A Domo Lailai kei na Katakata ni Yalo

Ena 1995, au a sureti meu veikidavaki ka idola vosa ena dua na vuli ni dauvakadidike e Salt Lake ena iulutaga na kedra kakana na gone. Era lewe ciwasagavulu na dauvakadidike mai na 24 na vanua era a tiko rawa kina. Ena noqu vakadikevi ira tiko na vakarogoca tiko na noqu vosa, au a kurabui ena levu ni matanitu era matataki mai, oqori e kilai rawa mai na nodra isulusulu, roka ni yagodra, ivosavosa kei na so tale na ivakatakilakila.

Ni oti e tolu se va na vula tarava o ya au a tiko ena dua na koniferedi ni iteki ena baravi ni tokalau kei Amerika. Ena noqu dabe toka ena vanua ni sarasara ka waraka tiko na soqoni ni veiliutaki ni matabete, e a curu mai ki valenilotu e dua na turaga ni Aferika ka mai dabe toka ena bati ni salatu. Au a viavia kilai koya, ia au a sega ni taura rawa seu a sa raici koya oti mai vei. Au cuva yani ka taroga vei peresitedi ni iteki se o cei o koya. E a sauma mai o peresitedi ni iteki, “Oi, e sega ni lewe ni Lotu o koya. E parofesa lako vaka gade mai Aferika ka veivakavulici tiko ena dua na iunivesiti rogolevu mai kea. Ena vica na vula sa oti e a tiko ena dua na vuli ni dauvakadidike e Salt Lake Siti. E a tomika kina e dua na tikidua ni Lotu, ka wilika rawa kina na veika kece sara e rawata me baleta na Lotu. E sa dau lewena tiko na veisoqoni kece sara e rawa ni tiko kina ena gauna oqo. “Vakaveiwali, e a mai kaya na peresitedi ni iteki, “Au na kurabui ke sega ni dau tiko talega ena veisoqoni ni Soqosoqo ni Veivukei.”

Ni cava na soqoni ni veiliutaki ni matabete, au a vakaveikilaitaki au tale vua na parofesa ka veisiko tiko mai oqo. E a vakadeitaka na nona malaude ena ivurevure ni dina vou ka sa mai kunea. E a vakamacalataka ni ko iratou na nona matavuvale, ka ratou se tiko mai Aferika, eratou se tauri lesoni tiko mai vei rau na daukaulotu ka ratou sa na tomani koya mai e Amerika ena loma ni va na macawa mai oqo, ka gauna talega oqori eratou sa na papitaiso vata kece kina.

Ni mai tini na soqo ni matua ena bogi ni Vakarauwai, e a vakusakusa yani ki cake na turaga oqo, ka mai tukia tu yani na serena. Ena nona tukuna tu ena yalomarau. “E tavatukituki tu vakaoqo na utoqu ka sa dredre na kena tiko e lomaqu. Au sega ni kila seu na vosota rawa vakacava na va na macawa me keitou qai papitaiso kina.” Au a vakatura me taura vakamalua na malaude ni yalona ka waraki watina kei iratou na luvena, ka me rawa ni ratou qai papitiso vata kece vakadua.

Ni a drotaki bula voli mai vei Jesipeli na raluve ni Finisia o Ilaija, e a vakauti koya na Turaga ki na dua na delana cecere ka yaco kina vua e dua na ka vou. Ena nona tu o Ilaija e mata ni Turaga, “a sa dua na cagi levu ka kaukauwa … ia sa sega ena cagi ko Jiova: ia ni sa oti na cagi, sa qai tavuki na vanua, ia sa sega ena tavuki ni vanua ko Jiova; sa oti na tavuki ni vanua sa qai dua na buka waqa; ka sa segai ena buka waqa ko Jiova; ia sa oti na buka waqa, sa qai rogo mai e dua na domo lailai e vinaka” (1 Tui 19:11–12).

Au dau tarogi vakawasoma mai vei ira era sega ni lewe ni noda vakabauta se cava na vu ni tubu totolo ni noda Lotu, vei rau ruarua, na iwiliwili ni lewena kei na itavi qaravi, ena gauna vata oqori erau sa toro sobu tiko na ka e rua oqo ena veisoqosoqo lotu tale e so. Na isau ni taro oqori e rawarawa sara, na domo lailai e vinaka kei na yalo ka dau katakata. Ena vuravura osooso, leqaleqa, ka kosakosa oqo, e sega ni vaka e dua na cagi, sega ni vaka na buka waqa, sega ni vaka na uneune, ia sai koya e dua na domo lailai e vinaka, ka kilai matata sara ka dau vakavuna na katakata ni yalo. Sai koya e dua na katakata lo ki na yalo ni sai koya oqo na kosipeli vakalesui mai i Jisu Karisito, vata kei na kena ivunau taucoko sara, matabete, kei na veiyalayalati era a yali ena vuqa na itabagauna ni butobuto kei na veilecayaki. Io, sai koya e dua na domo lailai e vinaka kei na dua na yalo katakata ka vakadinadinataka na veivakurabuitaki ni veivakalesui mai.

Sai koya na domo lailai kei na katakata ni yalo ka dau vakayavalati ira na milioni na lewenilotu me ra vakatotomuri Jisu ena vosa, ivalavala, kei na veiqaravi. Sa ikoya na domo lailai kei na katakata ni yalo ka vakayavalati ira e udolu na veiwatini qase me ra kaulotu ena loma ni 18 ka vakacaca na vula se vakabalavutaki tale. Era biuta vakatikitiki na bula logaloga vinaka me ra qaravi ira yani na tani e vuravura ena nodra iyau ga vakataki ira ka ra na kaya beka e so me solibula vakaiyanaqa, ka vakawasoma me ra dau veiqaravi tu e veivanua yawa e veiyasai vuravura, ka dau balolo tu ga ni vakanananu na sisili ena wai katakata kei na idavodavo levu ka dakoba vinaka.

Sai koya na domo lailai kei na katakata ni yalo ka vakavuna vei ira na drau na udolu na cauravou kei na goneyalewa me ra biuta na veinakinaki ni bula vivinaka, biuta vakawawa tu mada na nodra vuli (so na gauna e biu vakadua na qito kei na so na sikolasivi), se tu vakawawa ni veidomoni, me ra veiqaravi mada vua na Turaga—kei na veika kece oqo ena nodra iyau vakataki ira—me ra kacivaka kina na vakalesui mai ni kosipeli. Sa ikoya na domo lailai kei na katakata ni yalo ka vakavuna vei ira na noda itabagone na veivakauqeti me tutaki na savasava, dina, kei na ivakavuvuli, dina ga ni dau vakavuna ena so na gauna na vakasewasewani kei na vakanadakui. Sa ikoya na domo lailai kei na katakata ni yalo ka dau vakayavalata e dua me muria na ivunau ka colata na nodra icolacola o ira era vakaleqai tu. Ia, sa tu na kaukauwa ena domo lailai kei na katakata ni yalo.

E taroga tu o Alama na ituvaki vakayalo ni lomada. E taroga kina, “Ko dou sa sucu li vakayalo vua na Kalou?” Oti oya, “ Sa vakararamataki kemudou tiko ga na i serau ni matana? Sa uqeti li kina na yalomudou mo dou veivutuni? (Alama 5:14 vakaikuritaki ena matanivola kala). Se dua tale na kena itukutukuni, e katakata tiko li e yalomu na nomu ivakadinadina me baleti Jisu Karisito?

Meu tukuna mada vei kemuni e tolu na ka e dau vakavuna na katakata ni yaloqu? iMatai, e dau katakata na yaloqu ena kila ka ni sa noqu iVakabula o Jisu Karisito ka sa rui titobu na nona lomani au ka vakavuna na nona vosota na mosi tawa cavuti rawa ka yacova sara na mate. E katakata na yaloqu niu vakila ena noqu dau vakanananutaka vakatitobu, ni sa rawa vei au meu vakasavasavataki, vakataucokotaki, ka vueti ena dra i Jisu Karisito. E katakata na yaloqu ena noqu vakasamataka na kena isau—na veivakararawataki e a yaco vua meu vagalalataki mai na noqu vakararawataki ena vuku ni noqu ivalavala ca kei na cala.

iKarua, e dau katakata na yaloqu ena kila me baleta na nona a gole yani ki na dua na veikau e dua na gonetagane yabaki 14 walega, ka vakakina ni mai na dua na masu malumalumu ka rawarawa e a tadola kina o lomalagi, ka rau rairai mai kina na Kalou kei Karisito, ka ra siro sobu mai na agilosi. Ka vakakina na kena vakalesui mai na taucoko ni kosipeli i Jisu Karisito kei na kena matabete, veiyalayalati, kei na taucoko ni ivakavuvuli. E katakata na yaloqu niu nanuma na veika e a vosota rawa na cauravou parofita oqo me rawa kina ni vakalesui mai na taucoko ni kosipeli. Ena gauna vata era siro sobu tiko mai kina na agilosi mai lagi, era cakacaka tale tikoga kina na agilosi nei Setani. E a vakatekivu na veibeitaki ka me vakataki ira na veiparofita ni gauna makawa e a tini ena mate na bula nei Josefa. Ena loma taucoko ni nona vakatovolei kei na beitaki, e a tudei ka nuidei tu ga na parofita gone oqo.

Ena vuku ni Parofita o Josefa Simici, sa yaco meu kila na titobu ni Veisorovaki nei Karisito. Ena vuku ni Parofita o Josefa, sa yaco meu kila vinaka na bibi ni Were mai Kecisimani—a vanua ni mosi vakaitamera ka colata kina o Karisito na noda dui rarawa yadua sega walega ena vuku ni noda ivalavala ca, ia me baleta talega na noda mosi, malumalumu, leqa, kei na vakacalaka yadudua. Au a kila na dina kei na tawamudu kei na iotioti ni Nona solibula cecere. Au yaco kina meu kila vakavinaka cake na loloma e a vakaraitaka na noda iVakabula ena Nona iotioti ni tavi ni veivueti. Ena vuku i Josefa Simici, sa yaco me vakalevutaki na noqu lomana ka vakavinavinakataka na iVakabula, ka sa vakaibalebale na noqu sokalou. Ena kedra maliwa na veisere ka vola o W. W. Phelps ena noda ivola ni sere e koto kina na sere rogolevu ka vakaoqo na qaqana “Laveti koya sa veitokani kei Jiova” (“Praise to the Man,” Hymns, no. 27). E dau katakata na yaloqu niu lagata na sere o ya.

Io, baleta ni da dau lagata ena qoroqoro kei na marau, “Praise to the man who communed with Jehovah,” eda lagata na qaqa ni sere oqo me baleta na iVakabula “Sa taleitaki tu nona lomani au ka qai mate kina! Sa taleitaki tu, talei tu vei au!” (“Loloma i Jisu.” Serenilotu, naba 22) ena levu ni vakarokoroko, na yalo e luvuci kei na vakavinavinaka cecekia. E katakata na yaloqu baleta na veivakararamataki e kauta mai na Parofita o Josefa ena noqu bula vakaiau me baleta na kena revurevu vei keda yadua na Veisorovaki ni noqu iVakabula.

iKatolu, e dau katakata na yaloqu niu dau vulica ka vakanananutaka na veivolanikalou tabu ena i Vola i Momani, ni tokona tiko na iVola Tabu ka tomana tiko na nona vakadinadinataki vakalou o Jisu Karisito me Luve ni Kalou na Dauveivueti ka iVakabula kei vuravura. Ena vuku ni itokani vakalou oqo na iVola Tabu, sa yaco me vakarabailevutaki na noqu kila na ivakavuvuli nei Karisito, sa yaco meu kila na vei isau ni taro ka ra sega ni sauma rawa vei au na iVola Tabu. Na i Vola i Momani e ivakadinadina matata ni nona sa parofita dina ni Kalou o Josefa, ni a rairai dina vua o Karisito, ka vakakina na kosipeli ni sa vakalesui mai na kena makare kei na taucoko.

E katakata na yaloqu niu vakasamataka vakatitobu na cakamana ni bula tiko na iVola i Momani—na cakacaka kaukauwa ni kena ceuti rawa ena peleti metali, na veisenijiuri ni kena maroroi vinaka tu mai vei ira na digitaki ni Kalou, kei na cakacaka mana ni kena vakadewataki. Sa ganiti koya dina na yaca, vunau vakalou. Baleta ni lomani keda sara vakalevu na Kalou, e a vakarautaka kina o Koya na ivakadinadina oqo vei keda, me rawa kina ni da walia, e rawa me da wilika, e rawa me da vulica ka rawa talega me da bolea. Ia, e bibi duadua na nona lomani au na Kalou ka rawa kina me solia vei au kei ira kece era vakasaqara ena yalodina e dua na ivakadinadina yadudua me baleta na dina ni i Vola i Momani—na ivakadinadina matata ni Vakalesui mai ka vakakina ni sa parofita dina o Josefa Simici.

Ena kena tukuni tiko na kila ka tabu oqo, e tukuna kina vakaoqo na parofita o Alama:

“Dou sa nanuma li niu sa sega ni kila na veika oqo? Raica au sa kaya vei kemudou, au sa kila ni sa dina na veika au sa tukuna. Ia dou sa kila li na vuna au kaya kina ni sa dina?

Raica au sa kaya vei kemudou; sa vakatakila vei au na Yalo Tabu ni Kalou. Au a lolo ka masu e na vica na siga, me vakatakilai kina vei au na veika oqo. Ia au sa kila ni sa ka dina, ni sa vakatakila vei au na Turaga na Kalou e na kaukauwa ni nona Yalo Tabu; ia na Yalo ni parofita oqo sa tiko vei au,” cava na cavuqaqa (Alama 5:45–46).

Me vakataki Alama ni gauna makawa, o ikeda vakayadua, na lewenilotu ka vakakina o ira na dauvakatataro yalodina, sa rawa me da kila deivaki ni sa dina na veika oqo. E sa dua na isolisoli uasivi vei keda na noda kila. E uasivi cake sara mai ena dua na isolisoli; sai koya ni noda itavi me da kila. E sa na yali vei keda e dua na ka vakaitamera keda sega ni kila na gauna e soli kina vei keda e dua na isolisoli vaka ko ya. Sa kaya na Turaga, “dou tukituki, ka na dolavi vei kemudou” (Maciu 7:7). Na parofita ni i Vola i Momani o Jekope e a kaya, “Lako mai ena yalomudou taucoko” (Jekope 6:5). Sa sega kina ni dodonu me da vakararavi ki na noda vuku se vakilakila vakayago, Eda vuli, eda masu, ka me vakataki Alama ni gauna eliu, sa rawa talega me da lolo, ka qai lako mai na domo lailai vinaka kei na katakata ni yaloda. Vakasamataka mada na ivakadinadina yadudua, ni sa dina na veika oqo. Na kena vakasama sara mada ga e katakata kina na yaloqu. Ena yaca i Jisu Karisito, emeni.