Ta’u Mai Tala ia Iesu

A tofi oe e te lauga i le faaiuga o le konafesi aoao, e te faalogologo i upu taitasi, ma mafaufau po o le a le vaega o lau lauga o le a laugaina a’o lei oo mai lou taimi. E leai ni autu e atofa mai, leai ni autu e fai faavaega. O le ala a le Alii, o le ala sili lava lea i taimi uma. Na te aveina taumafaiga taitasi ma le agaga tatalo a failauga taitasi, ma tuufaatasia ai se lagiga faaleagaga, e tumu i faaaliga ma le mana. O autu faisoo, o lea mataupu faavae e fau i lea mataupu faavae, o lapataiga faaperofeta, o folafolaga faagaeetia—o le ogatasi faalelagi o se vavega lava! Ou te molimau atu, o le konafesi ua tatou faalogologo atu ai ma lagonaina le mafaufau ma le finagalo o le Alii.

Sa faamatalaina e Peresitene Thomas S. Monson le tupulaga faia’e “o le tupulaga aupito silisili”¹ ma sa ia saunoa mai i a tatou talavou: “Ua outou o mai i lenei lalolagi i se taimi mamalu. Toetoe lava ina a leai se tuaoi o avanoa ua i o outou luma.”² Ona ia lapatai mai lea, “Ua tuuina mai i tatou i le lalolagi i taimi o faigata.”³ “O se taimi o le tuufau, ua fai ma masani a tagata le le amanaia ma solia tulafono a le Atua.”⁴ Ua siomia i tatou e le anoanoai o mea ua fuafuaina e tata’i ese ai la tatou gauai. “Ua faaaoga e le fili auala uma na te mafaia e maileia ai i tatou i lana upega o mea pepelo.”⁵

O lo tatou tiute le tausia o le tupulaga faia’e. Ua latou o mai i lenei lalolagi ma se tiutetauave taua ma se malosi tele faaleagaga. E le mafai ona tatou faatamavale i le auala e saunia ai i latou. O lo tatou lu’itau o ni matua ma ni faiaoga, e le ina ia faatupuina se fatu faaleagaga i o latou agaga, ae ia tapiliina le mumu o a latou fatu faaleagaga ua susulu mai i le afi o lo latou faatuatua i le muai olaga.

I le afiafi nei, ou te fia faamamafaina ai le augani a se tamaitiiti mai se pese a le Peraimeri:

I lo tatou lalolagi i le taimi nei, e manaomia e tamaiti taitasi, alii talavou taitasi, ma tamaitai talavou taitasi, lona lava liua i le upumoni. E manaomia e le tagata lava ia lona malamalama, lona faatuatua “tutumau ma le le mafaagaeetia”⁷ i le Alii o Iesu Keriso, tutoatasi mai matua, taitai o le autalavou, ma uo lagolagosua.

O tala ia Iesu e mafai ona pei o se matagi e tapili ai malala ola o le faatuatua i loto o a tatou fanau. Na fetalai mai Iesu, “O a’u nei le ala, ma le upu moni, ma le ola.”⁸ O tala ia Iesu e faamatala faafia e aumaia ai le faatuatua i le Alii o Iesu Keriso ma le malosiaga i le faavae o molimau. Mata e mafai ona e mafaufau i se meaalofa e sili atu ona taua mo a tatou fanau?

Pe ua mautu ea le soifua ma aoaoga a Iesu Keriso i mafaufau ma agaga o a tatou fanau? Pe latou te mafaufau ea i le soifuaga o le Faaola pe a latou taumanatunatu po o le a le mea e fai i o latou lava olaga? O le a tupu atili le taua o lenei mea i tausaga o lumanai.

Pe ua mafaufau ea a tatou fanau i le aufono i le muai olaga,⁹ lea na tautino mai ai e Iesu—o lē silisili i mea uma—e faapea, “O Au lenei, auina atu atu”?¹⁰ Pe o latou vaai i lo latou lava naunautai e auauna atu e mulimuli ai i Lana faataitaiga?

Pe latou te mafaufau ea e uiga i Lona fanau mai i se tulaga maualalo,¹¹ le Faaola o le lalolagi “ua taoto i se falemanu.”¹² Pe o fesoasoani ea ia i latou Ona tulaga sa i ai e malamalama lelei ai i le mea tonu e tuu ai oa a le lalolagi?

Pe o latou iloa ea sa faatele ona aoao mai Iesu “Ia outou ole atu ona outou maua ai lea”¹³ Pe gasolosolo ea i mafaufau o a tatou fanau Ana tatalo¹⁴ o le faafetai¹⁵ ma Ana olega i Lona Tama a o latou tootutuli e tatalo mo o latou lava popolega?

Pe ua tatou ta’u atu ea ia i latou le alofa o Iesu mo tamaiti, o lona tasiiina o i latou i ona aao, tatalo, ma tutulu mo i latou?¹⁶ Pe ua iloa e a tatou fanau o loo ua tu sauniuni mai Iesu “ma ona aao o faaloaloa mai e talia [i latou]”?¹⁷

Pe latou te maua ea le malosiaga i tala ia Iesu a o anapogi¹⁸—pe a tatou aoao atu ia i latou le tulafono o le anapogi?

I lo latou lava tuulafoaiina, pe ua iloa e a tatou fanau le lagona tuulafoaiina na oo i ai le Faaola ina ua tuua na o Ia e Ana uo, ma a o fesili atu o Ia i Ana Aposetolo, “Pe tou te fia o ese foi?”¹⁹

Pe ua lagonaina ea e a tatou fanau le mana o vavega a le Faaola? Sa faamaloloina e Iesu le lepela,²⁰ faapupula tauaso.²¹ Sa ia fagaina le 5,000,²² faatoafilemuina le sami,²³ ma faatuina mai Lasalo mai le oti.²⁴ Pe talitonu ea a tatou fanau “o le faatuatua e fai ai vavega,”²⁵ ma pe latou te tatalo ea mo ni vavega i o latou lava olaga?

Pe ua maua ea e a tatou fanau le lotototoa mai afioga a le Faaola i le pule o le sunako, “Aua e te mata’u, tau lava ina e faatuatua.”²⁶

Pe ua iloa ea e a tatou fanau e uiga i Lona soifua atoatoa,²⁷ Lana misiona lē manatu faapito, Lona faalataina ma le Faasatauroga²⁸ mataga? Pe ua tatou molimau atu ea ia te i latou i le mautinoa o Lona Toetu, ²⁹ o Lana asiasiga ia Sa Nifae i Amerika,³⁰ o Lona faaali atu i le Perofeta o Iosefa Samita i le Vao Paia?³¹

Pe o latou faamoemoe ea i Lona toe foi mamalu mai, pe a uma ona faasa’o o mea uma, ma tootutuli tulivae uma ma ta’uta’u atu e laulaufaiva uma o Iesu o le Keriso?³²

Pe o fai mai ea a tatou fanau: “Ta’u mai tala ia Iesu, ou te fia faalogo i ai”?³³

Mo le autalavou ma tamaiti: Ola e tusa ai ma o outou tiutetauave taua ma le malosi maoae faaleagaga. Saili ia outou iloa atili e uiga ia Iesu: tatala tusitusiga paia. O se tasi manatu, o le toe faitau lea i le tusi a Ioane ona talanoaina lea ma o outou matua, faiaoga, ma le tasi ma le isi.

Mo tama ma tina, o tamamatutua ma tinamatutua, ma i latou e leai ni a latou lava fanau, ae o loo faafaileleina ma le alolofa ia tamaiti ma le autalavou, o la’u fautuaga o le talanoa soo e uiga ia Iesu Keriso. O i Lona suafa paia le mana faaleagaga maoae. “E leai se isi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso.”³⁴

Mo tina o loo tausia a latou fanau e aunoa ma se tamā i le aiga, ou te folafola atu a outou tautalatala e uiga ia Iesu Keriso, o le a outou lagonaina le mana o le lagi o faamanuiaina outou.

Ina ua maliu lana tane, sa tausia e Sister Stella Oaks le la fanau laiti e toatolu (e aofia ai ma Elder Dallin H. Oaks³⁵) a o ia o se tina ua nofo toatasi. Fai mai a ia: “Na tuuina mai ia te a’u ia ou iloa e alofa le Alii ia te au ma o le a lava lo’u malosi mo la’u misiona. Na ou lagonaina le siomia [o a’u] i le alofa … [ma iloa ai] o le a ia [lagolagoina i matou] i mea faigata [o le a] tulai mai.”³⁶

Ou te tuuina atu se talosaga faapitoa lava i tamā: Faamolemole ia avea oe o se vaega taua o le talanoa atu i lau fanau e uiga i le Faaola. Latou te manaomia ni faamatalaga faamaonia o lou faatuatua, faatasi ai ma faamatalaga faamaonia mai lo latou tina.

E ui atonu e i ai ni taimi e le faalogo atu ai se tamaitiiti ma se loto talitonu, ae o le a tumau pea lau molimau i le Faaola i lona mafaufau ma le loto. Pe tou te manatua le tala a Alema lea na filifilia le ala sese? I lona toe foi mai na ia fai mai ai:

“Sa ou manatua … lo’u tama [o tautala] … e uiga i le afio mai … o Iesu Keriso … e togiola agasala a le lalolagi.

“Ina o taofi atu e lo’u loto i lenei manatu, sa ou tagi ifo i lo’u loto: Iesu e, le Alo o le Atua, ia e alofa mai ia te au.”³⁷

Afai e le o faalogo atu se tamaitiiti, aua e te faanoanoa. O loo i ai le taimi ma le upumoni i lau itu. A oo mai le taimi sa’o, o le a latou toe manatua au upu e faapei o fetalaia mai e le lagi. O le a le tuua lava e lau molimau lau fanau.

A o e talanoa atu ma le migao e uiga i le Faaola—i le taavale, i luga o le pasi, i le laulau ‘ai, a o outou tootutuli i le tatalo, i le taimi o suesuega o tusitusiga paia, po o ni talanoaga i le leva o le po—o le a i ai le Agaga o le Alii i au upu.³⁸

A e faia le mea sili e te mafaia, o le a faifai malie lava ona oo mai le molimau a Iesu i loto o lau fanau. O le a latou o atu i lo latou Tama Faalelagi i le tatalo faamaulalo ma lagonaina Lana uunaiga e ala i le mana o le Agaga Paia. O se faatuatua e malosi atu o le tagata lava ia o le a saunia ai [lau fanau] mo luitau o le a mautinoa latou te fetaiai.³⁹

Sa ou feiloai atu ia Bill Forrest ma Debbie Hutchings a o matou aooga i le Iunivesite o Polika Iaga. Ua foi mai Bill mai lana misiona. Sa mafana lo la’ua alofa ma Debbie ma sa faaipoipo ai loa i le Malumalu o Oakland Kalefonia. Sa faavae lo la’ua aiga i Mesa, i Arisona, ma sa faamanuiaina i la’ua i ni atalii e toalima ma afafine e toalua. Sa aoao e Bill ma Debbie la la’ua fanau ia alolofa i le Alii o Iesu Keriso, e faapei ona sa la’ua alolofa ai ia te Ia. Fai mai lo la alo o Elder Daniel Forrest, lea o loo galue nei i le Misiona a Mexico Oaxaca, “O taeao uma lava e le’i misi lo matou i ai iina i le laulau a’o lei amataina a’oga, e faitau ma talanoaina ia tusitusiga paia.”

E manatua lelei e lo la’ua afafine, o Kara, lea ua faaipoipo ma ua toalua lana lava fanau, le alu o lona tama e momoli o ia i gaoioiga i le taeao po i le aoga maualuga. Fai mai a ia, “E fiafia tele lo’u tama e sii mai upusii, o mau ma solo [ma o na taeao po ma te o ai i le taavale] ma te faataitai ai ona taulotoina.” O se tasi o ana mau e fiafia i ai o le, “Ia manatua, ia manatua lava, e ao ina oulua atiina ae lo oulua faavae i luga o le papa o lo tatou Togiola, o le Keriso lea, o le Alo o le Atua. Pe a faaoo mai e le tiapolo ana matagi tetele, … e le malo ai [o ia] ia te oulua e toso ifo ai oulua … ona o le papa ua atiina ae ai oulua.”⁴⁰

I le Aso Faraile i luma mai o le Aso Sa o le Eseta i le tausaga e 2000, ua atoa lelei le 10 tausaga talu ai, sa avea ai Bill Forrest ma Epikopo o le Uarota a Estate Groves i Arisona. A o alu atu lana taavale e faigaluega, faatoa tasi le maila (1.6 km) mai le fale, sa so’a ai lana taavale e se loli tele la’u iliili. E lei leva ona te’a ese mai Bill ae tuua loa e Debbie ma le fanau le fale, ma sa faafuasei ona latou tau mai i le mea na tupu ai le faalavelave. Na maliu Bill i le faalavelave. Na faafuasei ona aveina atu le agaga ola pea o lenei tane ma se tamā faapelepele ia te Ia o lē na faatoilaloina le oti, o le Alo o le Atua, o lona Toetu mamalu na latou faamanatuina faatasi i lena Aso Sa o le Eseta.

Na faapefea ona maua e Debbie ma lana fanau e toafitu (o le uii e na o le lima) le malosi sa latou manaomia? Na ta’u mai ia te a’u talu ai nei e Kara, o lē sa 15 ona tausaga i le taimi na maliu ai lona tama; “Ou te faafetai lava i lo’u [tina ma lo’u tama] mo auala sa la aoaoina ai a’u [e uiga i le Faaola]. Sa matou tatalaina faatasi ia tusitusiga paia, matou tatalo faatasi, ma o i la’ua o faataitaiga o le alofa moni [o le Faaola], alofa, ma le onosai… . O le Eseta [o] se taimi faapelepele i lo’u olaga i tausaga taitasi, pe a ou toe mafaufau i le soifua, misiona, ma le Toetu o lo tatou Faaola, ma e faamanatu mai ai lava ia te au le olaga o lo’u tamā faalelalolagi.”

Na saunoa Elder Daniel Forrest; “Sa 10 o’u tausaga ina ua maliu lo’u tama. O se taimi faigata… . O lo’u tina sa avea pea o ia ma se faataitaiga o aoaoga a le Faaola. Ou te tauaveina le pine o le igoa o lo’u tama mai lana misiona i Sepania. O ni upusii e [lua] o upusii ou te fiafia lava i ai mai lo’u tama [o]: ‘E mafai e ni alii se toalua ona faia soo se mea pau lava le mea o le tasi o i la’ua o le Alii’ ma le ‘E tatau lava ona avea le Faaola ma o tatou faavae. A aunoa ma lena, ua tatou fememea’i.’”

Ua faatumulia loto o le fanau a le au Forrest i le faatuatua ia Iesu Keriso. I le faaiuga o lenei vaiaso o le Eseta, ua 10 ai tausaga talu ona maliu lo latou tama, ua latou matua misia lava o ia, ae peitai ua “faaumatia le tiga o le oti ia Keriso.”⁴¹ Ua latou iloa, ona o le meaalofa e le mafuatiaina a le Faaola, e mafai ai ona latou toe faatasi ma lo latou tamā faalelalolagi ma lo latou Tama Faalelagi.

Ta’u mai ia te au tala ia Iesu.

E le o toe mamao ona tatou faalogo atu lea i le perofeta a le Atua. I le ta’ua ai o Lana perofeta, na fetalai mai le Alii, “O lana upu o le a outou talia, e pei lava o loo alu atu mai ia te a’u.”⁴² Ou te molimau atu o Peresitene Thomas S. Monson o le fofoga taumomoli o le Alii i le fogaeleele.

Ou te molimau atu o Iesu o le Keriso, le Faaola o tagata uma. O Lona soifua, Lana Togiola, Lona Toetu, Lona toe afio mai o loo faatalitali atu i ai, e moni ma e mautinoa e pei o le oso a’e o le la. Ia faamanuina Lona suafa e faavavau faavavau lava⁴³ I le suafa paia o Iesu Keriso, amene.