O Le Sefuluai: O Se Tofotofoga o le Faatuatua ma Faamanuiaga e Faavavau

O le sefuluai o se tofotofoga o le faatuatua ma faamanuiaga e faavavau.¹ I le Feagaiga Tuai, sa faamaonia e Aperaamo lona faatuatua i lona totogiina atu lea o mea e sefuluai ai mea i le faitaulaga sili o Mekisateko.² Sa tauto atu Iakopo, le atalii o le atalii o Aperaamo, i le Alii, “O mea uma foi e te foai mai ia te au ou te avatu lava ia te oe mea e sefulu ai.”³

Sa faavaeina le sefuluai i nei aso e gata ai, o se tulafono taua mo tagata o le Ekalesia toefuataiina a le Alii. O se tasi o auala faavae tatou te molimauina ai lo tatou faatuatua ia te Ia ma lo tatou usiusitai i Ana tulafono ma poloaiga. O le sefuluai o se tasi lea o poloaiga tatou te agavaa ai, e ala i lo tatou faatuatua, e ulu atu i le malumalu—le maota o le Alii.

Ina ua faatoa mavae le tolu masina talu ona mavae le Tagatavaleina o le Perofeta o Iosefa Samita, ma o le taimi foi lea o lo o fauina ai e le Au Paia le Malumalu o Navu, sa tusia e Polika Iaga e fai ma sui o le Korama a Aposetolo e Toasefululua e faapea: “Ia ulu atu ia ma le mauai ma tausia e le aunoa ma le mausali le tulafono o le sefuluai, … : ona e sau ai lea i le Maota o le Alii, ma aoaoina ai i ona ala, ma savali ai foi i ona ala.”⁴

O le tausia ma le mausali o le tulafono o le sefuluai, e le gata ina faaagavaaina ai i tatou mo le mauaina o sauniga faaola maualuluga atu o le malumalu, ae faatagaina ai foi i tatou e taliaina ia lava sauniga mo o tatou augatama. Ina ua fesili pe mafai e tagata o le Ekalesia ona papatisoina mo e ua maliliu pe afai latou te le o totogiina a latou sefuluai, sa tali mai Peresitene Ioane Teila, a o avea o ia ma se tasi o le Toasefululua i lena taimi: “O se tagata e le totogia lana sefuluai, e le tatau ona papatiso mo e ua oti… . Afai e le lava le faatuatua o se tagata na te faia ai ia mea faatauvaa, ua le lava foi lona faatuatua e faaolaina ai o ia lava ma ana uo.”⁵

O le sefuluai e atiinae ai ma tofotofoina lo tatou faatuatua. O le taulagaina mo le Alii o mea tatou te manatu tatou te manaomia pe mananao foi i ai mo i tatou lava, tatou te aoao ai e faalagolago atu ia te Ia. O lo tatou faatuatua ia te Ia e mafai ai ona tatou tausia feagaiga faalemalumalu, ma mauaina faamanuiaga e faavavau o le malumalu. Na tusia e le paionia o Sara Rich, le faletua o Charles C. Rich, i lana tusi faamaumau ina ua tuua Navu, “E tele faamanuiaga sa matou maua mai i le Maota o le Alii, ma sa mafua ai ona matou olioli ma maua le mafanafana i le lotolotoi o o matou faanoanoaga uma, ma sa mafai ai ona matou faatuatua i le Atua, aua sa matou iloa o le a Ia taialaina lava i matou i le malaga sa matou le mailoa.”⁶

E faapei foi o paionia, o le totogiina ma le usiusitai o sefuluai e faateleina ai lo tatou faatuatua, ma o le faatuatua foi e lagolagoina i tatou i o tatou tofotofoga, o puapuaga, ma faanoanoaga i la tatou malaga fai o le olaga.

Ua aoao mai foi i tatou e le sefuluai, e faaitiitia o tatou manaoga ma tuinanau i mea o lenei lalolagi. O le totogi o sefuluai e uunaia ai i tatou ina ia faamaoni i a tatou fegalegaleaiga ma o tatou uso a tagata. Tatou te aoao e talitonu, po o a lava mea ua tuuina mai ia te i tatou, e ala mai i faamanuiaga a le Alii ma a tatou taumafaiga filiga, ua lava lea mo mea tatou te manaomia.

E i ai se faamoemoega faapitoa o le sefuluai, o se tulafono e faasauniuni ai i tatou mo nisi mea. I le popofou o lenei tisipenisione, sa poloaiina ai e le Alii ni tagata patino o le Ekalesia, ina ia ola i le tulafono maualuga o le faapaiaga—o se tulafono e taliaina i se feagaiga. Ina ua le tausia lenei feagaiga, o lea na oo mai ai mafatiaga e tele i le Au Paia.⁷ Ona toe aveesea ai lea o le tulafono o le faapaiaga. Na faailoa mai e le Alii le tulafono o le sefuluai mo le Ekalesia atoa e suitulaga ai.⁸ I le aso 8 o Iulai, 1838, na Ia folafola mai ai:

“O le a faia foi lenei mea ma amataga o le sefuluai a lo’u nuu.

“ … O i latou ua faapea ona totogiina sefuluai o le a totogi atu le tasi vaesefulu o a latou mea uma e maua i tausaga taitasi; o le a faia foi lenei mea ma tulafono tumau ia te i latou e faavavau.⁹

O le tulafono o le sefuluai e saunia ai i tatou e ola i le tulafono maualuga o le faapaiaga—e faapaia ma tuuina atu o tatou taimi uma, taleni, ma mea uma ua tatou maua i le galuega a le Alii. Seia oo mai le aso e tatau ai ona tatou ola i lenei tulafono maualuga, ae ua poloaiina i tatou e ola i le tulafono o le sefuluai, o le tuuina atu lea i le lotofuatiaifo¹⁰ o le tasi vaesefulu o a tatou tupe maua i tausaga taitasi.

O i latou e tausia ma le faatuatua ma le faamaoni le tulafono o le sefuluai, ua folafola mai e le Alii i ai le anoanoai o faamanuiaga. O nisi o nei faamanuiaga e faaletino, e pei lava foi ona faaletino le sefuluai. Peitai, e faapei foi o sauniga faaletino o le papatisoga ma le faamanatuga, o le poloaiga e totogi le sefuluai e manaomia ai le ositaulaga faaletino, ae o le iuga e aumaia ai faamanuiga sili faaleagaga.

Ou te iloaina se ulugalii e fiaafe maila sa nonofo ai mai le malumalu sa aupito latalata atu. E ui lava ina sa itiiti se tupe na la mauaina, ae sa la totogiina ma le faatuatua a la’ua sefuluai ae teu uma tupe sa la mafai ona teu ina ia mafai ai ona la malaga i le maota o le Alii. Ina ua mavae se tausaga, sa te’i ua sau le uso o le tamaloa—e le o se tagata o le Ekalesia—ma ofoina atu ia te i la’ua ni pepa malaga se lua o le vaalele. O lenei faamanuiaga faaletino, na mafai ai ona maua faamanuiaga faaleagaga o o la’ua faaeega paia ma le faamauga. Sa i ai se isi faamanuiaga faaopoopo na maua mulimuli ane, ina ua tuia le loto o le uso o lea alii ona o le faamaoni ma le lotomaualalo o lenei ulugalii, o lea sa auai foi ma ia i le Ekalesia.

O faamanuiaga faaletino ma faaleagaga o le sefuluai, e faapatino mai lava mo i tatou ma o tatou aiga, e tusa ai ma le finagalo o le Alii. Peitai, ina ia tatou mauaina na faamanuiaga, e ao ina tatou usitai i le tulafono ua autu ai.¹¹ O le tulaga o le sefuluai, na fetalai ai le Alii: “Ina aumaia mea e sefulu ai a outou mea uma lava i le fale e tuu ai mea; ina ia i ai mea e ‘ai i lo’u fale; ma ia outou tofotofo mai ai ia te au i lenei mea, ua fetalai mai ai Ieova o ‘au; pe ou te le toina pupuni o le lagi mo outou, ma sasaa atu le manuia mo outou ina seia silisili ona tele.”¹²

Mata e i ai se tasi o i tatou na te teena ma le loto le sasaa mai o faamanuiaga mai le Alii? O le mea e faanoanoa ai, ona o le mea lea tatou te faia pe a le totogiina a tatou sefuluai. Tatou te tali atu leai i faamanuiaga tonu lava o lo o tatou sailia ma talosia ia tatou maua. Afai o oe lena o lo o masalosalo i faamanuiaga o le sefuluai, ou te uunaia oe ina ia e taliaina le valaaulia mai le Alii e “tofotofo [atu ia te Ia] … i lenei mea.” Totogi a outou sefuluai. Tatala pupuni o le lagi. O le a matua faamanuiaina lava outou ona o lo outou usiusitai ma le faamaoni i tulafono ma poloaiga a le Alii.

Ia outou mautinoa ua liligi mai nei faamanuiaga ia tusa pau ai e mauoa ma e matitiva. E pei o upu o le pese, “o le taulaga [e] maua ai manuia,” ae le o le aofai o tupe tatou te totogi atu.¹³ O tagata o le au paia e tuuina atu ma le lotofuatiaifo le sefulu pasene atoa o a latou tupe maua i le tausaga, latou te mauaina uma faamnuiaga ua folafolaina mai o le sefuluai, pe o le aofaiga o tupe iti a se fafine mativa ua oti lana tane, po o se aofaiga tele a se tupu.

I ni nai tausaga ua mavae, sa ou asiasi atu ai i se falelotu o se tasi ekalesia. Sa tusia i le faamalama matagofie felanulanuai sa faatau mai i Europa, le igoa o le tagata na ofoina atu le tupe e faatau ai; sa vaneina i le pulelaa maoae na gaosia mai le arasi o Lepanona ia mataitusi o le igoa o se tagata mauoa na ofoina atu; o nofoa foi e sili ona matagofie sa faaigoa i aiga lauiloa na sili a latou foai i le tupe mo le fauina o le falelotu.

O le eseesega, O Le Ekalesia a Iesu Keriso o le Au Paia o Aso e Gata Ai, o i latou uma lava e totogi atoa le sefuluai e tutusa lelei lava le aloaia ma le faamanuiaina e le Alii, e aunoa ma le tauia ma faamamaluina faalauaitele. E “le faailogaina e Ia se tagata.”¹⁴ O Lana tulafono foi o tupe maua [mo le Ekalesia] e le faa’au’au.

E matua taua tele i o tatou vaitaimi le auala o lo o faasoasoa ai le sefuluai. Pe a tatou vaai i faataitaiga o le matapeapea ma le faaloloto i nisi o pulega a kamupani faatamala, e mafai ona tatou faafetai ua saunia e le Alii se ala e pulea ai le sefuluai i lalo o Lana taitaiga.

E tusa ai ma le faaaliga, o epikopo ua faauuina e “tausia le fale teu oloa o le Alii; e talia tupe a le ekalesia.”¹⁵ E taufai tatau i epikopo ma failautusi ona avea ma ni tagata e totogi atoa le sefuluai, ma ua aoaoina foi e ola faautauta lelei, ia le sili atu i mea latou te maua. I totonu o nai itula talu ona taulimaina tupe mai le au paia o a latou uarota ma paranesi, e avatu sa’o ai lava e nei taitai o le lotoifale ia tupe i le laumua o le Ekalesia.

Ma e pei ona faaalia mai e le Alii, o le faaaogaina o le sefuluai e fuafua lea e se aufono e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu. O lo o patino lava le ta’u mai e le Alii, o le galuega a le aufono lea e taitaia i “la’u lava faatonuga ia te i latou.”¹⁶ Ua faaigoaina lea aufono o le “Aufono mo le Pulefaasoasoaina o Sefuluai.”

E maoae foi le molimauina o lenei aufono a o gauai atu i le siufofoga o le Alii. E silafia e uso taitasi [o lea aufono] ma e latou te auai foi i le faatinoina o faaiuga uma a le aufono. E leai se faaiuga e faia sei vagana ua autasi i ai finagalo. O tupe uma o le sefuluai, e faaalu mo faamoemoega o le Ekalesia, e aofia ai le uelefea—o le tausiga o e matitiva ma e le tagolima, o malumalu, fauina ma le tausiga o falelotu, o aoga, mataupu aoaoina—a faapuupuu—o le galuega a le Alii.

Ina ua fesili atu se uo a Peresitene Siaosi Alapati Samita pe o le a sona finagalo i se fuafuaga a lana uo faapea, o le a na aveina le tupe lea na tatau ona totogi ai lana sefuluai e faameaalofa ai i se isi gaoioiga alofa ua filifilia e ia lava, sa tali Peresitene Samita:

“Ou te manatu o oe ose tagata ua matua lima foai tele i meatotino a se isi tagata… .

“… Ua e faamatala mai ia te au le mea ua e faia i tupe a le Alii, ae e te le i ta’u maia ia te au faapea na e avatua i se tasi sau lava sene. O [le Alii] o Ia o lau paaga sili i le lalolagi, Na Ia avatu ia te oe mea uma lava ua ia te oe, e oo lava i le ea o lo o e manavaina. Ua Ia fetalai mai, e tatau ona e aveina le tasi vaesefulu o mea e te maua ma avatu i le Ekalesia e pei ona faatonuina ai e le Alii. E te le i faia lena mea; a ua e aveina le tupe a lau paaga sili, ma foai i isi.”¹⁷

O sefuluai a tagata o le Ekalesia e ou le Alii ia. Na te faia le faaiuga, e ala i se aufono a Ana auauna, pe faapefea ona faaaoga.

Mo tagata o le Ekalesia ma i si i le lalolagi atoa, ou te molimau atu i le faamaoni o le Aufono mo le Pulefaasoasoaina o Sefuluai. E 17 tausaga o avea au ma se sui o lenei aufono, a o avea ma Epikopo Pulefaamalumalu o le Ekalesia ma le taimi nei a o avea ma se tasi o le Korama a Aposetolo e Toasefululua. E aunoa lava ma se tuusaunoaga, o lo o faaaogaina tupe o le sefuluai a lenei Ekalesia mo Ona faamoemoega.

E finagalo le Alii i Ana fanau uma ia latou maua faamanuiaga o le sefuluai. Ua tele naua taimi e le aoaoina ai e i tatou o matua a tatou fanau ma uunaia e ola i lenei tulafono aua, o o latou sao ua na o ni nai tupe iti. Peitai, a leai se molimau e uiga i le sefuluai, o le a faigofie ona faatama’ia. I le va o le sefululua ma le luasefulu o o latou tausaga, latou te tosina atu ai i lavalava, o faafiafiaga, ma mea taugata, ma ono le maua ai le puipuiga faapitoa lea e maua i le sefuluai.

A o gasolo pea tausaga, mata e mafai ona faauuina se alii talavou e fai ma toeaina, auauna atu i se misiona, ma ia aoao lelei atu i isi se tulafono na te le i tausia e ia lava? Pe a toe taliu mai le misiona ma feagai ma faigata o aoga, amataina o se aiga, ma se galuega, mata o le a faiogfie atu ona ola ai i le tulafono o le sefuluai? E faapena foi, i se tamaitai talavou, mata e mafai ona agavaa o ia e auauna atu i le Alii ma osia ni feagaiga o le faaipoipoga faaselesitila e aunoa ma le mauaina mo ia lava o se molimau e uiga i le sefuluai? Mata ua saunia o ia e aoao atu i lana fanau se tulafono na te le i aoaoina i mea na oo i ai ia lava? E maeu le tele o le faamaoni e manaomia mai tama ma tina pe afai latou te mananao e talosagaina faatasi faamanuiaga puipuia o le sefuluai i luga o o latou aiga, ma faamanuiaga ua i ai la latou aia tatau! Na saunoa Peresitene Lorenzo Snow, “Aoao le fanau e totogi sefuluai, ina ia tausia pea e faavavau. Afai tatou te tausia lenei tulafono, tusa lava pe o a mea e fai mai e o tatou fili, e faasaoina lava i tatou e le Alii.”¹⁸

Toe o ni nai vaiaso ona maua lea e i tatou taitoatasi le avanoa paia, e toe feiloai ai ma o tatou epikopo ma fai faatalanoaga o le sefuluai ma le Alii. O le a agalelei ma agamalu lou epikopo. O le a malamalama o ia i luitau o loo oulua feagai. Afai e le mafai ona e toe totogia le aofai e te le i totogia i le taimi ua tea, ia e agai i luma. Amata i le aso. Faamatala i lou epikopo lau tautinoga o le a totogi atoa le sefuluai i le lumanai, ma faataatia sau fuafuaga e te toe vave foi i le malumalu. O le taimi lava e te faaalia ai lou faatuatua i le totogiina o le sefuluai mo se taimi, ma tausia isi poloaiga e tatau ai, o le a mafai ona e olioli i faamanuiaga e faavavau o le malumalu. Ou te aioi atu ia te outou, ia aua lava nei outou le faaaogaina lenei avanoa. Aua nei faatuai.

Tama ma tina, a o outou sauniuni mo faatalanoaga o le sefuluai, ou te uunaia oulua e faapotopoto la oulua fanau ma fesoasoani i ai e faitau a latou sene. Fesoasoani i alii talavou ma tamaitai talavou e vaai a latou faamaumauga ma faitau a latou tupe faasili i tausaga taitasi. Oka se ofoofogia o lenei avanoa e toto ai le fatu o le faatuatua i loto o a outou fanau. O le a outou amataina i latou i le ala e tau atu i le malumalu. O le a tutulai augatupulaga o o outou tupuaga na muamua ia te outou ma augatupulaga o mulimuli mai ia te outou, ma faaamuia atu ia te outou, aua ua outou saunia a outou fanau e faia sauniga faaola mo i latou. E le o se mea na tupu faafuasei, o’u uso e ma tuafafine, i lalo o le taitaiga a le perofeta soifua a le Atua i ona po nei, o Peresitene Gordon B. Hinckley, ua salalau ai i le lalolagi atoa le fausiaina o malumalu. O le tausia o poloaiga, e aofia ai le totogiina o sefuluai, tatou te agavaa ai e ulu atu i na malumalu, e faamauina ai i o tatou aiga, ma maua faamanuiaga e faavavau.

Ou te aioi atu ia aua nei o tatou faatuatuai, ma ia tatou gauai atu i le poloaiga a lo tatou Alii e tausi i le tulafono o le sefuluai. Ou te iloaina ni faifeautalai se toalua sa asiasi atu i se aiga mativa. O le fale o le aiga sa fausia i ni laupapa ma ni fasi laau, ma se fola palapala, ae leai se eletise po o ni moega. O afiafi taitasi, e faaalu ai e le tama, e galue leipa i se faatoaga, lona totogi atoa o le aso e faatau ai meaai mo le afiafi. Ina ua tuua e faifeautalai lea fale faatauvaa, sa mafaufau le soa sinia ia te ia lava, “O le tulafono o le sefuluai, o le a avea ma faavaatu’ia i lenei aiga. Atonu e le tatau ona talanoaina mo sina taimi.” E lei leva ae faaali leotele atu e le soa laitiiti ona mafaufauga, aua sa ola a’e ai foi o ia i se tulaga faapea i lo latou atunuu: “Ou te iloa e toe fa lesona ona faatoa aoaoina atu lea o le mataupu faavae o le sefuluai, ae mata e mafai faamolemole ona ta aoaoina i ai i le isi a ta asiasiga? E tatau ona latou iloa e uiga i le sefuluai i le taimi lenei, aua latou te matua manaomia lava le fesoasoani ma faamanuiaga a le Alii.”

Na malamalama lelei lenei faifeautalai “o lo o i ai se tulafono na faavaeina e le matatalaina i le lagi a o le’i faavaeina lenei lalolagi, e autu ai faamanuiaga uma lava—Pe a tatou maua foi soo se faamanuiaga mai le Atua, e maua ai i le usiusitai i le tulafono lea e autu ai.”¹⁹ E finagalo le Alii ia manuia lenei aiga ma o lo o faatalitali mai ma le naunautai i lo latou usiusitai ina ia mafai ai e Ia [ona faamanuia mai].

Ou uso e ma tuafafine pele, e moni lava faamanuiaga e faavavau o le sefuluai. Ua ou iloaina i lo’u olaga faapea foi le olaga o lo’u aiga. E tofotofoina lo tatou faatuatua, pe tatou te ola ai i le tulafono o le sefuluai i lo tatou usiusitai ma ositaulaga. Aua, i upu lava ia a le Perofeta o Iosefa Samita, “o se lotu e le manaomia le taulagaina o mea uma, e leai se mana e lava e maua ai le faatuatua e tatau ai mo le olaga ma le faaolataga.”²⁰

Ou te molimau atu o le Alii o Iesu Keriso na taulagaina Lona soifua ina ia maua ai le faaolataga mo i tatou taitoatasi. I le avea ai ma Ana molimau faapitoa, ou te molimau atu ai o loo soifua o Ia. Ma e avea au ma Ona sui ou te faafetai atu ai ia te outou, o le fanau, o fafine ua oti a latou tane, o le autalavou, o aiga—o e faatuatua—mo a outou sefuluai paia. “Ia fai lea ma mea e te ola ai; Aua e te fefe, aua o a’u na e fai i ai.”²¹ I le suafa paia o Iesu Keriso, amene.