“Sau, Ma Mulimuli Mai ia te Au”

O i tatou o soo o Iesu Keriso. I upu a Nifae, “Ua matou talitonu ia Keriso, … ua matou tautalatala ia Keriso, ua matou olioli ia Keriso, ua matou talai atu Keriso, ua matou vavalo atu foi ia Keriso” (2 Nifae 25:24, 26). I tagata talitonu i soo se mea, o upu sili ona mamana e atagia ai la tatou amio na Ia fetalai ai o le “Sau, ma mulimuli mai ia te au” (Luka 18:22; tagai foi Mataio 16:24; Mareko 1:17; Luka 9:23). Ina ua fesiligia e se tusiupu po o le fea poloaiga e sili, na tali Iesu:

“Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa: o le poloaiga sili lea.

“E faapena foi i lona lua … Ia e alofa atu i le lua te tuaoi, ia pei o oe lava ia te oe. E leai lava se tasi poloaiga e sili i na poloaiga” (Mareko 12:30–31).

I le faaaogaina o le faatulagaga o nei poloaiga e lua, sei o tatou talanoaina lava le auala e sili ona mafai ona tatou mulimuli ai ia te Ia.

O le faataitaiga a le Faaola i le fefaasoaai o le alofa i le va o Ia ma Lona Tama o se mea manino lava. O tatalo fai soo, uumi, ma le faamaoni a le Faaola ua saunia ai se faataitaiga malosi mo i tatou e mulimuli ai. O le alofa o le Tama mo Lona Alo sa matuai iloga lava, aemaise lava i le taimi o Lona papatisoga e Ioane: “O le siufofoga mai le lagi, ua faapea mai, O Lou atalii pele lena, ua ou fiafia lava ia te Ia” (Mataio 3:17).

O le lotogatasi i le va o i laua sa iloagofie lava ina ua fetalai le Faaola, “O au nei ma le Tama e tasi lava i maua” (Ioane 10:30). Ia malamalama o Lona finagalo ma le finagalo o le Tama sa eseese i sina taimi puupuu e pei ona i ai i Ketesemane (tagai Mataio 26:39) e faamanatu mai ai ia i tatou e faapea o a tatou tatalo o le a le tali maia i taimi uma i auala tatou te faamoemoe i ai. Ae ui i lea, o le tatalo o le mataupu faavae o le faatinoga. Na fetalai le Faaola e faapea afai e faatuatua se tasi e aunoa ma le masalosalo, “o mea uma foi tou te ole mai ai i le tatalo ua i ai le faatuatua, e maua lava e outou” (tagai Mataio 21:21–22). O lo tatou alofa mo le Faaola e tatau ona o faatasi ma faatinoga: “Afai tou te alofa mai ia te au, ia outou tausi mai i au poloaiga” (Ioane 14:15).

Sei o tatou manatunatu i le poloaiga sili lona lua, “E te alofa atu i le lua te tuaoi ia pei o oe lava ia te oe” (Mataio 22:39), po o le isi ona faatatauga sa aoaoina atu i Aposetolo “Ia outou fealofani; faapei ona ou alofa atu ia te outou” (Ioane 13:34). E ui lava o le valaaulia atu o se tuaoi mo se taumafataga o se auala manaia lea e faailoa atu ai le alofa, ae na filifilia e le Faaola se faataitaiga sili atu ona faigata ina ua fesili atu le aoao tulafono ia te Ia, “O ai foi le tagata ma te tuaoi?” (Luka 10:29).

Ona sosoo mai ai lea ma le tala masani o se tagata na malaga mai Ierusalema e agai i Ieriko ma osofaia ai o ia e tagata faomea ona tuu ai lea o ia i autafa o le ala toe a oti. Sa matamata i ai le sa Levi ma le faitaulaga ia te ia ma ui ane i le isi itu ala. Ae o se Samaria, o e sa inosia e Iutaia, sa alofa o ia i ai ma tausi ia te ia. E lei fesili le Samaria po o le a le ituaiga tagata e i ai o ia a o lei faaali atu le alofa mutimutivale. Na faaiu e Iesu lenei tala mamana i le apoapoaiga “ina alu ia ma ia e faapea ona fai” (Luka 10:37).

I totonu o taulaga tetele uma, o loo i ai o tatou tagata o e ua afaina i tulaga o le olaga ma ua le amanaiaina—o e ua leai ni aiga, o e ua tuulafoaiina, o e ua matelaina, ma e mamai. Ua fai mai nisi o le tuuina atu i ai o tupe ua tatou lagolago ai i le latou mea o loo fiafia e fai o fualaau oona po o le ava malosi, o lea ua mafai ai e i latou ona faaauau se ituaiga olaga ua latou filifilia. E faigofie tele ona faamasinoina tagata faapenei, ma e pei o uo a Iopu, e mafaufau i mea sese uma lava sa latou faia i o latou olaga ua oo mai ai lenei mala tele i o latou luga (tagai Iopu 22; Mosaea 4:17).

Ae peitai, a e tatou te lei laaloa e pei o le sa Levi ma le faitaulaga, se i o tatou toe mafaufau lava i le apoapoaiga a le Faaola “Sau, ma mulimuli mai ia te au.” Ia manatua sa leai se mea e nofo ai le Faaola, sa na o lavalava i Lona tino, ma sa masani ona fia taumafa. O le a se mea semanu Na te faia? E leai se fesiligia o le mea semanu Na te faia. Semanu Na te faaali atu le alofa mutimutivale ma auauna atu ia i latou.

E tele naua auala e fesoasoani ai i e ua leai ni aiga, e aofia ai le foai atu o le taimi, o oloa, ma tupe i vaega fesoasoani, nofoaga e maua fua ai meaai, po o ofisa o loo taulimaina ia faafitauli nei. Ae ui i lea, e foliga mai ia te au e tatau foi ona tatou faaali atu le alofa mutimutivale ia te i latou. O mataupu faavae ua faatuina o le uelefea o se taiala talafeagai lea. Ia manatua tatou te nonofo pea ma e matitiva (tagai Mareko 14:7).

Na toe faamamafa mai e le Faaola lenei mataupu faavae ina ua Ia talanoaina le Aso Faamasino ma le tuueseeseina o mamoe mai oti:

“Ona tali mai ai lea o e amiotonu ia te ia, e faapea mai, Le Alii e, o anafea na matou iloa ai oe ua fia ‘ai, ma matou fagaina oe? Po o fia inu, ma matou avane e te inu ai?

“O anafea foi na matou iloa ai oe o le tagata ese, ma matou talia oe? Po o le le lavalava, ma matou faaofuina oe?

“O anafea foi na matou iloa ai oe ua ma’i, po o i le fale puipui ma matou o atu ai ia te oe?

“Ona tali atu ai lea o le Tupu e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai” (Mataio 25:37–40).

Na faamamafa e Peteru le taua o lenei ituaiga alofa ina ua ia faapea mai, “Ia muamua i mea uma ona maua e outou o le alofa naunau o le tasi i le tasi: aua o le alofa e ufiufi ai agasala e tele” (1 Peteru 4:8).

Na faailoa mai foi e Mamona ni lagona faapena i le apoapoaiga lenei:

“O lenei, ou uso pele e, afai e leai se alofa ia te outou, e le aoga lava outou, aua e le uma le alofa. O le mea lea, ia outou uumau ai le alofa, ua silisili i mea uma, aua e faaleaogaina mea uma—

“A o le alofa moni, o le alofa mama lea o Keriso, e tumau ia e faavavau; o i latou uma foi ua maua ua i ai lea alofa i le aso gataaga, e lelei ia te i latou” (Moronae 7:46–47).

Sa aoao mai ma faataitai mai e Iesu le tele o uiga lelei faaletagata e tatau ona tatou mafaufau i ai a o tatou taumafai e mulimuli ia te Ia. O nei uiga e aofia ai le alofa, agamalu, lotomaualalo, agalelei, fia inu i le amiotonu, nofo tatalo, alofa, ma le lotomama. E le tatau lava ona tatou faamasino atu i isi, ae ia tatou faia i isi e pei ona tatou mananao i isi e fai mai ia i tatou. Na Ia aoao mai e tatau ona avea i tatou ma masima o le lalolagi ma se malamalama o le lalolagi. Na ia fetalai mai o le mea e manatu i ai le tagata i lona loto e pei lona taua o ana mea e fai. Na tauina mai ia i tatou ina ia tatou faamagalo atu i tagata uma, e aofia ai e o agaleaga mai ia i tatou, ma ia alolofa i o tatou fili. E le gata e ao ona avea i tatou ma faatupu filemu, ae ia tatou olioli i sauaga. Na Ia fautuaina i tatou ina ia avatu a tatou meaalofa ma tatalo i le mea lilo. Na Ia aoaoina i tatou ina ia liliu atu le isi alafau ma o i le maila faaopoopo. Na patino Lona lapataiina o i tatou ina ia toloa’i oa i le lagi nai lo oa o i le lalolagi. (Tagai Mataio 5–7.)

A o tatou manatunatu i le uiga atoatoa o le faaupuga “Sau, ma mulimuli mai ia te au,” e matuai manino lava atonu e tele naua mea e ao ona tatou aoaoina ma faia ina ia mafai ona tatou tali atu ma le atoatoa i lena poloaiga. Ae peitai, o le mea e maofa ai, i le gasologa o le uluai 30 tausaga o Lona soifua i Nasareta, e lei manatu ifo Iesu ia te Ia lava e ui lava sa Ia soifua i se soifuaga taumamaina (tagai Mataio 13:54–56; Mareko 6:2–3). E tatau foi ona uunaia ai i tatou i lea tulaga, ina ia faia ia sili atu i a tatou lava auala filemu ma le faamaualalo e aunoa ma le faatosina mai o manatu o tagata ia i tatou. O le apoapoaiga ina ia “Sau, ma mulimuli mai ia te au” ma le fesili “O le a se mea semanu e faia e Iesu?” ua maua ai ni taiala malolosi mo le olaga. O le tele ona tulimatai atu i nei taiala o le a fesoasoani ai ia i tatou uma e avea ai atili faapei o Keriso i o tatou manatu ma mea e fai.

O le Faaola, o le ua avea ma o tatou faaa’oa’o, ou te molimau atu o loo soifua o Ia. I le suafa o Iesu Keriso, amene.