E Maiu!
Te Tia Kakoaua Ibukiia Burabeti Ni Boong Aika Kaitira
Imwiin taian kakoaua ake e a tia n Anganaki, aio te koaua are e anga te Burabeti Iotebwa e anga Ibukina: Bwa e maiu! (tara D&C 76:22).
“E maiu!” Ngaia e kakoauaa te Burabeti Iotebwa Timiti ao te Tia Kamaiu Iesu Kristo. Man taian kakoaua akanne, ao ni kabaneiia taian Beretitenti n Ana Ekaretia Iesu Kristo Ibukiia Aika Itiaki Ni Boong Aika Kaitira imwiin—kamatoakiia bwa burabeti, taani mamata, ao taan kaotioti—a tia ni kakoaua koauan, arona n atua, ana Mwakuri ni kamaiu, ao Te Mangauti.
Beretitenti Gordon B. Hinckley
“I ataia ae tiaki ngai atuun te Ekaretia. Atuun te Ekaretia bon Te Uea Iesu Kristo. Au mition, katabeakiu raoi, karineau ae korakora a reke man kaotan au kakoaua ma te tangira ibukin koauan Maiuna. Iesu Kristo bon Natin te Atua, ae a tia ni kataua bwa e na ruo nakon te aonaaba ni kainnano, ni korakai, ni maraki, n anai nanoia aomata nakon te raoiroi, n reirei aron te maiu are akea tokina, ao n Anga ngaia bwa te karea ibukin aia bure aomata ni kabane. Ngaia bon ‘Aia King King ao aia Uea Uea, ao E na tautaeka n aki toki’ (Handel’s Messiah). … I kaota au koaua ae matoatoa bwa E maiu man tei I angatain Tamana.”1
Beretitenti Howard W. Hunter (1907–95)
“I rang ni kakatonga … ibukin au reitaki ma aomata ake iai aia koaua ae matoatoa bwa e maiu te Atua, bwa Iesu bon te Kristo; ao I kaota au kakoaua nakoim bwa te karaki ibukin te ataei are e bungiaki n aia tabo n amwarake maan i Beterem tiaki te karaki n taai akekei, ma Iesu, ae bon Natin te Atua ae bungiaki iroun Maria nakon te maiu ae maamate; bwa e na maeka ibuakoia aomata; bwa e na mate iaon te kaibangaki ao e na mangauti; bwa e maeka ao e maiu ni koaua n te bong aei; ao bwa bon te aomata n arora ao te Tia Kamaiua te aonaaba.”2
Beretitenti Ezra Taft Benson (1899–1994)
“N tabetai ao e na tabekaki te titiraki, ‘E koaua ae kaain te Moomon kiritian?’ Ti katanoataa rongorongon Iesu Kristo n Atua. Ti taraia bwa ti Ngaia reken kamaiuara. Ti kekeiaki ni maiuakin Ana reirei, ao a ingainga nanora nakon te tai are E na manga oki kaua nakon te aonaaba aei n tautaeka ao ni karietataaki bwa aia King King ao aia Uea Uea. N aia taeka buraabeti n ana Boki Moomon, ti taekinna nakoia aomata ni boong aikai, ‘Akea te ara [riki] teuana ke te kawai riki teuana ke te anga are e na reke iai te kamaiuaki nakoia natiia aomata, ma ti n aran ao rinanon Kristo, ae te Uea ae Moan te Mwaaka’ (Motiaea 3:17).”3
Beretitenti Spencer W. Kimball (1895–1985)
“Ti katea [Iesu Kristo] n te tabo n neboaki n akea riki te bootaki ae I ataia ni karaoa aei. Nakoira bon ti ngaia Natin te Atua, ngaia naba te Atua ao ti riai n nakoina….
“N na aki tabe bwa tera ae ti taekinna ibukina, e bon aki tau naba.
“Tiaki ti te Kaabenta, te I-Natareta, te I-Kariaraia, ma bon Iesu Kristo, te Atua ibukin te aonaaba aei, Natin te Atua, ma ae kakaawaki riki, ara Tia Kamaiu, te Tia Kabooi Maiura… .
“I kaota oin au kakoaua. I ataia bwa Iesu Kristo bon Natin te Atua ae maiu ao e tauraki iaon te kaibangaki ibukin aia bure kaain aonaaba.
“Bon raoraou, au Tia Kamaiu, au Uea, ao Atuau.”4
Beretitenti Harold B. Lee (1899–1973)
“Imwiin te kakaae ae abwaabwaki n te tairiki ao te katauraoi n tamnei n te ngaina n te bong are imwiina, I ataia bwa e mwaaka riki ngkana ko riki bwa te tia kakoaua nakon te bwai ae ko konaa n taraia, ni karokoa I kona ni kakoaua ma te aki nano kokoraki are e aki kona ni kananououa, bwa I ataia ma korakorau ni kabane ma au iango bwa Iesu bon te Kristo, Natin te Atua ae maiu, bwa E maiu, E mate, E a manga uti, ao n te bong aei E tararua mai karawa, ni babairea aron te ekaretia aei, are e katokaa Arana iai ibukin ae tataekina Ana reirei. I taekina au koaua aei ma te nanorinano ao I katuka au kakoaua iroumi.”5
Beretitenti Joseph Fielding Smith (1876–1972)
“Te kamaiuaki bon iroun Kristo. E riki man te mwakuri ni kamaiu ae aki tootoki ao akea tokina are e kakoroa bukina man katimtimwan raraana. Bon Natin te Atua, ao e roko nakon te aonaaba bwa e na kabomwii ibukiia aomata man te mate n rabwata ao n tamnei are e reke ibukin te mate are ti aranna bwa te bwaka.
“Rinanon ana raoiroi ao ana nanoanga ao ana bane aomata ni kautaki man te ruanimate, bwa e na motikaki taekaia ni kaineti ma mwakuri ake a tia ni karaoia n te rabwata ae maamate aei… .
I ataia bwa e maiu, ao e tautaeka i eta i karawa ao n te aonaaba iaana, ao ana kantaninga ana butimwaeaki. Boni ngaia ara Uea ao Atuara. Ngke e taetae nakon Iotebwa Timiti: Te Uea bon te Atua, ao akea te Tia Kamaiu irarikina (tara D&C 76:1).6
Beretitenti David O. McKay (1873–1970)
“‘Ti na kanga n ataa te kawai?’ e titiraki Toma, ngke e tekateka ma raona n abootoro ma aia Uea iaon te taibora imwiin te amwarake n te tairiki ae kauringaaba; ao ana kaeka te Kristo ae kangai: ‘Ngai te kawai, te koaua, ao te maiu… .’ (Ioane 14:5–6.) Ao ngaia boni ngaia! Ngaia reken raura, kairan maiura, te tia Karika te maiu are aki toki. Ngkana ti kan ata ara reitaki ma te Atua, tina nakon Iesu Kristo. Ngkana ti kan ataa koauan te tamnei ae aki maamate, tina kona n ataia man mangautin te Tia Kamaiu…
“… Bon ti ngaia te aomata ae kororaoi ae E a tia n nakonako n te aonaaba aei; te banna ni katooto ae ataaki irouia aomata aika ririeta; katotongan te Atua; kororaoi n ana tangira; te Tia Kabooi Maiura ; ao ara Tia Kamaiu; Natin te Tama ae akea Tokina ae kororaoi; te Oota, te Maiu , ao te Kawai.”7
Beretitenti George Albert Smith (1870–1951)
“E tiringaki te Tia Kamaiu bwa ti aonga ni kamaiuaki. E kataea ana kai te mate ao te ruanimate ao e anga te kantaninga ibukin te manga uti ae mimitong nakoia naake a ongeaaba nakon ana reirei.”8
“A mwaiti aika I kuneia n te aonaaba aika aki ataia bwa ti kakoaua ana mwakuri te Uea ae mairoun te Atua, ao I a tia ni kairaki bwa n na taekin aika mwaiti nakon ae ti teuana bukina bwa akea aomata n te aonaaba aei aika oota raoi n ana mwakuri Iesu Kristo, bwa antai aika kakoauaa bwa Natin te Atua, ao antai aika kakatonga man [koaua] bwa n n te tai aei ao e baunaki n te mimitong n angatain bain Tamana , n aroia Aika Itiaki ni Boong Aika Kaitira.”9
Beretitenti Heber J. Grant (1856–1945)
“Nakoia kaain te Ekaretia ni kabutaa te aonaaba, ao naake a tatangira te rau n taabo nako, ti taku, mangaia ae Teuaei ae mai Kariraia tiaki ti te Tia Reirei ae kakannato, tiaki ti te Tia Kairiiri ae roko raoi, ma bon Uean te Rau, te Tia Karika te maiu ae akea tokina, ikai ao ngkai, ke ni kabwarabwaraana teuana ae kamiimi te Tia Kamaiua te aonaaba!
“… Iesu bon te Tia Kabooi maiuia kain te aonaaba, te Tia Kamaiuia aomata nako, ae roko nakon te aonaaba ma ana mwakuri ae e atia ni bukinaki iai mai iroun te Atua bwa E na mate ibukiia aomata nako. Iesu Kristo n atongana ae Natin te Atua, te Riki Temanna nte iriko. Bon ngaia te Tia Kabooi Maiura, ao ti neboia.”10
Beretitenti Joseph F. Smith (1838–1918)
“E a tia n taetae nakoiu Tamnein te Atua ae Tabu—tiaki rinanon te taninga, tiaki rinanon te mata, ma nakon nanon tamneiu, nakon maiu ao iterana ae akea tokina,—ao E atia ni kaotia nakoiu bwa Iesu bon te Kristo, Natin te Atua ae maiu. I kakoaua nakoim bwa I ataia bwa e maiu te Tia Kabooi Maiura. N reitia riki, I kakoaua bwa n na Nooria n te aonaaba aei, ao are n na Nooria n ai Arona… . E a tia te Uea ni kaota aei nakoiu. E atia ni kaona tamneiu ni kabane n te koaua aei, ni karokoa ae e aki kona n reke te nano uoua.”11
Beretitenti Lorenzo Snow (1814–1901)
“Te Aomata are e maeka i Karawa , are e tautaeka ikekei imwain rikin te aonaaba aei, ae karika te aonaaba, ao ngaia are, kanakoa te tia kamaiu, bwa e na ruo ni kakororaoia ao ni kamaiuia naake E a tia ni karikiia, e a tia ni kaoti nakoia te roro aei.”12
“Ti kakoaua nakon te aonaaba ae bwanin bwa tia ataia, bwa man taian kaotioti mairoun te Atua, man rinanon naba ana kaotioti te Tamnei ae Raoiroi, bwa Iesu bon te Kristo, Natin te Atua ae maiu, ao boni ngaia are kaotia nakon Iotebwa Timiti n rabwatana n ai aron are kaoti naba nakoia ana abotoro n taai ake ngkoa, imwiin utina man te ruanimate, e a atia ni kaotia nakoina [te] koaua mai karawa ae ti ngaia ae a kona ni kamaiuaki iai botanaomata.”13
Beretitenti Wilford Woodruff (1807–98)
“Oin ana mwakuri Kristo nakon te aonaaba bwa E na anga ngaia bwa te karea ni kamaiu nakoia aomata nako man te mate ae akea tokina… . E karaoia ma nanona ae korakora n ongeaaba nakon nanon Tamana ni bwaai ni kabane mai moana, ao e mooi n te mwangko ae mao are e anganaki. Ikai are a uotaki nakon te oota, te mimitong, te karineaki, te aki mamate, ao te maiu are akea tokina, ao man te tangira anne ae korakora riki nakon te onimaki, ke te kaantaninga, ibukin ana Tiibu te teei te Atua are e a tia ikai ni karaoa te bwai ae aki konaa ni karaoia te [aomata] i bon irouna… .
“Akea te aomata ae iai mwaakana ni kamaiuia tamneia aomata man anganiia te maiu are akea tokina, ma ti te Uea Iesu Kristo, aan ana babaire Tamana.”14
Beretitenti John Taylor (1808–87)
“E kabiraki, ni baan te kimwareirei iaoia raona, E kekeiaki n tokanikai I aon mwaakaia aomata ao riaboro, iaon te aba n ikotaki ma moone; ao mani buokaki n te mwaaka ae korakora ma irouia Taian Atua, E kataea ana kai te mate, moone ao te ruanimate, ao n uti n tokanikai n ai aron Natin te Atua, te Tama ae bon akea tokina, te Mesia, Te Uea n Raoi, te Tia Kabooi Maiura, te Tia Kamaiua te aonaaba; E a tia ni katiaa ao ni kabwanina te mwakuri ni kaineti ma te mwakuri ni kamaiu, ae e a tia Tamana n anganna bwa E na karaoia n aron Natin te Atua ao Natin te aomata.”15
Beretitenti Brigham Young (1801–77)
“I kakoauaa bwa Iesu bon te Kristo, te Tia Kamaiu ao te Tia Kabooi Maiura iaon te aba; I a tia n ongeaaba n ana taeka, ao I ataa ana berita, ao te ataibwai are I a tia ni karekea ibukina, te wanawana n te aonaaba aei e bon aki kona n anga ke n anaia… .
“Ara Uea ae Iesu Kristo—te Tia Kamaiu, e a tia ni kamaiuia kain aonaaba ao bwaai ni kabane aika kaeti nakoina, bon ana Riki Temanna te Tama n te iriko … . E a tia n rinanon te mate ibukiia aomata ni kabane, ao E a tia ni kabooi aia bure ma irouia ara moa ni karo.”16
Te Burabeti Iotebwa Timiti (1805–44)
Ao aio te euangkerio, ae reke man te bwanaa ae roko ma i karawa ae e anganiira te ronogrongo—
Bwa e roko Iesu nakon te aonaaba bwa e na tauraki ibukin te aonaaba, ni kabwarai aia bure kaain aonaaba, ao ni katabua te aonaaba, ao ni kaitiakia man bwaai ni kabane aika bure;
Bwa aonga ni kamaiuaki irouia naake e a tia te Tama ni katuka mwaakana irouia are e karaoia (tara D&C 76:40–42).