FAAMATALA MAI IA TE AU SE TALA

Na laiti tele le Ofagapi a le Uarota a le Aai o Iowa Muamua, e auai i le savaliga o taavaletosolima a le autalavou, ae sa latou naunau lava e aofia ai i le faamanatuga o paionia o taavaletosolima. I se fautuaga mai se tasi o o latou taitai, na volenitia ai nei tamaitai talavou e avea o ni faamatala tala i le Faaaliga o Taavaletosolima.

Na tonu i teineiti e faaaoga lenei aafiaga e fai ma a latou galuega faatino o le tusi Alualu i Luma o le Tagata Lava Ia. Na su’i lava e le teineitiiti lona lava pulou ie, o se vaega o toniga a paionia moni mo le faaaliga. Sa latou faataitaia mo le tele o itula ina ia tauloto le tala na latou filifilia—o le tala e uiga ia Fanny Fry, o le na malaga i le vaega o taavaletosolima a George Rowley i le 1859.

Na o eseese Fanny ma lona aiga ma onosaia faigata a o sopoia laufanua valevalenoa. O se tasi aso na matapogia ai o ia ma oso ai lana taavaletosolima i ona luga. Sa faapea ua maliu o ia, o lea na amata ai ona sauniuni le usoga mo lona falelauasiga. E fiafia le Ofagapi a Iowa e faamatala le tetei o na uso lelei ina ua pulapula ae mata o Fanny. E ui lava i ona manua, sa faamalosi pea Fanny ma mulimuli ane, na toe faatasia ai i laua ma lona uso.

“Ou te fiafia e mafaufau i le toa o Fanny i le tuua o lona aiga ma sao mai [faigata o le malaga],” o le tala lea a Summer Burch. “Sa malosi o ia.”

“Ou te faamemelo ia te ia ona e le’i i ai lava sona uiga lē lelei, e oo lava i le taimi na faaletonu ai tulaga [o le malaga],” o le tala lea a Allison Engle.

I le taeao o le faaaliga, sa o atu ai Summer ma Allison, faatasi ma o la uso o le Ofagapi o Miranda Decker, Kendra Dawson, Lyssa Abel, ma Jenna Abel, ma faaali atu na uiga o Fanny Fry ia latou te faamemelo i ai. Sa savili le aso ma timuga, ma malulu. Ae sa latou onosaia le malulu faatasi ma le loto naunau ma ni foliga ataata. Na i ai teine uma i o latou tulaga, na oofu i ofu o paionia, ma sauni e faamatala le tala e uiga ia Fanny i soo se tagata ma tagata uma o e na fia faalogo i ai.