Filifiliaina o le Alofa Moni: O Lea Mea Lelei

E matagofie tele le faatasia o ni uso o le Aualofa, o ni tamaitai ua osi feagaiga i le talalelei toefuataiina a le Alii. O outou taitoatasi—e tusa lava pe o le a lo outou matutua, laasaga o le olaga, po o tulaga —e manaomia, e faatauaina ma alofagiaina outou i le Aualofa. Faafetai atu ia te outou; faafetai lava mo mea uma o loo outou faia.

O loo tautau i totonu o lou ofisa se ata vali matagofie o le faatusa o Iesu faatasi ma Maria ma Mareta.¹ O aso uma lava pe a faafeiloai au e lenei ata, ou te tomanatu ai lava i o tatou luitau i le avea ai ma ni tamaitai. Na musuia lava ia Sister Hughes, Sister Pingree, ma au nei, ina ia faaaoga lenei tala ia Maria ma Mareta e fai ma autu o lenei sauniga. Na aoao mai e le Alii, o le mea lava e tasi e ao ina maua: ia filifili lea mea lelei.² O le mea lena o le a matou talanoa atu ai i lenei afiafi, o le filifilia o lea mea lelei.

Sa nofo Mareta i se nuu laitiiti o Petania, ua na “talia [Iesu] i lona fale. O lona uso foi e igoa ia Maria, ua nofo foi o ia i lalo i tafatafa o vae o Iesu ma faalogo i lana fetalaiga.”³ E alolofa uma nei tamaitai i le Alii. Ma na “alofa lava Iesu ia Mareta, ma [Maria].”⁴ O le mea moni, o lenei [fegalegaleaiga] e le o sa latou tu masani lea, aua o aso na, e le masani ona talatalanoa faatasi ia tamaitai ma alii e uiga i le talalelei.

O se tasi aso, na saunia ai e Mareta se taumafataga, ma e pei ona fai mai le mau, “ua tiga i le fatuaiga.”⁵ I se isi faaupuga, na pagatia o ia i le tele o le mau mea e fai!

Ae o Maria, “ua nofo i lalo i tafatafa o vae o Iesu, ma faalogologo i lana fetalaiga,”⁶ ae ua atili ai le tiga o Mareta ona o le leai o se tasi na fesoasoani atu ia te ia. Pe le o se mea masani ea lena? Tou te manatu na mafaufau o ia faapea, “Aisea ua nofonofo ai i o ia Maria ae o lenei ou te afu ifo i lenei ogaumu?” Ona faapea atu ai lea o Mareta ia Iesu, “Le Alii e, e te le manatu mai ea, ina ua tuu mai e lou uso ia te au e sauni toatasi? Ia e fetalai ane ia te ia, ia fesoasoani mai ia te au.”⁷

Atonu na faateia Mareta i le malu o le valaaulia a le Alii ia te ia. “Mareta, Mareta e, ua e popole, ma ua pupu lou loto i mea e tele: A o le mea lava e tasi e ao ina ia maua: ua filifilia foi e Maria lea mea lelei, e le aveeseina ia te ia.”⁸

O le tali a le Faaola ua matuai faamanino mai ai le mea ua aupito sili ona taua. I lena afiafi i le fale o Mareta, e le o totonu o le umukuka na i ai lea mea lelei, ae o tafatafa o aao o le Alii. E mafai ona faatali le taumafataga.

E pei o Maria, ou te naunau lava ina ia ou aoao atili i le talalelei, ae e pei o Mareta i se isi itu, e tatau ona faamama uma a’u tagamea, ma faamaea uma a’u galuega ua faatulagaina i le fale faigaluega, ma saunia se taumafataga mo lo’u toalua nai lo se pizza maluluina. E toasefululima fanau a la’u fanau o o latou agaga vaivai ma luitau i aso taitasi, ou te fia malamalama atili i ai, ae peitai, e i ai foi so’u valaauga i le Ekalesia ou te pisi tele ai! E le i ai ni ou taimi se tele. E pei foi o outou uma lava, e tatau lava ona ou filifili. O loo tatou taumafai uma lava e filifili lea mea lelei, lea e le mafai ona aveeseina mai ia i tatou, ina ia paleni ai o tatou ola faaleagaga ma le faaletino. Faamata e le faigofie atu pe ana tatou filifili i le va o le faia o faiaoga asiasi ma le gaoiina o se faletupe? Ae peitai, o a tatou filifiliga e masani ona sili atu ona atamai. E tatau lava ona tatou faia le tele o filifiliga aoga.

O oe ma au o Maria ma Mareta ia; faapea foi ma uso uma o loo i totonu o le Aualofa. O nei tamaitai sa alolofa i le Alii ma sa la mananao e faaali atu lena alofa. O le taimi lea, na faaali atu e Maria lona alofa e ala i le faalogo atu i Ana fetalaiga, ae o Mareta sa faaali atu lona alofa e ala i lona auauna atu ia te Ia.

Na manatu Mareta e sao le mea na ia faia, ma sa tatau ona fesoasoani atu lona uso ia te ia.

Ou te le talitonu na fetalai mai le Alii faapea e i ai ni mau Mareta ma ni mau Maria. Sa lei faaleaogaina e Iesu ia le popolega o Mareta, ae sa Ia toe faatonutonuina le mea sa ia taulai atu i ai. Ou te talitonu sa fetalai atu o Ia e filifili lea mea lelei. Ma o le a lena mea? Na aoao mai le Perofeta o Liae ia tatou “vaai i le Puluvaga Sili, ma ia outou faalogo atu i Ana poloaiga sili, ma ia faamaoni i Ana fetalaiga, ma filifili i le ola faavavau, e tusa ma le finagalo o Lona Agaga Paia.”⁹

O le mea e tasi e ao ina ia maua o le filifili lea o le ola faavavau. Tatou te filifili i aso uma. A o tatou saili atu i le Alii, ma faalogo, ma mulimuli atu ia te Ia, e siomia i tatou i aao o Lona alofa—o se alofa e mama.

Sa aoao mai i tatou e Mamona “o le alofa moni o le alofa mama lea o Keriso, e tumau ia e faavavau.”¹⁰ O le alofa mama lea o Keriso. Sei o tatou tagai i lena mea. O le a le uiga o lenei fasifuaitau? Tatou te maua se vaega o le tali i le Iosua: “Ia outou matua anaana … tou te alofa atu ia Ieova lo outou Atua … ma auauna ia te ia ma o outou loto atoa ma o outou agaga atoa.”¹¹ O le alofa moni o lo tatou alofa lea mo le Alii, e faaalia e ala i a tatou galuega o le auauna atu, onosai, agalelei, ma le malamalama o le tasi i le isi.

O nisi vaaiga faaopoopo i le alofa mama o Keriso o loo maua i le Eteru. “Ua alofa [Iesu] i le lalolagi, ua oo lava ina foaiina mai [Lona] soifua … ina ia [Ona] toe maua ai ina ia sauni le mea e nonofo ai le fanauga a tagata. O lenei foi, ua ou iloa o lenei alofa sa ia te [Ia] mo le fanauga a tagata o le alofa moni lea.”¹² O le alofa moni o le alofa foi lea o le Alii mo i tatou, e faaalia e ala i Ana galuega o le auauna atu, onosai, agalelei, ma le malamalama.

O le “alofa mama o Keriso,”¹³ e le gata ina faatatau i lo tatou alofa mo le Faaola, ae o Lona alofa foi mo i tatou taitoatasi.

O loo faapupula mai foi i le tala ia Maria ma Mareta le ala e mafai ona faaitiitia ai le meaalofa o le alofa moni. I totonu o le talosaga a Mareta mo se fesoasoani, na taatia ai se faamasinoga manino ae le leoa: “O au e sao; ae sese o ia.”

Pe o tatou faamasino ea i le isi tagata? Pe e tatou faitioina ea isi ona o a latou lava filifiliga, ona ua tatou manatu ua sili atu mea ua tatou iloa, ae o le mea moni e toetoe a leai so tatou malamalamaaga i mea e tulaga ese ai le isi tagata po o ona musumusuga patino. Pe ua tatou faapea atu ea, “E faigaluega lava o ia i le aso atoa.” Po o le, “E lei alu lana tama i se misiona.” Po o le, “Ua matua tele o ia mo se tofiga.” Po o le, “E le mafai—e leai sona toalua.” O na ituaiga faamasinoga, ma le tele lava o isi faamasinoga faapena, e aveeseina mai ai ia i tatou lea mea lelei, o le alofa mama lea o Keriso.

E sasi foi la tatou vaai i lea mea lelei pe a tatou faatusatusaina i tatou lava i isi. E manaia atu lona lauulu, e lapopoa ai ou vae, e sili atu ona talenia lana fanau, e fua tele atu foi lana faatoaga—uso e, ua outou silafia le uiga o lau tala. E le mafai ona tatou faia lena mea. E le mafai ona tatou faatagaina i tatou lava ina ia tatou lagonaina le le taua e ala i le tagai atu i tulaga e le o mafai ona avea ai i tatou, nai lo o tulaga ua tatou i ai! O i tatou uma o uso o le Aualofa. E le mafai ona tatou faitio, muimui, pe faamasino atu ma taofia pea le alofa mama o Keriso. Pe le mafai ea ona outou lagonaina le fetalaiga matagofie a le Faaola: “Mareta, Mareta e … ?”

Na saunoa mai Elder Marvin J. Ashton: “Atonu o le alofa moni maoae o le a maua pe a tatou feagaleleiai, pe a tatou le faamasino atu pe faailoga tagata, pe a tatou taumafai e mafaufau i mea sili e uiga i le tasi ma le isi, pe gugu foi e aua le faia se tala. O le alofa moni o le talia lea o uiga ese o se tasi, vaivaiga ma pona; ma onosai i se tagata ua ta’ufaatauvaaina i tatou; pe o le tetee atu foi i le lagona o le faaonoono pe a le taulimaina e le isi tagata se mea i se ala atonu sa tatou faamoemoeina. O le alofa moni o le musu lea e faaaoga vaivaiga o le isi tagata, ma naunau e faamagalo atu i le tasi ua faatiga mai ia i tatou. O le alofa moni o le vaavaai atu lea o le tasi i mea silisili mai le isi.”¹⁴

I le faataitaia o le alofa moni, e oo atu ai ina tatou iloa le loto o se uso. Pe a tatou iloa le loto o se uso, ua avea i tatou ma ni tagata ua suia. O le a tatou le faamasinoina o ia. O le a tatou alolofa atu ia te ia. Ou te valaau atu ia te outou ina ia le gata ina saga alolofa atu, ae ia sili atu ona loloto le alofa o le tasi i le isi. Pe a tatou faia lenei mea, o le a mafai ona tatou iloa ma le mautinoa “e le uma le alofa.”¹⁵

E pei o le tulaga sa i ai Mareta, o se tasi o mea muamua lava e alu ese ma a’u pe a ou popole ma ponatia lo’u loto o lo’u uiga alofa moni lea. Pe tou te faamaonia ea lenei mea ia te outou?

Ua ou aoaoina e faapea o le auala aupito sili ona lelei e toe maua ai le alofa moni o le lafoai lea o mea ou te popole i ai ae alofa ma auauna atu i le Alii. E faapefea ona tatou faia lena mea? Tatou te amataina aso taitasi i le tootutuli i le tatalo i lo tatou Tama Faalelagi, tatou te faalogoina Ana fetalaiga e ala i le suesue i aso taitasi i tusitusiga paia, ma tatou mulimuli i le taitaiga tatou te maua. Tatou te faamuamua Keriso, toefuatai le alofa moni. “Ua tatou alolofa ia te Ia, aua na Ia muai alofa mai ia te i tatou.”¹⁶ O le taamilosaga lenei o le alofa moni. Uso e, “e le uma le alofa.

Ina ua ou maua lenei valaauga, sa ou naunau ma lou loto atoa ia lava lo’u alofa moni e alofa atu ai i uso uma lava taitoatasi i totonu o le Ekalesia. Ou te manao ia mafai e lo’u alofa faateleina ona fesoasoani ia outou lagonaina ai le alofa o le Alii i o outou olaga. Sa ou tatalo i lo’u Tama Faalelagi “ma le malosi uma o [lo’u] loto [ina ia] faatumuina i lenei alofa, ua foaiina mai ia te i latou uma o e ua fai ma soo faamaoni o Lona Alo, o Iesu Keriso.”¹⁷

O le masina o Tesema ua mavae i le Aoga Sa, na fautua mai ai lo matou faiaoga e faapea, o le taimi o faatalanoaga faaiu o le sefuluai matou te tuuina atu ai i le Alii se faamatalaga a le tagata lava ia i lo matou iloa ma le faaaogaina o se mataupu faavae o le talalelei. O le lagona na lofituina ai au o lau suesuega e tatau ona taulai atu i le alofa moni. O lenei musumusuga na faamaonia i le taimi o le sauniga o le faamanatuga, ma na ou iloa ai sa ou maua le taitaiga mai le Alii.

O le fegalegaleai faatasi ma le toatele o outou, ua ou maua ai se alofa mama maoae mo outou ma lo outou agalelei. Ua faalotomaulaloina au ona o la outou lagolago mai. Ua faateleina lou naunau e auauna atu ia te outou. O lagona nei o le alofa mama; o tali nei i a’u tatalo; o nisi nei o taimi e sili ona matagofie o lo’u valaauga. Masalo ai ua i ai sina o’u alualu i luma, aua ua tuufesilisili mai nisi o la’u fanau pe aisea ua ou lelei ai lava i lenei taimi. O le masina o Tesema o loo lumanai, o le a mafai ona ou tuuina atu ai i lo’u Tama Faalelagi se lipoti o a’u taumafaiga ina ia ou malamalama ma ola ai i le alofa moni.

E pei lava ona Ia faia ia Maria ma Mareta, o le a faapea foi ona faaali mai e le Alii ia i tatou lea mea lelei e le mafai ona aveeseina mai ia i tatou. O le a ia tuuina mai ia i tatou le alofa moni, o lena alofa mama o Keriso, aua “e le uma le alofa.”

Uso pele e, e tasi le mea e manaomia, ia mulimuli atu ia te Ia i aso taitasi. Ina filifili ia e outou o Keriso le Alii. Ia e filifili e fiafia i Ana afioga. Ia filifili e faalagolago ia te Ia i luga. Ia filifili e tulimatai atu mo Lona alofa. Ia filifili e tuuina atu ia te Ia lou Loto atoa. O le mea lea, ina filifili ia lea mea lelei.

Ou te tatalo atu ai i nei mea, i le suafa o Iesu Keriso, amene.