iTinitini ni Vosa

Kemuni na taciqu kei na ganequ lomani, eda sa mai vakacavara edua na koniferedi totoka. E a tiko vata kei keda na Yalotabu ni Turaga. E vuqa na dina eda sa mai vakavulici kina. E a mai vakaukauwataki na noda ivakadinadina, e mai vakabulabulataki na noda vakabauta.

Mai na caka mana, sa dua na caka mana, ena tekinoloji ni gauna oqo na veika kece sara e vakayacori oqo era sa kaburaki yani e vuravura raraba. E rawa me ra vakaitavi vata kei keda e ciwasagavulu ka lima na pasede na lewe ni Lotu e vuravura taucoko.

E sa dua na gauna me vakavoutaki kina na noda vakabauta cecere ni dina tawamudu ka lakovi keda mai vua na Parofita o Josefa Simici. Eda sa bau kalougata sara ga. Sa dua na ka totoka ni sa mai tu oqo vei keda na kila ka ni veika e dina ka cecere.

Ia au gadreva meu tukuna mada me vaka au a sa tukuna oti, na noda lewe ni Lotu, vata kei na ivotavota ni veivakalougatataki kece sara ka lako mai vei ira na noda lewe ni Lotu, e sega ni dodonu me vakavuna na vakadonui koya ga, na yalokaukauwa, na beci ira na tani. O ira taucoko na tamata era noda itokani. Na kena tarogi se cava na ivunau cecere duadua ni lawa e kaya kina na Turaga, “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kece ga … [ka] Mo lomana na kai nomu me vaka ko lomani iko” (Maciu 22:37, 39).

Veitalia ga na roka ni kuli ni yagoda,na ibulibuli ni matada, kei na noda ivosavosa, eda luveni Kalou taucoko ga ka dodonu me da veivuke ena loloma kei na veikauwaitaki vei ira na tamata kece ga.

Evei ga na vanua eda vakaitikotiko kina e rawa me da veitokani vata kei ira era tiko maliwai keda. O ira na luveda e rawa me ra veimaliwai vata kei ira na gone era sega ni lewe ni Lotu oqo ka ra tudei tu kevaka era tuberi vakavinaka. E rawa sara mada ga me ra yaco me ra daukaulotu kivei ira na nodra ilawalawa.

Keimami vakavinavinakataki kemuni na itabagone o ni veivorati tiko kei na ivalavalaca ni vuravura, ka biuta tani na ivalavalaca ni vuravura ka bulataka na bula e vinakata na Turaga. Keimami vakacabo masu e veigauna baleti ira na nodra itubutubu me ra na bula kilikili ena veigauna taucoko.

Keimami taleva lesu tale na veika e sa tukuni oti, lako wasoma ki na valetabu. E sega tale ni dua na gaunisala e vinaka cake me maroroya na maucokona ni bula me vaka na lako ki na valetabu. Ena vakamalumalumutaka na ivalavalaca ni iyaloyalo vakasisila, vakacaca ni wainimate gaga, kei na gole tani vakayalo. Ena vaqaqacotaka na bula ni vakawati kei na matavuvale.

Me vaka e dua na Lotu eda sa vulica me da cakacaka vata kei ira e so ena veivakacegui ena rarawa kei na mosi ka ra vakaleqai tu ena icolacola bibi. Na noda sasaga ni veivakacegui vakatamata e sa vakalougatataka sara ga na nodra bula e udolu vakaudolu na tamata ka ra sega ni lewe ni noda vakabauta vakalotu. Ena vakacaca vakadomobula ni sunami, kei na vakacaca ka vakavuna na veisaqasaqa, tauvimate, kei na waloloi, eda sa vakayacora e dua na cakacaka uasivi ka vakasakiti ena veivuke vei ira na tani ka sega ni leqataki se o cei ena vakacerecerei kina.

Ena vula o Feperueri ni yabaki oqo, na peresitedi ni Kauveilatai Damudamu e Amerika e a solia ki na Lotu na icocovi na “Circle of Humanitarians,” sa ikoya na icocovi cecere duadua e dau solia na Kauveilatai Damudamu e Amerika me baleta na veiqaravi ni veivakacegui vakatamata. E a soli oqo ena vakavinavinaka me baleta na ilavo ka a soli me ra cula kina e udolu vakaudolu na gonelalai me baleta na misila.

Na Rotary International e a vakavinavinakataka wale ga oqo na Lotu ena isolisoli vakailvo me baleta na kena vaqeavutaki kina vakadua na polio ena ikatolu ni vanua e vuravura ka se tiko voli ga kina na mate oqo.

Sa levu sara na kedra iwiliwili na tamata era sa vakabulai rawa mai na levu ni mosi kei na rarawa ka ra sotava tu mai ena nodra bula taucoko.

E a rawa me vakayacori na veika oqori mai na ivurevure ka lako mai ena lomasoli mai vei ira na noda itokani, era a dodoliga yani me veivuke vei ira era vakaleqai tu.

Sa dina sara ni sa vakalougatataki keda tiko na Turaga, ka sa dodonu meda dodoliga yani ka vukei ira na Nona tamata era vakaloloma tu ena vanua cava ga era vakaitikotiko kina.

Me vaka ni da sa vakarau lesu ki na noda veivale, au sa kaciva na veivakalougatataki mai lomalagi me nomuni. Mo ni yalodina ki na ivakaro ni Turaga o Koya ena dolava na katuba mai lomalagi ka sovaraka vei kemudou na ka ni veivakalougatataki. Me nomuni na noqu veivakalougatataki kei na noqu iloloma. Au sa laiva vei kemuni na noqu ivakadinadina ni bula tiko na Kalou na Tamada tawamudu, ka o Koya e voleka sara ka bula tiko nikuia, ni o Koya e Tamada, ka dau rogoca ka sauma na masu Au solia vei kemuni na noqu ivakadinadina ni o Jisu na Karisito na Dauveivueti kei vuravura na yaca walega e rukui lomalagi ka da rawa ni vakabulai kina, kau sa laiva vei kemuni na noqu ivakadinadina kei na noqu sa vakadinadinataka ni Kalou kei na Turaga o Jisu era vosa sara ga e matanavotu vua na gonetagane lailai o Josefa ka dolava na ilati me sa curu mai na itekitekivu ni iotioti ni veitabagauna.

Kemuni na taciqu kei na ganequ me vakalougatataki kemuni na Kalou. Sa noqu masu me nomuni na vakacegu edai kei na veigauna kece sara ena yaca i Jisu Karisito, emeni.