Faamaloloina o e Mama’i

E talitonu le Au Paia o Aso e Gata Ai i le faaaogaina o le atamai ma auala faasaienisi e sili ona lelei ua maua. Tatou te faaaogaina taumafa paleni, faamalositino, ma isi gaoioiga e faaumiumi ai le ola maloloina ma tatou te sailia fesoasoani a fomai faamalolo, e pei o fomai lautele ma fomai tipitipi, e toe maua ai le ola maloloina.

O le faaaogaina o saienisi faafomai e le o feteenai ma a tatou tatalo o le faatuatua ma lo tatou faalagolago i faamanuiaga faaleperisitua. A talosagaina e se tagata se faamanuiaga faaleperisitua, e fesili atu i ai Polika Iaga, “Ua e faaaogaina nisi vaifofo?” Ia i latou e fai atu leai ona “matou te mananao i Toeaina e faaee mai o latou lima i o matou luga, ma matou te faatuatua e faamaloloina ai i matou,” e tali atu i ai Peresitene Iaga: “E matuai le fetaui lava lena mea ma lo’u faatuatua. Afai tatou te mama’i, ma ole atu i le Alii e faamalolo i tatou, ma faia mea uma e tatau ona fai mo i tatou, i lo’u malamalama i ai i le Talalelei o le faaolataga, e sili ai lo’u fai atu i le Alii e faaola a’u saito ma sana, e aunoa ma lo’u suaina o le eleele ma toto ni fatu. Ia te a’u e fetaui atu le faaaoga o auala uma e mafai ou te iloa, ona ole atu ai lea i lo’u Tama oi le Lagi … e faamanuia lena auala mo le faamaloloina o lo’u tino.”¹

Ioe, tatou te le faatali seia oo ina le aoga isi auala uma ona faatoa tatou tatalo lea ma le faatuatua pe tuu atu faamanuiaga faaleperisitua mo le faamalologa. I tulaga faafuasei, e muamua ai tatalo ma faamanuiaga. O le tele o taimi tatou te faia ai i le taimi e tasi ia taumafaiga uma. O lenei faiga e mulimuli ai i aoaoga faaletusitusiga paia e tatau ona tatou “tatalo e le aunoa” (MFF 90:24) ma e tatau ona faia mea uma i le poto ma le auauai lelei.²

Ua tatou iloa o le tatalo faatuatua, e faia toatasi pe faia foi i o tatou aiga po o maota tapuai, e mafai ona aoga e faamalolo ai e mamai. E tele mau e faatatau atu i le mana o le faatuatua i le faamaloloina o se tagata. Ua aoao mai le Aposetolo o Iakopo e tatau ona tatou “tatalo le tasi mo le tasi, ina ia faamaloloina outou,” ma le isi, “ua aoga tele le tatalo faatauanau a le tagata amiotonu” (Iakopo 5:16). Ina ua faamaloloina le fafine na pai atu ia Iesu, sa fetalai atu o Ia ia te ia, “Ua e ola i lou faatuatua” (Mataio 9:22).³ E faapena foi, ua aoao mai le Tusi a Mamona “o loo galue [le Alii] ma le mana e tusa ma le faatuatua o le fanauga a tagata… .” (Moronae 10:7).

O se suesuega lata mai nei i le atunuu atoa na maua ai e toeitiiti o le 8 i le 10 tagata Amerika e “talitonu o loo tutupu lava vavega i aso nei [e pei ona sa] i ai anamua.” Fai mai le tasi vaetolu o i latou na suesueina na latou “oo pe sa molimauina se faamalologa faalelagi.”⁴ E toatele le Au Paia o Aso e Gata Ai ua i ai aafiaga i le mana o le faatuatua i le faamaloloina o e mamai. Ua tatou faalogo foi i le tele o faataitaiga o lea tulaga i tagata faatuatua o isi ekalesia. Na faamatalaina e se tagata i le nusipepa a Texas se vavega faapena. Ina ua faaletonu le mānāva a se teineitiiti e lima tausaga, ma sa fiva foi, sa ave faanatinati e ona matua i le falemai. E oo atu i le falemai ua le gaoioi fatuga’o ma ona māmā, o lona fiva na 107° tikeri, ma sa mumu sesega lona tino ma na lilofia i unooa. Fai mai fomai na tigaina o ia i le faamai matautia o le atuatuvale, e le mailoa le mafuaaga. Ina ua oo atu le tala i aiga ma uo, na amata ona tatalo mo ia nei tagata e matatau i le Atua ma sa faia ai se sauniga lotu faapitoa a le aulotu Porotesano i Waco, Texas. O se mea e ofo ai, sa faafuasei ona toe tulai mai o ia mai le gutu o le tuugamau, ma sa te’a mai le falemai i le na o se vaiaso ma nai aso. Sa tusia e lona tamamatua, “O ia o se faamaoniga ola e tali mai le Atua i talosaga ma faia vavega.”⁵

E moni, e pei ona aoao mai le Tusi a Mamona, “e faaalia le [Atua] lava ia te i latou uma o e talitonu ia te ia, i le mana o le Agaga Paia, ioe, i atunuu uma, ma ituaiga uma, ma gagana eseese, ma nuu e fai vavega tetele … i le fanauga a tagata, e tusa ma lo latou faatuatua” (2 Nifae 26:13).

Mo lenei aofia—o tagata matutua o loo umia le Perisitua Mekisateko ma alii talavou o e e le o toe mamao ona maua lea o lenei mana—O le a taulai atu la’u tautalaga i faamanuiaga faamalolo e aofia ai le mana o le perisitua. Ua tatou maua lenei mana o le perisitua ma e tatau ona tatou saunia uma mo lona faaaogaina tatau. O le faateleina ua i ai nei i faalavelave faalenatura ma luitau tautupe ua faaalia ai o le a tatou manaomia lenei mana e sili atu i le lumanai nai lo aso ua mavae.

E tele mau o loo aoao mai ai o auauna a le Alii “e faaee atu foi o latou lima i luga o e mamai, ma faamaloloina i latou” (Mareko 16:18).⁶ E tutupu vavega pe a faaaoga le pule o le perisitua e faamanuia ai e mamai. Ua ou vaai i nei vavega. A o ou talavou ma i le avea ai o se tagata matua, ua ou vaaia ai faamalologa ofoofogia e pei lava o vavega o loo tusia i tusitusiga paia, ma e faapena foi i le toatele o outou.

E lima vaega i le faaaogaina o le pule o le perisitua e faamanuia ai e mamai: (1) o le faauuga, (2) o le faamauina o le faauuga, (3) faatuatua, (4) o upu o le faamanuiaga, ma le (5) finagalo o le Alii.

O loo tele ina ta’ua i le Feagaiga Tuai le faauuga i le suauu o se vaega o se faamanuiaga na faia i le pule o le perisitua.⁷ O faauuga ua folafola mai e mo le faapaiaga⁸ ma atonu e mafai foi ona tagai i ai o se faailoga o faamanuiaga o le a liligi mai i le lagi, o se taunuuga o lenei galuega paia.

O le Feagaiga Fou tatou te faitau ai “e toatele foi o e mamai ua faauuina e Aposetolo a Iesu i le suauu, ma faamaloloina” (Mareko 6:13). O loo aoao mai i le tusi o Iakopo le matafaioi o le faauuga e faatatau i isi elemene i se faamanuiaga mo le faamalologa e ala i le pule o le perisitua:

“Ua ma’i ea so outou? Ina aami atu ia i toeaina o le ekalesia; ia latou tatalo mo ia, pe a uma ona faauu ia te ia i le suauu i le suafa o le Alii:

“O le tatalo foi e faia i le faatuatua e faaolaina ai le ma’i, e faatuina foi o ia e le Alii” (Iakopo 5:14–15).

A faauuina se tagata i le pule o le Perisitua Mekisateko, e faamauina le faauuga i lena lava pule e tasi. O le faamauina o se mea o lona uiga ia faamautuina, ia fusia ai mo lona faamoemoega atofaina. A faauuina e toeaina se tagata ma’i ma faamauina le faauuga, latou te tatalaina pupuni o le lagi mo le Alii e liligi mai ai faamanuiaga ua Ia finagalo ai mo le tagata puapuagatia.

Na aoao mai Peresitene Polika Iaga: “A tuu o’u lima i luga o le ulu o le tagata ma’i, ou te faamoemoe i le mana faamalolo ma le pule a le Atua ia oo atu i le tagata ma’i e ala atu ia te a’u, ma ia aluese ai le ma’i… . “Pe a tatou saunia, pe a o i tatou o ni auauna mama i luma o le Atua, e mafai ona tafe mai le mana mai le Silisili Ese e ala atu i le tino o le tagata o loo tuuina atu le faamanuiaga i le tino o le tagata ma’i, ma faapea ona malolo ai le ma’i… .”⁹

E ui ina tele tulaga ua faamaloloina ai tagata e faamanuiaina e le pule o le perisitua, ae e seāseā ona tatou ta’ua nei faamalologa i sauniga faitele ona ua lapataiina i tatou i faaaliga o ona po nei e aua nei “mitamita i [tatou lava] i nei mea, pe tautala ai i luma o le lalolagi; aua ua tuuina atu ia te outou mo lo outou manuia atoa ma le faaolataga” (MFF 84:73).

O le faatuatua e alagatatau mo le faamaloloina i mana o le lagi. O loo aoao mai foi le Tusi a Mamona “afai e leai se faatuatua i le fanauga a tagata, e le mafai e le Atua ona faia se vavega ia te i latou” (Eteru 12:12).¹⁰ I se saunoaga iloga e uiga i le faamanuiaina o e mamai, na saunoa ai Peresitene Spencer W. Kimball: “O le manaomia o le i ai o le faatuatua e tele lava ina manatu faatauvaa i ai. E foliga mai ua masani ona faalagolago atoa atu le tagata ma’i ma lona aiga i le mana o le perisitua ma le meaalofa o le faamalologa lea latou te faamoemoe ia i ai i le usoga e tuuina atu le faauuga, ae o le tiutetauave sili atu ua i ai lea i lē o loo faamanuiaina… . O le itu aupito taua lava o le faatuatua o le tagata pe afai o loo malamalama ma mafai ona tali atu le tagata lava ia. O le fetalaiga, ‘Ua e ola i lou faatuatua’ [Mataio 9:22] sa fetalai soo ai le Matai ma na toetoe lava ina a avea o se tali o se pese.”¹¹

Na fautuaina mai foi e Peresitene Kimball “o le faia soo o se faamanuiaga e ono avea ma se faailoga o le leai o se faatuatua, pe o le taumafai foi o le tagata ma’i e pasi atu le matafaioi o le atiina ae o le faatuatua i toeaina nai lo ia lava.” Sa ia faamatala e uiga i se tuafafine faatuatua na tuuina i ai se faamanuiaga faaleperisitua. Ina ua fesiligia o ia pe manao e toe fai sona faamanuiaga, na tali o ia: “Leai, ua uma ona faauuina ma faamanuiaina a’u. Ua uma ona fai le sauniga. Ua ia te au nei le matafaioi o le mauaina o lo’u faamanuiaga e ala i lo’u faatuatua.”¹²

O le isi vaega o se faamanuiaga faaleperisitua o upu o le faamanuiaga e saunoa i ai le toeaina pe a uma ona ia faamauina le faauuga. O nei upu e mafai ona matuai taua ae o ona anoupu e le taua, ma e le faamaumauina i faamaumauga a le Ekalesia. I nisi faamanuiaga faaleperisitua—e pei o se faamanuiaga faapeteriaka—o upu e tautalagia o le aano moni lea o le faamanuiaga. Ae o le faamanuiaga o se faamalologa o isi vaega o le faamanuiaga—o le faauuga, o le faamauga, faatuatua, ma le finagalo o le Alii—o elemene taua ia.

O le tulaga e tatau ona i ai, o le toeaina e faia le sauniga e matuai ola i le Agaga o le Alii lea e faapea ona ia silafia ai ma folafola atu ai le finagalo o le Alii i upu o le faamanuiaga. Na aoao mai Polika Iaga i e umia le perisitua, “o lou faamanuiaga ma lou tiute le ola ina ia e iloa le taimi e tulei mai ai le afioga a le Alii ia te oe ma le taimi e faaali mai ai le mafaufau o le Alii ia te oe.”¹³ Pe a tupu lena mea, e faataunuuina tonu lava ma faavavega le faamanuiaga na fofogaina. O nisi o mea maoae na tutupu, ua ou iloa ai le moni o musumusuga i se faamanuiaga o le faamalologa ma iloa ai o mea sa ou tautala atu ai, o le finagalo lea o le Alii. Ae peitai, e pei o le toatele o e faia ni faamanuiaga o faamalologa, sa masani ona ou tauivi ma le le mautonu i upu e tatau ona ou faia. Ona o ni mafuaaga eseese, e faateleina ai ma faaitiitia aafiaga o toeaina taitasi i le maualuga o le mataalia i uunaiga a le Agaga. O toeaina uma e tuuina atu se faamanuiaga e mafai ona uunaia i le mea o faanaunau i ai mo le tagata mafatia. O nei tulaga taitasi o le lē atoatoa, e mafai ona aafia ai upu tatou te tautatala atu ai.

O le mea e lelei ai, o upu e ta’u i se faamanuiaga o le faamalologa e le taua i taunuuga o lona faamalologa. Afai e lava le faatuatua o le tagata ma afai e finagalo i ai le Alii, o le a faamaloloina pe faamanuiaina le tagata mafatia, e tusa pe tautala ai le tagata e faia le faamanuiaga i na upu pe leai foi. I le isi itu, afai e gauai atu le tagata e faia le faamanuiaga i manaoga faaletagata pe vaivai foi, ma faapea ona fai atu ni poloaiga po o upu o le faamanuiaga e sili atu i mea ua filifili le Alii e tuuina mai e tusa ma le faatuatua o le tagata, o le a le faataunuuina na upu. O lea, uso e, e le tatau lava ona faalotolotolua se toeaina e auai i se faamanuiaga o se faamalologa ona o le mata’u na te le iloa ni upu e fai. O upu e fofogaina i le faamanuiaga o se faamalologa, e mafai ona faamalamalama ma faamalosia ai le faatuatua o i latou e faalogo i ai, ae o le taunuuga o le faamanuiaga e faalagolago lea i le faatuatua ma le finagalo o le Alii, ae le o upu e fofogaina e le toeaina e faia le faamanuiaga.

Alii talavou ma alii matutua, faamolemole ia faapitoa ona outou mātau ma le toto’a la’u faamatalaga lenei. A o tatou faaaogaina le mana e le masalomia o le perisitua a le Atua, ma a o tatou teufatuina Ana folafolaga o le a faafofoga ma tali mai o Ia i tatalo faatuatua, e ao ona tatou manatua i taimi uma, o le faatuatua ma le mana faamalolo o le perisitua, e le mafai ona aumaia ai se taunuuga e ese mai ma le finagalo o Le, ana le perisitua. O lenei mataupu faavae o loo aoaoina mai i le faaaliga lea na faatonuina ai toeaina o le Ekalesia e tuu atu o latou lima i luga o e mama’i. O le folafolaga a le Alii “o lē faatuatua ia te au ina ia faamaloloina, ma e le’i filifilia ia oti, o le a faamaloloina” (MFF 42:48; ua faatusilima mea e faamamafa). E faapena foi, i se isi faaaliga i ona po nei, ua tautino mai ai e le Alii a “ole atu [se tagata] e tusa ma le finagalo o le Atua … ua faia ai e pei ona ia ole atu” (MFF 46:30)¹⁴

Mai nei mea uma ua tatou iloa ai, e oo lava foi i auauna a le Alii e faaaogaina Lona mana paia i se tulaga ua i ai se faatuatua tele ina ia faamaloloina, e le mafai ona tuuina atu se faamanuiaga faaleperisitua o le a faamaloloina ai se tagata, pe afai o lena faamalologa e lē o le finagalo o le Alii.

I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Na ou lagonaina lena talitonuina i se lauga na tuuina atu e lo’u tausoga i le falelauasiga o se tamaitai talavou o lē na maliu i se gasegase tigaina. Sa ia tautalagia upu nei na muamua ou te’i ai ona faatoa ou malamalama ai lea: “Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia faamanuiaga faaleperisitua. Sa tusia lona igoa i lisi tatalo i le malumalu. O ia o le autu o le faitau selau o talosaga mo le toe faafoisia mai o lona malosi. Ma ou te iloa, ua lava ma totoe le faatuatua o lenei aiga e ai faamaloloina o ia, vagana ai o le finagalo o le Alii e foi atu o ia i le taimi nei.” Na ou lagonaina foi lena talitonuina i upu a se tamā o se isi teineitiiti lelei na maliu ona o le kanesa, i lona talavou. Sa ia tautino: “O le faatuatua o lo matou aiga o loo ia Iesu Keriso, ae e le faalagolago i taunuuga.” E tatagi pea le moni o na aoaoga ia te au. Tatou te faia mea uma tatou te mafaia mo le faamaloloina o sē pele, ona tatou faalagolago lea i le Alii mo le taunuuga.

Ou te molimau atu i le mana o le perisitua a le Atua, le mana o le tatalo o le faatuatua, ma le moni o nei mataupu faavae. Ae sili i lo mea uma, ou te molimau atu i le Alii o Iesu Keriso, e ona ia i tatou o ana auauna, o lona Toetu ua tatou maua ai le faamautinoaga o le tino ola pea, ma o lana Togiola foi ua tatou maua ai le avanoa mo le ola e faavavau, o le meaalofa e aupito sili o meaalofa uma a le Atua, i le suafa o Iesu Keriso, amene.