Mga Kapangulohan sa Sunday School Nagkat-on og Importante nga Tulumanon

Ni Lauren Allen

Mga Magasin sa Simbahan

Matag Dominggo sa Highland Utah 30th Ward, si Richard Christiansen ug ang iyang mga counselor sa kapangulohan sa Sunday School magbanus-banos sa usa ka buluhaton nga pamilyar na sa hapit matag yunit sa Simbahan. Sigurohon nila nga ang matag klase adunay magtutudlo ug nagtabang sa mga estudyante sa pagpasulod gikan sa mga pasilyo ngadto sa ilang mga klasehanan.

Hinoon, si Brother Christiansen adunay tin-aw nga panabut nga ang iyang mga responsibilidad dili limitado sa pag-atiman sa mga estudyante ug sa pagbagting sa mga bell.

Usa sa nag-una nga mga tulumanon sa matag korum ug sa auxiliary nga organisasyon mao ang pagtudlo sa mga miyembro sa mga baruganan sa ebanghelyo nga mahinungdanon alang sa ilang kaluwasan. Ang tulumanon sa kapangulohan sa Sunday School, sama ni Brother Christiansen ug sa iyang mga counselor, mao ang pag-abag sa mga lider sa auxiliary ug sa priesthood niini nga buluhaton pinaagi sa paglihok isip training specialists nga magtutudlo diha sa ward.

“Ang pagtudlo mao ang unang pamaagi nga anaa sa Simbahan aron sa paglig-on sa mga miyembro, sa pagtabang kanila nga mas mohugot ang ilang pagsaksi sa Pagpahiuli, ug sa pag-angkon og kaluwasan ug kahimayaan,” miingon si Russell T. Osguthorpe, kinatibuk-ang presidente sa Sunday School.

Isip presidente sa Sunday School sa ward, si Brother Christiansen adunay responsibilidad sa pag-alagad isip usa ka kapanguhaan alang sa mga ginikanan, mga lider, ug sa mga magtutudlo sa pagtabang nga molambo ang panudlo nga manghitabo sa panimalay ug sa Simbahan.

“Ang pagtudlo mao ang usa ka butang nga mahinungdanon, ug ang pagkahimong epektibo nga magtutudlo makatabang sa uban nga mahinamong mokat-on,” miingon si Brother Christiansen.

Usa sa mga himan nga magamit sa mga kapangulohan sa Sunday School mao ang kurso sa pagpalambo sa magtutudlo [teacher improvement course] nga mahimong himoon panahon sa Sunday School. Ang kurso naglangkob og 12 ka leksyon nga anaa sa manwal nga Pagtudlo, Walay Labaw ka Mahinungdanon nga Tawag ug mahimong itudlo sa usa ka sakop sa kapangulohan sa Sunday School ubos sa pagdumala sa bishop.

“Kini usa ka kurso nga makatabang kaayo kang bisan kinsa nga miyembro sa Simbahan kinsa interesado nga mapalambo ang iyang mga kahanas sa pagtudlo,” miingon si Brother Osguthorpe, diha man sa panimalay o sa klasehanan. “Ang mga leksyon nakatabang sa mga partisipante nga makakat-on unsaon sa pagtudlo pinaagi sa Espiritu, unsaon sa pagdapit og aktibo, makugihon nga pagkat-on, ug unsaon sa pagtudlo aron ang mga miyembro magmadasigon sa paggamit sa mga baruganan sa ebanghelyosa kaugalingon nilang mga kinabuhi.”

Sumala ni Brother Osguthorpe, ang mga presidente sa Sunday School kanunay nga motambong sa ward council, sigon sa gilatid sa Handbook sa mga Panudlo sa Simbahan, Basahon 2, aron ilang masabtan ang mga tumong sa bishop alang sa mga miyembro sa ward ug magkatinambagay kon unsaon sa pagtabang nga molambo ang pagtudlo aron kadto nga mga tumong makab-ot.

Panahon sa ward o branch council ang presidente sa Sunday School mahimong dapiton sa bishop o branch president sa paghatag og mga panudlo sa mga baruganan nga may kalabutan sa pagtudlo sa ebanghelyo ug sa pagkat-on. Si Brother Osguthorpe nagsugyot nga siya usab mahimong moreport sa attendance sa mga klase sa youth ug sa adult Sunday School ug mangayo og tabang gikan sa laing mga lider sa ward sa pag-abag niadtong kinsa mahimong nanlimbasog pa.

“Ang pinakaepektibo nga pagpanudlo sa Simbahan mahitabo sa mga panimalay diin ang matinud-anong mga ginikanan nagsunod sa mga baruganan sa ebanghelyo ug nagtudlo niadto nga mga baruganan ngadto sa ilang mga anak. Ang mga auxiliary anaa sa pagsuporta sa panimalay niining pinakasagrado nga mga katungdanan. Ang kapangulohan sa Sunday School usa ka kapanguhaan diha sa ward sa pagtabang sa mga ginikanan ug sa mga magtutudlo nga makatuman sa ilang mga responsibilidad,” miingon si Brother Osguthorpe.

Ang malampuson nga pagtudlo sa ebanghelyo sa bahin sa mga ginikanan ug sa mga lider sa Simbahan makalig-on sa mga pagpamatuod sa mga miyembro ug makatabang kanila sa pagduol ngadto ni Kristo, siya miingon.

“Ang bugtong makatarunganong paagi sa pagsukod sa kaepektibo sa pagtudlo sa ebanghelyo [diha sa ward] mao ang pagpaniid sa pagkamatinud-anon sa mga miyembro. Kon mas daghan ang batan-ong mga lalaki nga nag-alagad og misyon, kon mas daghang kabatan-onan [ang nagtubo ug] nagpakasal sulod sa templo, kon mas daghang mga ginikanan ang nagbasa sa mga kasulatan, naghimo og family home evening, ug kanunay nga nagsimba sulod sa templo, ang pagtudlo naglambo.”

Mga Kausaban sa Pagpalambo sa Magtutudlo Gipasabut

Sa usa ka sulat nga gipetsahan og Nobyembre 17, 2006, ang Unang Kapangulohan mipahibalo sa mga kausaban kon unsaon sa pagdumala ang pagpalambo sa magtutudlo. Pipila ka mga kalibug ang nagpadayon. Ang mga mosunod nagpaila kon unsa nga palisiya ang wala na ipadayon ug unsa ang gipadayon.

Wala na Ipadayon:	Gipadayon:
Ang posisyon sa stake teacher improvement coordinator ug sa ward teacher improvement coordinator wala na ipadayon.	Ang mga responsibilidad sa teacher improvement coordinator karon anaa na sa ward o branch Sunday School president.
Ang matag tulo ka bulan nga mga miting sa pagpalambo sa magtutudlo wala na ipadayon.	Ang kurso sa pagpalambo sa magtutudlo nga anaa sa Pagtudlo, Walay Labaw ka Mahinungdanon nga Tawag mahimo gihapong itudlo kon gikinahanglan.

Mga Kapanguhaan sa Pagpalambo sa Pagtudlo

Pinaagi sa paggamit sa mga kasulatan, sa manwal nga Pagtudlo, Walay Labaw ka Mahinungdanon nga Tawag, (aytem nu. 36123) ug sa “Pagtudlo sa Ebanghelyo ug Pagkapangulo” nga seksyon sa Handbook sa mga Panudlo sa Simbahan, Basahon 2, ang mga miyembro mahimong mopalambo sa ilang pagtudlo ug motuman sa tawag ni Presidente Gordon B. Hinckley (1910–2008) sa pagtudlo sa ebanghelyo ni Jesukristo “nga mas maayo kay sa atong nahimo kaniadto” (“We Have a Work to Do,” Ensign, Mayo 1995, 88).

“Kinahanglan natong lig-unon ang atong kaugalingon ug ang atong mga katawhan aron atong mapasulti ang atong mga magtutudlo nga maggikan sa ilang mga kasingkasing kay sa gikan sa ilang mga libro, sa pagpahayag sa ilang gugma alang sa Ginoo ug sa ilang bililhon nga buhat, ug tungod niana kini mohatag og kainit sa mga kasingkasing sa ilang mga gitudloan,” miingon si Presidente Hinckley (Teachings of Gordon B. Hinckley [1977], 619–20).

Ang katuyoan sa kurso sa Pagtudlo sa Ebanghelyo nga anaa sa Pagtudlo, Walay Labaw Ka Mahinungdanon nga Tawag mao ang pagtabang sa mga miyembro nga mopalambo sa ilang mga kahanas sa pagtudlo ug mahibalo sa importansya sa pagpalambo sa pagtudlo sa ebanghelyo. Ang kurso naglangkob sa mga hilisgutan sama sa pagtudlo pinaagi sa Espiritu, pagdapit og makugihon nga pagkat-on, ug sa paggamit og epektibong mga pamaagi sa pagtudlo.

Ang manwal nga Pagtudlo, Walay Labaw Ka Mahinungdanon nga Tawag anaa na sa kapin sa 30 ka mga pinulongan. Kontaka ang lokal nga mga sentro sa pag-apud-apod aron anaay magamit.