Tina ma Fanau Teine

Uso e ma tuafafine, o le ono masina talu ai, na ou lauga ai i le sauniga a le au perisitua o le konafesi aoao i tama ma atalii. E pei ona outou mateia, na tuufesili mai foi la’u fanau teine e to’a 5, fanau teine a la’u fanau e to’a 24, ma le faateleina pea o le numera o fanau teine a a latou fanau, mo lea lava foi taulaiga e tasi. O le aso la, o le a ou talanoa faapitoa atu ai i tina ma fanau teine o le Ekalesia.

E faavavau ona i ai se faatosinaga taua a si ou toalua pele o Barbara, i le ma fanau teine ma a latou fanau teine; ma e faapena foi i latou, ia te ia. E faatino e tina ma fanau teine se tiute taua i le fesoasoani lea o le tasi i le isi ia iloa o latou agavaa e le masino, e ui lava i faatosinaga faalotovaivai tagata a se lalolagi ua faaleagaina ma faaseseina tulaga faaletamaitai ma faaletina.

Ua toeitiiti atoa le seneturi ua mavae talu ona saunoa mai Peresitene Iosefa F. Samita i tamaitai o le Ekalesia e faapea: “E le mo outou ona taitaiina e tamaitai o le lalolagi, ae e tatau ona outou … taitaia tamaitai o le lalolagi i mea uma e tauleleia, mea uma e faaleAtua, mea uma e faagaeetia ai ma … mama i le fanau a tagata” (Teachings of Presidents of the Church: Joseph F. Smith [1998], 184).

Tuafafine, o i matou, o o outou tuagane, e le mafai ona matou faia le mea ua tofia faalelagi i ai outou, na fai mai lava a o lei faavaeina le lalolagi. E mafai ona matou taumafai i ai, ae e le mafai lava ona matou faamoemoe e faataitaia a outou meaalofa tulaga ese. E leai se isi lava mea i le lalolagi e sili ona patino, sili ona faamalosiauina, pe sili ona suia ai olaga e pei o uunaiga a se tamaitai amiotonu.

Ua ou malamalama o nisi o outou tamaitai talavou e le o i ai ni tina e mafai ona outou talanoaina faatasi nei mataupu. Ma e toatele foi outou tamaitai e le o i ai i le taimi nei o o outou olaga ni fanau teine. Ae talu ai ua i ai i tamaitai uma i o latou natura paia ia taleni ua fai ma o latou tofi ma le tulaga faatausimea e avea ai ma se tina, o lea o le tele lava o lau tautalaga o le a tutusa lava le faatatauga i tinamatutua, uso o tina ma tuafafine o tama, uso, toalua o tama, tina faaletulafono, taitai ma isi faufautua o e o nisi taimi latou te faatumuina avanoa mo nei mafutaga taua o le tina ma le tama teine.

Tamaitai talavou, e ese le faamemelo o o outou tina ia te outou. Latou te iloa atu ia te outou le folafolaga o augatupulaga i le lumanai. O mea uma tou te ausia, o luitau uma tou te faatoilaloina, e aumaia ai ia i latou le olioli mama. Ma e faapena foi, o o outou popolega ma faanoanoaga o o latou popolega ma faanoanoaga foi na.

O le asō, ou te fia tuuina atu ai ia te outou tamaitai talavou ni fautuaga i auala e faaaoga lelei ai avanoa o la oulua mafutaga ma lou tina. Ona ou faasoaina atu lea o ni nai manatu i tina e uiga i auala e mafai ona latou faaaoga atoa ai a latou uunaiga i a latou fanau teine faapea foi ma isi tagata o o latou aiga.

O le mea e faanoanoa ai, ua matuai faigofie lava ona faaalia le fenumiai ma le faaletonu o le tulaga faaletamaitai i le lalolagi i aso nei. Ua tumu peau o le ea, mekasini pulepuletutu, ma ua faaalia i lauie o tifaga i tamaitai lē tausaafia, lē mama, ma le lē tapasa—e faia nei mea uma ae o loo faalauiloaina e le lalolagi. Na saunoa faaperofeta le Aposetolo o Paulo e uiga i “taimi faigata” o le a oo mai i aso amuli, ma sa ta’ua faapitoa ai se mea atonu na faapitoa lava le foliga faigata ia te ia: “fafine valelea, ua mafatia i agasala, o e ua taitaieseina e tuinanau eseese” (2 Timoteo 3:6). O aganuu lauiloa i aso nei ua tele ina faia ai tamaitai ia foliga e faavalevalea, matuai leai ni mafaufau, ma vaivai. Ua fai ai i latou e pei o se mea e leai se taua ma le faaaloalogia ai i latou ma faapea mai ai e mafai ona latou tuua o latou faailoga i le tagata i na o faatosinaga lava—o le savali aupito matautia lea e faigofie ona auina atu e le tiapolo i tamaitai e uiga ia i latou lava.

O lea, au tamaitai talavou pele, ou te uunaia outou ma lo’u loto atoa, e aua nei outou vaai atu i aganuu i aso nei mo a outou tagata e faataitai i ai ma tagata e avea ma o outou faufautua. Faamolemole vaai atu i o outou tina faamaoni mo se mamanu e mulimuli ai. Ia outou faataitai ia i latou, ae le o tagata lauiloa i ata tifaga o o latou tulaga faatauaina e le o tulaga faatauaina ia o le Alii, ma o o latou tulaga faatauaina e le atagia ai se vaaiga e faavavau. Vaai atu i lou tina. Aoao mai ona malosiaga, lona lototele, ma lona faamaoni. Faalogo ia te ia. Atonu e le o ia o se tagata e atamai i le faiga o feau tusitusi i telefoni feavaeai; atonu foi e leai sana itulau patino i le Initoneti [Facebook]. Ae a oo loa i mataupu e uiga i le loto ma mea a le Alii, e matuai tumu o ia i le atamai. A outou oo atu i le taimi tou te faaipoipo ai ma avea ma se tina talavou, o le a avea o ia ma ou punavai sili o le atamai. E leai se isi tagata i le lalolagi lenei e tutusa lona alofa ia te oe pe naunau foi e ositaulaga ni mea se tele e tomatauina ai oe ma fesoasoani atu ia e maua ai le fiafia—i lenei olaga ma le faavavau.

Ia outou alolofa i o outou tina, ou tuafafine talavou e. Faaaloalo ia te ia. Faalogo ia te ia. Faatuatua ia te ia. E naunau o ia i le mea e sili ona lelei mo oe. E popole o ia mo lou saogalemu ma lou fiafia e faavavau. O lea ia e agalelei ia te ia. Ia e onosai i ona le atoatoa, aua e i ai ona vaivaiga. E tofu uma lava i tatou ma vaivaiga.

Ia sei ou faasoa atu ni nai manatu ia te outou tina e uiga i le tiutetauave faapitoa o loo e faia i olaga o lau fanau teine. E i ai se uo a le matou aiga e masani ona malaga faatasi ma tagata o lona aiga lautele. O le mea autu lava na te matauina pe a maea ia malaga taitasi o le auala e tutusa lelei ai amio a tamaitai talavou ma o latou tina. Afai e faautauta tina, e faapena foi a latou fanau teine. Afai e tausaafia tina, e faapena foi teineiti. Afai e fai ni seevae tosotoso o tina ma isi lavalava o aso fai soo i sauniga faamanatuga, e faapena foi a latou fanau teine. Tina, o a outou faataitaiga e matuai taua i lau fanau teine—e tusa lava pe latou te le faailoaina atu.

I le talafaasolopito o le lalolagi, o tamaitai lava na avea ma faiaoga o amioga lelei uma. O lena aoaoga e amata i le luelue [a o pepe] ma faaauau atu ai i olaga o a latou fanau. O aso nei, ua osofaia lo tatou lalolagi i savali matautia ma le matuai sese e uiga i le tulaga faaletamaitai ma le faaletina. O le mulimuli ai i nei savali e mafai ona ui atu ai lau fanau teine i ala o le agasala ma le faataumaoia o le tagata lava ia. Atonu e le malamalama i ai lau fanau teine seiloga e te ta’uina atu ia i latou—pe sili atu foi, seiloga e te faaali atu ia i latou le ala e fai ai filifiliga lelei. O le avea ai ma tina o Isaraelu, o outou o malutaga muamua a a outou fanau teine mai mea taufaasee a le lalolagi.

Ia tina, ou te iloa e i ai taimi e foliga ai e le o faalogo atu a tatou fanau i lesona o loo tatou taumafai e aoao atu ia i latou. Talitonu mai, ua ou vaai i le pupula lena a le tupulaga i le taimi tonu ua e faapea ua e oo atu ai i le vaega e sili ona lelei o au aoaoga. Ou te folafola atu ia te outou e tusa lava pe ua e manatu e le o faalogo atu lau tama teine i se mea e tasi na e fai atu ai, o loo aoao lava o ia mai ia te oe a o ia matauina oe e vaai ai pe tutusa au amioga ma au faamatalaga. E talitonu na saunoa Ralph Waldo Emerson, “Ua matuai leotele lava mea o loo e faia ua le mafai ai ona ou lagona atu au tala” (see Ralph Keyes, The Quote Verifier [2006], 56).

Aoao lau fanau teine ia saili le olioli i le faafaileleina o fanau. O iina e mafai ona maua ai e lo latou alofa ma taleni le aoga e sili ona faavavau. Mafaufau i le anotusi lenei le poloaiga a Peresitene Harold B. Lee e faapea “o le galuega aupito taua … o le a e faia, o le a faia lea i totonu o puipui o lou lava aiga” (Teachings of Presidents of the Church: Harold B. Lee [2000], 134). Ioe, ua moni lenei aoaoga ia i tatou uma, ae e sili atu le mamana pe a mafaufau i le mafutaga a tina ma fanau teine.

Tina, aoao lau fanau teine o se afafine faamaoni o le Atua e aloese mai le faaosoosoga o le faitatala po o le faamasino atu o le tasi ma le isi. I se lauga i le Aualofa i Navu, na fautua mai ai le Perofeta o Iosefa Samita, “o le laulaufaiva o se mea e le mataofia—ia taofiofi tou laulaufaiva mai mea e leai se taua” (Teachings of Presidents of the Church: Joseph Smith [2007], 455).

I ni tausaga e lei mamao atu, na i ai ni tusitusiga se tele, tusi, ma ata tifaga na tusia e uiga i tamaitai ma teineiti e faitatala ma “le alolofa.” E taumafai lava i taimi uma Satani e faavaivaia le mea aupito faapelepele o le uiga paia o se tina—o le natura o le faafaileleina.

O se mafutaga a le tina ma lana tama teine o se nofoaga lea e aoao ai e se tama teine le tulaga o le faafailele e ala i le faafaileleina. E alofaina o ia. E aoaoina o ia ma iloa muamua lava le lagona e maua o le i ai o se isi e alofa moni ia te ia, e aoai ai o ia a o faaauau ona ia faamalosiauina ma talitonu ia te ia i le taimi lava lea e tasi.

Ia manatua tuafafine, o le Atua o le punavai lea o le mana o amioga lelei uma ma le faaleagaga. E mafai ona tatou maua lena mana e ala i le osifeagaiga ma Ia ma tausi na feagaiga. Tina, aoao a outou fanau teine i le taua o le osia o feagaiga, ona faaali atu lea ia i latou le ala e tausi ai na feagaiga i se auala o le a latou naunau ai e ola agavaa e o atu i le malumalu.

I le lalolagi i aso nei, o le uiga o lenei mea o le talanoa atu i lau fanau teine e uiga i mataupu tau i feusuaiga. Ua ola ae a outou fanau teine faapea foi a outou fanau tama, i se lalolagi ua taliaina faasoloatoa ai le vave tafafaovale faasamasamanoa ma le faia o tulaga lē mama. Ua faalauiloaina tamaitai lē tausaafia ma lē mama, ma ua masani ona viia ma faata’ita’i i ai. E ui ina i ai auala e mafai ona tatou faia i o tatou fale ma aiga e tuuitiitia ai lo tatou aafia i nei mea le lelei o le olaga i aso nei, ae e le mafai ona aloese atoa ai lau fanau teine i savali faalauiloa o feusuaiga ma faatosinaga o loo siomia ai i latou. E tatau ona outou faia ni talanoaga faisoo, ma le le taofiofia lea tou te aoao atu ai lau fanau teine i mea moni e uiga i nei mataupu.

Mo se faataitaiga, e tatau ona latou malamalama a fai ni o latou ofu e fufusi tele, pupuu tele, po o ni ofu e maualalalo tele ua, ua le gata ina latou auina atu se feau sese i alii talavou latou te miomio faatasi, ae ua latou faaputuputuina foi i o latou mafaufau le talitonuga sese e faapea, o le tulaga faatauaina o se tamaitai e fitoitonu lava lea i ona foliga faaletino. O lenei faauigaga e lei i ai lava, ma o le a lē i ai lava i le faauigaga amiotonu o se afafine faamaoni o le Atua. E tatau ma e manaomia ona latou faalogo i lenei aoaoga—ia manino ma fai soo atu pea—mai ou laugutu, ma e tatau ma e manaomia ona latou vaaia o faia ma le sa’o ma faifai pea ia tulaga faatauaina i le faiga o ou lava laei, o ou foliga vaaia, ma le ola tausaafia.

O le a tele ina osia ma tausia e le autalavou uma ia feagaiga pe a latou aoao ia iloa le mafutaga ma le siufofoga o le Agaga. Aoao lau fanau teine i mea a le Agaga. Faasino atu i latou i tusitusiga paia. Tuu atu ia i latou ni aafiaga o le a fesoasoani latou te teufatuina ai faamanuiaga o le mana o le perisitua i o latou olaga. E ala atu i le tausia o feagaiga o le a latou iloa ai ona faalogo i le siufofoga o le Alii ma maua faaaliga faaletagata lava ia. O le a faafofoga moni mai ma tali mai le Atua ia latou talosaga. O le autu a le Mutuale mo le 2010 e aoga i o tatou tupulaga talavou faapea foi ia i tatou uma: “Ia e faamalosi ma lototele; aua e te fefe, aua e te mata’u; aua o Ieova lou Atua o loo ia te oe i mea uma e te alu i ai” (Iosua 1:9). O le a faapea ona taitai saogalemu atu ai i latou i faamanuiaga o le maota o le Alii.

Ia mautinoa ua latou iloa o le tausia o feagaiga o le auala aupito saogalemu lea i le fiafia e faavavau. Ma afai e manaomia, aoao i latou i le ala e salamo ai, ma le auala e tumau ai i le mama ma le agavaa.

Ia, afai o se upu lenei na outou faalogo muamua i ai, ou uso e ma tuafafine, aua ua ou talanoa atu i matua ma a latou fanau mo konafesi aoao sosoo e tolu. O Aperila o le tausaga ua mavae na ou uunaia ai le autalavou ia “aoao i lesona mai taimi ua tuanai.” Mai lena lauga ou te sii mai ai: “Afai e te naunau e faalogo ma aoao, o nisi o aoaoga e sili ona ’anoa e maua mai ia i latou o e na muamua atu ia te outou… . Oka se matagofie o le a i ai lou olaga pe afai e te mulimuli i le faataitaiga faatamalii o soo faamaoni o Keriso” (“Learning the Lessons of the Past,” Liahona, May 2009, 31, 33).

O Oketopa na sei mavae atu nei sa ou talanoa atu ai i tamā ma atalii i le sauniga perisitua, ae o nei ua matele lava ina ou talanoa atu i tina ma fanau teine. I ia tulaga taitasi na eseese lava a’u savali, ae tutusa lava. Ou te faamoemoe o loo outou faafofoga mai ma iloa ai se mamanu ma faalogoina ai se savali mausali ma ogatasi, e talafeauga ma nei aso e gata ai—e taua—e faafofoga i ai matua ma fanau ma aoao mai lē tasi ma lē isi. O nei savali na ou tautala atu ai ua lē na o ni mataupu maaleale. O [nei aoaoga] o le ute, o le totonugalemu o le fuafuaga a le Atua mo lo tatou fiafia ma le filemu e faavavau.

O le a fesoasoani atu le Ekalesia i soo se taimi matou te mafai ai. Matou te i ai iina e fesoasoani ma lagolago atu ia te outou o ni matua ma fanau. Ae o le aiga o le nofoaga aupito taua lea e saunia ai le autalavou o aso nei, e taitai aiga ma le Ekalesia a taeao. E fitoitonu ia i tatou taitoatasi o tina ma tamā ina ia faia mea uma tatou te mafaia e saunia ai a tatou tupulaga talavou ia avea o ni alii ma ni tamaitai faamaoni ma amiotonu. O le aiga o le nofoaga e ao ona tatou aoao atu ai le talalelei e ala i le upu ma faataitaiga.

E faaiu atu la’u fautuaga i le aotelega faaperofeta lenei mai ia Peresitene Iosefa F. Samita: “O a tatou fegalegaleaiga [faaleaiga] e le o faamoemoeina atoa mo lenei olaga, mo le taimi nei, a o tatou taueseeseina mai le faavavau. Tatou te ola mo le olaga nei ma mo le faavavau. Tatou te faia ni fegalegaleaiga ma mafutaga mo le olaga nei ma le faavavau atoa… . O ai nisi e ese mai le Au Paia o Aso e Gata Ai o loo mafaufau i le lagona e faapea, o le a tatou faaauauina le faalapotopotoga o le aiga i tala atu o le tuugamau? o le tamā, le tina, ma le fanau e iloa e le tasi le isi … lenei faalapotopotoga o le aiga o se iunite sili ma le atoatoa o le faatulagaga o le galuega a le Atua, ma ua faamoemoe uma o le taunuuga e faaauau i le olaga nei ma le faavavau?” (Teachings: Joseph F. Smith, 385, 386).

Ia faamanuia le Atua ia tatou aoao atu, faafailele, ma saunia e le tasi le isi i totonu o puipui o o tatou aiga mo le galuega tele lea e ao ona faia e i tatou uma i le taimi nei ma le lumanai, o la’u tatalo lea, i le suafa o le Alii o Iesu Keriso, amene.