Aveese Tamaiti Mai Le Vai!

O se aso manaia lava ia Iuni 2003. Sa matou tietie atu ma lau fanau e toalima mai lo matou fale i Logan, Iuta, agai atu i Bear Lake e asiasi i le aiga o lou uso. O le latou fale e na o ni nai minute lava e savali atu ai mai le sami, ma ina ua uma le asiasiga mo sina taimi, na tonu loa ia te au e ave atu lau fanau ma o latou tausoga e toalua o Kami ma Erin, i le matafaga e taaalo ai.

O le vai sa i le faatausiusiuga sa mafanafana, ma o si sau malu na savili ai a o ou saofai i lou nofoa, e faitautusi ma malolo. Sa ou tilotilo atu i le vai ma iloa ai Kami pe tusa ua 50 iata (46 m) le mamao mai le matafaga, o loo faatafetafea i se momi maopoopo lelei. Talu ai ona e loloto lava le vai a o lei mamao ese mai le matafaga, na ou talotalo atu ai ia te ia ma valaau atu e faalatalata mai [ia te au], ae sa na le lagonaina mai lou leo mai le mamao lena.

E tusa o le taimi lena na amata ai ona ou le nofonofo lelei ma lagonaina ai le Agaga o musumusu mai e tatau ona aveese tamaiti mai le vai. Na ou valaau atu ia i latou e soso mai i le matafaga, ma sa o mai ma le musua agai mai ia te au. Na faafuasei ona tautala leotele ma manino mai le Agaga, “Aveese tamaiti mai le vai!” Sa ou tepa atu i uta i mauga i tua mai o i matou ma vaaia ai le faauli o ao. Na malosi le emo o se uila i le lagi.

Sa ou alaga atu, “O ese mai le vai. Ua emo mai uila!” Sa ou tamoe atu ia Kami, o le taimi lena pe a ma le 75 iata (68 m) ua faatafea ese atu ai mai le matafaga. O le taimi lena, na taia ai i matou e se savili malosi. Sa taumafai lou atalii e valu tausaga o Dallin, e toso atu se isi momi i le vai, ae na taia lava e le savili pei o se la ma pau ai o ia i le eleele.

Sa ou taumafai ina ia ou oo atu ia Kami i le vave na ou mafaia, ae na atili ai le tafea mamao atu i le savili. E le o au o se tagata aau malosi, ma faatasi ai ma galu maualuluga na siomia ai au, sa faaauau ai pea ona ou asa atu i le vai. Sa ou iloa atu le feaa o ona vae i le malosi na te mafaia a o faalagolago atu i le pito o le momi, ae na laitiiti se aoga o lenei mea i le faafetauia o le savili malosi. Sa atili ai le tafea ese atu i le vasa laolao.

Na atili foi ona loloto le vai a o ou asa atu, seia oo ina oo i ou tauau. Ona tau lea o ou vae i se vaega e loloto faafuasei i le pito i lalo o le vai. Sa tatau ona ou tu, ae e 20 lava iata (18m) o loo ou mamao ai mai ia Kami. Sa ou taumafai e valaau atu ia te ia, ae paga lea, na leai sou leo na sau. Ina ua mafai, sa na o ni manava tau mole [na sau ai]. O le taimi lena na ou iloaina ai le malulu tele o le vai i le mamao lea. Na ou iloaina ua amata ona oo mai le maluluina. O le a le mafai foi ona ou toe foi i tua. O le a ma malelemo uma.

O le taimi lena, i le faaaogaina o le malosi atoa na totoe ia te au, na ou valaau ai ina ia mafai ona lagona mai e Kami au upu ma iloa ai sa ou tatalo. “Le Tama Faalelagi, faamolemole fesoasoani mai ia i maua ina ia ma maua le malosi e faia ai lenei mea.” O le taimi lava lena, na ou faalogoina ai le mafanafana o lou tino atoa, ma na toe foi mai lou malosi. Na amata ona manino ma malosi lou leo, ma ou valaau atu loa ia te ia, “Kami, alo i ou lima!” Na alo e ona lima laiti e 10 tausaga le matutua e pei o le aau a se taifau i luga o le vai, i luma mai o le momi. Sa tau le malosi o ia e faia ai se eseesega i le savili malosi, ae peitai, na pei lava na i ai se lima tele lava i ona tua, na aloaloina malie mai o ia i ou lima na faaloloa atu. Sa faaauau pea ona ou valaau atu ia te ia ni upu faamalosiau seia oo lava ina fepaiai o ma tamatamailima, ma o le taimi lena, na ou iloaina ai, talu ai ona sa aumaia o ia e le Tama Faalelagi ia te au, o le a ma saogalemu ai.

I luga o le matafaga, sa tagi ai Dallin a o sasa faalealofa o ia e le savili ma le oneone. Na alu lou malosi uma i le aumaiga o ia, o isi tamaiti, faapea ma momi ma meataalo i totonu o le taavale. I se mea mamao, na faatumulia le ea i le ee leotele o se sailini, e faailo ai se afi na amataina e le uila i luga o mauga. Na foliga mai na faaopoopo mai i le mafatiaga i lena taimi, ae na matou iloaina na laveaiina i matou e ala i le fesoasoani faalelagi.

Na ou faamatalaina i tamaiti le mea na tupu i le sami, ma o le taimi lava na matou taunuu ai i le fale, na matou tuuina atu le faafetai e ala i le tatalo mo Lona faasaoina o o matou ola. Ma a o matou faia lea mea, na ou lagonaina le tele o le alofa o lo tatou Tama oi le Lagi. Ou te iloa Na te silafia Lana fanau, ma ou te faafetai lava ona sa faatasi o Ia ma i matou i lena aso.