O le a le eseesega i le va o le anapogi ma le le ’ai?

O le le ’ai o le a oso ai lou fiaai. O le anapogi, e faia ma se faamoemoega faapitoa ma i ai faatasi ma le tatalo, o le a e latalata atu ai i le Atua ma e maua ai faamanuiaga ma le malosi faaleagaga (tagai Isaia 58:6–11).

E le pei o le le ai, a tatou anapogi, ua tatou filifili e faia mo se faamoemoega faapitoa faaleagaga. E mafai ona e anapogi mo le fesoasoani a le Alii ina ia e malamalama i mataupu faavae o le talalelei po o le taulimaina o filifiliga ma aafiaga patino. E mafai foi ona e anapogi mo faamanuiaga mo isi, e pei o o latou soifua maloloina po o le, ia latou talia le talalelei (tagai Alema 6:6). E mafai foi ona e anapogi e faaali atu ai le agaga faafetai i lo tatou Tama Faalelagi.

O le tatalo o le isi lea elemene e ese ai le anapogi mai le le ’ai. E tatau ona amata ma tatalaina se anapogi i le tatalo faamaoni, ma i le taimi atoa o le anapogi, e mafai ona e mafaufau loloto ma tatalo i le mafuaaga ua e anapogi ai. O nei auala e taulai atu ai lou mafaufau i le mafuaaga ua e anapogi ai nai lo le mafaufau i lou lagonaina o le fiaai. “Ona e valaau lea, a e tali mai ai Ieova; e te alaga atu, ae fetalai mai o ia, O a’u lenei” (Isaia 58:9).