E Faaalia Lava i Ou Foliga

E le’i i ai lava se isi taimi sili atu e ola ai i lenei fogaeleele nai lo lenei. O aso nei “e le tatau ona faagaloina.”¹ O outou aso, ma e maoae tele. E maoae tele outou! A o ou vaavaai atu i o outou mata ma vaaia o outou foliga susulu, ou te maofa lava i lo outou lelei tele, malolosi, ma le mama a’ia’i i se lalolagi ua matua tumu i lu’itau. Ou te manatuaina ai se solo, sa masani lo’u tamamatua ona fai mai ia te a’u, a o o’u pei o outou. Fai mai o ia:

E lei galo lava ia te au lena solo faigofie, ma sa ou taumafai e le aunoa e ola i se ala o le a faaalia ai i o’u foliga. Ua mafai ona ou vaai atu, o loo faapena foi ona outou faia. Ua vaaia le malamalama i o outou mata, aua ua outou osia ma tausia feagaiga ma lo outou Tama Faalelagi ma Lona Alo, o Iesu Keriso, ma ua outou faia ni filifiliga tou te agavaa ai mo le mafutaga ma le Agaga Paia. Ou te matuai talisapaia outou taitoatasi.

Na saunoa Peresitene Hinckley e faatatau ia te outou, “O outou … o le augatupulaga aupito lelei [ma le malolosi] o tupulaga talavou ua i ai i le talafaasolopito o lenei Ekalesia.”³ Ou te talitonu sa saunia ma faapolopoloina outou ina ia outou o mai i le lalolagi i lenei taimi ua maoae ai luitau ma avanoa. Ou te talitonu o loo faamoemoe mai le Alii ia te outou e avea ma taitai o le amiotonu ma ia tutu atu e avea ma molimau “i taimi uma, i mea uma, ma nofoaga uma.”⁴ E moni lava, e mafai ona ta’ua outou o le “faamoemoega susulu”⁵ mo le lumanai.

Ou te talitonu ua faitaulia ai outou i e na ta’ua e le Aposetolo o Peteru ina ua ia fai mai, “O outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou ta’uta’u atu ona lelei na ia valaau ia te outou nai le pouliuli e oo i lona lava malamalama e matua ofo ai.”⁶

O le malamalama o le malamalama lava o le Faaola. O le malamalama o le talalelei toefuataiina a Iesu Keriso. O le ituaiga olaga e te ola ai i le talalelei, e atagia mai ai Lona malamalama. O lau faataitaiga o le a i ai se aafiaga mamana mo le lelei o le lalolagi. “Ina tutula’i ia ma susulu atu, ina ia faia lo outou malamalama ma tagavai mo atunuu”⁷ o se valaau lea mo outou taitoatasi. O se valaau ia agai atu i nofoaga maualuluga. O se valaau ia avea ma ta’ita’i—e taitai faatamalii, mama a’ia’i, tausaafia, ma le paia. O se valaau e faasoa atu lenei malamalama i isi. Ua oo mai le taimi e “tutula’i ai ma susulu atu.”

Pe mafai e se tamaitai talavou amiotonu ona suia le lalolagi? O le tali o se “ioe!” telē. Ua ia te oe le Agaga Paia e fai ma ou taiala, ma o le a Ia “faaali atu … ia te outou mea uma … e tatau ona [outou] faia.”⁸ O mea masani e te faia i aso taitasi o le a faamalosia ai oe e avea ma se taitai ma se faataitaiga—o tatalo i aso taitasi, suesue i tusitusiga paia i aso taitasi, usiusita’i i aso taitasi, ma le auauna atu i isi i aso taitasi. A e faia nei mea, o le a e latalata atili atu i le Faaola, ma avea atili ai e faapei o Ia. E faapei foi o Mose ma Apinati ma isi taitai faamaoni,⁹ o le a susulu ou foliga i le afi mumu o lou faatuatua. “Po ua outou maua ea lona foliga i o outou mata?”¹⁰ “Tula’i ia ma susulu atu.”

I le 1856, i le 13 o ona tausaga, sa auai Mary ma lona aiga i le Ekalesia i Egelani, ma sa latou malaga mai i Amerika, ma auai i le aumalaga o taavaletosolima a Matini. I lona talafaasolopito, sa ia faamatalaina ai le faigata o le malaga—o le maliu o lona tuagane pepe ma lona tuagane matua, o le malo o ona vae i le aisa, ma faaiu ai i le maliliu o si ona uso laitiiti ma lona tina. Ina ua taunuu o ia i le Vanu o Sate Leki, sa tipiese e le fomai ona tamatamaivae, peitai sa folafola atu ia te ia e le perofeta, o Polika Iaga, o le a le toe tipieseina se isi vaega o lona vae. Sa ia tusia: “I se tasi aso sa ou nofo ai … ma tagi. Ua ou tigaina i o’u vae—ae tu’itu’i mai loa se olomatua faatinoiti i le faitotoa. Fai mai a ia, sa ia lagona e i ai se tasi o loo manaomia o ia mo ni nai aso… . Sa ou faaali atu ia te ia o’u vae… . Sa ia fai mai, ‘Ioe, o le fesoasoani mai o le Alii o le a laveaiina ai.’ Sa ia faia se fusi e faasusu i se vaimafanafana ma tuu i lo’u vae, ma o aso uma lava pe a alu ese le fomai, e sau ai ma sui le fusi. Ina ua atoa le tolu masina, sa lelei o’u vae.”¹¹

Peitai, o le umi tele ona nofo o Mary i lona nofoa, ua malo ai uaua o ona vae ma ua le mafai ai ona toe faasasa’o. Ina ua vaai atu lona tama i le tulaga ua i ai [Mary], sa tagi o ia. Sa mili e ia ona vae i le suauu ma taumafai e tau faasa’osa’o, ae sa le aoga. I se tasi aso sa fai atu ai lona tama, “Mary ua ou mafaufau i se fuafuaga e fesoasoani ai ia te oe. O le a ou tu’itu’ia se fata i luga o le puipui, ma a ou alu e faigaluega, ona e taumafai lea e aapa i ai.” Fai mai lana tala, sa taumafai o ia i le aso atoa mo le tele o aso, ma sa i’u ina au o ia i le fata. Ona tago lea o lona tama toe tuutuu le fata i luga. Sa atoa le isi tolu masina o fai pea lenei faiga, ma o lona maelega na toe sasa’o ai ona vae ma toe aoao ai e savali.¹²

Ou te talitonu o loo outou aoao e pei foi o Mary Goble, ia papa’i atu i luga teisi i le fata ua tuu i luga e o tatou taitai mo i tatou, ma afai tou te au i luga atu pe a sii i luga na tagavai, o le a mafai ona outou savavali atu ma le mautinoa i le lumanai.

E susulu foliga o tamaitai talavou i Aferika i Sisifo, i le malamalama susulu o le Agaga Paia. Latou te ola i tulaga o loo ta’ua i le tamaitusi o le Mo Le Malosi o le Autalavou, o loo taialaina i latou e le Agaga, ma o loo sauniuni i latou e avea ma taitai. Latou te alolofa i le Alii ma ua latou faafetai mo Lona malamalama i o latou olaga. O nisi o nei tamaitai talavou sa savavali mai mo le tolu itula, ina ia faasoa mai a latou molimau ia te au. Ua suia a’u ona o i latou.

A o ou i ai i Amerika i Saute, sa usuina e tamaitai talavou ma o latou taitai le pese, “O Loo Ou Taumafai e Avea e Pei o Iesu.”¹³ E le gata ina latou usuina upu, ae sa tino mai le uiga. I Asia ma Initia, o tamaitai talavou o faataitaiga o le faatuatua, e fai lelei laei, ma le mama a’ia’i. E susulu o latou mata, ma e fiafia foi. O tamaitai talavou i Egelani, Aialani, ma Uelese, ua latou tutu atu mo le upumoni ma le amiotonu i a latou a’oga. Ua latou faia se suiga, i se lalolagi ua faapogisaina. O nisi o outou, ua na o outou o outou aiga po o a’oga e lolotu. Ua outou faia se suiga. Ua outou taulamua i auala amiotonu.

E lei mamao atu, sa matou sopo ai ma se vaega o talavou i le tumutumu o Ensign Peak. O iina sa matou tilotilo ifo ai i le aai o Sate Leki ma le malumalu, ma matou talatalanoa ai i osigataulaga sa faia e le toatele mo le talalelei. Ona lialia’i lea e talavou taitasi se fu’a. O luga o a latou fu’a sa latou tusia ai faailoga o la latou savali i le lalolagi—o mea latou te mananao e tutu atu ai mo nei aso e gata ai. O se tulaga faagaeetia le faalogo atu i tautinoga ma molimau a i latou taitoatasi. Ona matou lagiina lea o le “I Luga o Mauga”¹⁴ ona alalaga faatasi ai lea o le autalavou: “Hurrah mo Isaraelu!”¹⁵ Ou te toe faia foi na upu i le aso. Hurrah mo outou! Ou te faamoemoe o le a outou le faatuatuai lava e “faapupula atu lo outou malamalama … ina ia [iloa e isi] la outou amio lelei, ma latou vivii atu ai i lo outou Tama o i le lagi.”¹⁶ Ou te faamoemoe foi, o le a sisi faamaualuga a’e a outou fu’a. Ou te iloa, a outou taitai i le amiotonu, o le a faataunuuina le mau lenei o loo i le Isaia: “Aua faauta, … o le a afio ae Ieova i ou luga, ma le pupula o Ieova e aliali mai i ou luga.”¹⁷ O le a iloatino ai, “e oo mai foi Nuu Ese i lou malamalama, o tupu foi e o mai i latou i le pupula o lou alu ae.”¹⁸

Ua mafai ona ou vaai atu i se aso o le a vaavaai atu ai le lalolagi ia te outou ma faapea atu: “O ai outou? O ai nei tamaitai talavou ua susulu mai ai lenei malamalama? Ua outou soona fiafia ea i se a? Aisea ua outou iloa ai le itu tou te agai i ai i se lalolagi ua matua faanunununu naua?” Ma o le a outou tutula’i a’e i o outou vae ma faapea atu ma le talitonuga maumaututu: “O i matou o afafine o lo matou Tama Faalelagi, e alofa ia i matou, ma e matou te alolofa foi ia te ia. O le a matou ‘laulaututu e fai ma molimau a le Atua i aso uma, ma mea uma, atoa ma nuu uma.’”¹⁹

O la’u valaau ia te outou, e tutusa lelei lava ma le valaau a Moronae: “Ala mai ia, ina tulai ia … , o oe na le tama fafine a Siona.”²⁰ Na vaai o ia ia te oe. Na vaai o ia i le aso lenei. O o outou taimi nei! O oe lava e faia le tonu o le a e “tulai ma susulu atu.” Ou te talitonu afai e te ala ma tula’i mai, o le a avea lou malamalama ma tagavai i atunuu, ae ou te talitonu foi o le a avea a outou tagavai ma se malamalama i atunuu. Ua vaetofia outou. Sa iloga lava outou i le mua’i olaga. O lou gafa o loo i ai se feagaiga ma ni folafolaga. Ua ia te oe uiga taua faaleagaga o le au faatuatua—o Aperaamo, Isaako, ma Iakopo. Ua atagia mai i lou lava natura lou tofi paia ma lou taunuuga. O lou fanau mai o se teine, e le o se mea na faafuaveta. O le a faalauteleina ou uiga paia a o e taitaiina isi ma e tulai mai i ou gafatia paia. Ia e faalatalata atu i le Faaola. O loo soifua o Ia! O Ia o le malamalama, o le ola ma le faamoemoe o le lalolagi. O le a Ia taitai oe ma avatu ia te oe le lototele e faasoa atu ai lou malamalama. E pei ona sa aoaoina ai a’u e lo’u tamamatua, “A e ola latalata i le Atua ma Lona alofa tunoa e le i’u, e te le tau ta’uina atu, [aua] o le a faaalia lava i ou foliga.”²¹ I le suafa o Iesu Keriso, amene.