Kaumeʻa ki he Kaumeʻa
Founga Feohi mo e Niʻihi Kehé
Mei ha ʻinitaviu mo ʻEletā Felenisisikou J. Viniasi ʻo e Kau Fitungofulú, lolotonga ngāue ko e Palesiteni ʻi he Kau Palesitenisī Fakaʻēlia ʻo e ʻĒlia Kalipiané; fai ʻe Sarah Cutler
“Kae fetauhiʻaki ʻa kimoutolu ʻi he ʻofa” (Kalētia 5:13).
ʻE founga fēfē nai hano langa ha fāmili taʻengata? Ko e ʻuluaki sitepú ko e ako mei hoʻo ongo mātuʻá. Ne papitaiso ʻeku ongo mātuʻá ʻi he 1951, ʻoku ou kei taʻu fā. Ne mau kau ʻi he niʻihi ne fuofua kau ki he Siasí ʻi ʻUlukuaí.
Ne u ako mei heʻeku ongo mātuʻá ʻa e founga feohi mo e niʻihi kehé. Naʻá na akoʻi mai ke u tokoniʻi ʻa e tokotaha kotoa, ʻo aʻu pē kiate kinautolu ʻoku ʻikai ke nau haʻu mei homau fonuá pe anga fakafonuá. Ne ʻi ai ha taimi ʻe taha ne haʻu ai ha ʻeikivaka mei Noaue ki ʻUlukuai. Ne haʻu toko taha pē, ne ʻikai haʻu mo hono fāmilí. Ne fakaafeʻi ia ʻe hoku fāmilí ke nofo ʻi homau ʻapí. Ne ʻosi tokolahi pē e kakai ne nofo ʻi homau kiʻi ʻapí, ka naʻa mau toe fakaafeʻi mai mo ha toko taha.
ʻI heʻeku vakai ki hono tokangaʻi ʻe heʻeku ongo mātuʻá ʻa e niʻihi kehé, ne u ako ai ha tefitoʻi moʻoni mahinongofua ʻo e ongoongolelei ʻo Sīsū Kalaisí: fakakaumeʻa ki he niʻihi kehé, ngaohi leleiʻi kinautolu pea ʻoua naʻa fakamaauʻi kinautolu. Angaʻofa pea tokoniʻi ʻa e kakaí ʻi he taimi ʻoku ʻi ai haʻanau fie maʻú.
Naʻá ku sio foki ki he ngāue ʻeku ongo mātuʻá ʻi he Siasí mo ʻena tokoniʻi ʻa e kau faifekaú. Kimuʻa pea uiuiʻi au ko ha taki lakanga fakataulaʻeikí, ne u ʻosi maʻu ʻe au ha ako lelei ʻi ʻapi mei heʻeku ongo mātuʻá.
Ko e vave ange ko ia ʻete kamata ke moʻui ʻaki ʻa e ongoongoleleí ʻi heʻete moʻuí, ko e lelei ange ia hoʻo moʻuí. ʻE ʻi ai e ʻaho te ke ʻoatu ai ʻa e pōpoaki tatau ʻo e ongoongoleleí mo e tukufakaholó ki hoʻo fānaú pea mo ʻenau fānaú. ʻE lava ke ke kamata ha toʻu tangata foʻou ʻo ha fāmili taʻengata kapau te ke ako ʻa e ngaahi tefitoʻi moʻoni ʻo e ongoongoleleí.
Ne hoko e sīpinga ʻeku ongo mātuʻá ko ha tukufakaholo ia kiate au mo hoku fāmilí. ʻOku ou ʻamanaki ʻe hokohoko atu ia ʻi he ngaahi toʻu tangata ʻi he kahaʻú. ʻOku ou maʻu mo hoku uaifí ha vā fetuʻutaki fakaʻofoʻofa mo ʻema fānaú. Naʻá ma feinga ke tokoniʻi ke mahino kiate kinautolu ʻa e ngaahi meʻa ne akoʻi mai ʻe heʻeku ongo mātuʻá, kapau te ke ʻofa mo tokoniʻi ʻa e niʻihi kehé, ʻoku faitāpuekina koe. Kuo foua ʻe heʻema fānaú ha ngaahi faingataʻa lahi, ka kuo silaʻi kotoa kinautolu ʻi he temipalé. ʻOku nau mālohi ʻi he Siasí pea ʻoku ma ʻamanaki te nau ʻoatu ʻa e tukufakaholo ko ʻení ki he toʻu tangata hokó.
Ko hoku makapuná ko e toʻu tangata ʻaki ia hono fā ʻa homau fāmilí ʻi he Siasí. ʻOkú ma fakaʻamu ʻe lava ke ma vahevahe mo kinautolu ʻa e malava ko ia ke tali ʻa e niʻihi kehé, ke tokoniʻi pea hiki hake kinautolu. ʻOku mau ngāue ke fokotuʻu ha fāmili ʻoku makatuʻunga ʻi he tui kia Sīsū Kalaisí pea maʻu ha fakamoʻoni mālohi ki Heʻene ongoongoleleí.
Ngaahi tā fakatātā ʻa Dilleen Marsh