Faamalosia o le Faatuatua i le Atua le Tama ma Iesu Keriso e ala i Suesuega Patino o Tusitusiga Paia

“Ina ua faatoa ou faaipoipo, … sa valaaulia a’u i se ‘aiga i le aoauli mo uso uma o le Aualofa o la’u uarota, o ē ua faitauina le Tusi a Mamona po o se tusi laitiiti o le talafaasolopito o le Ekalesia. Sa na o ni nai taimi lava ou te faitau ai a’u tusitusiga paia, ma sa ou agavaa e auai i lea taumafataga i le faitauina o le tamaitusi, aua sa faigofie ma e laitiiti le taimi na alu ai. A o o’u ’ai, sa malosi lo’u lagona, e ui lava e lelei le tusi o le talafaasolopito, ae sa tatau ona ou faitauina le Tusi a Mamona. Sa uunaia a’u e le Agaga Paia e sui la’u faitauga o tusitusiga paia. O le aso lava lena sa amata ai ona ou faitauina le Tusi a Mamona, ma e le’i toe taofia. … Ona sa amata ona ou faitau i aso taitasi i tusitusga paia, o lea ua ou iloa ai e uiga i lo’u Tama Faalelagi, o Lona Alo o Iesu Keriso, ma le mea e tatau ona ou fai ina ia ou faapei ai o i La’ua. …

“… E mafai ona avea tamaitai uma ma se faiaoga o aoaoga faavae o le talalelei i lona aiga, ma e manaomia e uso uma i le Ekalesia le malamalama o le talalelei e avea ai ma se taitai ma se faiaoga. Afai e te le’i amatalia le mausa o le suesue i tusitusiga paia i aso taitasi, ia amata nei loa ma suesue ai pea ina ia mafai ai ona saunia mo ou tiute o lenei olaga, ma le faavavau.”¹

Julie B. Beck, peresitene aoao o le Aualofa

“O se suesueina o tusitusiga paia o le a fesoasoani i a tatou molimau ma molimau a tagata o o tatou aiga. O loo ola ae a tatou fanau i le taimi nei ma ua siomia e leo o loo uunai ai i latou ina ia lafoai mea e tonu ae tulimatai atu i faafiafiaga o le lalolagi. Sei vagana ua i ai so latou faavae mautu i le talalelei a Iesu Keriso, se molimau o le upumoni, ma se naunautaiga e ola amiotonu, e mafai ona aafia i latou i na faatosinaga i nei aafiaga. O lo tatou tiutetauave le faamalolosi ma puipuia i latou.”²

Peresitene Thomas S. Monson

“Matou te mananao i o tatou tuafafine ia avea ma e atamamai i tusitusiga paia. … E te manaomia se malamalamaaga i ana upumoni faavavau mo lou lava manuia, ma mo le faamoemoega o le aoaoina o lau lava fanau ma isi tagata uma e mafai ona e faatosina mai.”³

“Matou te mananao ia faamanuiaina o tatou aiga i ni tuafafine e lava le silafia i tusitusiga paia—pe e te nofotoatasi pe faaipoipo, talavou pe matua, maliu le toalua pe o nofo i se aiga. … Ia avea [outou] ma tagata atamamai i tusitusiga paia—e le faapea ia ta’u faatauvaaina ai isi, ae ia siitia ai i latou!”⁴

Peresitene Spencer W. Kimball (1895–1985).