Amumaha ang Nagtubo nga Kaliwatan

Elder Neal A. Maxwell (1926–2004) sa Korum sa Napulog Duha ka mga Apostoles: “Gireserba sa Ginoo alang niining panahona, [ang nagtubo nga henerasyon] kinahanglan nga ipreserba karon … ug andamon alang sa ilang talagsaon nga panahon sa kasaysayan sa katawhan! Sila giandam aron sa pag-abut niining panahona, apan karon sila kinahanglan nga maningkamot pag-ayo aron makab-ot ang ilang mga angayang buhaton. …

“Ang mga kabatan-onan sama ra sa mga bunyaganan [prospective converts]. Adunay mga mahinungdanong panahon diin ang ilang mga kalag mosugod sa paglihok—padulong sa Ginoo o palayo gikan Kaniya. Kining mga panahona sa pagdesisyon dili kanunay mamugna, apan kon kini mahitabo, kini kinahanglan nga dili mausik. Mas kasagaran kaysa wala, kini nga mga panghitabo mahitabo sa hilum ug sa balaang pagpakig-istorya kauban sa mga ginikanan, mga apohan, sa usa ka bishop, sa usa ka hamtong nga lider, o sa usa ka matarung nga higala” (“Unto the Rising Generation,” Ensign, Abr. 1985, 8, 10).

Elder Ronald A. Rasband sa Presidency sa Seventy: “Ang atong mga bag-ong tubo angay lang sa atong pinakamaayo nga paningkamot sa pagsuporta ug paglig-on kanila sa ilang panaw sa pagkahingkod. … Ang matag lihok nga atong himoon, matag lugar nga atong padulngan, uban sa matag batan-on nga Santos sa Ulahing mga Adlaw nga atong mahimamat, kita kinahanglan adunay dakong kahibalo sa panginahanglan sa pagpalig-on, pag-amuma ug isip impluwensya sa kaayohan sa ilang mga kinabuhi.” (“Ang Atong mga Bag-ong Tubo,” Liahona, Mayo 2006, 47).

Presidente Gordon B. Hinckley (1910–2008): “Ayaw kalimti nga kining gagmayng mga bata mga anak nga lalaki ug mga anak nga babaye sa Dios ug ang inyo mao ang temporaryong pag-amuma kanila, nga Siya ang ginikanan sa wala pa kamo mahimong mga ginikanan ug wala Niya biyai ang Iyang katungod o interes isip usa ka ginikanan ngadto sa Iyang gagmayng mga anak. … Amumaha ang inyong mga anak pinaagi sa gugma, sa pag-alima ug pahimangno sa Ginoo. Atimana ang inyong gagmayng mga bata. Abi-abiha sila sa inyong mga panimalay, ug amumaha ug higugmaa sila sa tibuok ninyong kasingkasing. Sila mahimong mobuhat, sa mga tuig nga moabut, og pipila ka butang nga dili nimo gusto nga ilang buhaton, apan pagmapailubon, pagmapailubon. Ikaw dili mahimong mapakyas kon imo lang gibuhat ang tanan” (“Words of the Living Prophet,” Liahona, Mayo 1998, 26–27).

Julie B. Beck, kinatibuk-ang presidente sa Relief Society: “Ang pag-amuma nagpasabut sa pag-ugmad, sa pag-atiman, ug sa pagpatubo. … Ang pag-amuma nagkinahanglan og paghan-ay, pailub, gugma, ug trabaho. Ang pagtabang sa pagtubo pinaagi sa pag-amuma tinuod nga usa ka gamhanan ug may impluwensya nga tahas nga gihatag sa mga babaye” (“Mga Inahan Kinsa Nasayud,” Liahona, Nob. 2007, 76, 77).

Barbara Thompson, ikaduha nga magtatambag sa kinatibuk-ang kapanguluhan sa Relief Society: “Isip mga kaigsoonan sa Relief Society kita makatabang sa usag usa aron pagpalig-on sa mga pamilya. Kita gihatagan og mga oportunidad sa pag-alagad sa daghang mga kapasidad. Kita kanunay nga makauban sa mga bata ug batan-on kinsa nanginahanglan lamang unsa ang atong matanyag. Kamong mga hamtong nga mga sister adunay maayo nga mga tambag ug kasinatian nga mapaambit sa batan-ong mga inahan. Usahay usa ka lider sa Young Women o magtutudlo sa Primary mosulti o mobuhat sa butang nga gikinahanglan lamang sa pagdugang unsa ang gitudlo sa mga ginikanan. Ug klaro kaayo nga kita wala magkinahanglan og bisan unsa nga calling aron pagtudlo og higala o silingan” (“Ako Molig-on Kanimo; Ako Motabang Kanimo,” Liahona, Nob. 2007, 117).