O Filifiliga E Tolu

Talu ai nei lava, na ou maitauina ai le tele o polokalama ua i ai e faaleleia atili ai le tagata lava ia. Masalo ua tele le manaomia o nei oloa, aua e tau leai se taimi e ki ai le televise po o le leitio e le vaaia pe faalogoina ai le faalauiloaina mai o oloa ia o loo folafola mai ai mea uma lava mai le faapauina o pauna e oo atu i le faatutupuina o se faaputuga lauulu mafiafia. O nisi taimi ou te mafaufau ai pe o iloa lelei au e nei tagata latou te faia nei oloa.

O le aso ou te fia ofoina atu ai lau lava polokalama e faaleleia atili ai le tagata lava ia. O loo aofia ai ni laasaga se tolu na aoga ia te au, ma ou te talitonu o le a aoga tele foi ia te outou. Ae o le mea e sili ai, o lenei polokalama e faaleleia ai le tagata lava ia e le totogia. E le manaomia ai se tupe. O le a le emoemo mai foi se numera e vili fua, ma lapataiina ai oe faapea ua toe lima minute e faaaogaina ai lenei ofo e faatasi i le olaga ona maua.

Atonu o le auala lelei lava e aoao atu ai nei mataupu faavae o le faaaoga lea o se faataoto.

Sa i ai se tagata e igoa ia Ioane o le na oo i ai le tele o puapuaga ma faanoanoaga, e ui lava i lona talavou. Sa leai sona aiga ma ua malosi i le ava malosi ma isi fualaau faasaina, ma na matuai mai tigaina ai Ioane ma ua lelava ai i le olaga. O le faateteleina o lona mai ma le le fiafia, o le tele foi lea o lona iloa afai na te le faia ni suiga—ma ia faavave—e tele lava se avanoa o le a oti o ia ma le faanoanoa, le aoga, ma le tuulafoaia.

Talu ai ona sa auai o ia i le Peraimeri i ni nai taimi ao laitiiti o ia, o lea na afea ai loa e Ioane se falelotu lata ane lea na ia talosaga atu ai e fia vaai i le epikopo.

“Ua ou faaleagaina lou olaga,” o le tala lea a Ioane ma tagi lotulotu na faapea ona sau mai le taele o lona loto mafatia. Na ia talanoa e uiga i mea sese sa ia faia ma le auala o le faatafunaga ma le faanoanoa na ia uia.

Ao faalogologo le epikopo i le tala faanoanoa a Ioane, sa mafai ona ia iloaina le manao moni o lenei alii e salamo ma suia lona olaga. Ae na mafai foi ona ia lagonaina e laitiiiti se lagona mautinoa o loo ia Ioane e mafai ona suia o ia.

Na mafaufau le epikopo i sina taimi mo se upu e mafai ona ia fai atu ai. Na iu ina ua ia ea i luga ma faapea atu, “Ioane, e tolu lava ni filifiliga sa ou faia i lo’u olaga na matuai taua lava ia te au. Atonu o le a fesoasoani foi ia te oe.”

“Faamolemole, tau mai ia te au,” o le augani atu lea a Ioane. “O le a ou faia soo se mea. Ou te manao ia ou toe amata mai le mea sa ou i ai muamua. Ou te toe fia foi i tua.”

Na ataata le epikopo ma tau atu ia te ia, “O le mea muamua lava e tatau ona e malamalama i ai e le mafai ona e toe foi i tua ma amata mai i le mea sa e i ai muamua. Ae le faapea ua galo mea uma. E mafai ona e amata atu i le mea o loo e i ai nei. Ia e filifili e amata ona e salamo i le taimi nei.”

I se isi itu, e pei uma lava i tatou o Ioane. Sa tatou faia uma ni mea sese. Ae tusa po o le a lo tatou naunau e toe foi i tua ma toe amata mai ai, tatou le mafai. Ae peitai, e mafai ona tatou amata atu i le mea o loo tatou i ai i le taimi nei.

I totonu o le Tusi a Mamona, tatou te faitau ai ia Alema le Itiiti. O ia o le atalii o se perofeta maoae, ae sa ia liliuese mai lona tama ma saili e fai le amioleaga. I le mavae ai o le asiasiga mai se agelu lea na vaivai ma gugu ai o ia, sa faapea ona ia salamo ma galue ai mo le taimi atoa na totoe o lona olaga e toe faaleleia ia leaga na ia faia muamua. O le taunuuga, sa ia faamanuiaina ma faatamaoaigaina olaga o le faitau fia selau o isi tagata. E lei taliaina e Alema e faapea na fetuuina o ia ona o ana mea sese sa faia i le taimi ua fano. Sa malamalama o ia e le mafai ona ia toe tineia le taimi ua sola. Ae na malamalama foi o ia, sa ia te ia le mana e salamo ai ma amata se amataga fou mai le mea ua i ai.

E faapefea ona amata ona tatou salamo?

E ala lea i le faailoaina muamua o o tatou sese ma filifili e suia. E ala i le tautino atu i le aso—i lenei lava aso—ia faia le lelei sili atu, ia ola i ni olaga mamalu ma le agaalofa, ia taumafai i aso uma ia avea atili e faapei o le Faaola.

O lo tatou iuga ma lo tatou taunuuga mulimuli e faalagolago lea i a tatou filifiliga i aso taitasi.

Na silafia e le perofeta maoae o le Feagaiga Tuai o Iosua lenei mea ina ua ia faapea mai, “Ina filifili ia o outou i le aso nei po o ai tou te auauna i ai; … a o au nei ma lou aiga, matou te auauna ia Ieova.”¹

Na malamalama Iosua i le taua o le filifili e aunoa ma le faatuai ina ia sili atu ona amiotonu. E tatau foi ona tatou filifili i le taimi nei. Pe o le a tumu ea o tatou olaga i le faanoanoa ma le leai o se faamoemoe? Pe o le a tatou salamo ea ma taumafai i aso taitasi ina ia avea o tatou aso ma ni aso taua ma le aoga?

O le olioli o a taeao po o le faanoanoa o a taeao o loo i ai ona aa i faaiuga tatou te faia i le taimi nei. Masalo o loo faapea ifo nisi tagata ia i latou lava; “Ou te iloa e tatau ona suia nisi o mea i lou olaga. Atonu o se isi taimi, ae le o le taimi nei.”

O i latou o e nonofo ma tau mafaufau ma faatalitali lava mo le taimi tatau e sui ai, ua pei lava o le tamaloa sa tutu i le auvai o le vaitafe ma faatalitali le taimi e tafe uma ese atu ai le vai ina ia mafai ona ia sopo atu i le laueleele matutu.

O le aso, o le aso lea o filifiliga.

Ina ua faalogo atu Ioane i upu a le epikopo, na ia folafola atu loa o le a faapea ona ia faia le mea na saunoa atu ai le epikopo. Talu ai ona o mea sa fai ma ona mausa, na iloa ai e Ioane e moomia ona ia salamo ma faaleleia lona soifua maloloina. O lea na alu ai i se nofoaga e i ai se auaunaga faapea ma ia faia ai se gaoioiga umi e toe faaleleia ai o ia. Na amata ona ia ‘ai i taumafa paleni. Na amata ona savali ma faia isi faamalosi tino.

Ua mavae ni vaiaso. Na mafai e Ioane ona lafoai ona mausa. Na mafai ona ia iloaina ua toe faaleleia lona soifua maloloina ma ua malosi. Ae sa lei faamalieina o ia. Sa tele ni mea i lona olaga e moomia ona faaleleia lea na ia lagona ai le lofituina ma le lotovaivai.

O lea la, na ia toe faatulagaina ai foi se isi feiloaiga ma lana epikopo.

O iina na ia aoaoina ai le filifiliga lona lua: “Ioane,” sa faapea atu ai le epikopo ia te ia, “atonu o le a faigata ia te oe pe afai e te mafaufau e mafai ona e faaatoatoaina oe lava i se taimi se tasi. O le mea e tatau ona e aoaoina o le filifili lea o mea e ave i ai lau faamuamua. E tatau lava ona faamuamua ia mea e aupito sili ona taua.”

O le tele lava o tulaga, e faifai malie lava le alualu i luma—e tasi le laa i le taimi. Tatou te malamalama i lenei mea pe a tatou aoaoina se mea fai musika, avea ma se tagata taalo iloga, po o le aveina o se vaalele. Ae peitai, e masani ona seasea lava mafai ona tatou faamagaloina i tatou lava pe a tatou le maua le alualu i luma o loo tatou mafaufauina i vaega uma o o tatou lava olaga.

E faaaluina e tagata ta faatagata ma tagata tusiata maoae ia le tele o itula e faaatoatoaina ai a latou taleni. Latou te le uuina i luga se tofi po o se pulumu ma ni vali lanu eseese ma faamoemoe o le a lelei atoatoa i lena taimi. Latou te malamalama o le a tele ni mea sese o le a latou faia ao latou aoao, ae o le a latou amata mai i le amataga, o mea e aupito sili ona taua e muamua.

E faapena foi i tatou.

E avea i tatou ma matai tufuga o o tatou olaga i lea lava ala e tasi—e ala i le taulai atu muamua i mea e aupito sili ona taua. Ua tofu i tatou uma ma ni nai manatu lelei o filifiliga e aupito sili ona taua e tatau ona tatou faia—o filifiliga o le a faapea ona faaleleia atili ai o tatou olaga ma aumaia ai ia i tatou le olioli ma le filemu sili atu. O iina e tatau ona tatou amata ai. O iina e tatau ona tatou tuu i ai a tatou taumafaiga sili.

O po uma lava ae ou te lei moe, ou te aumaia ai se tamai kata ma tusi ai se lisi o mea e tatau ona ou faia i le aso e sosoo ai i le faasologa o lo latou taua.

Pe a ou taunuu atu i le ofisa i le taeao, ou te siakiina lau kata ma tuu uma i ai au taumafaiga i le vaega muamua o loo i le lisi. Pe a ou faataunuuina lena vaega, ona ou faasolo atu lea i le lona lua ma faasolosolo ai lava. O nisi aso, e mafai ona maea atoa ai lau lisi. Ae o isi aso, e i ai nisi galuega e le maea. Ae peitai, ou te le faanoanoa ai, aua o loo taulai atu lou malosi i mea e aupito sili ona taua.

Na amata ona malamalama Ioane e le mafai ona ia suia mea uma o loo sese i lona olaga i se taimi e tasi, ae e mafai ona ia filifilia ia mea e ave i ai lana faamuamua. E mafai ona ia taulai atu i mea e aupito sili ona taua, ma e i ai le taimi o le a amata ai ona alualu i luma lona olaga.

Faatasi ai ma le fesoasoani mai le peresitene o le korama a le au toeaina, na maua ai e Ioane se fale lelei e nofo ai. Sa ia iloa e tatau ona ia sailia se auala e tausia ai o ia lava, ma a o faasolosolo pea ona faaleleia atili lona soifua maloloina ma ona uiga, sa faapea ona ia maua se galuega le tumau.

O po uma lava ae lei alu Ioane e moe, na te faia ai se lisi o mea e aupito sili ona taua e tatau ona ia faataunuuina i le aso e sosoo ai.

Mulimuli ane, na maua e Ioane se totogi feololo. Sa mafai ona alu atu i se fale e sili atu ona lelei ma faatau se taavale. E ui lava ina sa ia maua ni faalogona sili atu ona lelei e uiga i lona olaga ma le mea ua agai atu i ai, ae sa ia lagonaina lava e i ai se mea o loo misi.

O le mea lea, na toe foi atu ai Ioane mo le taimi lona tolu e talanoa ma lana epikopo.

“O le mafuaaga o loo e lagonaina ai pea le leai o se aoga,” na saunoa atu ai le epikopo, “ona e te lei faia le filifiliga lona tolu.”

Na fesili atu Ioane po o le a lea filifiliga.

“E le lava le na o le faia o filifiliga ma ni faaiuga ma galue ai i ia mea i aso taitasi,” o le tala lea a le epikopo. “E toatele tagata ua faaaluina o latou olaga i galuega faamanuiaina ma ua ausia mea e tele. Ae o loo latou lagonaina lava le leai o se aoga. Ma o le faaiuga o o latou aso latou te tagiaue ai faapea ua itiiti se aoga o o latou olaga.”

O le lagona tonu lava lena sa maua e Ioane.

Sa faaauau ona faapea atu le epikopo, “E le lava le na o le faia o ni mea. E tatau ona tatou faia mea tonu—o mea ua finagalo lo tatou Tama Faalelagi ia tatou faia.”

“E faapefea ona ou iloa po o a ia mea tonu?” na fesili atu ai Ioane.

Na ataata le epikopo ma toese mai lana kesi se seti o tusitusiga paia. O le faavaa pa’u ua maosiosia ma maanuminumi. O pito lanu auro o laupepa ua toeitiiti leiloa atu. “E auala mai i tusitusiga paia ma saunoaga a perofeta o aso e gata ai,” o le tali lea a le epikopo. “O ‘mea tonu nei.’ E talitonu nisi tagata faapea o poloaiga a lo tatou Tama Faalelagi ua mamafa ma malolosi. O le mea moni lava, o ni tusitaulima i le fiafia. O tulaga uma lava o le talalelei a Iesu Keriso—o mataupu faavae, o mataupu autu, ma poloaiga—o se vaega o le fuafuaga a lo tatou Tama Faalelagi e fesoasoani ia i tatou ina ia tatou maua le filemu ma le fiafia.”

Na susue e le epikopo le Tusi a Mamona ma faitau ia upu a le Tupu o Peniamina: “Ia mafaufau … i le manuia ma le fiafia o i latou o e tausi i poloaiga a le Atua. Aua faauta, ua manuia i latou i mea uma, i le faaletino atoa ma le faaleagaga; afai foi ua latou tutumau e oo i le iuga, e talia i latou i le lagi, ina ia latou mau faatasi ma le Atua i le fiafia e le iu.”²

Ao saunoa le epikopo, sa mafaufau Ioane i lona lava olaga. O mea na ia maua e lei aumaia ai ia te ia le fiafia. Atonu o le mea o loo fai mai ai le epikopo e sao. Atonu o le fiafia e maua mai lea i le ola e tusa ai ma poloaiga a lo tatou Tama Faalelagi.

“Manatua foi afioga a le Faaola,” o le tala lea a le epikopo e foliga mai ua ia silafia le mea na mafaufau i ai Ioane: “ ‘Aua se a le aoga i le tagata, pe afai na te maua le lalolagi uma, ae maumau ai lona ola?’ ”³

O le po lava lena, na faia ai e Ioane se tautinoga o le a ia susueina le afioga a le Atua ma ia aoao ai mo ia lava ia poloaiga ma mataupu autu a lona Tama Faalelagi. Na te lei toe teenaina afioga a le Alii, ae sa ia taliaina ma teufatuina. A o faapea ona ia faia, na amata ona mou ese atu le leai o se aoga mai lona agaga, ma ia iloa ai le faasolosolo malie mai lava ona suitulaga ai le olioli ma le manuia e silisili lava i mea uma e manatu i ai.

O mea na tauina atu e le epikopo ia Ioane na suia moni ai lava lona olaga. Sa i ai se taimi na faalotovaivaiina ai o ia, faanoanoa, ma toetoe a maliu ai; ae o le taimi nei, ua ia lagonaina ua toe ola mai, malosi, ma faatumulia i le olioli.

Uso e ma tuafafine, ua tuuina mai e lo tatou Tama Faalelagi alofa ia i tatou tusitusiga paia ina ia aoao mai ia i tatou le ala i le filemu ma le fiafia. O le aso, ua i ai se isi mafuaaga sili e olioli ai, aua e fetalai mai Lona Alo ia i tatou uma!

E le nofonofo le Alii i Ona lagi, i le fifilemu ma punitia i tua o ni puipui mafiafia. I lalo o le taitaiga a lo tatou Tama Faalelagi, e tuuina mai ai e le Alii ia faatonuga i Ana auauna faauuina. O Peresitene Gordon B. Hinckley, o loo taitaia le galuega paia a le Alii i luga o le fogaeleele i le taimi nei.

E le gata i lea, o le Malamalama o Keriso e taitaiina atu ai tagata uma i lo tatou Tama Faalelagi ma Ana upumoni. E aoaoina ai i tatou ina ia alolofa atu i le Alii ma ia alolofa atu i o tatou uso a tagata, aua “ua foaiina mai le Agaga o Keriso i tagata uma lava, ina ia iloa ai e i latou le lelei ma le leaga.”⁴

E laitiiti lava so tatou ‘alofaga i le le filifiliaina o le ala a le Alii. Pe tou te manatu ea i le Aso o le Faamasinoga, e i ai sina popolega laitiiti lava se tasi o lo tatou Faaola i oa ua tatou maua po o le viiga ua tatou maua? E finagalo o Ia ina ia tatou o mai ia te Ia ma ia tatou faataitai ia te Ia, ma ia iloa le alofa mama o Keriso lea e oo mai e ala i le taliaina o Lana afioga ma usiusitai i Ana poloaiga.

O le auala lena e aveesea ai le lagona o le leai o se aoga mai o tatou olaga ma faatumuina ai o tatou agaga i le olioli e le mafaamatalaina.

Sei ou toe otootoina atu ia filifiliga e tolu tou te mafaufau i ai. E le masalomia le i ai o ni au lava filifiliga ua e mulimulitai i ai ma le faamanuiaina i lou olaga.

Muamua, ia filifili e amata le laasaga o le salamo i le taimi nei. Aua le faatuai. Auai i au sauniga ma auauna atu ma le fiafia i le Ekalesia. Ia aoao ma ola i mataupu faavae o le talalelei. Amata nei loa ona faasaunia outou lava e ulufale atu i le malumalu.

Lua, ia filifili e faamuamua mea e aupito sili ona taua. Ia faamuamua lava lou aiga. Ia faia ni afiafi faaleaiga e sili ona ‘anoa. Ia tutusa le taimi e te faaaluina faatasi ma lou aiga ma lo latou taua. Ia faapelepele ma tausi i tagata o lou aiga ma ia aua lava nei faatagaina lou pisi i au fuafuaga ma lou le fiafia e faia ai se tou va ma e pele ia te oe. Taumafai i aso taitasi ina ia sili atu ona usiusitai i poloaiga a le Alii.

Tolu, ia filifili le mea tonu. Suesue i tusitusiga paia ma saunoaga a lo tatou perofeta o aso nei, o Peresitene Gordon B. Hinckley. Ia faaaoga nei aoaoga paia i o outou olaga. Ia aapa atu ia i latou o e puapuagatia—o e ua tuua toatasi, o e mamai, ma e le tagolima. Ia fai le mea e te mafaia e tuumamaina ai lo latou mafatia ma fesoasoani atu ia i latou ina ia avea ma ni tagata e ola faalagolago ia i latou lava. Ao outou faia ia mea o le a matuai fiafia le Alii ia te outou.

Uso e ma tuafafine, ou te iloa o loo soifua lo tatou Tama Faalelagi ma Lona Alo Pele. Ou te molimau atu ia te outou o Iosefa Samita na soifua mai e faatuina le Ekalesia a le Alii i le tisipenisione o le atoaga o taimi. I le avea ai o se molimau faapitoa o Iesu Keriso, ou te iloa na tuuina mai e le Faaola Lona soifua mo i tatou. E ala mai i Lana Togiola, ua mafai ai e tagata uma ona salamo ma faamamaina mai agasala. E mafai ona tatou toe foi atu i lo tatou Tama Faalelagi ma iloa ai le taua o le taulaga e faavavau a le Faaola. Ou te molimau atu ai i nei mea i le suafa o Iesu Keriso, amene.