Na Latou Tulei Saunoa Mai ia i Tatou

Peresitene Gordon B. Hinckley: Mafaufau i le ofoofogia o lenei mea.

O le Ekalesia toefuataiina lenei a Iesu Keriso. O i tatou o se nuu, o le Au Paia o Aso e Gata Ai. Tatou te molimau atu na tatalaina mai le lagi, na talaia pupuni, na fetalai mai le Atua ma sa faaalia mai Iesu Keriso lava Ia, ma sosoo ai ma le faaeeina mai o le pule paia mai le lagi.

O Iesu Keriso o le maa tulimanu o lenei galuega, ma o lo o fausia i luga o se “faavae o … aposetolo ma perofeta” (Efeso 2:20).

Peresitene Thomas S. Monson, Fesoasoani Muamua i le Au Peresitene Sili: Mai lava i le gasologa o augatupulaga, e tutusa lava le savali na tuuina mai e Iesu. Ia Peteru ma Aneterea i auvai o le Vai Matagofie o Kalilaia na Ia fetalai atu ai, “Mulimuli mai ia te a’u.” Ia Filipo o anamua na oo mai i ai le valaau, “Mulimuli mai ia te a’u.” … Ma, ia te oe ma a’u, afai ta te faalogo lelei, o le a oo mai i ai lea lava valaaulia tutusa, “Mulimuli mai ia te a’u.”

Peresitene James E. Faust, Fesoasoani Lua i le Au Peresitene Sili: Ou te faamoemoe ia mafai ona tatou pei uma o le “Tamai Enisini Lea e Mafaia.” E le lapoa tele, sa na o le fesuiaiga lava o taavale sa faaaoga ai, e le’i alu foi i luga o se mauga, ae sa naunau. O lena tamai enisini sa tosoina i luga se nofoaafi, ma tolotolo atu lava i luga o le mauga ma toe ifoifo i lalo ma faapea ane, “Sa ou manatu Ou te mafaia.” E tatau ia i tatou uma ona aeaina ia mauga tatou te le’i feaei ai muamua

Elder David B. Haight o le Korama a Aposetolo e Toasefululua: O loo soifua le Atua. O Ia o lo tatou Tama. Ou te molimau atu o Iesu o le Keriso, o le Alo o le Atua soifua, ma o le Perofeta o Iosefa Samita o le perofeta o le Toefuataiiga. O Peresitene Hinckley o lo tatou taitai musuia o lenei Ekalesia i le lalolagi atoa i ona po nei. Ia faamanuia mai le Alii ia te ia, i mea uma na te faia … a o ia taitai atu i luma le galuega.

Elder Neal A. Maxwell o le Korama a Aposetolo e Toasefululua: Uso e ma tuafafine, e ui ina tatou ola i se taimi o le “vāvāō,” e mafai lava ona tatou tutu i nofoaga paia ma le le faagaeetia (tagai MFF 45:32; 87:8). E ui ina tatou ola i se taimi o le malosi o amioga le pulea, ae e mafai lava ona tatou maua lena filemu i totonu, lea tatou te le malamalama i ai (tagai Filipi 4:7). O le a tutupu pea lava mea e le malamalama i ai, peitai, e faapei foi o Nifae, e mafai lava ona tatou iloa e alofa le Atua ia te i tatou … .

… E moni e le mafai ona tatou malamalama atoatoa i nei mea uma i le taimi nei! Ae e mafai ona tatou iloa, i le taimi nei lava, e silafia ma alofa le Atua ia te i tatou taitoatasi!

Elder Robert D. Hales o le Korama a Aposetolo e Toasefululua: O le totogiina ma le usiusitai o sefuluai e faateleina ai lo tatou faatuatua, ma o le faatuatua foi e lagolagoina i tatou i o tatou tofotofoga, o puapuaga, ma faanoanoaga i la tatou malaga fai o le olaga

Elder Dieter F. Uchtdorf o le Au Peresitene o le Au Fitugafulu: E leai ni o’u augatama sa i ai i paionia o le senituri e 19. Ae peitai, talu mai uluai aso o lo’u auai i le Ekalesia ua ou lagonaina lava se lagona fesootai atu i na uluai paionia o e na sopoiaina ia fanua lafulafua. O i latou o o’u augatama faaleagaga, e faapena foi i tagata taitasi uma o le Ekalesia, tusa lava po o le a le atunuu, gagana, po o le aganuu. Sa latou faatuina se nofoaga saogalemu e le gata i sisifo, ae faapena foi le faavae faaleagaga mo le fausiaina o le malo i atunuu uma o le lalolagi.

Elder Robert K. Dellenbach o le Au Fitugafulu: Ua fetalai mai le Alii ia i tatou, ina ia faaavanoa se Aso Sa se tasi i le masina e anapogi ai mo taumafataga e lua. Ua valaaulia i tatou e totogi atu tupe ua sefeina mai i tau o ia aiga i le Ekalesia, ina ia mafai ai ona fesoasoani atu ia i latou o lo o manaomia le fesoasoani.