Reitan Iango ibukin Tibwauaan te Tai, Eberi 2007

A kaotaki ikai reitan iango aika kona ni kabonganai taan kairiiri n te Moanrinan ma Tibwauaan te Tai are e boretiaki n te Riaona n Eberi 2007. Ibukin te reirei, kaetieti, ao waaki ni kakukurei aika irekereke ma iango aikai, tara “E Maiu!” n te iteraniba R4 ao R5 n aia mwakoro ataei n te Riaona aei.

1. Korea te taeka ae bure n te burakibooti. Tuangia ataei bwa ngkana a rairananoia a bita te bure nakon te eti. Tuangiia ataei bwa a na buokiko ni bita te taeka ae bure nakon te eti man iangoan te bwai ae a na karaoi ibukin te rairannano. Kabonganai mwakuri ni kakae aika teniua (tara “Mwakuri ni Kakae,” Teaching, No Greater Call [1999], 161–62) n anga taai are a kona iai n rairananoia ataei. Imwiin te moan mwakuri ni kakae, anenea te anene ke te anene n taromauri iaon te rairannano, ao kabwarabwara bwa te rairannano bon te kauoua n tua n te euangkerio. Imwiin te kauoua ni mwakuri ni kakae, anenea te anene ke te anene n taromauri iaon te rairannano. Imwiin te kateniua ni mwakuri ni kakae, anenea te anene ke te anene n taromauri iaon te kabwarabure ao kabwarabwara bwa ti riai ni kabwarai aia bure aomata ake a rairananoia. Kamauna te taeka ae bure man te burakibooti, ao korea te taeka ae eti. Taekinna man Anuau n te Ekaretia, “N na rinea te eti. I ataia ae I kona n raira nanou ngkana I karaoa ae kairua.” Kaota am kakoaua iaon te rairannano ao Ana Mwakuri ni Kamaiu Iesu Kristo.

2. Kabwarabwara bwa ara burabeti ae maiu e taui kiingin te nakoanibonga ni kabane ao te kariaiakaki n te Ekaretia ni boong aikai. Katea tamnein te burabeti. E ngae n anne, kabwarabwara, bwa e kaira te Ekaretia iaan ana kairiiri temanna te aomata. Titirakinia ataei bwa antai te aomata anne (Iesu Kristo). Katea tamnein Iesu Kristo, ao katukua ietan tamnein te burabeti, ni kaotia bwa te burabeti e mwakuri iaan Ana kairiiri. Kaota te Riaona are e tibwa otinako nakoia ataei. Kabwarabwara bwa ngkana e taetae nakoira ara burabeti n te maungatabu ni kabuta, e reireinira te bwai are e tangiria Kristo bwa ti na ongo ao ti na karaoia. Karaurau n rinea aua te kibu n taetae man ana rongorongo te burabeti ae tibwa otinako, ao kaoia ataei ake a ikawai riki bwa a na wareki. Karinani aua bwaai aika a kona ni karaoi ataei n ira ana taeka te burabeti. Te katooto, ko kona ni karinani “kabwaka te kabwianibwai,” “kabwarai bure riki,” ke “wareki booki aika tabu.” Kaoia ataei bwa a na korea tamnein te iango teuana are a kan mwakuria bwa aonga ni kona ni irira raoi te burabeti (tara “Waaki ni Korotamnei,” Teaching, No Greater Call, 166–67). Rinea te anene ke te anene n taromauri ae irian tuua ake aua are tibwa tia n taetae iaona te burabeti. Kaoia ataei ake a korea tamnein te tua anne bwa e na tei i moa n te ruu ao ni katea aia tamnei n aia tai n anenea te anene kaain te Moanrinan. Kaota am kakoaua iaon kakaawakin te nakoanibonga.

3. Te angareirei iaon te Anene: “E Nakon Iotebwa Timiti te Anera” (te Riaona aei, iteraniba R13). Imwaain reiakinan te anene aei, kataneiako kairan birina ae akea aekakina. E bitaki te mita man 3/4 nakon 2/4 ibukin tibwatibwan te noti ni katoa rain.

   Katekei taeka aika koreaki iaon te mwakoro ni beeba ni kamangaoi—“Moronai,” “Te Maunga ae Komora,” “Nibwaaite,” ao “Ana Boki Moomon.” Tuangiia ataei bwa te anene aei bon iaon bwaai aika aua. Tuangia bwa a na buokiko ni kaeti taeka aika koreaki iaon te mwakoro ni beeba bwa e na boraoi nneia ma te anene. Anenea te anene ma ngaia, ao titirakinia bwa enga taeka aika koreaki iaon te mwakoro ni beeba ae na rimoa. Ibukina bwa te moan kibu n taeka bon “E nakon Iotebwa Timiti te Anera,” ngkanne taeka aika koreaki iaon te mwakoro ni beeba ae eti bon “Moronai.” Tuangia ataei bwa a na anenea te kibu n taeka anne ma ngkoe. Anenea te anene teniua riki te tai, ni katoai ni katikui taeka aika koreaki iaon te mwakoro ni beeba ni nneia ni katoa tai. Kabwarabwara bwa Iotebwa Timiti e anai bwatua koora man te Maunga are Komora, ao bwatua akanne bon aia rekooti Nibwaaite, ao bwa te boki ae kakaawaki, ae tabu bon Ana Boki Moomon. Ibukina bwa e kimototo te anene, kabwanina te anene n aneneia ni katoa te tai are ko titiraki iai. E na buokia ataei bwa a na atai taekana ao birin te anene ae kakukurei. Kaungaia ataei bwa a na karakina Ana Boki Moomon nakoia aia utu man anenean te anene aei. Kaota am kakoaua bwa te karaki are e taekinaki n te anene e bon koaua.