Matinud-anong mga Higala

Usa sa mahinungdanong pasidungog nga ikahatag sa Manluluwas mao ang pagtawag kanato og “mga higala.” Kita nasayud nga Siya nahigugma uban sa hingpit nga gugma sa tanang mga anak sa Iyang Langitnong Amahan. Apan niadtong kinsa nagmatinud-anon sa ilang pagserbisyo uban Kaniya, siya nagreserba niining talagsaong titulo. Kamo nahinumdom sa mga pulong gikan sa ika-84 nga seksyon sa Doktrina ug mga Pakigsaad: “Ug usab Ako moingon nganha kaninyo, akong mga higala, kay gikan karon Ako motawag kaninyo nga mga higala, kini angay nga Ako mohatag nganha kaninyo niini nga sugo, nga kamo mahimo gani ingon nga akong mga higala sa mga adlaw sa diha nga Ako uban kanila, nagpanaw sa pagsangyaw sa ebanghelyo diha sa akong gahum.” (D&P 84:77).

Kita mahimo Niyang mga higala samtang kita nagserbisyo sa uban alang Kaniya. Siya mao ang hingpit nga ehemplo sa matang sa higala nga kita mahimo. Siya buot lang unsa ang labing maayo alang sa mga anak sa Iyang Langitnong Amahan. Ang ilang kalipay mao ang Iyang kalipay. Siya mobati sa ilang kasubo sama sa Iyang Kaugalingon tungod kay Siya mibayad sa tanan nilang mga sala, midala sa Iyang Kaugalingon sa tanan nilang mga kahuyang, miantus sa tanan nilang mga kasamok, ug mibati sa tanan nilang mga pangandoy. Putli ang Iyang mga motibo. Siya wala nagtinguha og pasidungog alang sa Iyang Kaugalingon apan sa paghatag sa tanang himaya ngadto sa Iyang Langitnong Amahan. Ang hingpit nga higala, si Jesukristo, hingpit nga wala naghunahuna sa kaugalingon sa paghalad og kalipay ngadto sa uban.

Matag usa kanato kinsa naghimo og pakigsaad sa bunyag nagsaad sa pagsunod sa Iyang hingpit nga ehemplo sa pagtambayayong sa usag usa nga mga alantuson sama sa Iyang buhaton (tan-awa sa Mosiah 18:8).

Sa sunod nga pipila ka adlaw kamo adunay daghang mga oportunidad nga mahimong higala alang Kaniya. Kini mahimo samtang kamo maglakaw sa abugon nga dalan. Kini mahimo samtang kamo maglingkod sa usa ka tren. Kini mahimo samtang kamo mangita og usa ka kalingkuran sa kongregasyon sa Simbahan. Kon kamo nagtan-aw, kamo makakita og usa ka tawo nga nagpas-an og bug-at nga palas-anon. Kini mahimong palas-anon sa kaguol o kamingaw o kasuko. Kini mahimong makita ninyo kon kamo mag-ampo lamang alang sa Espiritu sa paghatag kaninyo og mga mata nga makakita ngadto sa mga kasingkasing ug magsaad sa pagpataas sa mga kamot nga nawad-an og paglaum.

Ang tubag sa inyong pag-ampo mahimong mao ang nawong sa usa ka karaang higala, nga wala na nimo igkita sulod sa daghang mga tuig apan kansang panginahanglan kalit lang mosulod sa inyong hunahuna ug kasingkasing ug mobati nga daw kini imoha. Kana nahitabo kanako. Karaang mga higala mikontak kanako gikan sa lagyo nga mga dapit ug sa katuigan aron sa paghatag og pagdasig nga bugtong ang Dios lamang ang makasulti kanila sa akong palas-anon.

Ang buhi nga mga propeta sa Dios nanghangyo kanato nga mahimong matinud-anong mga higala niadtong nagpamiyembro sa Simbahan isip mga kinabig ug sa pagluwas niadtong nahilayo. Mahimo kini nato, ug atong kining himoon kon kanunay natong hinumduman ang Manluluwas. Kon kita moduol aron sa paghatag og tabang ug sa pagpagaan og usa ka palas-anon, Siya mopaduol kanato. Siya mogiya kanato niadtong nanginahanglan. Siya mopanalangin kanato sa pagbati unsa ang ilang gibati. Samtang kita magpadayon sa atong mga paningkamot sa pagserbisyo kanila, kita anam-anam nga mahatagan sa gasa sa pagbati sa Iyang gugma alang kanila. Kana mohatag kanato og kaisug ug kalig-on sa pagbalik-balik sa pagduol diha sa pagkamatinud-anon.

Ug, sa panahon karon ug sa kahangturan, kita mobati sa hingpit nga kalipay nga giabi-abi ngadto sa grupo sa Iyang matinud-anong mga higala. Nag-ampo ako alang niana nga panalangin alang kanatong tanan ug niadtong atong serbisyohan.