Ko Hono Fakamaʻa ʻo e Konga-ʻapi ʻo e Temipalé

ʻI Kenitaki, ʻi he faka-tonga ʻo e ʻIunaiteti Siteití, ʻoku vela mo pikipiki ʻa e ʻeá ʻi he faʻahitaʻu māfaná. Ne ʻi ai ha ʻaho ne fakatokangaʻi ʻe he kakaí ne tupu ha limulimua lanu mata ʻi he ʻā ʻo e Temipale Luivila Kenitakí. Naʻe ʻikai ke siʻi—naʻe fuʻu lahi ʻaupito!

Ko ia ne fakakaukau ʻa e fānau Palaimeli ʻo e Uooti Kelesiuti Ua ʻi he Siteiki Luivila Kenitakí ke nau fai ha ngāue ki ai. Ne fai haʻanau ʻekitivitī ʻi ha ʻaho māfana ʻi Sune. Naʻe pehē ʻe Sala M., taʻu 10, “Naʻa mau ʻalu mo ha ngaahi konga tupenu mo e kane vai mo e koa ke fakamaʻa ʻaki ʻa e ʻaá pea ke tokoni ke tauhi ke maʻa ʻa e fale ʻo e Tamai Hēvaní.” Neongo naʻá ne viviku ka “naʻe fakalata pē ia he naʻe ʻi ai kotoa homau ngaahi kaungāmeʻá.”

Naʻe pehē ʻe Siua H., taʻu 9, naʻá ne kiʻi helaʻia ʻi hono fakamaʻa ko ia ʻo e ngaahi konga māʻolunga ko ia ʻo e ʻaá. Ka naʻe lahi hono kau tokoní. Ko hono moʻoní, ne mei omi kotoa e fānau Palaimelí, mahalo ne nau toko 75 fakakātoa. Ne ʻomi ʻe ha tokolahi honau ngaahi tokouá mo e tuofafiné, ngaahi tamaí mo e ngaahi faʻeé ke tokoni.

Ne ʻiloʻi ʻe he fānaú ʻoku nau ʻi he kelekele ʻo e temipalé, ko ia ne nau feinga ke ʻapasia. Naʻe ʻikai lāunga ha taha ʻi he lahi e ngāué. Naʻe pehē ʻe Meikeni H., taʻu 6, “Naʻe pau ke mau olo mālohi he naʻe fuoloa e ʻi ai ʻa e ʻulí. Naʻá ku ʻiloʻi ko ʻemau tokangaʻi ʻa e ʻapi ʻo ʻetau Tamai Hēvaní.” Ka naʻe ʻaonga pē ia.

Naʻe ongoʻi pehē foki mo Sala. Naʻá ne pehē, “Naʻá ku ongoʻi ʻaupito ʻa e Laumālié he naʻá ku ʻiloʻi ne fiefia ʻa e Tamai Hēvaní ʻi he meʻa naʻa mau faí.”

Hili e ʻosi ʻa e ngāué, ne fakatahataha mai ʻa e kulupú ki he fale lotu ʻi he tafaʻakí ʻo nau kai sōsisi mo talanoa ki he meʻa ne nau akó.

ʻOku ʻikai faʻa tatali ʻa e fānau Palaimelí ke nau lava ʻo hū ki he temipalé ke fakahoko ha papitaiso maʻá e kau pekiá. Ka ʻi he taimi ní, ʻoku nau fiefia ʻi heʻenau ʻiloʻi naʻa nau tokoni ke hā fakaʻofoʻofa ʻa tuʻa—ʻo hangē ko ia ʻoku totonu ke hoko ki he fale ʻo e Tamai Hēvaní.