Qarauna na iNaki Ca e Koto Mai na Daku ni Matadredredre

Ena bogi nikua au na vosa tiko vei kemuni na cauravou, vei kemuni ka a vakamacalataka o Peresitedi Gordon B Hinckley ni o ni “itabatamata uasivi duadua.”¹ E laurai e vuravura raraba na kemuni vinaka. Au masuta mo ni vakila ni sa baleti kemuni yadua na noqu vosa, o kemuni na luve ni Kalou, o ni cakacaka vakukauwa mo ni rawata na veika e dodonu.

Au vinakata meu tukuna vei kemuni na veika a sotava e dua na yalododonu yalodina ka noqu itokani vinaka. Au na cavuta tikoga me o “noqu itau” na vuna ko ni sa kila tiko.

Ni cakacaka tiko vakayamata vuni ena FBI, a vakadikeva tiko o noqu itau eso na isoqosoqo ni basu lawa ka ra vakacuruma tiko yani ki Amerika na waigaga ni veivakamatenitaki vakatabui.

Ena dua na gauna, erau a curuma kina o koya kei na dua tale na yamata vuni e dua na vale ka kilasamitaki ni veisoliyaki tiko mai kina na kokeni. E vakamacalataka kina o noqu itau na veika a yaco:

“Keirau tukia na katuba nei koya na dau volitaki waigaga. A dolava mai na katuba o koya ka kilakasamitaki tiko, ni raici keirau a qai tovolea me latia na neirau rai. Ia sa bera keirau sa raica na kokeni ena dela ni nona teveli.

“E dua na tagane kei na dua na yalewa ka rau a dabe tiko ena teveli sa tekivu me rau vunia na kokeni. E dodonu me keirau tarovi rau me rau kakua ni vakacacana na ivakadinadina, au a biligi koya na dauvolitaki waigaga vakatotolo ni vakalatia tu na katuba. Niu biligi koya a sota na yaloka ni matai keirau. E matalia ni sega ni vaka me cudru se rere. A matadredre tu mai vei au.

“Na matana dredredre au nanuma kina ni na sega ni cakava vei au e dua na ka au biuti koya ga kau goleva yani na teveli. Sa tu mai dakuqu ena gauna oqo o koya na dauvolitaki waigaga. Ena gauna vata oqori, sa votu mai kina vei au, ena veivakauqeti kaukauwa: ‘Qarauna na inaki ca e koto mai na daku ni matadredredre.’

“Ena gauna vata oqori au sa gole tale yani kina vua na dauvolitaki waigaga. Sa tu na ligana ena loma ni nona taga e liu. Ena gauna vata oqori au qai raica kina na dakaileka ni sa vakarau tu me vana. A tarava mai eso na veiqaliqali kau mani kauta laivi rawa na nona iyaragi na tamata o ya.”²

E muri ena dua tale na kisi, a mani vesu kina na dauvolitaki waigaga ena laba ka qai sakitaka kina ni a rawa me vakamatei noqu itau talega kevaka me a sega ni gole lesu totolo yani.

Au dau vakasamataka vakalevu na ivakasala ka yaco mai ki na nona vakasama: “Qarauna na inaki ca ka koto mai na daku ni matadredredre.” Oqori na veika au via vosa kina vei kemuni nikua.

Me tekivu ena veika eda kila. Na veika vinaka e vu mai vua na Kalou; na veika ca mai vua na tevoro.³ Ia era sega ni tautauvata na kaukauwa ka ra veivaluvaluti tiko e vuravura. Ena ulu ni veika vinaka kece sai Karisito—O Koya na Le Duabau ga nei Tamana, o koya ka a bulia na noda vuravura kei na vuqa tale. Na noda Dauveisereki e ka bula ka sa vakaturi cake tale mai na mate.⁴ Au kila ni bula tiko.

Na tevoro, ena yasana kadua, “sa dau vakauqeta na tamata me cakava na ca.”⁵ “Ni sa lutu mai lomalagi ka sa rarawa me tawamudu,”⁶ ia oqo “sa segata ko koya me ra rarawa na tamata kecega me vakataki koya.”⁷ O koya na daulasulasu ka na dau druka tu ga.⁸

Na kaukauwa ni iVakabula kei na kaukauwa ni tevoro ena sega dina ni rawa ni vakatauvatani.⁹ Ena vuravura oqo, sa vakatarai ki na vu ni ca me veivakauqeti me rawa kina vei keda ni da qai digidigi ena vinaka kei na ca. E kaya vakaoqo na ivolanikalou: “A sa solia na Turaga na Kalou vua na tamata me lewa na ka me kitaka … [Ia] kevaka e sega … [ena sega] ni rawa me lewa na ka me kitaka.”¹⁰

Na digidigi ena vinaka kei na ca e uto sara ga ni veika eda mai sotava e vuravura. Ena iotioti ni gauna ena dikevi lesu kina na noda bula, ena sega dina ni dua na ka kevaka eda a vutuniyau se da dravudravua, kevaka eda a dauqito se sega, kevaka era a tu o ira na noda itokani se eda a dau guilecavi vakawasoma.

E rawa ni da cakacaka, vuli, dredre ka veilasamaki, danisi, lagasere ka marautaka e vuqa na ka. Na veika oqo e tiki talei ni bula, ia era sega ni vu ni noda mai tiko eke.¹¹ Na veigauna vinaka me da na digidigi kina ena vinaka kei na ca sai koya na vu ni noda mai tiko eke.¹²

E sega ni dua vei keda ena rawa ni kaya, “Au vinakata meu digitaka na ca.” Eda vinakata kece me da digitaka na veika dodonu. Ia na digitaki ni vinaka mai na ca e sega ni dau rawarawa, ba leta na ca e dau vuni koto mai na daku ni matadredredre. Rogoca na ivakasala ni qaqarauni oqo:

“Oi kemudou na wekaqu lomani, dou qarauna mo dou kakua ni nanuma ni sa vu mai vua na Kalou na veika ca.”¹³

“Mo dou dau vakatawa ka masu, me kakua ni rawai kemudou na vere; raica sa vinakata ko Setani me tauvuloni kemudou.”¹⁴

“Sa segata talega ko Setani me rawai kemudou; io me lewai kemudou sara.”¹⁵

Na itukutuku sai koya: Qarauna na inaki ca e koto mai na daku ni matadredredre!

Au kilai ira e vica na cauravou era a tekivu ena nodra inakinaki kece sara me ra tudei ena nodra yalodina vua na iVakabula, ia era tarabe baleta ni ra a sega ni raica na inaki ca ka koto mai na daku ni matadredredre, ka sega beka ni vakarerevaki na kena irairai. Era raica ga na lasa, na marau, na veiciqomi, ia era sega ni raica na veika tale e so.

Ena rawa vakacava ni da raica na inaki ca ka koto mai na daku ni dua na ka e sega ni vakarerevaki na kena irairai?

O ni sa kila tu na kena isau, ia oqo eso na vakasama:

Taumada: vosa vei ira na nomuni itubutubu. Vakaevei na vakasama o ya, e veisaqasaqa beka na kena rorogo kei na nomuni nanuma? Keimami kila tu na tama ni keimami se yawakalia sara mai na taucoko, ia keimami lomani kemuni, sa neimami gagadre titobu vata kei ira na tinamuni mo ni dau digia na veika dodonu.

Tarava, muria na parofita. O iratou na 15 na turaga oqo eda tokona me ra parofita, daurairai ka dauvakatakila sa soli vei ira na kaukauwa vakalou me ra raica na veika eda sega ni dau raica ena so na gauna. Sa matata sara ka bibi na ivakasala e solia vei keda o Peresitedi Hinckley me baleta “na inaki e koto mai na daku ni matadredredre.¹⁶ Sa koto na veidusimaki vakauqeti ena ivolalailai, Me iSakisaki ni iTabagone.¹⁷ Ni o vakayagataka na ivakasala nei Peresitedi Hinckley, sa yalataka tu na Turaga ni na “vakamalumalumutaka na kaukauwa ni tevoro.”¹⁸ Ena rawa ni o raica na inaki ca e koto mai na daku ni matadredredre ka na lako tani vei iko na kena revurevu.

E dua na ka bibi sara, vakatara me dusimaki iko na Yalo Tabu. Sa yalataka vei keda na Turaga ni gauna eda sa buladodonu kina, ena rogo mai ki na noda vakasama kei na yaloda na domo lailai ka rogo malua.¹⁹ O ni sa vakila oti na veivakauqeti oqo. O ni kila na domo oqo.²⁰

Na isolisoli ni Yalo Tabu e isolisoli vakayalo. E dau kidakida sara ka na sega ni veimaliwai rawa kei na veika tawakilikili. Ena sega ni rawa ni o vakacudruya se tabonaka laivi nikua me na qai tiko tale vata kei iko ni mataka. Ia ni o rogoca na kena veivakauqeti ka buladodonu tikoga, ena tubu me kaukauwa cake e lomamu. Na Yalo Tabu a vakasalataki noqu itau ena ka rerevaki vakayago, ena vakasalataki iko talega na Yalo Tabu ena veika rerevaki vakayalo.

Kena iotioti ga, rawata e dua na nomu ivakadinadina me baleta na iVakabula. Masu vagumatua. Wilika na iVola i Momani ni sega e raici iko. Dau tiko duadua ka vakasamataka se o cei sara mada o Jisu ka bibi vakacava vei iko na Nona bula kei na solibula.

Nanuma na nona ivakaraitaki na cauravou o Josefa Simici. Ena nona dau waqaca na kadrala ena bogi me wilika na iVola Tabu, baleta ni vinakata me vakayacora vakakina. Ena gauna e lako kina ki na veikau me masu a lako duadua.²¹

Ni da vakalevutaka cake na noda kila ka lomana na iVakabula, ena cilava na veika kece e vakavolivoliti keda na Nona rarama. Eda na qai dau raica na veika ca ena kena irairai dina.²²

Au kila ni o Jisu Karisito na noda iVakabula. Ena sega ni vakamacalataki rawa ena vosa na Nona cecere kei na lagilagi, na Nona vakaturaga kei na kena vakasakiti. A rairai mai vata kei Tamana vua na Parofita o Josefa Simici. O Peresitedi Gordon B. Hinckley na parofita ni Kalou nikua. Kemuni na veitacini e tu vei keda na Nona Matabete Tabu. Ni da bula kilikili tikoga, eda na vakalougatataki me da raica na inaki ca e koto mai na daku ni matadredredre. Au vakadinadinataka ena yacai Jisu Karisito, emeni.