Haʻi Fakataha ʻi he Folofola ʻa e ʻOtuá

Ko e taha ʻo e ngaahi meʻa mahuʻinga kuo foua ʻe he kau finemui ko ʻení fekauʻaki mo e folofolá ko hono kumi ʻo e tali ki heʻenau ngaahi fehuʻí ʻi he ako ʻo e folofolá.

Ko e taimi ʻe niʻihi ʻi hono ako ʻe Selaia Kulusi (Sariah Gruse), taʻu 16, ʻa e folofolá, ʻokú ne pehē ʻoku ʻasi lelei hake pē ha tali ia he pēsí. “Ka ʻoku meimei ke ʻikai ke u toe maʻu ʻe au ʻa e potu folofola ko iá, koeʻuhí he koe ngaahi fakakaukau mo e Laumālie naʻá ku maʻu fakataha mo iá naʻá ne tokoniʻi moʻoni aú.”

Ne foua ʻe Tenisi Leina (Denise Reiner), taʻu 16, ʻa e ngaahi meʻa tatau. ʻOkú ne manatuʻi ʻa e ʻi ai haʻane fehuʻi, peá ne fakaava ʻene folofolá, ʻo ne maʻu ʻa e talí ʻi he peesi naʻá ne fakaava haké. Naʻe ueʻi ia ʻe he meʻa ko ʻeni ne hokó, ka ko e taimi lahi, ʻokú ne pehē, “ ʻokú te fakatokangaʻi ʻoku tākiekina koe ʻo kiʻi lahi ange, pea ʻokú ke maʻu moʻoni e tali ki hoʻo ngaahi fehuʻí ʻi he taimi ʻokú ke toutou lau maʻu ai pē ʻa e folofolá.”

ʻOku tui ʻa e kau finemui ko ʻení ʻoku tokoniʻi kitautolu ʻe he folofolá ke tau taha ko e Kāingalotu ʻi he Siasi ʻo Kalaisí. ʻOku pehē ʻe ʻElisapeti Kalake, taʻu 16, “Ko e ongoongoleleí ʻoku ʻi he folofolá. ʻOku ʻikai totonu ia ke tau fakafekiki pe fakafepaki ki ai. ʻOku ʻi ai ʻa e ngaahi tefitoʻi moʻoní. Te nau lava ʻo tokoni ke tau uouangataha.”

ʻOku tui tatau mo Selaia: “ʻOku tatau ʻa e ongoongoleleí ʻi he funga māmaní koeʻuhí ko e folofolá. ʻOku tatau ai pē ia pe ko e fē feituʻu te ke ʻalu ai he māmaní. Te ke lava ʻo ongoʻi lata ʻi he lotú koeʻuhí, he te ke maʻu ʻa e ngaahi akonaki tatau pē mo e ngaahi tefitoʻi tui tatau pē.”

ʻOku tui ʻa Sela Kalake, taʻu 17, ko e Tohi ʻa Molomoná ʻoku mātuʻaki mahuʻinga “koeʻuhí he ʻoku fakamatalaʻi mahino ai ʻa e ongoongoleleí. Kapau te tau muimui ai mo e ngaahi folofola kehé, te ne tokoniʻi kitautolu ke tau hoko ʻo taha mo uouangataha maʻu pē.”

ʻOku pehē ʻe ʻElisapeti, ʻoku paotoloaki ʻe he uouangataha ko ʻení ʻa e Laumālié. “Ko e taimi ʻoku tau loto taha ai mo e ongoongoleleí, te ke lava leva ke ongoʻi ʻa e Laumālié ʻi he taimi ʻoku akoʻi aí. Ka ʻi ai ha laumālie ʻo e fakafekiki, he ʻikai ke ke teitei ongoʻi ʻe koe ʻa e Laumālié.”

Ko ʻene aʻu mai ko ia ki hono fakatupulaki ha mahino lelei ange ʻo e folofolá, ʻoku tui tatau kotoa ʻa e kau finemui ko ʻení ki he hoko ʻa e seminelí ko ha meʻa ʻoku ʻikai lava ke liʻaki. ʻOku pehē ʻe Tenisi, “ʻOkú ke ako lahi ʻi he seminelí fekauʻaki mo e kakai ʻi he folofolá pea mo hono hisitōliá kakato.”

ʻOku pehē ʻe Lesilī Leina, taʻu 17, “Ko e seminelí ko ha konga ia ʻo ʻeku moʻuí. ʻOku ou ʻiloʻi ʻoku mahuʻinga. ʻOku totonu ke ke ako fakafoʻituitui, pea ko e seminelí leva ke mou ako fakataha ai.”

ʻOku tānaki mai ʻe Sela ʻo pehē, “ ʻOku ou nofo ʻamanaki maʻu pē ke ako ʻa e folofolá ʻi he pongipongi kotoa ʻi he seminelí. Kuo fakamālohia ʻeku fakamoʻoní. Te u pehē ko ha taimi makehe ia.”

Kia Selá, kuo hoko ʻa e seminelí ko ha feituʻu ke vahevahe ai ʻene ngaahi ongó. ʻOkú ne pehē, “Naʻe faingataʻa ʻi he kamataʻangá kiate au koeʻuhí he ko ʻeku faʻeé ʻa e faiako seminelí pea naʻá ku maʻu ha ongo he ʻikai ke u lava ʻo fakahaaʻi moʻoni ʻeku ngaahi fakakaukaú.” Ka naʻá ne ikunaʻi ʻene manavasiʻí mo fakatokangaʻi ko e seminelí ko ha feituʻu ʻoku malu mo ha feituʻu ke fakahaaʻi ai ʻene ngaahi fehuʻí, fakakaukaú, mo ʻene ngaahi ongo fekauʻaki mo e ongoongoleleí.

ʻOku ʻi ai hano ʻaonga moʻoni ʻo e folofolá ʻi he moʻui ʻa e kau finemuí ni, pea kuo nau lava ʻo fakaʻaongaʻi ʻa e folofolá ʻi ha ngaahi founga kehekehe.

Hangē ko ʻení, kuo tokoni ʻa e ako folofolá kiate kinautolu ʻi hono tali ha ngaahi fehuʻi ʻa ha niʻihi kehe pea pehē ki he ngaahi fehuʻi fakatāutahá. ʻOku pehē ʻe ʻElisapetí, “Kapau ʻe mahino kiate koe ʻa e folofolá mo e ngaahi tefitoʻi moʻoni ʻi aí, pea ka fai atu ʻe ha taha kiate koe ha fehuʻi fekauʻaki mo e folofolá, te ke lava moʻoni ʻo fakamatalaʻi lelei ange koeʻuhí he ʻoku mahino kiate koe. ʻE faingofua ange ia.”

ʻIkai ngata aí, kuo maʻu ʻe Tenisi ha ivi mo ha fakalotolahi ʻi he folofolá. ʻOkú ne pehē, “Kapau te ke lau pē ʻa e faʻahinga ʻahiʻahi naʻe maʻu ʻe he kakaí ʻi he taimi ko iá pea mo e founga ne nau lava ai ʻo ikunaʻi kinautolú, ʻe fakamālohia koe ʻe he meʻa ko iá he ʻahó ni. Pea ko e taimi te ke lau ai ʻi he folofolá fekauʻaki mo e ngaahi tāpuaki kotoa ko ia ʻo e ongoongoleleí, te ke toki ʻilo ʻa e meʻa te ke maʻu tuʻunga ʻi he faitotonú, pea ʻoku toe lelei foki mo ia ke ʻiloʻi.”

Koeʻuhí ko hono ʻaonga ʻo e folofolá ʻi heʻenau moʻuí, kuo fakatokangaʻi ʻe he kau finemuí ni ʻoku nau ʻi he hala ʻoku fakatau atu ki ha mahino mo ha fakamoʻoni maʻongoʻonga ange. Pea ʻoku nau ongoʻi ʻoku haʻi fakataha kinautolu ʻo uouangataha mo e Kāingalotu ʻi he potu kotoa pē tuʻunga ʻi he folofola ʻa e ʻOtuá.