Ngaahi Fakakaukau Maʻá e Efiafi Fakafāmili ʻi ʻApí
ʻOku ʻoatu ʻa e ngaahi fokotuʻu fakafaiakó ni ke ʻoatu ha ngaahi fakakaukau. ʻE lava ke ke fakafeʻungaʻi ia ki ho fāmilí.
“Ngaahi Tāpuaki ʻo e Temipalé,” p. 12: Fakaʻaliʻali ha fakatātā ʻo ha temipale. ʻAi ha tā ʻo ha fāmili he tafaʻaki ʻe taha ʻo e lokí ʻo fakatatau mai ki he tā temipalé. ʻI hoʻo fakamatalaʻi fakalūkufua ko ia ʻa e fakamatalá, ʻunuakiʻi ke ofi ange ʻa e tā ʻo e fāmilí ki he temipalé. ʻEke ange ki he kau mēmipa ʻo e fāmilí pe ko e hā ʻa e meʻa ʻoku nau ongoʻi ʻi he aʻu atu ʻa e fāmilí ki he temipalé. Lau ʻa e Tokāteline mo e Ngaahi Fuakava 109:7–23, vakai ki ha toe ngaahi founga kehe ke teuteu ai ki he temipalé pea mo e ngaahi tāpuaki ʻoku maʻu mei he ʻalu ki he temipalé. (Vakai ki he lea ko ia ʻa Silivia H. ʻOloletí, “Ngaahi Temipale Māʻoniʻoní, Ngaahi Fuakava Toputapú,” mei he konifelenisi lahi ʻo ʻOkatopa 2008.)
“ ʻA au? Ko ha Tauhi-sipi ʻi ʻIsileli?” p. 30: Lau ʻa e konga ko ia ko e “Ko Hono Fakafoki Mai Kinautolú,” pea aleaʻi ʻa e founga ʻe lava ke tau hoko ai ko ha kau tauhi-sipi ki he niʻihi kehé. ʻAi ko ha ʻekitivitī maʻá e fānau īkí, mou tautaufetongi ʻi he toitoi mo hono kumi ʻa e niʻihi kehé ʻo hangē ko e kumi ko ia ʻe he tauhi-sipí ha sipi kuo hē. Fakakaukau ki ha kakai ʻe lava ke ke tokoniʻi ke fakafoki mai kinautolu “ki he tākangá.” Fakaʻosi ʻaki ha lotu ke maʻu ha tataki ki he ngaahi founga ke tokoniʻi ʻaki kinautolú. (Vakai foki ki he lea ʻa ʻEletā ʻEtuato Kavaleti, “Ko e Foki Ki ʻApí,” mei he konifelenisi lahi ʻo ʻOkatopa 2008.)
“Kamata ʻaki ha Lotu,” p. 40: Fakamatalaʻi nounou ʻa e ngaahi konga mahuʻinga mei he fakamatalá. Toe lau ʻa e palakalafi ua ʻo e konga ko e “Ha Tokotaha Ke Mo Talanoa.” Kole ange ki he fāmilí ke nau fai mai ha fakamatala ki ha ngaahi taimi ne fakamālohia ai kinautolu ʻe he lotu fakafāmilí. Ke fakamamafaʻi ʻa e mahuʻinga ʻo e lotu maʻá e niʻihi kehé, fakakaukau ke lau ʻa e palakalafi ʻe tolu fakamuimuitaha ʻi he lea ko ia ʻa ʻEletā Tēvita A. Petinā ko e, “Lotu Maʻu Ai Pē,” mei he konifelenisi lahi ʻo ʻOkatopa 2008.
“Ko e Mana ʻo e Mā faka-Mekisikoú,” p. K6: Lau ʻa e talanoá, aleaʻi ʻa e ngaahi faingataʻa ne fehangahangai mo e fāmili ʻo Loú ʻi heʻenau teuteu ko ia ke ʻalu ki he temipalé. Fakakaukau ke mou ngaohi fakafāmili ha mā faka-Mekisikou pe ko hono faʻifaʻitaki ʻa e founga ko ia hono ngaohi ʻo e mā faka-Mekisikoú, ʻo kamata pē mei hono tō ʻo e koané ki hono fakatau atu ko ia ʻo e mā faka-Mekisikoú ki he kau folau ʻeveʻevá. Fakaʻosi ʻaki hano lau ʻa e lea ko ia ʻa ʻEletā Tenisi B. Niuenisuainitaá.