Pagpanglimpyo sa mga Nataran sa Templo

Sa Kentucky, sa habagatang bahin sa Estados Unidos, kini mahimong init ug alimuot inig ka summer. Usa ka adlaw niana ang mga tawo nakamatikod og berde nga agup-op nga mitubo sa koral libut sa Templo sa Louisville Kentucky. Ug dili lang gamay—dihay daghan kaayo!

Mao nga ang mga bata sa Primary sa Crestwood Second Ward sa Louisville Kentucky Stake nakahukom sa paglimpyo niini. Sa usa ka mainit nga adlaw sa Hunyo duna silay kalihokan. “Nagdala kami og mga trapo ug mga balde sa tubig ug sabon aron limpyohan ang koral ug motabang nga malimpyohan ang balay sa Langitnong Amahan,” miingon si Sara M., edad 10. Nabasa siya, pero “makalingaw kini tungod kay ang tanan namong mga higala didto.”

Si Josh H., edad 9, miingon nga gikapoy siya og gamay sa paglimpyo sa taas nga bahin sa koral. Pero daghan ang mitabang kaniya. Gani, hapit ang tanang mga bata sa Primary mianha, mga 75 ang tanan. Daghan ang midala sa ilang mga igsoon ug mga mama ug mga papa aron sa pagtabang.

Ang mga bata nasayud nga anaa sila sa mga nataran sa templo, mao nga naningkamot sila nga magbinuotan. Ug walay usa nga nagbagulbol sa kapoy nga trabaho. “Kinahanglang manguskos kami pag-ayo tungod kay ang mansa dugay na kaayo,” miingon si Megan H., edad 6. Pero dili kini kabayran. “Ako nasayud nga kami nag-atiman sa panimalay sa among Langitnong Amahan.”

Mao usab ang gibati ni Sara. “Gibati gayud nako ang Espiritu tungod kay ako nasayud nga ang Langitnong Amahan nalipay nga gibuhat namo kini,” siya miingon.

Human matapos ang trabaho, ang grupo nagpundok sa building sa Simbahan sa tupad aron mangaon og hot dog ug mag-istoryahanay unsay ilang nakat-unan.

Ang mga bata sa Primary naghinam-hinam na nga makaadto sa templo sa ilang mga kaugalingon aron sa paghimo og mga bunyag alang sa mga patay. Pero sa pagkakaron, sila malipayon nga sila nakatabang sa gawas nga nindot tan-awon—sama sa unsay angay sa balay sa Langitnong Amahan.