Ina ia Tatou Maua Pea Lona Agaga e Faatasi ma i Tatou

Ina ua papatisoina i tatou taitoatasi, sa tatou ulu atu i se feagaiga paia ma lo tatou Tama Faalelagi. O se feagaiga o se maliega lea i le va o le Atua ma Lana fanau i luga o le fogaeleele, ma e taua le malamalama e fuafuaina e le Atua ia tuutuuga o feagaiga uma o le talalelei. E le faia e oe ma a’u se tonu o le natura po o elemene o se feagaiga. Ae, tatou te taliaina tuutuuga ma tulaga manaomia o se feagaiga e pei ona faia ai e lo tatou Tama Faavavau [tagai Bible Dictionary: “Covenant,” p. 651].

O le sauniga faaola o le papatisoga e tatau lava ona faia e se tasi ua i ai le pule tonu mai le Atua. O tuutuuga faavae nei o le feagaiga na tatou ulu atu i ai i le vai o le papatisoga: sa tatou molimau ua tatou naunau e tauave i o tatou luga le suafa o Iesu Keriso, o le a tatou manatua pea o Ia, ma o le a tatou tausia Ana poloaiga. O le faamanuiaga folafolaina mo le faamamaluina o lenei feagaiga o le a tatou maua pea Lona agaga e faatasi ma i tatou (tagai MFF 20:77). I se isi faaupuga, o le papatisoga i le vai e taitai atu ai i le avanoa aloa’ia mo le mafutaga faifai pea ma le sui lona tolu o le Aigaatua.

Ina ua maea o tatou papatisoga, sa tofu i tatou ma lima sa faaee i luga o o tatou ulu o i latou ua i ai le pule o le perisitua ma sa faamauina ai i tatou o ni tagata O Le Ekalesia a Iesu Keriso o le Au Paia o Aso e Gata Ai, ma sa faaee mai ai le Agaga Paia i o tatou luga (tagai MFF 49:14). O le faaupuga “talia le Agaga Paia” i lo tatou faamauga, o se poloaiga ia taumafai mo le papatisoga a le Agaga.

Sa aoao mai e le Perofeta o Iosefa Samita: “E sili ai lou papatisoina o se taga oneone e pei o se tagata, pe afai e le faia mo le faamagaloga o agasala ma le mauaina o le Agaga Paia. O le papatisoga i le vai ua na o se afa papatisoga, ma e leai sona aoga pe a leai le isi afa—o lona uiga, o le papatisoga a le Agaga Paia” (History of the Church, 5:499). Sa papatisoina i tatou e ala i le faatofuina i le vai mo le faamagaloga o agasala. E tatau foi ona papatiso i tatou ma faatofu i le Agaga o le Alii, “ona oo mai ai lea o le faamagaloina o a outou agasala i le afi ma le Agaga Paia” (2 Nifae 31:17).

A o tatou mauaina le malamalama i le Agaga Paia, tatou te aoaoina ai o le malosi tatou te lagonaina ai le faatosinaga a le Agaga, e le tutusa i taimi uma. E le faalausosoo ona oo mai ia te i tatou ni uunaiga malolosi, ma le uiga ese. Tusa lava pe tatou te taumafai e faamaoni ma usiusitai, e i ai taimi e le iloagofie ai i o tatou olaga le taitaiga, faamautinoaga ma le filemu o le Agaga. E moni, o loo faamatala mai i le Tusi a Mamona ia tagata faamaoni o sa Lamana sa “papatisoina i latou i le afi ma le Agaga, a ua latou le iloa” (3 Nifae 9:20).

O loo faamatala mai i tusitusiga paia le uunaiga a le Agaga Paia “o se leo filemu ma le itiiti” (1 Tupu 19:12; tagai foi i le 3 Nifae 11:3) ma se “leo itiiti ma le malie lava ia” (Helamana 5:30). O lea, e masani ona fesootai mai le Agaga o le Alii ia i tatou i auala filemu, faaeteetegata, ma le malu.

I a tatou suesuega patino ma aoaoga i potuaoga, tatou te faamamafaina lava e le aunoa le taua o le iloa o musumusuga ma uunaiga tatou te maua mai le Agaga o le Alii. Ma ua sa’o ma aoga lena auala. E ao ona tatou saili ma le filiga ina ia tatou iloa ma tali atu i uunaiga pe a oo mai ia i tatou. Peitai, e i ai se itu taua o le papatisoga a le Agaga atonu e tele ina le amana’iaina i lo tatou atina’ega faaleagaga.

E tatau foi ona tatou taumafai ia iloatino le taimi tatou te “o ese ai [i tatou lava] mai le Agaga o le Alii, ina ua le maua e ia se mea e nofo ai ia i [tatou] e taitai ai [tatou] i le ala o le poto ina ia faamanuiaina i [tatou], ma faauluolaina, ma faatumauina” (Mosaea 2:36). E patino lava talu ai o le faamanuiaga folafolaina o le ia tatou maua pea Lona Agaga e faatasi ma i tatou, e tatau ona tatou gauai atu ma aoao mai filifiliga ma ta’a’iga ia e tuueseeseina ai i tatou mai le Agaga Paia.

E manino lava le tulaga faatonuina. Afai o se mea tatou te mafaufau i ai, vaai i ai, faalogoina, pe faia foi e faataumamao ai i tatou mai le Agaga Paia, o lona uiga ua tatau loa lava ona taofia loa le mafaufau i ai, vaai i ai, faalogologo i ai, po o le faia o lena mea. Mo se faataitaiga, afai o le mea o loo faamoemoe e faafiafia ai, e tavavae ese mai ai i tatou mai le Agaga Paia, ua manino mai ai o na ituaiga o faafiafiaga e le mo i tatou. Talu ai e le mafai ona mafuta le Agaga ma mea faatufanua, o mea paaa, pe le tausaafia foi, o lona uiga e manino lava e le mo i tatou foi na mea. Aua tatou te tuleiesea ai le Agaga o le Alii pe a tatou auai i gaoioiga ua tatou iloa e tatau ona tatou lafoa’ia, o lona uiga e le mo i tatou na ituaiga o mea.

Ou te iloa o i tatou o alii ma tamaitai pauu o loo ola i se lalolagi faitino, ma atonu tatou te le mafuta ma le Agaga Paia i sekone taitasi o minute taitasi o itula taitasi. Peitai, e mafai ona tele sa tatou mafutaga ma le Agaga Paia, a leai o le tele o taimi—ma e moni lava e mafai ona tele atu le mafuta mai o le Agaga nai lo le tatou mafuta atu i ai. A o tatou saga faalofiaina i tatou i le Agaga o le Alii, e tatau ona tatou taumafai ia iloa uunaiga pe a oo mai, ma ta’a’iga po o mea e afua ai ona tatou aveeseina mai i tatou lava mai le Agaga Paia.

O le avea “o le Agaga Paia ma o [tatou] taiala” (MFF 45:57) e mafai ma e taua mo lo tatou tuputupu ae faaleagaga ma lo tatou ola ai i se lalolagi ua faateleina le amioleaga. O nisi taimi i le avea ai ma Au Paia o Aso e Gata Ai, tatou te talanoa ma fai amioga e peiseai, o le iloaina o le faatosinaga a le Agaga Paia i o tatou olaga, o se mea e fou ma e le masani ai. Ae peitai, e ao ina tatou manatua, o le folafolaga o le feagaiga e faapea ia tatou maua pea Lona agaga e faatasi ma i tatou. O lenei faamanuiaga maoae, e faatatau lea i tagata taitoatasi uma o le Ekalesia ua papatiso, faamauina, ma poloaiina ina ia “talia le Agaga Paia.”

I o tatou taimi, o le Tusi a Mamona o le punavai muamua lea e tatau ona tatou liliu atu i ai mo se fesoasoani e aoao ai le auala e valaaulia ai le mafutaga faifai pea ma le Agaga Paia. O le faamatalaina o le Liahona e le Tusi a Mamona, o le faatonu po o le tapasa sa faaaogaina e Liae ma lona aiga i la latou malaga i le vao, ma sa patino lava lona aofia ai i tusitusiga, o se malamalama ma se ata lafoia mo o tatou aso, ma o se lesona taua o mea e tatau ona tatou faia ina ia olioli ai i faamanuiaga o le Agaga Paia.

A o tatou taumafai ina ia ogatasi o tatou uiga faaalia ma faatinoga ma le amiotonu, ona avea lea o le Agaga Paia mo i tatou i aso nei e faapei ona faia e le Liahona mo Liae ma lona aiga i o latou taimi. O mea tonu lava na mafai ai ona galue le Liahona mo Liae o le a faapena foi ona valaaulia ai le Agaga Paia i o tatou olaga. O mea tonu foi na le mafai ai ona galue le Liahona i ona po anamua, o le a faapena foi ona tatou aveesea ai i tatou lava mai le Agaga Paia i ona po nei.

A o tatou suesue ma mafaufau loloto i faamoemoega o le Liahona ma mataupu faavae o loo faagaoioia ai, ou te molimau atu o le a tatou mauaina musumusuga e tatau ai ma o tatou tulaga taitoatasi ma aiga ma mea e manaomia. E mafai ma o le a faamanuiaina i tatou i le taitaiga faifai pea mai le Agaga Paia.

Sa saunia le Liahona e le Alii ma tuuina atu ia Liae ma lona aiga ina ua latou tuua Ierusalema ma a o latou faimalaga i le vao (tagai Alema 37:38 ma le MFF 17:1). Sa faasino atu lenei tapasa po o le faasinoala ia le itu e tatau ona agai atu i ai Liae ma lana aumalaga (tagai 1 Nifae 16:10), ma o “se ala sa’o i le nuu na folafolaina” (Alema 37:44). O vae i totonu o le Liahona sa gaoioi “e tusa ma le faatuatua ma le filiga ma le usiusitai” (1 Nifae 16:28) o le au malaga ma sa le mafai foi ona toe gaoioi pe a tauaimisa, le migao, paie, pe lotogalo foi tagata o le aiga (tagai 1 Nifae 18:12, 21; Alema 37:41, 43).

Sa tuuina mai foi i le tapasa auala sa mafai ai e Liae ma lona aiga ona maua le “malamalama e uiga i ala o le Atua” (1 Nifae 16:29). O le mea lea, o uluai faamoemoega autu o le Liahona o le saunia lea o le faasinoala ma faatonuga i se malaga umi ma le faigata. O le faasinoala o se meafaigaluega faaletino, e fai ma taiala vaaia o lo latou tulaga faaleagaga i luma o le Atua. E galue e tusa ai ma mataupu faavae o le faatuatua ma le filiga.

E faapei foi ona faamanuiaina Liae i ona po anamua, e faapena foi ona tofu i tatou i nei ona po ma se tapasa faaleagaga lena e mafai ai ona taitaiina ma faatonutonu i tatou i la tatou malaga i le olaga nei. Sa faaeeina mai le Agaga Paia i luga o oe ma a, ina ua tatou o ese mai le lalolagi ma ulu atu i le Ekalesia a le Faaola e ala i le papatisoga ma le faamauga. O le pule o le perisitua paia, sa faamauina ai i tatou e avea ma tagata o le Ekalesia, ma sa apoapoaiina ai i tatou ina ia saili atu mo le mafutaga faifaipea a le “Agaga o le upumoni; e le mafai e le lalolagi ona talia o ia, aua, ua le vaaia o ia, ua le iloa foi o ia: a o outou ua outou iloa o ia; aua e tumau pea o ia ia te outou, e i ai foi o ia i totonu ia te outou” (Ioane 14:17).

A o taitasi i tatou ma fetaomi atu i luma i le ala o le ola, tatou te maua le taitaiga mai le Agaga Paia e faapei foi ona taitaiina Liae e ala i le Liahona. “Aua faauta, ou te toe fai atu ia te outou, afai tou te ui atu i le ala ma talia le Agaga Paia, na te faaali ia te outou mea uma e tatau ona outou faia” (2 Nifae 32:5).

E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai.

“Ia teuteuina ou manatu i le mama e le aunoa; ona malosi ai lea o lou faatuatua fai ifo i luma o le Atua… .

“E avea le Agaga Paia ma au aumea tumau, a o lou tootoo ma tootoo le feliuliuai o le amiotonu ma le upumoni” (MFF 121:45–46).

Ma, o “nai mea iti foi ma le faatauvaa” (Alema 37:6), e saunia ai e le Agaga Paia mo i tatou auala e mafai ai ona tatou maua le malamalama faateleina e uiga i ala o le Alii: “Peitai o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma ua ou fai atu ai ia te outou” (Ioane 14:26).

E mafai ona avea le Agaga o le Alii ma o tatou taiala ma o le a faamanuiaina i tatou i le faasinoala, faatonuga, ma le puipuiga faaleagaga i la tatou malaga i le olaga nei. Tatou te valaaulia le Agaga Paia i o tatou olaga e ala i tatalo ’anoa a le tagata lava ia ma le aiga, taumamafa i afioga a Keriso, filiga ma le usitai atoatoa, faamaoni ma le faamamaluina o feagaiga, ma le amioatua, lotomaulalo, ma le auaunaga. Ma e tatau ona tatou mausali i le aloese mai mea e le mama, o mea paaa, o mea faatufanua, agasala, pe faatiapolo ia e mafua ai ona tatou aveeseina mai i tatou lava mai le Agaga Paia.

Tatou te valaaulia foi le mafutaga faifaipea ma le Agaga Paia a o tatou taumamafa ma le agavaa i le faamanatuga i aso Sapati taitasi: “Ina ia e tausi atili ai ia te oe lava ia mama nai le lalolagi, ia e ulu atu i le fale tatalo ma avatu ai au faamanatuga i lo’u aso paia” (MFF 59:9).

O le sauniga o le faamanatuga tatou te faafou ai a tatou feagaiga o le papatisoga ma mafai ai ona maua ma faatumauina le faamagaloga o a tatou agasala (tagai Mosaea 4:12, 26). E le gata i lea, ua faamanatu mai foi ia i tatou i vaiaso taitasi, le folafolaga ia tatou maua pea Lona agaga e faatasi ma i tatou. A o tatou taumafai la e tausia i tatou lava ia mama ma ia le pisia mai le lalolagi, ona avea ai lea o i tatou ma ipu tauaogaina e mafai ona mafuta ai le Agaga o le Alii e le aunoa.

Ia Fepuari o le 1847 na faaali atu ai le Perofeta o Iosefa Samita ia Polika Iaga i se miti po o se faaaliga. Sa fesili Peresitene Iaga i le Perofeta pe i ai sana savali mo le Usoga. Sa tali atu le Perofeta o Iosefa: “Ta’u atu i tagata ina ia lotomaulalo ma faatuatua, ma ia mautinoa ia tausia le agaga o le Alii ma o le a ia taitai sa’o i latou. Ia faaeteete ma aua lava nei liliu ese mai le leo itiiti ma le filemu; o le a aoaoina ai i latou i le mea e fai, ma pe o fea foi e o i ai; o le a aumaia ai fua o le malo” (tagai i Teachings of Presidents of the Church: Brigham Young [1997], 41; faamamafa faaopoopo). E ui i upumoni uma lava atonu sa aoao atu e le Perofeta o Iosefa ia Polika Iaga i lena faaaliga paia, sa ia faamamafaina le taua o le mauaina ma le tausisia o le agaga o le Alii.

O’u uso e ma tuafafine pele, ou te molimau atu i le moni o le soifua ai o le Atua le Tama Faavavau ma Lona Alo, o Iesu Keriso, ma le Agaga Paia. Ia tatou taufai ola ina ia maua pea Lona agaga e faatasi ma i tatou, ma agavaa ai mo faamanuiaga o le faasinoala, faatonuga, ma le puipuiga ia e taua mo nei aso e gata ai. I le suafa paia o Iesu Keriso, amene.