Napanalanginan tungod sa Akong Calling

Ang Ginoo mitawag kanimo sa pag-alagad isip presidente sa Primary,” miingon ang presidente sa branch kanako. Usa lamang ka tuig ang milabay sukad nahuman nako ang klase sa Laurel ug duha lamang ka tuig sukad ako nabunyagan sa Simbahan. Dili ako makatuo.

“Wala akoy pasensya nga gikinahanglan sa pagtudlo sa mga bata,” miingon ako kaniya.

“Nagtuo ka ba nga ang imong calling gikan sa Dios?” siya nangutana. “Kon Siya motawag kanato, Siya mopasarang kanato.”¹

Ang iyang mga pulong mipuno kanako uban sa pagsalig, ug diha-diha dayon nasayud ako nga ang Ginoo nagkinahanglan nako sa Primary. Wala akoy ideya kon unsaon sa pagbuhat sa akong bag-ong calling, apan nasayud ako nga Siya mogiya kanako.

Nagtinguha ako sa pagbuhat sa labing maayo kutob sa akong mahimo, apan pipila ka bulan ang milabay ang akong inahan nahiling nga may kanser. Dugang niana, nag-eskwela ako og systems engineering. Naglisud gyud ko sa pagtuman sa tanan nakong mga responsibilidad sa eskwelahan, sa unibersidad, ug sa Primary. Ang akong kadasig misugod sa pagkahinay, ug usa ka Dominggo sa Simbahan ang tanang butang nahunong, ug ang mga luha misugod sa pagtulo.

Usa ka miyembro nga kauban sa ward nakabantay ug mihatag kanako og talagsaong tambag: “Judith, ang labing maayo sa pagbuntog sa mga pagsulay mao ang pagtutok sa imong kaugalingon sa ebanghelyo ug sa pagserbisyo sa uban,” miingon siya. “Sa pagbuhat sa ingon, imong makita unsaon sa Ginoo pagpagaan sa imong mga palas-anon.

Samtang misunod ko sa iyang madasigong tambag, ang akong kinaiya nausab, ang akong hugot nga pagtuo nalig-on, ug ako napuno og determinasyon sa pagserbisyo sa Ginoo. Ang akong mga pagsulay nagpadayon, apan akong gihalad ang akong kaugalingon sa akong calling ug naghinam-hinam nga makita ang mga bata matag Dominggo. Sila nagtudlo kanako og usa ka butang matag semana samtang sila nagpakita ngari kanako sa ilang mga pagpamatuod pinaagi sa ilang mga buhat. Sa paglabay sa mga bulan, akong nakita giunsa sa Ginoo paghulma ang akong kinaiya ug sa unsang paagi nga ako naglambo og mga gasa ug mga talento nga wala nako masayri nga ako diay aduna.

Pagkasunod tuig ako mibiya sa Barranguilla, Colombia, sa pag-adto sa Bogotá sulod sa usa ka bulan uban sa akong mama tungod kay siya nagkinahanglan og chemotherapy. Nianang panahona ako kanunay nga nag-ampo ug mibati nga duol sa Ginoo. Mihukom ako sa pag-usab sa akong major sa unibersidad, ug pinaagi sa pagdasig, nahibaloan nako nga ang Ginoo gusto nga akong ipahinungod ang akong kaugalingon sa pagtudlo sa mga bata. Sa dihang ako mibalik sa eskwelahan, misugod ako sa pag-eskwela og kurso sa special education.

Nasayud ako nga ang Langitnong Amahan mihatag kanako sa akong calling sa Primary sa pag-andam kanako. Samtang ako miserbisyo, nadiskobrehan nako ang akong tinuod nga bokasyon, ug samtang ako nagpuyo sa ebanghelyo ug nagtutok sa akong kaugalingon sa pagserbisyo, mibati ako nga anaa ako sa bukton sa Ginoo.

Ang pagpamatuod nga akong naangkon samtang nagserbisyo sa kapangulohan sa Primary ug sa wala madugay sa kapangulohan sa Primary sa stake nakapalahutay kanako isip miyembro sa Simbahan. Nakakat-on ako kon unsaon pagtudlo uban sa gugma, sa pagpuyo sa kalibutan sama sa usa ka bata, ug sa pagtinguha sa giya ug inspirasyon sa Ginoo.

Matag adlaw kon ako motudlo sa bilingual school sa akong siyudad, maghunahuna ako kabahin sa mga paningkamot, mga hagit, ug mga panalangin niadtong mga katuigan. Ang mga bata kaniadto sa Primary karon mga batan-on na, apan ang ilang mga mata nagsanag gihapon uban sa gugma alang sa Manluluwas ug sa Iyang ebanghelyo.

Nasayud ako nga kon ang Ginoo motawag kanato, Siya motudlo ug mobansay kanato ug mobutang og mga lider sa atong dalan nga motabang kanato sa pagpuyo niining nindot nga ebanghelyo ni Jesukristo.