai tatou te usiusitai i le Atua ma mulimuli i Ana Perofeta, o le a aumaia e a tatou taulaga o faamanuiaga mai le lagi. “Ma o le a outou tuuina mai e fai ma taulaga ia te au, o se loto momomo ma se agaga salamo.”¹³

O se auala tulaga ese na ou maua ai se aafiaga itiiti i le taulaga alofa a lo tatou Faaola mo au. A o ou i ai i Ierusalema i se aso na sosoo ma le Kerisimasi, ma na asiasi atu ai ma lou toalua i ni vaega o nofoaga na femaliuai ma aoao atu ai le Faaola. O mafatiaga na tigaina ai le Faaola na aumaia ai ni faanoanoaga loloto ia i maua, ao ma tutu i se ana pogisa i lalo ae o le maota o Kaiafa. O iina na sasaina ma puapuagatia ai lo tatou Alii. Sa ma vaaia pupu o tulaga o filifili i puipui maa. Faatasi ai ma loimata, na ma usuina ai le pese “Se Tagata Mativa Faanoanoa.”¹⁴ Sa tuua toatasi na o ia faatasi ma tagata leaga na sasaina o ia. Faatasi ai ma ni loto nutimomoia, sa ma tatalo atu ai mo le lototele ina ia avea i maua ma ni Ana auauna agavaa.

E lei umi talu ona mavae lena mea, ae ma asiasi atu i le Tuugamau gaogao i le Togalaau. O upu o le mau, “E le o iinei o Ia; aua ua toetu mai o Ia”¹⁵ na ma toe faalogoina i o maua loto. Sa tusia e Elisa R. Snow,

O le Togiola a le Faaola, o le faatinoga sili lea o le alofa mama ua iloa e le lalolagi uma.

Tatou te pepese i upu nei mai ia Peresitene Gordon B. Hinckley:

Ou te lagona lou faanoanoa, ona o se mataua se tasi o lona toto na maligi mo au. Ou te tatalo ina ia i ai se aso ou te feiloai atu ai i le Faaola. O le a ou tootuli ma sogi atu i ona aao na faamanualia, ma o le a Ia soloi esea ou loimata. Ou te tatalo ina ia fetalai mai o Ia, “Le auauna lelei e ma le faamaoni.”¹⁸ Ua i ai lo tatou faamoemoe, ona o Lona alofa tunoa, uso e ma tuafafine. O Ia o le “puna o tatou faamanuiaga uma.”¹⁹ O nei mea uma ou te molimau atu ai i le suafa paia o le faaaoao sili o taulaga, o lo tatou Faaola lea o Iesu Keriso, amene.