Ua Fesoasoani le Faiga Fou o Savali i Tuafafine e Faaleleia ai le Avea ma Faiaoga Asiasi
I le masina o Iulai 2010, o le a maua ai e tamaitai o le Aualofa ma i latou ua totogi saofaga i mekasini o le Liahona ma le Ensign se suiga i le faiga masani o le Savali a Faiaoga Asiasi.
“Matou te mananao i faiaoga asiasi uma ia malamalama o le faiaoga asiasi, o se valaauga mai le Alii ma ia talia lona tofiga e alofa ai, auauna atu, aoao atu, ma auauna atu i se isi uso ma mafaufau i ai i lena mea,” o le saunoaga lea a Julie B. Beck, peresitene aoao o le Aualofa.
O le faiga fou o le savali o le a fesoasoani i tamaitai e malamalama ai i le faamoemoega o le Aualofa, aoao atu mataupu faavae e fesoasoani ai i tamaitai e faaaoga le faamoemoega i o latou olaga, saunia se vaaiga faasolopito, ma ofoina atu ni fautuaga i le auala e mafai ai e tamaitai ona atili lelei le vaavaaiga ma le faamalolosia o isi uso.
“O Le Savali a Faiaoga Asiasi o se meafaigaluega i lima o se faiaoga asiasi. A o ia suesue i savali ma mafaufau i uso [ na te asia] o le a ia iloa le mea e tatau ona faasoa atu ia i latou ma le mea e tatau ona faia mo i latou,” o le tala lea a Sister Beck.
O se faataitaiga lenei o le Savali fou a Faiaoga Asiasi, faatasi ai ma faamatalaga o ona itu fou.
Faatonuga
O Faamoemoega o le Aualofa
Savali
Fesili mo le Auaunaga
Fesili o le Faaaogaina
Mai Lo Tatou Talafaasolopito
Mai i Tusitusiga Paia
O Ni Isi Faamatalaga
E fesoasoani faatonuga i faiaoga asiasi e iloa ai pe faapefea ona aoao atu ma faaaoga le savali.
Ua faaopoopo i ai faamoemoega o le Aualofa e faamanatu atu ai i tamaitai ia tiutetauave o le Aualofa: ia faateleina le faatuatua ma le amiotonu faaletagata lava ia, faamalolosia aiga ma auaiga, ma saili atu ma fesoasoani ia i latou e manaomia le fesoasoani.
O le savali autu o le a ofoina atu ai se fautuaga patino talafeauga ma tuusao mai i le au peresitene aoao o le Aualofa.
O le mafuaaga o lenei fesili o le fesoasoani lea i faiaoga asiasi e galulue e ala i musumusuga e auauna atu i tuafafine o loo latou aoaoina.
Ua faamoemoe lenei fesili e uunaia ai le faatinoga e tamaitai taitoatasi o le Aualofa ma fesoasoani ai ia te ia e faaaoga le savali i lona lava olaga.
O le faitauina o le talatuu viia o le Aualofa, e mafai ai e tamaitai ona maua musumusuga mai le faalapotopotoga sa i ai i popofou o le Ekalesia ma le polokalama ua i ai nei a le Aualofa. “E musuia i tatou e ala i a latou osigataulaga ma le naunau e faatino la tatou pitolaau i le fausiaina o le malo o le Alii i lo tatou vaitau o le auaunaga,” o le saunoaga lea a Sister Beck.
O le a fesoasoani nei mau faatusi paia e faalautele ai le suesue, aoao atu, ma le faaaogaina e le tagata lava ia o le savali.
E mafai ona maua isi sootaga i isi punaoa i le itulau Uepi a le Aualofa i le, reliefsociety.lds.org.