O Lo Tatou Faalagolagomaga Tele o le Perisitua Paia

I nai tausaga ua mavae atu, ina ua latalata ona atoa le sefululua tausaga o lo ma atalii laitiiti o Clark, a o ma sauni e tuua le Fale o Ofisa o Taitai o le Ekalesia, ae susu mai loa le susuga a Peresitene Harold B. Lee ma faafeiloai i ma’ua. Sa ou ta’uina atu ia Peresitene Lee e faapea o Clark e le o toe umi ae atoa lona 12, o le taimi lava lena na faliu atu ai loa Peresitene Lee ma fesili atu, “O le a le mea e tupu ia te oe pe a atoa lou 12?”

O se tasi lena o taimi e tatalo ai se tama ina ia musuia le atalii e tuuina atu se tali sa’o. Sa tali atu Clark e aunoa ma le tau faatali ia Peresitene Lee, “O le a faauuina au e avea ma se tiakono!”

O le tali lea sa ou tatalo i ai ma sa sailia foi e Peresitene Lee. Ona ia fautuaina lea o lo ma atalii, “Ia manatua, o se faamanuiaga maoae le umia o le perisitua.”

Ou te faamoemoe ma lo’u loto atoa ma lo’u agaga atoa o alii talavou uma e mauaina lena perisitua o le a faamamaluina lena perisitua ma ia faamaoni i le faatuatuaga ua tuuina atu i ai ina ua faaee atu i ai. Ia mafai e i tatou uma taitoatasi o e ua umia le perisitua a le Atua ona iloa le mea ua talitonu i ai. E pei ona apoapoai mai le Aposetolo o Peteru, ia mafai ona tatou saunia pea e “tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou.”¹ O le a i ai taimi i o tatou olaga taitasi o le a valaauina ai i tatou e faamatala pe puipuia o tatou talitonuga. A oo mai le taimi e faatinoina ai, ua mavae atu foi taimi o sauniuniga.

O le toatele o outou alii talavou o le a maua le avanoa e faasoa atu ai a outou molimau pe a outou auauna atu o ni faifeautalai i le lalolagi atoa. Ia saunia nei mo lena avanoa matagofie.

Ua i ai ni o’u aafiaga i le tele o avanoa. O se tasi o ia avanoa na tupu i le 21 tausaga talu ai, a o lei oo i le taimi na faasaolotoina ai le Malo Temokarasi o Siamani—po o Siamani i Sasae, e pei ona sa lauiloa tele ai—mai pulega faaKomunisi. Sa ma talanoa ma le Failautusi a le Setete o Siamani i Sasae, o Minisita Gysi. O le taimi lena o loo fausia lo tatou malumalu i Freiberg, i Siamani i Sasae, faatasi ai ma isi falelotu pe lua pe tolu. Sa tele ni mataupu sa ma talanoa ai ma Minisita Gysi, e aofia ai la tatou polokalama o le fauina o fale i le lalolagi atoa. Sa ia fesili mai, “Aisea ua maumea tele ai le tou lotu, ua mafai ai ona outou fausiaina ia fale i lo matou atunuu ma le lalolagi atoa? E faapefea ona maua a outou tupe?”

Sa ou tali atu i ai faapea e le maumea le Ekalesia ae o loo tatou mulimuli i le mataupu faavae faatusi paia anamua o le sefuluai, o le mataupu faavae lea o loo toe faamamafaina i a tatou tusitusiga paia o ona po nei. Sa ou faamalamalamaina atu foi i ai faapea o la tatou ekalesia e leai ni faifeau e totogiina, ma sa faailoa atu foi i ai o mafuaaga nei e lua ua mafai ai ona tatou fausiaina ia fale o loo i ai, e aofia ai le malumalu matagofie o Freiberg.

Sa sili ona faagaeetia ia Minisita Gysi i le faamatalaga sa ou tuuina atu, ma sa ou faafetai i le mafai ona ou taliina ana fesili.

O le avanoa e faailoa atu ai se upumoni e mafai ona oo mai i se taimi tatou te le o faamoemoe e oo mai ai. Ia tatou saunia.

I se tasi taimi, sa fesiligia ai Peresitene Tavita O. MaKei e se tagata e le auai i le Ekalesia po o a talitonuga patino o loo ese ai ia aoaoga o le Ekalesia mai aoaoga a isi faatuatuaga. Ina ua saunoa i le vaega lenei i se taimi mulimuli ane, na faailoa atu ai e Peresitene MaKei, sa ia lagona lava le faagaeetia e tali atu: “O le mea e tulagaese ai talitonuga o la’u ekalesia mai talitonuga o isi lotu, o le pule faalelagi lea e ala mai i faaaliga tuusao.”²

O fea e mafai ona tatou mauaina ai se faataitaiga sili ona ofoofogia o lena pule faalelagi e ala mai i faaaliga tuusao nai lo mea na tutupu i lena “taeao o se aso matagofie ma le manino, i le amataga o le tau totogo ae o laau i le tausaga e afe valuselau luafulu,” ina ua alu atu Iosefa Samita i le togavao e tatalo. O ana upu na faamatalaina ai lena taimi i le talafaasolopito e matuai mamana lava: “Sa ou vaaia ni Tagata se toalua, e le mafaamatalaina lo la’ua mamalu ma lo la’ua pupula, o tutu mai i o’u luga a’e i le ea. Sa fetalai mai le tasi o i laua ia te au, ma sa ia ta’u lou igoa ma fetalai mai a o tusi ane lona aao i le tasi—O Lo’u Atalii Pele Lenei. Faalogo ia te Ia!”³

E liliu atu o tatou mafaufau i le asiasiga a lena avefeau mai le lagi, o Ioane le Papatiso, i le aso 15 Me, 1829. O iina i luga o auvai o le Vaitafe o le Susquehanna, e lata i Harmony, Pennsylvania, na faaee ai e Ioane ona lima i luga o Iosefa Samita ma Oliva Kaotui ma faauuina i la’ua, i le faapea atu: “I luga o oulua o’u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu, ma le talalelei o le salamo, ma le papatisoga i le faatofuina mo le faamagaloina o agasala.”⁴ Na folafola atu e le avefeau faapea o loo ia galue i lalo o le taitaiga a Peteru, Iakopo, ma Ioane, o e o loo umia ia ki o le Perisitua Mekisateko. Na sosoo mai ai ma le faauuga ma le papatisoga. O le isi lenei faataitaiga o le pule faalelagi e ala i faaaliga tuusao.

I se taimi mulimuli ane, na auina mai ai Peteru, Iakopo, ma Ioane e tuu mai faamanuiaga o le Perisitua Mekisateko. O nei Aposetolo na auina mai e le Alii e faauu ma faamauina Iosefa ma Oliva e avea ma Aposetolo ma ni molimau faapitoa i Lona suafa. O le pule faalelagi e ala i faaaliga tuusao e uiga ese ai lenei asiasiga paia.

O se taunuuga o nei aafiaga, ua tauaveina ai e i tatou uma le tulaga e moomia—o le avanoa faamanuiaina ma le tiute paia—ina ia faamaoni i le faatuatuaga ua tatou mauaina.

Na folafola mai e Peresitene Polika Iaga, “O le Perisitua o le Alo o le Atua o … le tulafono lea ua mafua ai ona i ai lalolagi, sa i ai, ma o le a faaauau pea ona i ai e faavavau, faavavau lava.”⁵ Na faalauteleina e Peresitene Iosefa F. Samita lenei autu, ma fautua mai, “E le o se mea e tele atu pe itiiti ifo foi nai lo le mana o le Atua ua faasafuaina mai i le tagata lea e mafai ai e le tagata ona galue i le lalolagi mo le faaolataga o le aiga tagata, i le suafa o le Tama ma le Alo ma le Agaga Paia, ma galue ai faatulafonoina, ae le o le faafoligaina o lena pule; e le nonoina mai augatupulaga ua maliliu pe ua mavae atu, ae o le pule na tuuina mai i lenei taimi o loo tatou ola ai, e agelu avefeau ma agaga mai luga, e tuusao lava mai le afioaga o le Atua Silisiliese.”⁶

Ina ua lata ona atoa lo’u 18 ma ua saunia e ulufale atu i le tautua faamiliteli i le Taua II o le Lalolagi, sa fautuaina atu ai au ina ia mauaina le Perisitua Mekisateko. O la’u matafaioi la e fai o le telefoni atu lea o Peresitene Paul C. Child, o la’u peresitene o le siteki, mo se faatalanoaga. O ia o se tagata e fiafia ma malamalama tele i tusitusiga paia, ma o lona faamoemoega le tatau i tagata uma ona faapena le fiafia ma le malamalama i ai. Sa ou iloa mai isi ana faatalanoaga e auiliili ma sailiili, sa faapea ai le ma talanoaga i luga o le telefoni:

“Talofa, Peresitene Child. O Uso Monson lenei. Ua fautuaina au e le epikopo ina ia feiloai ma lau susuga ina ia faauuina au e avea ma se toeaina.”

“Lelei, Uso Monson. O afea e mafai ona ta feiloai ai?”

I le iloaina lea o lana sauniga faamanatuga o le 4:00 ma le iloaina lea o le utiuti o lo’u malamalama i tusitusiga paia i lana matau, sa ou fai atu ai, “Ae a le 3:00?”

O lana tali: “Oi, Uso Monson, e le lava ai la se taimi e suesue ai tusitusiga paia. E mafai la ona e sau i le 2:00 ma aumai lau lava seti o tusitusiga paia ua makaina lelei?”

Ua oo i le Aso Sa, ma ua ou taunuu i le fale o Peresitene Child. Sa faafeiloai mai au, ona amata lea o le faatalanoaga. Sa ia saunoa mai, “Uso Monson, o loo e umia le Perisitua Arona.” Ioe, ua ou iloa lena mea. Sa ia faaauau, “Pe na i ai se agelu na auauna mai ia te oe?”

O la’u tali, “Ou te le mautinoa.”

“Ae e te iloa,” sa ia saunoa mai ai, “e i ai lau aia i mea faapena?”

Na alu atu la’u tali: “Leai.”

Ona ia aoaoina lea o au, “Uso e Monson, tauloto mai le vaega e 13 o le Mataupu Faavae ma Feagaiga.”

Sa ou amata, “I luga o oulua o’u uso a auauna e, i le suafa o le Mesia ou te tuuina atu ai le Perisitua o Arona, o loo i ai ki o asiasiga ma galuega a agelu …”

“Taofi,” sa faatonu mai ai e Peresitene Child. Ona ia fautua mai lea i se leo malu e faapea, “Uso Monson, ia aua lava ne’i galo o le avea ma se tasi e umia le Perisitua Arona ua e aia foi i asiasiga a agelu. Ia faaauau le fuaitau.”

Sa ou taulotoina le vaega na totoe o le mataupu. Sa saunoa mai Peresitene Child, “Manaia.” Ona ma talanoaina lea o nisi vaega o le Mataupu Faavae ma Feagaiga e faatatau i le perisitua. O se faatalanoaga umi, ae o le a le galo lava ia te au. I le faaiuga, na tuu mai ai lima o Peresitene Child i luga o o’u tauau ma faapea mai, “Ua e saunia nei e mauaina le Perisitua Mekisateko. Ia manatua e faamanuia e le Alii le tagata e auauna atu ia te Ia”.

I le tele o tausaga mulimuli ane, a o avea ia Paul C. Child ma sui o le Komiti Uelefea a le Perisitua, sa ma auai faatasi atu ai i se konafesi faalesiteki. I le sauniga taitai o le perisitua, ina ua oo i lona taimi e saunoa ai, sa ia uuina ana tusitusiga paia i lona lima ma savaliese mai luga o le tulaga i le mea o loo i ai le aofia. I le iloaina o Peresitene Child e pei ona ou iloaina, sa ou malamalama ai i lana mea o le a fai. Ma sa ia sii mai ni fuaitau mai le Mataupu Faavae ma Feagaiga e aofia ai le vaega e 18 e faatatau i le taua o se agaga, o loo faailoa mai ai le tatau ona tatou galulue i aso uma o lo tatou ola ina ia aumaia se agaga i le Alii. Ona ia faliu atu ai lea i se tasi o peresitene o le korama a toeaina ma fesili atu, “O le a le taua o se agaga.”

Sa tetemu le peresitene o le korama a o tau mafaufau lana tali. Sa fai sa’u tatalo i lo’u loto ina ia mafai ona ia taliina le fesili. Sa iu ina ua ia tali atu, “O le taua o se agaga o lona tulaga gafatia lea e avea ai o se Atua.”

Sa tapuni e Uso Child ana tusitusiga paia, ma savali atu ma le filemu ma toe foi i luga o le tulaga. Ina ua ia pasia au, sa ia faapea mai, “O se tali ina a loloto.”

E moomia ona tatou iloa le tautoga ma le feagaiga o le perisitua, aua e faatatau ia i tatou uma lava. O i latou ua umia le Perisitua Mekisateko, o se folafolaga o le manaomia ona tatou faamaoni ma usiusitai i tulafono a le Atua ma ia faalautele ia valaauga e oo mai ia i tatou. Ia i latou o e umia le Perisitua Arona, o se folafolaga e faatatau i tiute ma matafaioi i le lumanai, ina ia mafai ona latou saunia i ai i latou lava iinei ma le taimi nei.

O lenei tautoga ma le feagaiga ua faatuina e le Alii i upu nei:

“Aua ai se faamaoni i le maua o nei perisitua e lua ua ou tautala atu ai, ma le faalauteleina o lo latou valaaulia, ua faapaiaina e le Agaga i le faafouina o o latou tino.

“E avea i latou ma atalii o Mose ma Arona ma fanau a Aperaamo ma le ekalesia, atoa ma le malo, ma le au filifilia a le Atua.

“O lenei foi, o i latou uma o e maua lenei perisitua, ua talia a’u, ua faapea mai ai le Alii;

“Aua o le talia a’u auauna, ua talia a’u.

“O le foi na te talia a’u ua talia lo’u Tama;

“O le foi na te talia lo’u Tama ua talia le malo o lo’u Tama; o lea o le a tuuina atu ai ia te ia mea uma o i ai i lo’u Tama.”⁷

Na matauina e Elder Delbert L. Stapley ua maliu o le Korama a le Toasefululua i se tasi taimi: “E lua tulaga manaomia autu o lenei tautoga ma le feagaiga. Muamua o le faamaoni, o lona uiga o le usiusitai i tulafono a le Atua ma fautuaina mai ai le tausia faamaoni o faatulagaga uma o le talalelei… .

“O le tulaga manaomia lona lua … o le faalauteleina lea o le valaauga o se tasi. O le faalauteleina o le faamamaluina lea, ia faaeaina ma viia ma mafua ai ona faatuina i se tulaga maualuga o le faaaloalogia po o le faatauaina. E faauigaina foi o le faateleina o le faatauaina, ia faateleina po o le faasili atu.”⁸

Na fesiligia le Perofeta o Iosefa Samita i se tasi taimi, “Uso e Iosefa, e te talosaga soo mai ina ia matou faalauteleina o matou valaauga. O le a le uiga o lenei mea?” Na tali atu i ai, “Ina ia faalauteleina se valaauga, e ao ona faamamaluina ma faatauaina, ina ia mafai ona suluia atu le malamalama o le lagi i mea e faia e se tasi i le vaai atu i ai a isi tagata. E faalauteleina e se toeaina lona valaauga pe a iloa e ia ona tiute i le avea ma toeaina ma faia e ia na tiute.”

O i latou o e umia le Perisitua Arona e tatau ona tuuina atu i ai le avanoa e faalautele ai o latou valaauga i lena perisitua.

I se tasi Aso Sa i le lua tausaga talu ai sa ou auai atu ai i le sauniga faamanatuga i la’u uarota. E le o se mea e tupu soo. E toatolu ositaulaga sa i le laulau faamanatuga, faatasi ai ma le alii talavou sa i le ogatotonu e foliga mai e le atoatoa le malosi i lana gaoioi aemaise lava i le tautala. Sa ia taumafai faalua e faamanuia le areto ae sa matuai tau feto’i i taimi taitasi, e le masalomia le maasiasi i lona le mafaia ona tuuina atu atoatoa o le tatalo. Ona suitulaga ai lea o se tasi o ositaulaga ma tuuina atu le faamanuiaga i le areto.

I le taimi na tufa ai le areto, sa ou faapea ifo ia te au lava, “E le mafai ona ou tuuina atu le aafiaga o lena alii talavou ia faatoilaloina i le laulau faamanatuga.” Sa i ai so’u faalogona malosi lava afai ou te le masalosalo, e mafai lava ona ia faamanuiaina lelei le vai. Talu ai ona sa ou i luga o le tulaga e latalata atu i le laulau faamanatuga, sa ou soso atu ma faapea atu i le ositaulaga na latalata mai ia te au, ma faasino i ai le alii talavou lea sa i ai si faafaigata, “Tuu ia te ia e faamanuia le vai, e puupuu le tatalo.” Ona ou tatalo lea. Ou te lei manao i se toilalo faalua. Ou te fiafia tele i le fuaiupu lea e i tusitusiga paia o loo tau mai ai ia i tatou faapea e le tatau ona tatou masalovale ae ia faatuatua.⁹

Ina ua oo i le taimi e faamanuia ai le vai, sa toe tootuli lena alii talavou ma tuuina atu le tatalo, atonu sa feto’ito’i, ae leai ma se upu na misi. Sa le mafaamatalaina lo’u fiafia. A o tufaina atu e tiakono ia fata, sa ou vaai atu i le tamaitiiti ma faamalo atu i ai. Sa ia faaali mai foliga ataata. Ina ua tatalaina atu alii talavou e nonofo faatasi ma o latou aiga, sa ia nofo i le laina i le va o lona tina ma lona tama. E maeu le olioli i le vaai atu i lona tina ua fusi mai o ia ma faaali atu i ai laufofoga fiafia, a o faamalo atu i ai lona tama ma tuu atu lona lima i luga o lona tauau. Sa tilotilo uma mai i latou e toatolu i le mea sa ou nofo ai, ma faamalo uma mai. Sa mafai ona ou vaaia le soloiese e le tina ma le tama o loimata mai o la’ua mata. Sa ou lagona le faagaeetia faapea o le a lelei lava lenei alii i le lumanai.

O le perisitua e le faapea o se meaalofa ae o se poloaiga e auauna atu, o se avanoa e siitia ai, ma se avanoa e faamanuia ai olaga o isi.

E lei leva tele atu na ou maua ai se tusi e faatatau i se tiakono talavou, o Isaac Reiter, faapea tiakono, aoao, ma ositaulaga o e sa auauna atu, siitia ma faamanuiaina lona olaga ma o latou lava olaga.

Na tauivi Isaac ma le kanesa mai le taimi na fitu ai masina o lona matua seia oo ina maliu i le 13 o ona tausaga. Ina ua siitia atu o ia ma lona aiga i se fale e latalata i se falemai ina ia mafai ai e Isaac ona maua ia togafitiga faafomai talafeagai, sa talosagaina ai le au Perisitua Arona i le uarota sa lata ane i ai ina ia aveina atu le faamanatuga ia i latou i Aso Sa taitasi. O lenei sauniga faalevaiaso na avea ma se mea fiafia a le au Perisitua Arona e auai i ai. Faatasi ai ma o latou taitai ma le aiga o Isaac, latou te faapotopoto ai i tafatafa o le moega o Isaac i le falemai, usuina ia viiga ma fefaasoaai ai molimau. Ona faamanuia lea o le faamanatuga. E tausisi mai lava Isaac e faapea, talu ai ona o ia o se tiakono, o ia e tufaina atu le faamanatuga i lona aiga ma i latou o e na aveina atu. A o taoto o ia i lona moega, sa ia maua le malosi e uu ai se ipu mafolafola a le o le areto ua faamanuiaina po o le vai. O i latou uma e auai e o atu ia Isaac e taumamafa ai i le faamanatuga mai le ipu mafolafola. E lei umi ae amata ona auai atu i ai tausimai ma le aufaigaluega a le falemai i le sauniga a o latou iloaina le latalata o Isaac i lona Tama Faalelagi ma na te faamamaluina lava o Ia. E ui i le vaivai ma le tiga, ae sa tausia pea e Isaac o ia lava i le faamamaluina o se tasi e umia le perisitua paia.

Sa avea Isaac ma se faataitaiga maoae i alii talavou i le uarota. Sa latou vaaia lona naunau e faataunuuina ona tiute, e ui lava sa taoto i lona moega o le a oti, ma sa latou iloaina o na tiute o ni faamanuiaga moni lava. Sa amata ona latou vave malaga atu ina ia saunia le faamanatuga ma ia vave ona nonofo i o latou nofoa. Sa faateleina le faaaloalo.

Sa avea Isaac Reiter ma se lauga ola e faatatau i le faamamaluina o le perisitua. I lona falelauasiga, sa ta’ua ai faapea i lona olaga atoa, sa tu ai le isi ona vae i le lagi. E le masalomia lona faaauauina pea o le faalauteleina o ona tiute ma fesoasoani i le galuega i talaatu o le veli.

Mo i tatou o e umia le Perisitua Mekisateko, o loo i ai pea lava lo tatou avanoa e faalauteleina ai o tatou valaauga. O i tatou o leoleo mamoe o loo leoleo ia Isaraelu. E vaavaai mai mamoe fiaaai ua saunia ina ia fafagaina i le areto o le ola. Pe ua tatou saunia ea uso e, e fafaga le lafu a le Atua? E taua tele lo tatou iloaina o le taua o se agaga, ina ia aua ai lava nei o tatou fiu ai i se tasi o Ona atalii faapelepele.

Afai e i ai se tasi e lagona faapea e vaivai tele e le mafai ai ona faia ia lelei sili atu ona o le fefe tele, o le fefe i le toilalo, e leai lava se isi faamautinoaga e sili atu nai lo le fetalaiga a le Alii: “Ua lava lo’u alofa tunoa mo tagata uma o e faamaulaloina i latou lava i o’u luma; aua afai latou te faamaulaloina i latou lava i o’u luma, ma faatuatua ia te a’u, ona ou faia lea o mea vaivai ma mea malolosi ia te i latou.”¹⁰

E maua vavega i soo se mea pe a faalauteleina valaauga o le perisitua. Afai e suitulaga le faatuatua i le masalosalo, afai e suia e le auauna atu ma le le manatu faapito le tauivi mo le tagata lava ia, o le a faataunuuina e le mana o le Atua Ona faamoemoega. O le e valaauina e le Atua, e faaagavaaina e le Atua.

Ia faamanuiaina pea, ia musuia pea, ia taitaiina pea e lo tatou Tama Faalelagi i latou uma o e umia Lana perisitua faapelepele o la’u tatalo lea, i le suafa o Iesu Keriso, amene.