O Le Silisiliese o le Atua

I le tele o faamoemoega maoae na ausia i le soifuaga ma le galuega a le Alii o Iesu Keriso, e tasi le vaega maoae o lena lava misiona e masani ona le amanaiaina. E lei malamalama i ai i latou na mulimuli ia te Ia i lena taimi, ma o le toatele o le au Kerisiano i ona po nei e le malamalama i ai i le taimi nei, ae sa masani ona fetalai soo i ai le Faaola lava Ia ma faamamafaina. O le aotelega silisili lea o le upumoni na afio mai Iesu e fetalai i ai ma fai, aemaise lava i Lana taulaga togiola ma le puapuaga, na Ia aoao mai ai ia i tatou po o ai le Atua lo tatou Tama Faavavau ae pe faapei foi o ia, faapea le atoatoa o le gauai atu o Ia i Lana fanau i soo se augatupulaga ma soo se atunuu. Sa taumafai Iesu e ala i upu ma galuega e faaali ma faamanino mai ia i tatou le natura moni o Lona Tama, lo tatou Tama o i le Lagi.

Na Ia faia lenei mea na o se vaega i le taimi lena ae o lenei ua moomia e i tatou uma ona iloa atoatoa le Atua ina ia mafai ai ona loloto atu le alofa ia te Ia ma atoatoa ona usiusitai ia te Ia. E pei ona faailoa uma mai i le Feagaiga Tuai ma le Feagaiga Fou, “O le poloaiga sili o poloaiga uma o le … ia e alofa i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa: o le poloaiga muamua [ma le sili lea].”¹

E leitioa ona aoao mai le Perofeta o Iosefa Samita: “O le uluai mataupu faavae o le talalelei ia iloa ma le mautinoa le uiga o le Atua.” “Ou te manao ia te outou uma ia iloa o Ia,” na ia saunoa ai, “ma ia masani ia te Ia.”² E tatau ona i ai “so tatou manatu sa’o i lona … atoatoa, ma ona uiga,” o se maofa i le “maoae o [Lona] tagata.”³ O lea ua avea ai ma fuaitau muamua lava tatou te taumemumemu ai i le faailoaina o lo tatou faatuatuaga le, “Matou te talitonu i le Atua le Tama Faavavau.”⁴ Sa faapea foi ona matua faamamafaina e Iesu. E ui lava sa Ia aloaiaina Lana matafaioi tupito i le fuafuaga paia, ae sa amata lava e le Faaola lana tatalo i le folasaga lenei: “Ma o le ola e faavavau foi lenei, ia latou iloa oe, le Atua moni e toatasi.”⁵

Ina ua mavae atu augatupulaga o perofeta sa taumafai e aoao le aiga o le tagata i le finagalo ma le auala o le Tama, sa masani lava ona tau le faamanuiaina, o lea na auina mai ai e le Atua i le lalolagi, i Lana lava taumafaiga silisili ina ia tatou iloa o Ia, Lona Alo Pele e Toatasi ma le atoatoa, na foafoaina i Lona lava faatusa ma uiga, ina ia ola ma auauna atu i tagata i luitau o le olaga i aso taitasi.

O le afio mai i le lalolagi ma se tiutetauave faapena, ina ia faataunuuina tiute o Elohima—fetalai e pei ona Ia fetalai, faamasino ma auauna atu, alofa ma lapatai, onosai ma faamagalo atu e pei Ona ia fai—o se tiute e matuai lofituina ai ma e le mafai e outou ma au ona malamalama i ai. Ae i le faamaoni ma le naunautai lea e aofia ai i uiga o se tamaitiiti paia, na mafai ai e Iesu ona malamalama i ai ma sa Ia faia. Ae, ina ua amata ona oo mai faaneetaga ma le faamamaluga, sa Ia faafoi atu uma lava le viiga i le Tama.

“O le Tama … na faia galuega,” na Ia fetalai atu ai ma le faamaoni. “E le mafai e le Atalii ona fai o se mea, na o ia lava; a o mea na te vaai atu i le Tama o faia: o mea foi o faia [e le Tama], o loo faia foi ia lava mea e le Atalii.”⁶ I se tasi taimi na Ia fetalai ai: “O au nei ou te tautala i mea ua ou iloa i lo’u Tama.” “Ou te le fai fua foi se mea; ae peitai, faapei ona aoao mai e lo’u Tama ia te au.” “Ou te lei alu ifo mai le lagi e fai lo’u lava loto, a o le finagalo o le ua auina mai a’u.”⁷

Ou te faia la’u lava tautinoga ma lo’u loto e uiga i le Atua lo tatou Tama Faavavau i le taeao nei aua o loo matua mafatia nisi o le lalolagi i le taimi nei ona o le matua le fiafia i manatu sese e uiga ia te Ia. O loo i ai foi ma se tulaga ua tauau ina falala atu i ai i lagona vavamamao ma le Tama, e oo lava ina matuai motuese mai lava ma Ia, pe afai foi sa latou talitonu ia te Ia. Ma afai latou te talitonu, o le toatele o tagata i aso nei e faapea mai atonu latou te lagonaina le toamalie i aao o Iesu, ae faigata ia i latou ona mafaufau atu i le matuia o se feiloaiga faafuasei ma le Atua.⁸ O le sese o le faitau (ma e mautinoa lava, i nisi o tulaga, o se faaliliuga na misi) o le Tusi Paia, e vaai atu ai nei tagata i le Atua le Tama ma Iesu Keriso Lona Alo ma faapea e matuai eseese lava [a la’ua] faatinoga, e ui lava ina o loo ta’ua le mea moni i le Feagaiga Tuai ma le Feagaiga Fou, o le Alo o le Atua e tasi ma o ia lava lea, o loo galue e pei ona sa Ia faia i lalo o le taitaiga a le Tama, o Ia lea e le liliu o “ananafi, o le aso, ma le faavavau.”⁹

Pe a manatunatu atu la i nei manatu sese ona tatou iloa ai lea o se tasi o sao taua o le Tusi a Mamona, o le leai o se laina tuaoi ae atoa lelei le tasi o le vaaiga i lena tusi maoae, e uiga i le paia silisili ese. O le Tusi a Mamona e le o i ai se va o Malaki-ia-Mataio, e leai se tau faatali sei vaai po o a suiga faalelotu ma le tofamanino faaleaganuu i le va lea, e leai se le malamalama i le Atua o le e galue faavavevave, ma le alofa, ma le faamaoni i totonu o itulau uma o lena tusi mai lona amataga i le Feagaiga Tuai e oo mai i lona faaiuga i le Feagaiga Fou. Ioe, i se taumafaiga ina ia toe faafoi le Tusi Paia i lona uluai taua sa i ai i le lalolagi ma se malamalama sao i ai i le Silisiliese, o le mea o loo i ai i le Tusi a Mamona o se vaaiga e le masuia o le Atua i Ona mamalu uma ma le agalelei, o Ona tamaoaiga uma ma le aoao i mea uma—aemaise lava le aofia ai o le toe faaalia mai o Lona lava Alo Pele e Toatasi, o Iesu Keriso.

E ao ina tatou matua faafetai mo tusitusiga paia uma, aemaise lava i tusitusiga paia o le Toefuataiga, lea e aoaoina ai i tatou i le silisiliese o sui taitoatasi o le Aigaatua. Mo se faataitaiga, o le a tatou matuai fiafia lava pe afai o le a mauaina uma e le lalolagi ma taliaina le vaaiga i le Tama lea o loo faamatalaina ma le ootia i totonu o le Penina Tautele.

O iina, i le totonugalemu o faaaliga vaaia silisili i tagata lea na tatalaina ai le lagi i lana vaai, na maitauina ai e Enoka ia faamanuiaga ma luitau o le olaga faaletino, na ia tepa atu ai i le Tama ma sa maofa i le vaai atu o tutulu o Ia. Na ia saunoa atu ma le maofa ma le ofo i lenei Tagata silisili ona mamana i le lalolagi: “Po ua faapefea ona e tutulu? … E amiotonu oe [ma] alofa, ma agalelei e faavavau; … O le filemu … o loo i ai i lou nofoalii; e alu atu foi mai ou fofoga le alofa tunoa e le gata; ae ua faapefea ea la ona e tutulu?”

I le silasila atu i mea o loo tutupu e toetoe lava o soo se vaitaimi, na tali atu ai le Atua: “Faauta i ou uso nei; o i latou o galuega a o’u lava lima… . Na ou tuuina atu ia i latou … [se] poloaiga, ia latou fealofani, ma e ao ina latou filifilia au, lo latou Tama; ae faauta, ua aunoa i latou ma le alofa, ma ua latou inoino i o latou lava toto… . Pe le tatau ea ina laue le lagi i lo latou iloa o le a puapuagatia i latou ia?”¹⁰

O lena vaaiga mamana e tasi, ua sili atu mea ua na faia e aoao mai ai le natura moni o le Atua nai lo soo se isi lava tusitusiga faalelotu ua mafai ona faailoa atu ai. E fesoasoani ai foi ia i tatou ina ia malamalama atili ai i lena taimi manino i le tala faatusa a le Tusi a Mamona i le laau o le olive, ae ina ua uma ona eli ma teteleina, faasusu ma velevele, teuteu ma uluulu, toe fetuunai, ma faafeusuai, sa lafoai i lalo e le Alii o le tovine lana suo ma ana meafaigaluega ma tagi, ma taualaga atu i soo se tasi e lagona mai, “Se a foi se isi mea e mafai ona ou faia i lou tovine?”¹¹

O se faatusa e le mafaagaloina lea o le aafia ai o le Atua i o tatou olaga! E maeu le tiga i se matua pe afai e le filifilia o Ia e Lana fanau po o le “talalelei a le Atua” na Ia auina mai!¹² E maeu le faigofie ona alofa i se tasi o le e tupito le alofa ia i tatou!

O le mea moni lava o le umi o tausaga o faifaimalie le suia o talitonuga i se Tama atoatoa ma le alofa, ua faateteleina lea e ala i faamatalaga na faia e tagata e faaseseina ai augatupulaga lea e anoanoai ai le faamatalatalaina o le Atua e pei o le e leiloa ma le le malamalama—e leai se tino, e leai ni lagona, e faigata ona maua, e le mafai ona pai i ai, e i soo se mea i taimi uma atoa ma le le o i ai i se mea. E mautinoa lava, e le o faamatalaina mai ai iina le Atua lea tatou te mafaufau i ai e ala i fofoga o nei perofeta. E le faatusalia foi i ai le Iesu o Nasareta soifua, sa manava, ma faitino o le sa i le “pupula o lona mamalu, ma ua matua tusa ma lona [Tama].”¹³

Ona o lena manatu, o lea e lei afio mai ai Iesu ina ia faaleleia le silafia o le Atua i le tagata ae na afio mai o Ia ina ia faaleleia le malamalama o le tagata i le Atua ma ole atu ia i latou ina ia alolofa i lo latou Tama Faalelagi e pei ona Ia alofa mai pea lava ia i latou. O le fuafuaga a le Atua, o le mana o le Atua, o le paia o le Atua, ioe, e oo lava i le toasa ma le faamasinoga a le Atua ua maua uma e tagata le avanoa e malamalama i ai. Ae o le alofa o le Atua, o le loloto o Lona gauai atu i Ana fanau, latou te lei malamalama atoatoa i ai—na faatoa malamalama i ai ina ua afio mai Keriso.

O le fafagaina la o e sa fia aai, faamalolo i e mamai, aoaiina tagata pepelo, ole atu mo le faatuatua—o Keriso lena o loo faaali mai ia i tatou le ala o le Tama, o Le e “alofa tunoa ma alofa mutimutivale, e telegese lona toasa, e onosai ma tumu i le agalelei.”¹⁴ I Lona soifuaga aemaise lava i Lona maliu, na faailoa mai ai e Keriso, “O le alofa lenei o le Atua ua ou faaali atu ia te outou, e faapena foi ia te au.” I le faatinoina atoatoa e le Alii o le tausiga atoatoa a le Tama, i lo Laua puapuagatia ma le fetufaai o le faanoanoa mo agasala ma lototiga o le toatele o i tatou, tatou te iloa ai le uiga tonu o loo i totonu o le folafolaga: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau. Aua e lei auina mai e le Atua lona Atalii i le lalolagi ina ia faasala i le lalolagi; a ia faaolaina le lalolagi ia te ia.”¹⁵

Ou te tuuina atu la’u lava molimau i lenei aso e uiga i se Atua soifua, o le na te silafia o tatou igoa, e faafofoga ma tali mai i a tatou tatalo, ma faapelepele ia i tatou e faavavau o fanau a Lona agaga. Ou te tautino atu faapea e ui i le faigata tele o galuega o loo i ai i le lalolagi, Na te sailia lava lo tatou fiafia taitoatasi ia sili atu i isi atugaluga faaleatua. Na foafoaina i tatou i Lona lava faatusa ma foliga,¹⁶ ma o Iesu o Nasareta, Lona Alo Pele e Toatasi i la le tino, na afio mai i le lalolagi o se tagata faitino atoatoa o se faailoga o Lona silisiliese. E faaopoopo atu i molimau a perofeta anamua o loo i ai foi ia i tatou le vavega i ona po nei o Palamaira, le faaali mai o le Atua le Tama ma Lona Alo Pele, le Faaola i le lalolagi, i le perofeta taulealea o Iosefa Samita. Ou te tautino atu o lena faaali mai, ma o upu a lena perofeta, ou te folafola atu ai foi: “E tele le onosai o lo tatou Tama faalelagi i Lana silafaga, e le faatuaoia foi Lona alofa tunoa ma faamanuiaga, nai lo le tatou saunia e talitonu pe taliaina… . E le vaai atu le Atua i sina agasala [e tusa pe laitiiti] ma faatagaina ai sina mea, ae … a tatou latalata atu i lo tatou Tama faalelagi, o le tele foi lena ona tatou vaai atu ma le alofa i agaga o le a fano; tatou te lagona lo tatou mananao e sii i latou i o tatou tau’au, ma lafoai ese i o tatou tua a latou agasala.”¹⁷

Ou te molimau atu o loo i ai se Atua e i ai ni tau’au faapena. Ma i le agaga o le tofi paia faaaposetolo, ou te faapea atu ai e pei foi o se tasi na umia anamua lenei tofi: “O le alofa lava lenei, e le ona ua tatou alolofa i le Atua, a ua alofa mai o ia ia te i tatou, ua na auina mai foi Lona Alo e fai ma togiola mo a tatou agasala. Le au pele e, afai ua faapea ona alofa mai o le Atua ia te i tatou, e tatau ai foi ona tatou fealofani”¹⁸—ma alolofa ia te Ia e faavavau, ou te tatalo ai. I le suafa paia o Iesu Keriso, amene.